Read Kodava 1 ಕೊರಿಂಥ 16 Bible Online

1 ಕೊರಿಂಥ 16 - Kodava bible

1 ಕೊರಿಂಥ 16

¹ಯೆರೂಸಲೇಮ್‍ಲ್ ಉಳ್ಳ ಯೇಸುನ ನಂಬ್‍ನಯಿಂಗಕ್ ಸಹಾಯ ಮಾಡ್‌ವಕಾಯಿತ್ ಕೂಟಿತ್ ಬೆಪ್ಪ ಪಣತ್‍ರ ವಿಷಯತ್‍ಲ್, ಗಲಾತ್ಯ ನಾಡ್‍ಲ್ ಉಳ್ಳ ಸಬೇಕ್ ನಾನ್ ಆಜ್ಞೆ ಮಾಡ್‍ನನೆಕೆ ನಿಂಗಳು ಮಾಡಿ.

²ಓರೋರ್ ವಾರತ್‍ರ ಆದ್ಯ ದಿವಸತ್‍ಲ್ ನಿಂಗ ಕೂಡಿ ಬಪ್ಪಕ, ಆ ವಾರತ್‍ಲ್ ನಿಂಗ ನಯಿಚ ದುಡ್ಡ್‌ಲ್, ಚೆನ್ನ ದುಡ್ಡ್‌ನ ಬೋರೆ ಮಾಡಿತ್ ಬೆಕ್ಕಂಡು. ನಾನ್ ನಿಂಗಡಲ್ಲಿಕ್ ಬಪ್ಪಕತ್ತನೆ ನಿಂಗ ಪಾರಕಾತಂಡಿಪ್ಪಕ್ಕಾಗ. ಅಕ್ಕ ನಾನ್ ಬಪ್ಪಕ, ಪಣತ್‍ನ ಕೂಟಿತ್ ಬೆಪ್ಪ ಕೆಲಸ ನಿಂಗಕ್ ಇಪ್ಪುಲೆ.

³ನಾನ್ ಬಪ್ಪಕ, ನಿಂಗ ಸಹಾಯ ಮಾಡ್‌ವಕಾಯಿತ್ ಕೂಟಿತ್ ಬೆಚ್ಚ ಪಣತ್‍ನ ಯೆರೂಸಲೇಮ್‌ಕ್ ಕೊಂಡ್ ಪೋಪಕ್ ದಾರ್‌ಕ್ ಯೋಗ್ಯತೆ ಉಂಡ್‍ೕಂದ್ ನಿಂಗ ಗೇನ ಮಾಡ್‍ವಿರೋ, ಅಯಿಂಗಡ ಪಕ್ಕ ಪಣತ್‍ನ ಕೊಡ್‌ತಿತ್, ಅಯಿಂಗಡ ಕೈಯಿಲ್ ಕಾಗದ ಕೊಡ್‌ತಿತ್ ನಾನ್ ಅಯಿಪಿ.

⁴ಅಥವ, ನಾನು ಅಯಿಂಗಡ ಕೂಡೆ ಪೋಕಂಡೂಂದ್ ನಿಂಗ ಗೇನ ಮಾಡ್‍ಚೇಂಗಿ, ಅಯಿಂಗ ನಾಡ ಕೂಡೆ ಬರಡ್.

⁵ನಾನ್ ಇಕ್ಕ ಮಕೆದೋನ್ಯ ನಾಡ್‍ರ ಬಟ್ಟೇಲ್ ಪೋಯಂಡುಳ್ಳಗುಂಡ್, ಅದಾನ ಪಿಂಞ ನಾನ್ ನಿಂಗಡ ಪಕ್ಕ ಬಪ್ಪಿ.

⁶ಒರ್ ಸಮಯ ನಾನ್ ನಿಂಗಡ ಕೂಡೆ ಚೆನ್ನ ಕಾಲ ಒಳಿಯುವಿ, ಕಯ್ಯುವೇಂಗಿ ಕುಳ್‌ರ್ ಕಾಲತ್‍ಲ್‌ ನಿಂಗಡ ಕೂಡೆ ಒಳಿಯುವಿ. ಅಕ್ಕ ನಿಂಗ, ನಾನ್ ಪೋಪಕುಳ್ಳ ಪ್ರಯಾಣಕ್ ಬೋಂಡಿಯಾನ ಸಹಾಯ ಮಾಡ್‌ವಕ್ ಕಯ್ಯು.

⁷ಇಕ್ಕತ್‍ರ ಪ್ರಯಾಣತ್‍ಲ್, ನಾನ್ ನಿಂಗಡ ಪಕ್ಕ ಬಂದಿತ್ ಬೆರಿಯ ಬುಟ್ಟಿತ್ ಪೋಪಕ್ ನಾಕ್ ಕುಶಿಯಿಲ್ಲೆ; ಒಡೆಯ ಅಪ್ಪಣೆ ಕೊಡ್‍ತತೇಂಗಿ, ನಿಂಗಡ ಪಕ್ಕ ಬಂದಿತ್ ಚೆನ್ನ ಕಾಲ ಇಪ್ಪಕ್ ಆಪಾಂದ್ ನಂಬಿಕೇಲ್ ಉಳ್ಳ.

⁸ಆಚೇಂಗಿಯು ಪಂಚಾಶತ್ತಮ[21] ನಮ್ಮೆಕತ್ತನೆ ಎಫೆಸ ಪಟ್ಟಣತ್‍ಲ್ ಇಪ್ಪಿ.

⁹ಎನ್ನಂಗೆಣ್ಣ್‌ಚೇಂಗಿ, ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ಬಲ್ಯ ಪಡಿ ತೊರ್‌ಂದಿತುಂಡ್. ನಾನ್ ಮಾಡ್‌ವಾನ ವಿರೋದಿಚಿಡುವಯಿಂಗಳು ಇಲ್ಲಿ ದುಂಬ ಉಂಡ್.

¹⁰ತಿಮೊಥೆಯ ನಿಂಗಡ ಪಕ್ಕ ಬಾತೇಂಗಿ, ಅಂವೊ ನಿಂಗಡ ಕೂಡೆ ದೈರ್ಯತ್‍ಲ್ ಇಪ್ಪಕ್ ಸಹಾಯ ಮಾಡಿ, ಅಂವೊ ನಾಡನೆಕೆ ದೇವಡ ಸೇವೆ ಮಾಡಿಯಂಡುಂಡ್.

¹¹ಆನಗುಂಡ್ ದಾರೂ ಅಂವೊನ ಕೀಳಾಯಿತ್ ಕಾಂಗತಿ. ಅಂವೊ ನಾಡ ಪಕ್ಕ ಬಪ್ಪಕ್, ನಿಂಗ ಅಂವೊನ ಸಮಾದಾನತ್‍ಲ್ ಅಯಿಚಿರಿ. ಬಾಕಿ ತಮ್ಮಣಂಗಡ ಕೂಡೆ ಅಂವೊ ಇಲ್ಲಿ ಬಪ್ಪಾಂದ್ ನಾನ್ ಪಾರಕಾತಂಡುಂಡ್.

¹²ತಮ್ಮಣನಾನ ಅಪೊಲ್ಲೋಸ ಬೋರೆ ತಮ್ಮಣಂಗಡ ಕೂಡೆ ನಿಂಗಡ ಪಕ್ಕ ಬಂತ್ ನಿಂಗಳ ಕಾಂಗಂಡೂಂದ್ ಅಂವೊನ ನಾನ್ ದುಂಬ ಬೋಡಿಯಂಡಿಯೆ; ಆಚೇಂಗಿ. ಅಂವೊಂಗ್ ಇಕ್ಕ ಅಲ್ಲಿ ಬಪ್ಪಕ್ ಮನಸ್ಸಿಲ್ಲೆ, ಅಂವೊಂಗ್ ಎಕ್ಕ ಸಂದರ್ಪ ಕ್‍ಟ್ಟುವ ಅಕ್ಕ ಬಪ್ಪ.

¹³ನಿಂಗ ಎಕ್ಕಾಲು ಎಚ್ಚರತ್‍ಲ್ ಇರಿ. ದೇವಡ ಮೇಲೆ ಉಳ್ಳ ನಂಬಿಕೇಲ್ ನಿಂಗ ದೃಡವಾಯಿತ್ ಇರಿ, ನಿಂಗ ದೈರ್ಯತ್‍ಲ್ ಪಿಂಞ ಬಲವುಳ್ಳಯಿಂಗಳಾಯಿತ್ ಇರಿ.

¹⁴ನಿಂಗ ಮಾಡ್‌ವ ಎಲ್ಲಾ ಕೆಲಸತ್‍ನ ಪ್ರೀತಿಲ್ ಮಾಡಿ.

¹⁵ನಾಡ ಅಣ್ಣತಮ್ಮಣಂಗಳೇ, ಸ್ತೆಫನಂಡ ಕುಟುಂಬತ್‍ಲ್ ಉಳ್ಳಯಿಂಗ ಅಖಾಯ ಪ್ರಾಂತ್ಯತ್‍ಲ್ ಆದ್ಯವಾಯಿತ್ ಯೇಸುನ ನಂಬ್‍ನಯಿಂಗಾಂದು, ಪಿಂಞ ದೇವಡ ಮಕ್ಕಕ್ ಸೇವೆ ಮಾಡ್‌ವಕ್ ಅಯಿಂಗೆಲ್ಲಾ ಅಯಿಂಗಳ ಒಪ್ಪ್‌ಚಿಟ್ಟಿತುಂಡ್‍ೕಂದೂ ನಿಂಗಕ್ ಗೊತ್ತುಂಡಲ್ಲ.

¹⁶ಇನ್ನನೆ ಉಳ್ಳಯಿಂಗಕು, ಅಯಿಂಗಡ ಕೂಡೆ ದೇವಡ ಸೇವೇನ ಕಷ್ಟಟತ್‍ಲ್ ಮಾಡಿಯಂಡುಳ್ಳ ಸೇವಕಂಗಕೂ, ಅಯಿಂಗ ಎಣ್ಣ್‌ವಾನ ಕ್‍ೕಟಿತ್ ಅದ್ಂಗ್ ಬಗ್ಗಿತ್ ನಡ್‍ಕಂಡೂಂದ್ ನಿಂಗಕ್ ಬುದ್ದಿ ಎಣ್ಣ್‌ವಿ.

¹⁷ಸ್ತೆಫನ, ಫೊರ್ತುನಾತ ಪಿಂಞ ಅಖಾಯಿಕ ಎಣ್ಣ್‌ವಯಿಂಗ ಕೊರಿಂಥ ಪಟ್ಟಣತ್ಂಜ ಇಲ್ಲಿ ಬಂದಾಂಗ್ ನಾಕ್ ದುಂಬ ಕುಶಿಯುಂಡ್. ನಿಂಗ ನಾಕ್ ಎಂತ ಮಾಡಂಡೂಂದ್ ಗೇನಮಾಡಿಯಂಡಿಂಜಿರೋ ಅದ್‍ನೆಲ್ಲಾ ಅಯಿಂಗ ನಾಕ್ ಮಾಡಿತ್.

¹⁸ಅಯಿಂಗ ನಾಕ್ ಪಿಂಞ ನಿಂಗಕ್ ಚಾಯಿ ಒತ್ತಾಸೆ ಮಾಡ್‍ಚಿ, ಅನ್ನನೆ ದೇವಡ ಸೇವೇನ ಚಾಯಿ ಮಾಡ್‌ವಯಿಂಗಳ ನಿಂಗ ದುಂಬ ಗನಪಡ್‌ತಂಡು.

¹⁹ಆಸ್ಯ ನಾಡ್‍ಲ್ ಉಳ್ಳ ಸಬೇಲ್ ಉಳ್ಳಯಿಂಗ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಅಕ್ವಿಲನು ಪ್ರಿಸ್ಕಿಲ್ಲಳು ಅಯಿಂಗಡ ಮನೆಲ್ ಕೂಡಿ ಬಪ್ಪ ಸಬೆರ ಜನಳು ನಿಂಗಕ್ ಒಡೆಯಂಡಲ್ಲಿ ವಂದನೆ ಎಣ್ಣಿಯಂಡುಂಡ್.

²⁰ಇಲ್ಲಿ ಉಳ್ಳ ಅಣ್ಣತಮ್ಮಣಂಗ ಎಲ್ಲಾ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ನಿಂಗ ಒಬ್ಬಂಗ್ ಒಬ್ಬ ಪವಿತ್ರವಾನ ಮುತ್ತ್ ಕೊಡ್‌ತಿತ್[22] ವಂದನೆ ಮಾಡಿ.

²¹ಪೌಲನಾನ ನಾನ್ ನಾಡ ಸ್ವಂತ ಕೈಯಿಂಜ ನಿಂಗಕ್ ವಂದನೆ ಒಳ್‌ದಿಯಂಡುಂಡ್.

²²ಒಬ್ಬ, ಒಡೆಯನ ಪ್ರೀತಿ ಮಾಡತೆ ಪೋಚೇಂಗಿ ಅಂವೊಂಡ ಮೇಲೆ ಶಾಪ ಬರಡ್. ಓ ನಂಗಡ ಒಡೆಯನೇ ಬಾ.

²³ಒಡೆಯನಾನ ಯೇಸುರ ಕೃಪೆ ನಿಂಗಡ ಕೂಡೆ ಇರಡ್.

²⁴ಕ್ರಿಸ್ತ ಯೇಸುರ ಮೂಲಕ ನಾಡ ಪ್ರೀತಿ, ನಿಂಗೆಲ್ಲಾಡ ಕೂಡೆ ಇರಡ್. ಆಮೆನ್.