Read Kodava 1 ಕೊರಿಂಥ 2 Bible Online

1 ಕೊರಿಂಥ 2 - Kodava bible

1 ಕೊರಿಂಥ 2

¹ನಾಡ ಅಣ್ಣತಮ್ಮಣಂಗಳೇ, ನಾನ್ ಆದ್ಯವಾಯಿತ್ ನಿಂಗಡ ಪಕ್ಕ ದೇವಡ ವಿಷಯತ್‍ನ ಎಣ್ಣುವಕ್ ಬಪ್ಪಕ, ನಾನ್ ಎಂತೋ ಬಲ್ಯ ಬಲ್ಯ ತಕ್ಕ್ ಎಣ್ಣಿಯಂಡ್, ಜ್ಞಾನತ್‍ರ ಬಲ್ಯ ತಕ್ಕ್ ಪರ್ಂದಂಡ್ ಬಂದಿತ್ತ್‌ಲ್ಲೆ.

²ಎನ್ನಂಗೆಣ್ಣ್‌ಚೇಂಗಿ, ನಾನ್ ನಿಂಗಡ ಕೂಡೆ ಇಪ್ಪಕ ಯೇಸು ಕ್ರಿಸ್ತನ ಪಿಂಞ ಅಂವೊ ಶಿಲುಬೇಲ್ ಚತ್ತದ್‍ನ ಬುಟ್ಟಿತ್ ಬೋರೆ ಒಂದು ನಿಂಗಕ್ ಗೊತ್ತಾಪದ್ ಬೋಂಡಾಂದ್ ನಾನ್ ತೀರ್ಮಾನ ಮಾಡಿಯೆ.

³ನಾನ್ ನಿಂಗಡ ಪಕ್ಕ ಬೋದನೆ ಮಾಡ್‌ವಕ್ ಬಲ ಇಲ್ಲತೆ, ಒಂದು ಮಾಡ್‌ವಕ್ ಕಯ್ಯತೆ, ದುಂಬ ಬೊತ್ತಿತ್ ನಡ್‍ಗಿಯಂಡ್ ಇಂಜ್.

⁴ನಿಂಗಡ ನಂಬಿಕೆ, ಮನುಷ್ಯಂಡ ಜ್ಞಾನತ್ಂಜ ನಿಕ್ಕತೆ, ದೇವಡ ಶಕ್ತಿಲ್ ನಿಪ್ಪಕಾಯಿತ್,

⁵ನಾಡ ತಕ್ಕ್ ಪಿಂಞ ಬೋದನೆ, ಮನುಷ್ಯಂಡ ಜ್ಞಾನತ್‍ಲ್ ಇಲ್ಲತೆ, ಪವಿತ್ರಾತ್ಮ ಪಿಂಞ ಅಂವೊಂಡ ಶಕ್ತಿರಗುಂಡ್ ಇಂಜತ್‍ೕಂದ್ ನಿಂಗ ಕಾಂಬಕಿಂಜತ್.

⁶ಅನ್ನನೆ ಇಂಜತೇಂಗಿಯು, ಆತ್ಮತ್‍ರ ಬದ್‍ಕ್‍ಲ್ ಬೊಳ್ಂದಿತುಳ್ಳಯಿಂಗಡ ಪಕ್ಕ ಜ್ಞಾನತ್‍ರ ವಿಷಯತ್‍ನ ನಂಗ ಪರಿವ. ಈ ಲೋಕತ್‍ರ ಜ್ಞಾನತ್‍ನ ಅಲ್ಲ, ಪಾಳಾಯಿ ಪೋಪ ಈ ಲೋಕತ್‍ರ ರಾಜಂಗಡ ಜ್ಞಾನವು ಅಲ್ಲ,

⁷ಆಚೇಂಗಿ ಈ ಲೋಕ ಸೃಷ್ಟಿ ಆಪಕ್ ಮಿಂಞಲೇ ನಂಗಡ ಮಹಿಮೆಕಾಯಿತ್ ಉಂಟ್‍ಮಾಡಿತ್, ಅದ್‍ನ ಒಳ್‌ಪ್‍ಚಿಟ್ಟಿತ್‌ಂಜ ಗುಟ್ಟಾನ ದೇವಡ ಜ್ಞಾನತ್‍ನ ನಂಗ ಪರಿವ.

⁸ಆಚೇಂಗಿ ಈ ಲೋಕತ್‍ರ ರಾಜಂಗ ದಾರೂ ಇದ್‍ನ ಅರ್ಥ ಮಾಡಿಯಂಡಿತ್‌ಲ್ಲೆ. ಅನ್ನನೆ ಅರ್ಥ ಮಾಡಿತ್ಂಜತೇಂಗಿ, ಮಹಿಮೆಯುಳ್ಳ ಒಡೆಯನ ಅಯಿಂಗ ಶಿಲುಬೇಕ್ ಇಡ್‍ವಕಿಂಜಿಲೆ.

⁹ದೇವಡ ವಾಕ್ಯತ್‍ಲ್ ಒಳ್‍ದ್‍ನ ಪ್ರಕಾರ: ದೇವ, ಅಂವೊಂಡ ಮೇಲೆ ಪ್ರೀತಿ ಉಳ್ಳಯಿಂಗಕ್ ತಯಾರ್ ಮಾಡಿತುಳ್ಳದ್‍ನ, ಒರ್ ಕಣ್ಣ್ ಕಂಡಿತು ಇಲ್ಲೆ, ಕೆಮಿ ಕ್‍ೕಟಿತು ಇಲ್ಲೆ, ಅದ್ಂಡ ಗೇನ ಮನುಷ್ಯಂಡ ಹೃದಯತ್‍ಲ್ ಪುಟ್ಟಿತು ಇಲ್ಲೆ.[3]

¹⁰ಆಚೇಂಗಿ ನಂಗಕ್ ದೇವ ಅದ್‍ನ ತಾಂಡ ಆತ್ಮತ್‍ರಗುಂಡ್ ಕಾಂಬ್‍ಚಿಟ್ಟತ್. ಆ ಆತ್ಮ ದೇವಡ ಆಳವಾನ ವಿಷಯತ್‍ನೆಲ್ಲಾ ತ್‍ೕಡ್‌ವ.

¹¹ಒರ್ ಮನುಷ್ಯಂಡ ಆತ್ಮಕ್ ಅಲ್ಲತೆ, ಬೋರೆ ದಾರ್‌ಕ್ ಆ ಮನುಷ್ಯಂಡ ವಿಷಯ ಗೊತ್ತಾಪ? ಅನ್ನನೆ ದೇವಡ ಆತ್ಮಕ್ ಅಲ್ಲತೆ ದೇವಡ ವಿಷಯತ್‍ನ ಬೋರೆ ದಾರೂ ಅರ್ಥಮಾಡುಲೆ.

¹²ನಂಗ ಈ ಲೋಕತ್‍ರ ಆತ್ಮತ್‌ನ ಅಲ್ಲ, ಆಂಡ ಬದ್‍ಲ್, ದೇವ ನಂಗಕ್ ಇನಾಮಾಯಿತ್ ಕೊಡ್‍ತಿತುಳ್ಳದ್‍ನ ಗೊತ್ತಾಪಕಾಯಿತ್ ದೇವ ನಂಗಕ್ ಅಯಿಚ ಪವಿತ್ರಾತ್ಮತ್‍ನ ಕ್‍ಟ್ಟ್‌ನಯಿಂಗಳಾಯಿತುಂಡ್.

¹³ಈ ವಿಷಯತ್‍ನೆಲ್ಲಾ ಮನುಷ್ಯಂಗಡ ಜ್ಞಾನ ಎಣ್ಣಿತಂದನೆಕೆ ಬೋದನೆ ಮಾಡುಲೆ, ಆಚೇಂಗಿ, ಪವಿತ್ರಾತ್ಮ ನಂಗಕ್ ಎಂತ ಬೋದನೆ ಮಾಡ್‍ಚೋ, ಆ ತಕ್ಕ್‌ನ ಮಾತ್ರ ಪರಿಂದಿತ್, ಆತ್ಮೀಯ ವಿಷಯತ್‍ನ ಪವಿತ್ರಾತ್ಮ ಉಳ್ಳಯಿಂಗಕ್ ವಿವರಿಚಿಟ್ಟಂಡುಂಡ್.

¹⁴ದೇವಡ ಆತ್ಮ ಇಲ್ಲತ ಮನುಷ್ಯ, ದೇವಡ ಆತ್ಮತ್‍ರ ವಿಷಯತ್‍ನ ಸ್ವೀಕಾರ ಮಾಡುಲೆ. ದೇವಡ ವಿಷಯವೆಲ್ಲ ಅಂವೊಂಗ್ ಪುಚ್ಚಿ ತಕ್ಕ್‌ರನೆಕೆ ಇಪ್ಪ. ಅಂವೊಂಗ್ ಅದ್‍ನ ಅರ್ಥ ಮಾಡ್‌ವಕ್ ಕಯ್ಯುಲೆ. ಎನ್ನಂಗೆಣ್ಣ್‌ಚೇಂಗಿ ಆತ್ಮೀಯವಾಯಿತ್ ಉಳ್ಳಯಿಂಗಕ್ ಮಾತ್ರ ಪವಿತ್ರಾತ್ಮ ಎಣ್ಣ್‌ವದ್ ಅರ್ಥ ಆಪ.

¹⁵ಪವಿತ್ರಾತ್ಮ ಉಳ್ಳ ಮನುಷ್ಯ ಎಲ್ಲಾ ವಿಷಯತ್‍ನ ಅರ್ಥ ಮಾಡಿತ್ ನೋಟ್‍ವಕಯ್ಯು. ಆಚೇಂಗಿ ಅಂವೊನ ಬೋರೆ ದಾರ್‌ಕು ಅರ್ಥ ಮಾಡಿತ್ ನೋಟ್‌ವಕಯ್ಯುಲೆ.

¹⁶ದೇವಡ ವಾಕ್ಯ ಎಣ್ಣ್‌ವನಕೆ:[4] ಒಡೆಯಂಡ ಮನಸ್ಸ್‌ನ ಅರ್ಥ ಮಾಡಿತ್ ಅಂವೊಂಗ್ ಬುದ್ದಿ ಎಣ್ಣ್‌ವಂವೊ ದಾರ್? ಆಚೇಂಗಿ, ದೇವಡ ಮನಸ್ಸ್‌ನ ಅರ್ಥಮಾಡ್‌ವಕಾಯಿತ್ ಕ್ರಿಸ್ತಂಡ ಮನಸ್ಸ್‌ನ ಪವಿತ್ರಾತ್ಮ ನಂಗಕ್ ತಂದಿತುಂಡ್.