Read Kodava ರೋಮ್ 9 Bible Online

ರೋಮ್ 9 - Kodava bible

ರೋಮ್ 9

¹ನಾನ್ ಕ್ರಿಸ್ತಂಡಲ್ಲಿ ಸತ್ಯ ಎಣ್ಣಿಯಂಡುಂಡ್. ನಾನ್ ಪೊಟ್ಟ್‌ಪರ್ಂದಂಡಿಲ್ಲೆ.

²ನಾಡ ಹೃದಯತ್‍ಲ್, ನಾನ್ ಬಲ್ಯ ಬೇಜಾರತ್‍ಲ್ ಪಿಂಞ ಎಡಬುಡತೆ ಕಷ್ಟಪಟ್ಟಂಡುಳ್ಳ್‌ಂದ್ ನಾಡ ಮನಸಾಕ್ಷಿಯು ಪವಿತ್ರಾತ್ಮಂಡಲ್ಲಿ ಸಾಕ್ಷಿಯಾಯಿತ್ ಉಂಡ್.

³ತಡೀರ ಪ್ರಕಾರ ನಾಡ ಜನವಾಯಿತ್ ಉಳ್ಳ ನಾಡ ಅಣ್ಣತಮ್ಮಣಂಗಕ್ ಬದ್‍ಲ್, ನಾನೇ ಕ್ರಿಸ್ತನ ಬುಟ್ಟಿತ್ ಶಾಪ ಕ್‍ಟ್ಟ್‌ನಂವೊನಾಯಿತ್ ಇಪ್ಪಕ್ ನಾನ್ ಆಸೆ ಪಡುವಿ.

⁴ಅಯಿಂಗ ಇಸ್ರಾಯೇಲ್ ಜನ; ಮಕ್ಕಕುಳ್ಳ ಹಕ್ಕ್ ಅಯಿಂಗಡದೇ, ದೇವಡ ಮಹಿಮೇನೆ ಅಯಿಂಗಕೇ ಕಾಂಬ್‍ಚಿಟ್ಟತ್; ಅಯಿಂಗಕೇ ಒಪ್ಪಂದ ಮಾಡ್‍ಚಿ, ಅಯಿಂಗಕೇ ನ್ಯಾಯಪ್ರಮಾಣತ್‍ನ ಕೊಡ್‍ತತ್; ಅಯಿಂಗಕೇ ಆರಾದನೆ ಮಾಡ್‌ವ ಬಾಗ್ಯತ್‍ನ ಕೊಡ್‍ತತ್ ಪಿಂಞ ಅಯಿಂಗಕೇ ದೇವಡ ವಾಗ್ದಾನವು ಕ್‍ಟ್ಟ್‌ಚಿ.

⁵ಮುತ್ತಜ್ಜಂಗ ಅಯಿಂಗಕುಳ್ಳಯಿಂಗಳೇ, ತಡೀರ ಪ್ರಕಾರ ಕ್ರಿಸ್ತ ಸಹ ಅಯಿಂಗಡಲ್ಲಿ ಪುಟ್ಟ್‌ಚಿ, ಇಂವೊ ಕಾಲಕಾಲಕು, ಎಲ್ಲಾಂಗು ಕೊಡಿಲ್ ದೇವನಾಯಿತ್ ಕೊಂಡಾಡುವಕ್ ಉಳ್ಳಂವೊನಾಯಿತುಂಡ್, ಆಮೆನ್.

⁶ದೇವಡ ವಾಕ್ಯ ನೆರೆವೇ‍ರತೆ ಪೋಚೀಂದ್ ಎಣ್ಣುವಕ್ಕಾಗ, ಇಸ್ರಾಯೇಲ್ ವಂಶತ್‌ಲ್ ಪುಟ್ಟ್‌ನಯಿಂಗ ಎಲ್ಲಾರು, ನೇರಾನ ಇಸ್ರಾಯೇಲ್ ಜನ ಅಲ್ಲ.

⁷ಅಯಿಂಗ ಅಬ್ರಹಾಮಂಡ ಸಂತಾನಕಾರಂಗಳಾಯಿತ್ ಇಂಜತೇಂಗಿಯು, ಅಯಿಂಗ ಎಲ್ಲಾರು ಅಂವೊಂಡ ಮಕ್ಕ ಅಲ್ಲ; ಅಂವೊಂಡ ಮೋಂವೊನಾನ ಇಸಾಕಂಡಲ್ಲಿ, ಇಂವೊಂಡ ಮೂಲಕವೇ ನೀಡ ಸಂತಾನ ಆಪಾಂದ್ ಅಬ್ರಹಾಮಂಗ್ ಎಣ್ಣಿತುಂಡಲ್ಲ?[17]

⁸ಎನ್ನನೆ ಎಣ್ಣ್‌ಚೇಂಗಿ, ತಡೀರ ಪ್ರಕಾರ ಮಕ್ಕ ಆನಯಿಂಗ ಎಲ್ಲಾರು ದೇವಡ ಮಕ್ಕ ಅಲ್ಲ, ವಾಗ್ದಾನತ್‍ರ ಪ್ರಕಾರ ಮಕ್ಕ ಆನಯಿಂಗಳೇ ಅಂವೊಂಡ ಸಂತಾನಕಾರಂಗಳಾಯಿತ್‌ಪ್ಪ.

⁹ಸರಿಯಾನ ಸಮಯತ್‍ಲ್ ನಾನ್ ಬಪ್ಪಿ, ಅಕ್ಕ ಸಾರಾಳ ಒರ್ ಮೋಂವೊನ ಪೆರುವಾಂದ್ ಎಣ್ಣ್‌ನದೇ ಆ ವಾಗ್ದಾನ.[18]

¹⁰ಇದ್ ಮಾತ್ರವಲ್ಲತೆ, ರೆಬೆಕ್ಕ ಅವಡ ವಡಿಯನಾನ ನಂಗಡ ಮುತ್ತಜ್ಜನಾನ ಇಸಾಕನಗುಂಡ್ ಕೆಲಕರ್ತಿ ಆಚಿ.

¹¹ಆಚೇಂಗಿ, ಅವಕ್ ಮಕ್ಕ ಪುಟ್ಟ್‌ವಕ್ ಮಿಂಞಲೇ, ಅಯಿಂಗ ನಲ್ಲದ್ ಕೆಟ್ಟದ್ ಏದು ಮಾಡ್‌ವಕ್ ಮಿಂಞಲೇ,

¹²ದೇವ ಆಯ್ಕೆ ಮಾಡ್‌ವ ಅಂವೊಂಡ ತೀರ್ಮಾನ, ಕ್ರಿಯೇನಗುಂಡು ಅಲ್ಲ, ಕಾಕ್‌ನಂವೊನಗುಂಡ್‍ೕಂದ್ ಉಳ್ಳದ್‍ನ ಸ್ತಿರಪಡ್‌ತ್‍ವಕಾಯಿತ್, ಬಲ್ಯಂವೊ ಎಳಿಯವೊಂಗ್ ಸೇವೆ ಮಾಡ್‌ವಾಂದ್ ಅವಕ್ ಎಣ್ಣಿತ್ಂಜತ್[19].

¹³ಅನ್ನನೆ ದೇವ ಯಾಕೋಬನ ಪ್ರೀತಿ ಮಾಡಿತ್, ಏಸಾನ ದ್ವೇಶ ಮಾಡ್‍ಚೀಂದ್ ಒಳ್‍ದಿ ಬೆಚ್ಚಿತುಂಡ್.[20]

¹⁴ಅಕ್ಕ, ನಂಗಕ್ ಎಂತ ಎಣ್ಣುವಕ್ ಕಯ್ಯು? ದೇವಡ ಪಕ್ಕ ಅನೀತಿ ಉಂಡ್‍ೕಂದ್ ಎಣ್ಣ್‌ವದಾ? ಅನ್ನನೆ ಇಲ್ಲವೇ ಇಲ್ಲೆ.

¹⁵ದೇವ ಮೋಶೇನ ನೋಟಿತ್: ನಾಕ್ ದಾಡ ಮೇಲೆ ಕನಿಕರ ಕಾಟ್‍ವಕ್ ಕುಶಿಯುಂಡೋ, ಅಂವೊಂಡ ಮೇಲೆ ಕನಿಕರ ಕಾಟ್‌ವಿ, ದಾಡ ಮೇಲೆ ಕನಿಕರ ಕಾಟ್‍ವಕ್ ಕುಶಿಯುಂಡೋ, ಅಂವೊಂಡ ಮೇಲೆ ಕನಿಕರ ಕಾಟ್‍ವೀಂದ್ ಎಣ್ಣ್‌ಚಿ[21].

¹⁶ಆನಗುಂಡ್, ಒರ್ ಮನುಷ್ಯ ಆಸೆ ಪಡುವಗುಂಡೋ ಅಥವ ಪ್ರಯತ್ನ ಮಾಡ್‍ವಗುಂಡೊ ಅದ್ ಆಪುಲೆ, ಆಚೇಂಗಿ, ಕನಿಕರ ಕಾಟುವ ದೇವಡಗುಂಡ್ ಮಾತ್ರ ಆಪ.

¹⁷ಅದಲ್ಲತೆ, ನಾಡ ಶಕ್ತಿನ ನೀಡಲ್ಲಿ ಕಾಂಬಿಚಿಡುವಕ್ ಪಿಂಞ ನಾಡ ಪೆದ ಇಡೀ ಲೋಕತ್‍ಲ್ ಪಬ್ಬ್‌ಚಿಡ್‌ವಕಾಯಿತ್ ನಿನ್ನ ನಾನ್ ರಾಜನಾಯಿತ್ ನೇಮಿಚಿಟ್ಟಿಯೇಂದ್[22] ದೇವ ಐಗುಪ್ತಂಡ ರಾಜನಾನ ಫರೋಹನಂಡ ಪಕ್ಕ ಎಣ್ಣ್‌ನದಾಯಿತ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್.

¹⁸ಆನಗುಂಡ್, ದಾಡ ಮೇಲೆ ಕನಿಕರ ಕಾಟ್‍ವಕ್ ಅಂವೊಂಗ್ ಕುಶಿಯುಂಡೋ, ಅಂವೊಂಡ ಮೇಲೆ ಕನಿಕರ ಕಾಂಬ್‌ಚಿಡ್‌ವ. ದಾಡ ಹೃದಯತ್‍ನ ಗಟ್ಟಿಮಾಡ್‌ವಕ್ ಚಿತ್ತ ಉಂಡೋ ಅಂವೊಂಡ ಮನಸ್ಸ್‌ನ ಗಟ್ಟಿಮಾಡ್‌ವ.

¹⁹ಇನ್ನನೆ ಆಚೇಂಗಿ, ದೇವ ಎನ್ನಂಗಾಯಿತ್ ಒಬ್ಬ ಮಾಡ್‌ವ ಪಾಪತ್‍ರಗುಂಡ್ ಅಂವೊಂಡ ಮೇಲೆ ಕುತ್ತ ಪರಿಯುವ? ಅಂವೊಂಡ ಚಿತ್ತಕ್ ವಿರೋದವಾಯಿತ್ ದಾರ್‌ಕ್ ನಿಪ್ಪಕ್ ಕಯ್ಯೂಂದ್ ನಿಂಗ ನಾಡ ಪಕ್ಕ ಕ್‍ೕಪಿರ.

²⁰ಅನ್ನನೆ ಆಚೇಂಗಿ ಮನುಷ್ಯ! ದೇವಕ್ ವಿರೋದವಾಯಿತ್ ತಕ್ಕ್ ಪರಿಯುವಕ್ ನೀನ್ ದಾರ್? ಒರ್ ವಸ್ತು, ಅದ್‍ನ ಮಾಡ್‌ನಂವೊನ ನೋಟಿತ್, ನೀನ್ ಎನ್ನಂಗ್ ನನ್ನ ಇನ್ನನೆ ಮಾಡಿಯಾಂದ್ ಕ್‍ೕಪದ್ ಸರಿಯಾ?[23]

²¹ಒರ್ ಕುಂಬಾರಂಗ್, ಒರೇ ಕೊಜೆ ಮಣ್ಣ್‌ಲ್, ಒರ್ ಪಾತ್ರತ್‍ನ ಗನಪಟ್ಟ ಉಪಯೋಗಕಾಯಿತು, ಇಂಞೊರ್ ಪಾತ್ರತ್‍ನ ಸಾದಾರಣ ಉಪಯೋಗಕಾಯಿತು ಮಾಡ್‌ವಕ್, ಆ ಕುಂಬಾರಂಗ್ ಮಣ್ಣ್‌ರ ಮೇಲೆ ಅದಿಕಾರ ಇಲ್ಲೆಯಾ?

²²ಆಚೇಂಗಿ, ದೇವ ಅಂವೊಂಡ ಚೆಡಿನ ಕಾಂಬಿಚಿಡುವಕ್, ತಾಂಡ ಶಕ್ತಿನ ಕಾಟ್‌ವಕಾಯಿತ್ ಯೆಹೂದ್ಯಂಗಡಲ್ಲಿ ಮಾತ್ರ ಅಲ್ಲತೆ, ಯೆಹೂದ್ಯ ಅಲ್ಲತಯಿಂಗಡ ಮದ್ಯತ್ಂಜ ಸಹ ನಂಗಳ ಕಾಕ್‍ಚಿ.

²³ತಾಂಡ ಮಹಿಮೆಕಾಯಿತ್ ತಯಾರ್ ಮಾಡ್‍ನ ಕನಿಕರತ್‍ರ ಪಾತ್ರವಾಯಿತುಳ್ಳ ನಂಗಡ ಮೇಲೆ ತಾಂಡ ಮಹಿಮೇರ ಐಶ್ವರ್ಯತ್‍ನ ಕಾಂಬ್‍ಚಿಡುವಕ್ ಕುಶಿಯುಳ್ಳಂವೊನಾಯಿತು,

²⁴ದೇವಡ ಬಲ್ಯ ಚೆಡಿಕ್ ಯೋಗ್ಯವಾನ ಪಾತ್ರತ್‍ರಮೇಲೆ, ದುಂಬ ತಾಳ್ಮೆಲ್ ಸಹಿಸಿಯಂಡ್ ಇಂಜತೇಂಗಿ ನೀಕ್ ಎಂತ?

²⁵ಇದ್‍ಲ್ಲತೆ, ನಾಡ ಜನ ಅಲ್ಲತಯಿಂಗಳ, ನಾಡ ಜನಾಂಗಾಂದು, ಪ್ರೀತಿಚಿಡತವಳ ಪ್ರೀತಿಚಿಟ್ಟಂವಾಂದ್ ನಾನ್ ಕಾಕುವಿ,

²⁶ನಿಂಗ ನಾಡ ಜನ ಅಲ್ಲಾಂದ್ ಒಳ್‍ದಿತುಳ್ಳ ಜಾಗತ್‍ಲ್, ಅಯಿಂಗ ಜೀವವುಳ್ಳ ದೇವಡ ಮಕ್ಕಳಾಯಿತುಂಡ್‍ೕಂದ್ ಹೋಶೇಯ ಪ್ರವಾದಿರ ಮೂಲಕ ಎಣ್ಣಿತುಂಡ್[24].

²⁷ಅನ್ನನೆ ಇಸ್ರಾಯೇಲ್ ಜನತ್‍ರ ವಿಷಯತ್‍ನ: ಇಸ್ರಾಯೇಲ್ ಮಕ್ಕಡ ಲೆಕ್ಕ ಸಮುದ್ರತ್‍ರ ಮಣತ್‍ರಚ್ಚಕ್ ಇಂಜತೇಂಗಿಯು, ಚೆನ್ನ ಜನ ಮಾತ್ರ ಬಚಾವಾಪಾಂದು,

²⁸ಅಂವೊ ನೀತಿಲ್ ಎಲ್ಲಾನ ನೆರೆವೇರಿಚಿಡುವಾಂದು, ಲೋಕತ್‍ಲ್ ಎಲ್ಲಾನ ಬೆರಿಯ ಆಕೀರ್‌ಕ್ ಕೊಂಡ್ ಬಪ್ಪಾಂದು ಯೆಶಾಯ ಪ್ರವಾದಿ ಮೊರಟಂಡ್ ಎಣ್ಣ್‌ಚಿ[25].

²⁹ಇಂಞು ಮಿಂಞಕ್ ಯೆಶಾಯ: ಸೇನೆರ ಒಡೆಯ ನಂಗಡ ಮದ್ಯತ್‍ಲ್ ಒರ್ ಬಾಗತ್‍ನ ಕಾಪಾಡತೆ ಪೋಯಿತ್ಂಜತೇಂಗಿ, ನಂಗಳು ಸೊದೋಮ್ ಪಿಂಞ ಗೊಮೋರ ಪಟ್ಟಣತ್‍ರನೆಕೆ ಪಾಳಾಯಿ ಪೋಯಿತಿಪ್ಪಾಂದ್ ಎಣ್ಣ್‌ಚಿ[26].

³⁰ಆನಗುಂಡ್ ನಂಗ ಎಂತ ಎಣ್ಣುವಕ್ ಕಯ್ಯು? ನೀತಿನ ತ್‍ೕಡತ ಯೆಹೂದ್ಯಂಗಲ್ಲತ ಜನಕ್ ನೀತಿ ಕ್‍ಟ್ಟ್‌ಚಿ, ಅದ್ ನಂಬಿಕೇರ ಮೂಲಕ, ಕ್‍ಟ್ಟುವ ನೀತಿಯೇ.

³¹ಆಚೇಂಗಿ, ನ್ಯಾಯಪ್ರಮಾಣತ್‍ರ ಮೂಲಕ ನೀತಿನ ತ್‍ೕಡ್‍ನ ಇಸ್ರಾಯೇಲ್ ಜನಕ್ ನೀತಿ ಕ್‍ಟ್ಟಿತ್ತ್‌ಲ್ಲೆ.

³²ಎನ್ನಂಗೆಣ್ಣ್‌ಚೇಂಗಿ: ಅಯಿಂಗ ನಂಬಿಕೇರ ಮೂಲಕ ಅದ್‍ನ ತ್‍ೕಡತೆ, ನ್ಯಾಯಪ್ರಮಾಣತ್‍ರ ಕ್ರಿಯೆರ ಮೂಲಕ ಅದ್‍ನ ತ್‍ೕಡ್‍ನಗುಂಡ್ ಅಯಿಂಗಕ್ ಕ್‍ಟ್ಟಿತ್‌ಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ತಡ್‍ಪ ಕಲ್ಲ್‌ರಗುಂಡ್ ಅದ್ಂಡಮೇಲೆ ಅಯಿಂಗ ಬುದ್ದತ್.

³³ಇದ್: ನೋಟಿ, ತಡ್‍ಪಕುಳ್ಳ ಕಲ್ಲ್‌ನ ಪಿಂಞ ಬೂವಕ್ ಮಾಡ್‌ವ ಬಂಡೆ ಕಲ್ಲ್‌ನ ಚೀಯೋನ್‌[27] ಪಟ್ಟಣತ್‍ಲ್ ಬೆಚ್ಚಿಯೆ; ಅಂವೊಂಡ ಮೇಲೆ ನಂಬಿಕೆ ಬೆಪ್ಪಂವೊ ದಾರಾಯಿತ್ ಇಂಜತೇಂಗಿಯು ಅಂವೊಂಗ್ ಞಾಣ ಆಪುಲೇಂದ್ ಒಳ್‍ದಿತುಳ್ಳನೆಕೆ ಇದ್ ಆಚಿ.[28]