Read Kodava 1 ಕೊರಿಂಥ 13 Bible Online

1 ಕೊರಿಂಥ 13 - Kodava bible

1 ಕೊರಿಂಥ 13

¹ನಾನ್ ಮನುಷ್ಯಂಗಡ ಬಾಷೆಲ್ ತಕ್ಕ್ ಪರ್ಂದತೇಂಗಿಯು, ದೇವದೂತಂಗಡ ಬಾಷೆಲ್ ತಕ್ಕ್ ಪರ್ಂದತೇಂಗಿಯು, ನಾಕ್ ಜನಡಮೇಲೆ ಪ್ರೀತಿ ಇಲ್ಲತೆಪೋಚೇಂಗಿ, ಆ ತಕ್ಕ್, ಕಂಚ್ ಪಾತ್ರ ಮಾಡ್‌ವ ಸದ್ದ್‌ರನೆಕೆ, ಅಥವ ಗಂಟೆ ಪೊಜ್ಜನೆಕೆ ಇಪ್ಪ.

²ನಾನ್ ಪ್ರವಾದನೆ ಮಾಡ್‌ವ ವರತ್‍ನ ಪಡ್ಂದಂವೊನಾಯಿತ್, ಎಲ್ಲಾ ಗುಟ್ಟ್‌ನ ಪಿಂಞ ಬುದ್ದಿನ ಅರ್ಥಮಾಡ್‍ಂವೊನಾಯಿತ್ ಇಂಜತೇಂಗಿಯು, ಕುಂದ್‍ನ ತಳ್ಳ್‌ವಕುಳ್ಳ ಎಲ್ಲಾ ನಂಬಿಕೆ ಉಳ್ಳಂವೊನಾಯಿತ್ ಇಂಜತೇಂಗಿಯು, ನಾಕ್ ಪ್ರೀತಿ ಇಲ್ಲತೆಪೋಚೇಂಗಿ, ನಾನ್ ಒಂದು ಇಲ್ಲೆ.

³ನಾಡ ಪಕ್ಕ ಉಳ್ಳ ಎಲ್ಲಾನ ಕೊಡ್‍ಪಕ್ ಮನಸ್ಸ್ ಇಂಜತೇಂಗಿಯು, ಅದ್ ಮಾತ್ರ ಅಲ್ಲತೆ, ನಾಡ ತಡೀನ ಚುಡ್‌ವಕ್ ಕೊಡ್‍ಪಕ್ ಮನಸ್ಸ್ ಇಂಜತೇಂಗಿಯು, ನಾಕ್ ಪ್ರೀತಿ ಇಲ್ಲತೆಪೋಚೇಂಗಿ, ನಾಕ್ ಒರ್ ಪ್ರಯೋಜನವು ಇಲ್ಲೆ.

⁴ಪ್ರೀತಿ ತಾಳ್ಮೆಯು ದಯೆಯು ಉಳ್ಳದ್; ಪ್ರೀತಿಕ್ ಒಟ್ಟೆಕಿಚ್ಚ್ ಇಲ್ಲೆ, ಪ್ರೀತಿ ಹೊಗ್‍ಳ್‍ಚಿಡುಲೆ, ಆಂಗಾರ ಪಡುಲೆ.

⁵ಪ್ರೀತಿ ಮರ್ಯಾದಿ ಇಲ್ಲತೆ ನಡ್‍ತುಲೆ. ಅದ್ ತಾಂಡ ಸ್ವಂತದ್‍ನ ಮಾತ್ರ ಗೇನ ಮಾಡುಲೆ, ಪ್ರೀತಿ ಬೆರಿಯ ಚೆಡಿ ಮಾಡುಲೆ, ಬೋರೆಯಿಂಗ ಕೆಟ್ಟದ್ ಮಾಡ್‌ನಾನ ಲೆಕ್ಕ ಬೆಚ್ಚೊಲೆ.

⁶ಅನ್ಯಾಯತ್‍ಲ್ ಕುಶಿ ಪಡುಲೆ, ಆಚೇಂಗಿ ಸತ್ಯವಾನ ಕಾರ್ಯ ಮಾಡ್‌ವಕ ಕುಶಿ ಪಡುವ.

⁷ಪ್ರೀತಿ ಎಲ್ಲಾನ ತಾಂಗುವ, ಎಲ್ಲಾ ವಿಷಯತ್‍ಲು ನಂಬಿಕೆ ಇಡ್‌ವ, ಎಲ್ಲಾ ವಿಷಯತ್ ನಿರಿಕ್ಷೇಲ್ ಇಪ್ಪ, ಎಲ್ಲಾನ ಸಹಿಸುವ.

⁸ಪ್ರೀತಿ, ಎಕ್ಕಾಲು ಬುದ್ದ್ ಪೋಪುಲೆ. ಪ್ರವಾದನೆ ಎಣ್ಣ್‌ವದ್ ಇಲ್ಲತಾಪ, ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿವದ್ ಇಲ್ಲತಾಯಿ ಪೋಪ, ಬುದ್ದಿಯು ಇಲ್ಲತಾಯಿ ಪೋಪ.

⁹ನಂಗಕುಳ್ಳ ಬುದ್ದಿ ಕಮ್ಮಿಯಾನದ್, ಪಿಂಞ ಪ್ರವಾದನೆಯು ಕಮ್ಮಿಯಾನದ್.

¹⁰ಆಚೇಂಗಿ ಪರಿಪೂರ್ಣ ಉಳ್ಳದ್ ಬಪ್ಪಕ, ಕಮ್ಮಿಯಾನದ್ ಇಲ್ಲತೆ ಆಯಿಪೋಪ.

¹¹ನಾನ್ ಕುಂಞಿಯಾಯಿತ್‌ಪ್ಪಕ, ಒರ್ ಕುಂಞಿರನೆಕೆ ತಕ್ಕ್ ಪರ್ಂದಿಯೆ, ಒರ್ ಕುಂಞಿರನೆಕೆ ಗೇನ ಮಾಡ್‍ನ ಪಿಂಞ ಒರ್ ಕುಂಞಿರನೆಕೆ ಅರ್ಥ ಮಾಡಿಯಂಡಿಯೆ, ಆಚೇಂಗಿ ನಾನ್ ಬಲ್ಯಂವೊನಾನ ಪಿಂಞ ಕುಂಞಿರ ಗುಣತ್‍ನೆಲ್ಲ ಬುಟ್ಟಿಯೆ.

¹²ಇಕ್ಕ, ನಂಗಡ ಬದ್‍ಕ್‍ನ, ಒರ್ ಕನ್ನಡಿಲ್ ಕಾಂಬನೆಕೆ ನೆಳನ ನೋಟಿಯಂಡುಂಡ್. ಅಕ್ಕ ನಂಗ ಚಾಯಿತೆ ನೇರಾನದ್‌ನ ಕಾಂಬ. ಇಕ್ಕ ನಾನ್ ನೋಟಿಯಂಡುಳ್ಳದ್ ಪರಿಪೂರ್ಣವಾನದ್ ಅಲ್ಲ, ಆಚೇಂಗಿ, ದೇವಕ್ ನನ್ನ ಪೂರ್ತಿ ಗೊತ್ತುಳ್ಳನೆಕೆ, ನಾನು ಎಲ್ಲಾನ ಚಾಯಿ ಅರ್ಥ ಮಾಡ್‌ವಕ್ ಅಕ್ಕ ಕಯ್ಯು.

¹³ಆನಗುಂಡ್, ಮೂಂದ್ ವಿಷಯ ಎಕ್ಕಾಲು ಇಪ್ಪ, ನಂಬಿಕೆ, ನಿರೀಕ್ಷೆ ಪಿಂಞ ಪ್ರೀತಿ. ಈ ಮೂಂದ್‍ಲ್ ಪ್ರೀತಿಯೇ ಬಲ್ಯದ್.