Read Kodava 1 ಕೊರಿಂಥ 15 Bible Online

1 ಕೊರಿಂಥ 15 - Kodava bible

1 ಕೊರಿಂಥ 15

¹ಅಕ್ಕ, ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಮಿಂಞಲೇ ಪ್ರಚಾರ ಮಾಡ್‍ನ ದೇವಡ ನಲ್ಲ ಸುದ್ದಿನ ಪುನಃ ನಿಂಗಡ ನೆನಪ್‌ಕ್ ಕೊಂಡ್ ಬಪ್ಪಿ. ಅಕ್ಕ ನಿಂಗಕ್ ಕ್‍ಟ್ಟ್‌ನ ಈ ಬೋದನೆಲ್ ಬೊಳ್ಂದಂಡ್, ನಂಬಿಕೇಲ್ ದೃಡವಾಯಿತುಳ್ಳಿರ.

²ಈ ಬೋದನೆರನೆಕೆ ಮಾಡ್‍ಚೇಂಗಿ ದೇವ ನಿಂಗಳ ನಿಂಗಡ ಪಾಪತ್ಂಜ ಕಾಪಾಡ್‌ವ; ಇಲ್ಲತಪೋಚೇಂಗಿ ಕ್ರಿಸ್ತಂಡ ಮೇಲೆ ನಿಂಗಕ್ ಉಳ್ಳ ನಂಬಿಕೆ ಪ್ರಯೋಜನ ಇಲ್ಲತ ಆಯಿಪೋಪ.

³ನಾಕ್ ದೇವ ಪಡಿ‍ಪ್‍ಚಿಟ್ಟ ಮುಕ್ಯವಾನ ವಿಷಯತ್‍ನ ನಾನ್ ನಿಂಗಕ್ ಒಪ್ಪ್‌ಚಿಟ್ಟಿಯೆ. ಅದ್ ಎಂತ ಎಣ್ಣ್‌ಚೇಂಗಿ, ಕ್ರಿಸ್ತ ನಂಗಡ ಪಾಪಕ್ ಪರಿಹಾರವಾಯಿತ್ ದೇವಡ ವಾಕ್ಯ ಎಣ್ಣ್‌ನನೆಕೆ ಚತ್ತತ್.

⁴ಪಿಂಞ ಅಂವೊನ ಪೂತತ್, ದೇವಡ ವಾಕ್ಯ ಮಿಂಞಲೇ ಎಣ್ಣ್‌ನನೆಕೆ ಮೂಂದನೆ ದಿವಸತ್‍ಲ್ ಅಂವೊ ಚಾವ್‍ಯಿಂಜ ಜೀವವಾಯಿತ್ ಎದ್ದತ್.

⁵ಅಂವೊ ಕೇಫಂಗ್ ಪಿಂಞ ಪನ್ನೆರಂಡ್ ಅಪೊಸ್ತಲಂಗಕ್ ಅಂವೊನ ಕಾಂಬ್‍ಚಿಟ್ಟತ್.

⁶ಅಲ್ಲಿಂಜ ಅಂಞ್ಞೂರ್ ಶಿಷ್ಯಂಗಕಿಂಜ ಜಾಸ್ತಿ ಜನಕ್ ಅಂವೊನ ಒಮ್ಮಕೆ ಕಾಂಬ್‍ಚಿಟ್ಟತ್; ಯೇಸುನ ಕಂಡ ಜನತ್‍ಲ್ ದುಂಬ ಜನ ಇಕ್ಕಲು ಬದ್‍ಕಿಯಂಡುಂಡ್, ಚೆನ್ನ ಜನ ಮಾತ್ರ ಚತ್ತ್ ಪೋಚಿ.

⁷ಅಲ್ಲಿಂಜ ಯಾಕೋಬಂಗು ಪಿಂಞ ಎಲ್ಲಾ ಅಪೊಸ್ತಲಂಗಕು ಅಂವೊನ ಕಾಂಬ್‍ಚಿಟ್ಟತ್.

⁸ಕಡೇಕ್, ಪುಟ್ಟ್‌ವಕುಳ್ಳ ಸಮಯಕ್ ಮಿಂಞಲೇ ಪುಟ್ಟ್‌ನ ನಾಕ್ ಸಹ ಕಾಂಬ್‍ಚಿಟ್ಟತ್.

⁹ನಾನ್ ಎಲ್ಲಾ ಅಪೊಸ್ತಲಂಗಕಿಂಜ ಕಮ್ಮಿಯಾನಂವೊ. ದೇವಡ ಸಬೇಕ್ ನಾನ್ ದುಂಬ ಕಷ್ಟ ಕೊಡ್‌ತಗುಂಡ್, ಅಪೊಸ್ತಲಾಂದ್ ನನ್ನ ಕಾಕ್‍ವಕ್ ನಾನ್ ಯೋಗ್ಯನಲ್ಲ.

¹⁰ಆಚೇಂಗಿ ನಾನ್ ಇಕ್ಕ ಇಪ್ಪದ್ ದೇವ ನಾಡ ಮೇಲೆ ಕಾಟ್‍ನ ಕೃಪೆ ಮಾತ್ರ. ಅಂವೊ ನಾಡ ಮೇಲೆ ಕಾಟ್‍ನ ಕನಿಕರ ಪಾಳಾಯಿ ಪೋಯಿತ್ತ್‌ಲ್ಲೆ. ಅದ್ಂಡ ಬದ್‍ಲ್ ಅಯಿಂಗ ಎಲ್ಲಾಕಿಂಜ ನಾನ್ ದುಂಬ ಕೆಲಸ ಮಾಡಿಯೆ, ಆಚೇಂಗಿಯು ನನ್ನಗುಂಡ್ ಅನ್ನನೆ ಆಪಕಿಂಜಿಲೆ. ನಾಡ ಮೇಲೆ ಉಳ್ಳ ದೇವಡ ಕೃಪೇನಗುಂಡ್ ನಾನ್ ಅನ್ನನೆ ಮಾಡ್‍ವಕಾಚಿ.

¹¹ಆನಗುಂಡ್ ನಾನ್ ಪ್ರಚಾರ ಮಾಡ್‍ಚೇಂಗಿಯು ಅಥವ ಅಯಿಂಗ ಪ್ರಚಾರ ಮಾಡ್‍ಚೇಂಗಿಯು, ನಂಗೆಲ್ಲಾರು ಒರೇ ವಿಷಯತ್‍ನ ಪ್ರಚಾರ ಮಾಡಿಯಂಡುಂಡ್. ನಿಂಗಳು ಅದ್‍ನ ನಂಬಿತುಳ್ಳಿರ.

¹²ಕ್ರಿಸ್ತ ಚಾವ್‍ಯಿಂಜ ಜೀವವಾಯಿತ್ ಎದ್ದತ್‍ೕಂದ್ ನಂಗ ಬೋದನೆ ಮಾಡ್‌ವಕ, ನಿಂಗಡಡೆಲ್ ಚೆನ್ನ ಜನ, ಚತ್ತಯಿಂಗ, ಚಾವ್‍ಯಿಂಜ ಪುನಃ ಜೀವವಾಯಿತ್ ಏವುಲೇಂದ್ ಎನ್ನನೆ ಎಣ್ಣಿಯಂಡುಳ್ಳಿರಾ?

¹³ಚತ್ತ್‌ಪೋನ ಪಿಂಞ ಪುನಃ ಜೀವತ್‍ಲ್ ಏವುಲೇಂದ್ ಇಂಜತೇಂಗಿ, ಕ್ರಿಸ್ತ ಸಹ ಚಾವ್‍ಯಿಂಜ ಎದ್ದಿತ್‌ಲ್ಲೇಂದ್ ಆಪ.

¹⁴ಕ್ರಿಸ್ತ ಚಾವ್‍ಯಿಂಜ ಜೀವವಾಯಿತ್ ಪುನಃ ಎದ್ದಿತ್‌ಲ್ಲೇಂದ್ ಎಣ್ಣ್‌ಚೇಂಗಿ, ನಂಗಡ ಬೋದನೆಯು ಪ್ರಯೋಜನ ಇಲ್ಲತದ್, ನಿಂಗಡ ನಂಬಿಕೆಯು ಪ್ರಯೋಜನ ಇಲ್ಲತದ್.

¹⁵ಅನ್ನನೆ ಯೇಸುನ ನಂಬ್‍ನಯಿಂಗ ಚಾವ್‍ಯಿಂಜ ಜೀವವಾಯಿತ್ ಏವತೆ ಇಂಜತೇಂಗಿ, ದೇವ, ಕ್ರಿಸ್ತನ ಚಾವ್‍ಯಿಂಜ ಪುನಃ ಜೀವವಾಯಿತ್ ಎಪ್ಪ್‌ಚಿಟ್ಟತ್‍ೕಂದ್ ನಂಗ ಎಣ್ಣ್‌ನ ಬೋದನೆರಗುಂಡ್, ನಂಗ ದೇವಡ ವಿಷಯತ್ ಪೊಟ್ಟ್ ಸಾಕ್ಷಿ ಪರ್ಂದನೆಕೆ ಆಪಲ್ಲ?

¹⁶ಚತ್ತಯಿಂಗ ಚಾವ್‍ಯಿಂಜ ಏವ್‍ಲೇಂದ್ ಎಣ್ಣ್‌ಚೇಂಗಿ, ಕ್ರಿಸ್ತನು ಜೀವವಾಯಿತ್ ಎದ್ದಿತ್‌ಲ್ಲೆ.

¹⁷ಕ್ರಿಸ್ತ ಚಾವ್‍ಯಿಂಜ ಎದ್ದಿತ್‌ಲ್ಲೆ ಎಣ್ಣ್‌ಚೇಂಗಿ, ನಿಂಗಡ ನಂಬಿಕೇಕ್ ಒರ್ ಪ್ರಯೋಜನವು ಇಲ್ಲೆ; ನಿಂಗಳು, ಇಂಞು ನಿಂಗಡ ಪಾಪತ್‍ಲ್ ಇಪ್ಪಿರ.

¹⁸ಅಕ್ಕ ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತಯಿಂಗ ಸಹ ಪಾಳಾಯಿ ಪೋಪ.

¹⁹ನಂಗ ಯೇಸುರ ಮೇಲೆ ಬೆಚ್ಚಿತುಳ್ಳ ನಂಬಿಕೆ ಈ ಲೋಕತ್‍ರ ಬದ್‍ಕ್‍ಕಾಯಿತ್ ಮಾತ್ರ ಇಪ್ಪದಾಚೇಂಗಿ, ದೇವಡ ನಲ್ಲ ಸುದ್ದಿರ ಮೇಲೆ ನಂಬಿಕೆ ಇಲ್ಲತ ಜನಕಿಂಜ ನಂಗಡ ಸ್ತಿತಿ ಮೋಸವಾನದಾಯಿತ್‌ಪ್ಪ.

²⁰ಆಚೇಂಗಿ, ಕ್ರಿಸ್ತ ಚಾವ್‍ಯಿಂಜ ಜೀವವಾಯಿತ್ ಎದ್ದತ್. ಒರ್ ಬೊಳೆರೆ ಆದ್ಯ ಪಣ್ಣ್‌ರನೆಕೆ, ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತಯಿಂಗಕೆಲ್ಲಾ ಅಂವೊ ಆದ್ಯ ಪಣ್ಣಾಚಿ.

²¹ಆದ್ಯ ಮನುಷ್ಯನಾನ ಆದಾಮ ಎಣ್ಣುವ ಒರೇ ಮನುಷ್ಯಂಡ ಮೂಲಕ, ಈ ಲೋಕಕ್ ಚಾವ್ ಬಂದನೆಕೆ, ಮುನುಷ್ಯನಾಯಿತ್ ಈ ಲೋಕಕ್ ಬಂದ ಕ್ರಿಸ್ತ ಎಣ್ಣುವ ಒರೇ ಮನುಷ್ಯಂಡ ಮೂಲಕ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪಕ್ ಕಯಿಂಜತ್.

²²ಆದಾಮ ಮಾಡ್‍ನ ಕಾರ್ಯತ್ಂಜ, ಚಾವ್ ಎಲ್ಲಾರ್‌ಕು ಬಾತ್. ಅನ್ನನೆ ಯೇಸು ಕ್ರಿಸ್ತ ಮಾಡ್‍ನ ಕಾರ್ಯತ್‍ನಗುಂಡ್, ಎಲ್ಲಾರು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪನೆಕೆ ಮಾಡ್‍ಚಿ.

²³ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪದ್, ಕ್ರಮವಾಯಿತ್ ಆಪ, ನಂಗೆಲ್ಲಾ ಅಯಿಂಗಯಿಂಗಡ ಕ್ರಮತ್‍ಲ್ ಒಬ್ಬಂಗ್ ಬಯ್ಯ ಒಬ್ಬನಾಯಿತ್ ಏವ, ಈ ವಿಷಯತ್‍ಲ್ ದೇವ, ಕ್ರಿಸ್ತನ ಆದ್ಯವಾಯಿತ್ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿ. ಅನ್ನನೆ ಕ್ರಿಸ್ತ ಪುನಃ ಬಪ್ಪಕ, ದೇವ, ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತ್ ಪೋನಯಿಂಗಳ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿಡುವ.

²⁴ಇದಾನ ಪಿಂಞ ಅಂತ್ಯಕಾಲ ಬಪ್ಪ, ಅಕ್ಕ ಕ್ರಿಸ್ತ, ಎಲ್ಲಾ ರಾಜ್ಯಬಾರತ್‍ನ, ಎಲ್ಲಾ ಅದಿಕಾರತ್‍ನ, ಎಲ್ಲಾ ಶಕ್ತಿಯಳ ನಾಶ ಮಾಡಿತ್, ಅಪ್ಪನಾನ ದೇವಕ್ ಒಪ್ಪ್‌ಚಿಡುವ.

²⁵ಎಲ್ಲಾ ಶತ್ರುವಳ ಅಂವೊಂಡ ಕಾಲ್‌ಕ್ ಬೂವಕ್ ಮಾಡ್‌ವಕತ್ತನೆ ಕ್ರಿಸ್ತ ಈ ರಾಜ್ಯತ್‍ನ ಆಳು‍ವೆ ಮಾಡಂಡು.

²⁶ಪಾಳಾಪಕುಳ್ಳ ಆಕೀರ್ ಶತ್ರು ಚಾವ್.

²⁷ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ, ದೇವ ಎಲ್ಲಾನ ಅಂವೊಂಡ ಕಾಲ್‍ರ ಅಡಿಕ್ ಇಡ್‌ವ. ಆಚೇಂಗಿ ಎಲ್ಲಾನ ಅಂವೊಂಡ ಕಾಲ್‍ರ ಅಡಿಕ್‍ೕಂದ್ ಎಣ್ಣ್‌ವಕ, ಎಲ್ಲಾನ ಕ್ರಿಸ್ತಂಡ ಕಾಲ್‍ರ ಅಡಿಕ್ ಬೂವನೆಕೆ ಮಾಡ್‍ನ ದೇವನ, ಅದ್‍ಲ್ ಕೂಟ್‍ಲೆ.[16]

²⁸ಎಲ್ಲಾನ ಕ್ರಿಸ್ತಂಡ ಕಾಲ್‍ರ ಅಡಿಕ್ ಇಟ್ಟ ಪಿಂಞ, ಕ್ರಿಸ್ತ, ಎಲ್ಲಾನ ತಾಂಡ ಕಾಲ್‍ರ ಅಡಿಕ್ ಇಟ್ಟ ದೇವಡ ಅದಿಕಾರಕ್ ತನ್ನ ತಾನೆ ಒಪ್ಪ್‌ಚಿಡುವ; ಅಕ್ಕ ದೇವ ಎಲ್ಲಾಂಗು, ಎಲ್ಲವೂ ಆಯಿತ್ ಇಪ್ಪ.

²⁹ಇಲ್ಲತೆಪೋಚೇಂಗಿ, ಚತ್ತಯಿಂಗ ಜೀವವಾಯಿತ್ ಏವತೆ ಪೋನಕ, ಚತ್ತಯಿಂಗಕಾಯಿತ್ ದೀಕ್ಷಾಸ್ನಾನ ಎಡ್‍ಪದ್‍ಲ್ ಎಂತ ಪ್ರಯೋಜನ? ಎನ್ನಂಗಾಯಿತ್ ಅನ್ನನೆ ಮಾಡಂಡು?

³⁰ಅಕ್ಕ, ಎಕ್ಕ ಆಚೇಂಗಿಯು ನಂಗಳ ಕೊಂದ್‍ರ್‍ವಾಂದ್ ನಂಗ ಎನ್ನಂಗ್ ನೋಟಿಯಂಡಿರಂಡೂ?

³¹ನಾಡ ಅಣ್ಣತಮ್ಮಣಂಗಳೇ, ನಾನ್ ಎಕ್ಕ ಬೋಂಡ್‍ಚೇಂಗಿಯು ಚಾವನೆಕೆ ಉಂಡ್; ಒಡೆಯನಾನ ಕ್ರಿಸ್ತ ಯೇಸುರ ಕೂಡೆ ಉಳ್ಳ ಐಕ್ಯತ್‌ರಗುಂಡ್, ಇದ್‍ಲ್ ನಾನ್ ಹೆಮ್ಮೆ ಪಡ್‌ವಿ, ಇದ್ಂಗಾಯಿತ್ ನಾನ್ ಇನ್ನನೆ ಎಣ್ಣ್‌ವಿ.

³²ನಾನ್ ಎಫೆಸ ಪಟ್ಟಣತ್‍ಲ್ ಇಪ್ಪಕ, ಅಲ್ಲಿಯತ್‍ರ ಜನ ನಾಡ ಕೂಡೆ ಕಾಡ್ ಪ್ರಾಣಿಯರನೆಕೆ ಜಗಳ ಮಾಡ್‍ಚೀಂದ್ ಒರ್ ಸಾದಾರಣ ಮನುಷ್ಯಂಡನೆಕೆ ಎಣ್ಣ್‌ವಿ. ಇದ್‍ನಗುಂಡ್ ನಾಕ್ ಎಂತ ಲಾಬ? ದೇವಡ ಮೇಲೆ ನಂಬಿಕೆ ಬೆಚ್ಚಿತುಳ್ಳಯಿಂಗ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬರತ ಪೋಚೇಂಗಿ, ಬಾರಿ! ನಂಗ ಉಂಡಿತ್, ಕುಡಿಚಿತ್ ನಾಳೆ ಚತ್ತ್ ಪೋಕನಾಂದ್[17] ಎಣ್ಣ್‌ವಕ್ ಕಯ್ಯು ಅಲ್ಲ?

³³ಈ ವಿಷಯತ್‍ಲ್ ಮೋಸ ಪೋಕತಿ, ಬೋಂಡತ ಜನಡ ಕೂಟ್, ನಿಂಗಡ ನಲ್ಲ ಗುಣತ್‍ನ ಪಾಳ್ ಮಾಡಿರ್‌ವ.

³⁴ಏದ್ ಬೋದನೆ ಸರಿಯಾನದೊ, ಅದ್‍ನ ಮಾತ್ರ ಗೇನ ಮಾಡಿಯಂಡಿರಿ, ಪಾಪ ಮಾಡ್‌ವದ್‍ನ ನಿಪ್ಪ್‌ಚಿಡಿ, ನಿಂಗಡಲ್ಲಿ ಚೆನ್ನ ಜನಕ್ ದೇವ ದಾರ್‍ೕಂದ್ ಗೊತ್ತಿಲ್ಲತೆ ಉಳ್ಳಿರ. ನಿಂಗಕ್ ಞಾಣ ಆಪಕಾಯಿತ್ ಇದ್‍ನ ಎಣ್ಣ್‌ವಿ.

³⁵ಆಚೇಂಗಿ, ಚತ್ತಯಿಂಗ ಎನ್ನನೆ ಚಾವ್‍ಯಿಂಜ ಜೀವವಾಯಿತ್ ಏವ? ಅಯಿಂಗಕ್ ಏದ್ ತರ ತಡಿ ಇಪ್ಪಾ? ಇನ್ನನೆ ದಾರೇಂಗಿಯು ಕ್‍ೕಟಕ,

³⁶ಅಯಿಂಗಕ್ ನಿಂಗ: ಮುಠಾಳನೇ ನೀನ್ ಒರ್ ಕುರುನ ನೆಲಕ್ ಬಿತ್ತ್‌ವಕ, ಆ ಕುರು ಚತ್ತ್ ಪೋಚೇಂಗಿ ಮಾತ್ರ ಮೊಳಕೆ ಬಪ್ಪಲ್ಲಾ.

³⁷ಒರ್ ಕುರುನ ಬಿತ್ತ್‌ವಕ, ಮಿಂಞಕ್ ಬೊಳಿಯುವಕುಳ್ಳ ಗಿಡತ್‍ನ ನೀನ್ ಬಿತ್ತಿಯಂಡಿಲ್ಲೆ. ಗೋದಿ ಅಥವ ಬೋರೆ ಎಂತಾಚು ಒರ್ ಕುರು ಬಿತ್ತ್‌ವಿಯ.

³⁸ಆ ಕುರುಕ್ ದೇವ ನೇಮಿಚಿಟ್ಟಿತುಳ್ಳ ತಡೀರ ರೂಪತ್‍ನ ಕೊಡ್‍ಪ, ಓರೋರ್ ಕುರುಕ್ ಅದ್ಂಡದ್ಂಡ ತಡೀರ ರೂಪತ್‍ನ ಕೊಡ್‍ಪ.

³⁹ಅನ್ನನೆ, ಎಲ್ಲಾ ಯರ್ಚಿಯು ಒರೇ ತರ ಅಲ್ಲ. ಮನುಷ್ಯಂಗಡ ಯರ್ಚಿ ಒರ್ ತರ, ಪ್ರಾಣಿಯಡ ಯರ್ಚಿ ಇಂಞೊರ್ ತರ, ಪಕ್ಷಿಯಡ ಯರ್ಚಿ ಬೋರೆ ತರ, ಮೀನ್‌ರ ಯರ್ಚಿ ಇಂಞೊರ್ ತರ.

⁴⁰ಪರಲೋಕತ್‍ಲ್ ಉಳ್ಳ ದೇವದೂತ, ಸೂರ್ಯ, ಚಂದ್ರ, ನಕ್ಷತ್ರ ಅಯಿಂಗಡ ತಡಿ ಬೋರೆ, ಬೂಲೋಕತ್‍ಲ್ ಉಳ್ಳ ಮನುಷ್ಯಂಗಡ ತಡಿ ಬೋರೆ, ಪರಲೋಕತ್‍ಲ್ ಉಳ್ಳ ದೇವದೂತ, ಸೂರ್ಯ ಚಂದ್ರ ನಕ್ಷತ್ರ ಅಯಿಂಗಡ ತಡೀರ ಮಹಿಮೆ ಬೋರೆ, ಬೂಲೋಕತ್‍ಲ್ ಉಳ್ಳ ಮನುಷ್ಯಂಗಡ ತಡೀರ ಮಹಿಮೆ ಬೋರೆ.

⁴¹ಸೂರ್ಯಂಡ ಮಹಿಮೆ ಬೋರೆ ತರ, ಚಂದ್ರಂಡ ಮಹಿಮೆ ಬೋರೆ ತರ, ನಕ್ಷತ್ರತ್‍ರ ಮಹಿಮೆ ಬೋರೆ ತರ, ನಕ್ಷತ್ರತ್‌ಲ್ ಕೂಡೆ ಬೋರೆ ಬೋರೆ ಚಾಯಿ ಉಳ್ಳ ನಕ್ಷತ್ರ ಉಂಡ್.

⁴²ಇನ್ನನೆ ಚತ್ತಯಿಂಗಡ ತಡಿಯು ಜೀವವಾಯಿತ್ ಏವಕ ಬೋರೆಯಾಯಿತ್‌ಪ್ಪ. ನಂಗಡ ಈ ಲೋಕತ್‍ರ ತಡೀನ ನಂಗ ಚತ್ತ್ ಪೋಪಕ ಮಣ್ಣ್‌ಲ್ ಒರ್ ಕುರುನ ಬಿತ್ತ್‌ವನೆಕೆ ಬಿತ್ತುವ. ಆಚೇಂಗಿ ಎಕ್ಕಾಲು ದೇವಡ ಕೂಡೆ ಬದ್‍ಕ್‍ವಕಾಯಿತ್ ಚಾವ್ ಇಲ್ಲತ ರೂಪತ್‌ಲ್ ಏವ.

⁴³ನಂಗಡ ಚತ್ತ್‌ಪೋನ ತಡೀನ ಪೂಪಕಾಪಕ ಅದ್ಂಗ್ ಒರ್ ಬೆಲೆಯು ಇಲ್ಲೆ. ಆಚೇಂಗಿ ಏವಕ ದೇವಡ ಮಹಿಮೆ ದುಂಬ್‍ನದಾಯಿತ್ ಇಪ್ಪ. ಬಲಯಿಲ್ಲತ ತಡಿಯಾಯಿತ್ ಮಣ್ಣ್‌ಲ್ ಪೂಪ, ಆಚೇಂಗಿ ಬಲವುಳ್ಳದಾಯಿತ್ ಏವ.

⁴⁴ಈ ತಡೀನ ಪೂಪಕ ಅದ್ ಈ ಲೋಕತ್‍ರ ತಡಿಯಾಯಿತ್‌ಪ್ಪ, ಆಚೇಂಗಿ ಏವಕ, ಆತ್ಮೀಯ ತಡಿಯಾಯಿತ್ ಎದ್ದಿತ್ ಬಪ್ಪ. ಚಾವಕ್ ಮಿಂಞ ಒರ್ ತಡಿ ಉಳ್ಳನೆಕೆ, ಚಾವ್‍ಯಿಂಜ ಜೀವವಾಯಿತ್ ಏವಕ, ಆತ್ಮೀಯ ತಡಿ ಒಂದ್ ಉಂಡ್.

⁴⁵ದೇವಡ ವಾಕ್ಯತ್‍ಲ್ ಉಳ್ಳನೆಕೆ, ಆದ್ಯ ಮನುಷ್ಯನಾನ ಆದಾಮನ ದೇವ ಸೃಷ್ಟಿ ಮಾಡ್‌ವಕ ಅಂವೊನ ಜೀವ ಉಳ್ಳ ಮನುಷ್ಯನಾಯಿತ್ ಮಾಡ್‍ಚಿ. ಆಚೇಂಗಿ ದಂಡನೆ ಆದಾಮನಾನ ಕ್ರಿಸ್ತ, ಚಾವ್‍ಯಿಂಜ ಎಪ್ಪ್‌ಚಿಡ್‍ವ ಆತ್ಮೀಯ ಜೀವ ತಪ್ಪಂವೊನಾಯಿತ್ ಆಚಿ.[18]

⁴⁶ಆಚೇಂಗಿ ಆತ್ಮೀಯ ತಡಿ ಆದ್ಯ ಬಂದದ್ ಅಲ್ಲ, ನಂಗಡ ಈ ಲೋಕತ್‍ರ ತಡಿಯೇ ಆದ್ಯ ಬಂದದ್; ಆತ್ಮೀಯ ತಡಿ ಬಯ್ಯ ಬಾತ್.

⁴⁷ಆದ್ಯ ಮನುಷ್ಯನಾನ ಆದಾಮ ಮಣ್ಣಿಂಜ ಬಂದಂವೊ, ದಂಡನೆಯಂವೊನಾನ ಕ್ರಿಸ್ತ ಪರಲೋಕತ್ಂಜ ಬಂದಂವೊ.

⁴⁸ಬೂಮಿರ ಮಣ್ಣಿಂಜ ಬಂದ ಆದಾಮ ಏದ್ ತರ ತಡೀಲ್ ಇಂಜತೋ, ಅನ್ನನೆ ಎಲ್ಲಾ ಮುನುಷ್ಯಂಗಡ ತಡಿಯು ಉಂಡ್. ಪರಲೋಕತ್‍ರ ಮನುಷ್ಯಂಡ ತಡಿ ಎನ್ನನೆ ಉಂಡೋ ಅದೇ ತರ ಪರಲೋಕತ್‍ಲ್ ಉಳ್ಳಯಿಂಗಳು ಇಪ್ಪ.

⁴⁹ಈ ಮಣ್ಣ್‌ರ ಮನುಷ್ಯಂಗ್ ಇಂಜ ರೂಪತ್‍ನ ನಂಗ ಇಟ್ಟಂಡುಳ್ಳನೆಕೆ, ಪರಲೋಕತ್‍ರ ಮನುಷ್ಯಂಡ ರೂಪತ್‍ನ ನಂಗ ಇಟ್ಟಂಡಿಪ್ಪ.

⁵⁰ನಾಡ ಅಣ್ಣತಮ್ಮಣಂಗಳೇ, ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ, ನಂಗಡ ಈ ತಡೀರ ಯರ್ಚಿ ಪಿಂಞ ಚೋರೆಯುಳ್ಳ ತಡೀನಗುಂಡ್ ದೇವಡ ರಾಜ್ಯತ್‍ರ ಬಾದ್ಯಕಾರಂಗಳಾಪಕ್ ಕಯ್ಯುಲೆ. ಕಾಂಗತೆ ಆಯಿಪೋಪ ಈ ತಡಿ ಕಾಂಗತೆ ಪೋಕತ ತಡಿಕ್ ಬಾದ್ಯತೆ ಆಪುಲೆ.

⁵¹ನಿಂಗೆಲ್ಲಾರು ಇಲ್ಲಿ ಎಣ್ಣುವ ಸತ್ಯತ್‍ರ ಗುಟ್ಟ್‌ನ ಕ್‍ೕಳಿ; ನಂಗ ಎಲ್ಲಾರು ಚಾವುಲೆ, ಆಚೇಂಗಿಯು, ಕಡೆ ವಾಲಗತ್‍ರ ಸದ್ದ್ ಕ್‍ೕಪಕ, ಒರ್ ಗಳಿಗೆಲ್, ಕಣ್ಣ್‌ಮುಚ್ಚಿತ್ ತೊರ್‌ಪನೆಕೆ ನಂಗೆಲ್ಲಾರು ಬದ್‍ಲ್ ಆಯಿಪೋಪ.

⁵²ವಾಲಗತ್‍ರ ಸದ್ದ್ ಕ್‍ೕಪದು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತಯಿಂಗ ಎಲ್ಲಾ ಎದ್ದಿತ್ ಚಾವ್ ಇಲ್ಲತ ತಡೀಲ್ ಬಪ್ಪ; ಅಕ್ಕ ನಂಗಳು ಬದ್‍ಲಾಪ.

⁵³ಕಾಂಗತೆ ಆಯಿಪೋಪ ತಡಿ ಕಾಂಗತೆ ಪೋಕತ ತಡೀನ ಪಿಂಞ ಪಾಳಾಯಿ ಪೋಪ ತಡಿ ಪಾಳಾಯಿ ಪೋಕತ ತಡೀನ ಇಡ್‍ವನೆಕೆ ಆಪ.

⁵⁴ಮಣ್ಣ್‌ಕ್ ಬುದ್ದಿತ್ ಪಾಳಾಯಿಪೋಪಕಿಂಜ, ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಯಿಂಗಡ ತಡಿ ಎಕ್ಕಾಲು ಚಾವ್ ಇಲ್ಲತ ತಡಿಕ್ ಬದ್‍ಲಾಪಕ, ಚಾವ್ ಒಮ್ಮಕೆ ಪಾಳಾಯಿ ಪೋಚಿ, ಜಯ ಬಾತ್ ಎಣ್ಣುವ ದೇವಡ ವಾಕ್ಯ ಪೂರ್ತಿಯಾಪ.[19]

⁵⁵ಓ ಚಾವೇ ನೀಡ ಜಯ ಎಲ್ಲಿ? ಓ ಚಾವೇ ನೀಡ ವಿಷಕೊಂಡಿ ಎಲ್ಲಿ?[20]

⁵⁶ಪಾಪತ್‍ರಗುಂಡ್ ಮಾತ್ರ ಚಾವ್‍ಕ್ ನಂಗಡ ಮೇಲೆ ಅದಿಕಾರ ಉಂಡ್. ನ್ಯಾಯಪ್ರಮಾಣತ್‍ರಗುಂಡ್ ಮಾತ್ರ ಪಾಪಕ್ ನಂಗಡ ಮೇಲೆ ಅದಿಕಾರ ಉಂಡ್.

⁵⁷ನಂಗಡ ಒಡೆಯನಾನ ಯೇಸು ಕ್ರಿಸ್ತನಗುಂಡ್ ನಂಗಕ್ ಎಕ್ಕಾಲು ಜಯ ತಪ್ಪ ದೇವನ ನಂಗ ಕೊಂಡಾಡನ.

⁵⁸ಆನಗುಂಡ್, ನಾಡ ಪ್ರೀತಿರ ಜನಳೇ, ನಿಂಗ ನಿಂಗಡ ನಂಬಿಕೇಲ್ ದೃಡವಾಯಿತ್ ಇರಂಡು, ಏದ್ ಒರ್ ವಿಷಯವು ನಿಂಗಡ ನಂಬಿಕೇನೆ ಅನುಮಾನ ಪಡ್‍ತ್‍ವಕ್ಕಾಗ. ಒಡೆಯ ನಿಂಗಕ್ ಒಪ್ಪ್‌ಚಿಟ್ಟ ಕೆಲಸತ್‍ಲ್ ಮಿಂಞಕ್ ಪೋಪಯಿಂಗಳಾಯಿತ್ ಮಾಡಿಯಂಡಿರಿ. ನಿಂಗ ಮಾಡ್‌ವ ಒಡೆಯಂಡ ಕೆಲಸಕ್ ಫಲ ಇಲ್ಲತೆ ಪೋಪುಲೇಂದ್ ನಿಂಗಕ್ ಗೊತ್ತುಂಡುಲ್ಲ?