Read Kodava 1 ಕೊರಿಂಥ 3 Bible Online

1 ಕೊರಿಂಥ 3 - Kodava bible

1 ಕೊರಿಂಥ 3

¹ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಡ ಕೂಡೆ ಇಪ್ಪಕಾಪಕ, ಆತ್ಮೀಯ ಬದ್‍ಕ್‍ಲ್ ಬೊಳ್‌ಂದಯಂಗಳಾಯಿತ್ ನಿಂಗಡ ಕೂಡೆ ತಕ್ಕ್‌ಪರಿವಕ್ ಕಯ್ಯತೆ, ಈ ಲೋಕತ್‍ರ ಜನತ್‍ರನೆಕೆ, ಪಿಂಞ ಕ್ರಿಸ್ತಂಡ ಕೂಡೆ ಉಳ್ಳ ನಿಂಗಡ ಆತ್ಮೀಯ ಬದ್‍ಕ್‍ಲ್ ಚೆರಿಯ ಮಕ್ಕಡನೆಕೆ ನಿಂಗಳ ಗೇನ ಮಾಡಿತ್ ತಕ್ಕ್ ಪರಿವಕಾಚಿ.

²ನಾನ್ ನಿಂಗಕ್ ಕೂಳ್‍ರನೆಕೆ ಉಳ್ಳ ಆಳವಾನ ಸತ್ಯತ್‍ನ ಬೋದನೆ ಮಾಡತೆ, ಪಾಲ್‍ರನೆಕೆ ಉಳ್ಳ, ಗಟ್ಟಿಯಿಲ್ಲತ ಸತ್ಯತ್‍ನ ಬೋದನೆ ಮಾಡಿಯೆ. ಎನ್ನಂಗೆಣ್ಣ್‌ಚೇಂಗಿ ಅಚ್ಚಕ್ ಶಕ್ತಿ ನಿಂಗಕಿಂಜಿಲೆ.

³ನಿಂಗಡ ಪಕ್ಕ ಒಟ್ಟೆಕಿಚ್ಚ್ ಉಂಡ್, ಬೋರೆಯಿಂಗಡ ಕೂಡೆ ಜಗಳ ಮಾಡ್‌ವಿರ. ಇದೆಲ್ಲಾನ ನಿಂಗಡ ಪಾಪತ್‍ರ ಗುಣತ್‍ನಗುಂಡ್ ಈ ಲೋಕತ್‍ರ ಜನತ್‍ರನೆಕೆ ಮಾಡಿಯಂಡುಳ್ಳಿರಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ?

⁴ಒಬ್ಬ, ನಾನ್ ಪೌಲಂಡ ಕೂಟ್‍ಕ್ ಕೂಡ್‍ನಂವೋಂದೂ, ಇಂಞೊಬ್ಬ ನಾನ್ ಅಪೊಲ್ಲೋಸಂಡ ಕೂಟ್‍ಕ್ ಕೂಡ್‍ನಂವೋಂದೂ ಎಣ್ಣಿಯಂಡುಳ್ಳಗುಂಡ್, ನಿಂಗ ಈ ಲೋಕತ್‍ರ ಜನತ್‍ರನೆಕೆ ಬದ್‍ಕಿಯಂಡುಳ್ಳಿರಲ್ಲಾ?

⁵ಅಪೊಲ್ಲೋಸ ದಾರ್? ಪೌಲ ದಾರ್? ನಂಗ ದೇವಡ ಸೇವಕಂಗ ಮಾತ್ರ ಅಚ್ಚಕೆ. ನಿಂಗ ನಂಗಡ ಮೂಲಕ ಕ್ರಿಸ್ತಂಡ ಮೇಲೆ ನಂಬಿಕೆ ಇಡ್‍ವಕಾಚಿ. ದೇವ ನಂಗ ಒಬ್ಬೊಬ್ಬಂಗ್ ಕೊಡ್‍ತ ಕೆಲಸತ್‍ನ ನಂಗ ಮಾಡಿಯೆ.

⁶ನಾನ್ ಕುರುನ ಬಿತ್ತಿಯೆ, ಅಪೊಲ್ಲೋಸ ನೀರ್ ಬೂಕ್‌ಚ್. ಆಚೇಂಗಿ ದೇವನೇ ಗಿಡತ್‍ನ ಬೊಳಿಯುವಕ್ ಮಾಡ್‍ಚಿ.

⁷ದಾರ್ ಕುರು ಬಿತ್ತುವ, ದಾರ್ ನೀರ್ ಬೂಕ್‌ವ ಎಣ್ಣ್‌ವದ್ ಮುಕ್ಯ ಅಲ್ಲ. ಅದ್‍ನ ಬೊಳಿಯುವಕ್ ಮಾಡ್‌ವ ದೇವನೇ ಮುಕ್ಯ.

⁸ಇಂಞು ಕುರುನ ಬಿತ್ತ್‌ವಂವೊನು ನೀರ್ ಬೂಕ್‍ವಂವೊನು ಒರೇ ಉದ್ದೇಶಕಾಯಿತ್ ಕೆಲಸ ಮಾಡ್‌ವ. ದಂಡಾಳ್‍ಕು ಅಯಿಂಗಯಿಂಗ ಮಾಡ್‍ನ ಕೆಲಸಕ್ ತಕ್ಕಂತ ಸಂಬಳ ಕ್‍ಟ್ಟ್‌ವ.

⁹ಎನ್ನಂಗೆಣ್ಣ್‌ಚೇಂಗಿ ನಂಗ ದಂಡಾಳು ದೇವಡ ಸೇವೇಲ್ ಪಾಲ್‍ದಾರಂಗಳಾಯಿತ್ ಉಂಡ್; ನಿಂಗ ದೇವಡ ಬೇಲ್ ಆಯಿತು, ದೇವಡ ಕಟ್ಟಡವಾಯಿತೂ ಉಳ್ಳಿರ.

¹⁰ದೇವ ನಾಕ್ ತಂದ ಕೃಪೆಯಿಂಜ ಒರ್ ಬುದ್ದಿವಂತೆ ಶಿಲ್ಪಿರನೆಕೆ ನಾನ್ ಅಡಿಪಾಯ ಇಟ್ಟಿಯೆ. ಇಕ್ಕ ಬೋರೊಬ್ಬ ಅದ್ಂಡಮೇಲೆ ಕೆಟ್ಟಿಯಂಡುಂಡ್. ಆಚೇಂಗಿ ಒಬ್ಬೊಬ್ಬನು ಈ ಅಡಿಪಾಯತ್‍ರ ಮೇಲೆ ಕೆಟ್ಟ್‌ವಾನ ಎಚ್ಚರತ್‍ಲ್ ಕೆಟ್ಟಂಡು.

¹¹ಇಟ್ಟಿತ್ತುಳ್ಳ ಅಡಿಪಾಯವಾನ ಯೇಸು ಕ್ರಿಸ್ತನ ಬುಟ್ಟಿತ್ ಬೋರೆ ಅಡಿಪಾಯತ್‍ನ ದಾರೂ ಇಡ್‌ವಕ್ ಕಯ್ಯುಲೆ.

¹²ಆ ಅಡಿಪಾಯತ್‍ರ ಮೇಲೆ ಕೆಟ್ಟ್‌ವಂವೊ ಪೊನ್ನ್, ಬೊಳ್ಳಿ, ಬೆಲೆಯುಳ್ಳ ಕಲ್ಲ್, ಮರ, ಪಿಲ್ಲ್ ಪಿಂಞ ಒಣಕ್ ಪಿಲ್ಲ್‌ನೆಲ್ಲಾ ಇಟ್ಟಿತ್ ಕೆಟ್ಟ್‌ವ.

¹³ಆಚೇಂಗಿ ಕ್ರಿಸ್ತಂಡ ದಿವಸತ್‍ಲ್ ತಿತ್ತ್‌ರ ಮೂಲಕ ಒಬ್ಬೊಬ್ಬನು ಎಚ್ಚಕ್ ಚಾಯಿ ಕೆಟ್ಟ್‌ಚೀಂದ್ ಗೊತ್ತಾಪ. ಎನ್ನಂಗೆಣ್ಣ್‌ಚೇಂಗಿ ತಿತ್ತ್ ಅದ್‍ನ ಕಾಂಬ್‌ಚಿಡುವ. ಒಬ್ಬೊಬ್ಬಂಡ ಕಾರ್ಯತ್‍ನ ತಿತ್ತ್ ಪರೀಕ್ಷ ಮಾಡ್‌ವ.

¹⁴ಆ ತಿತ್ತ್ಂಜ ಅಂವೊ ಕೆಟ್ಟ್‌ನದ್ ಬಚಾವ್ ಆಚೇಂಗಿ, ಕೆಟ್ಟ್‌ನಂವೊಂಗ್ ಇನಾಮ್ ಕ್‍ಟ್ಟ್‌ವ.

¹⁵ಅಂವೊ ಕೆಟ್ಟ್‌ನದ್ ತಿತ್ತ್‌ಲ್ ಬೆಂಜಿ ಪೋಚೇಂಗಿ ಅಂವೊಂಗ್ ಬಲ್ಯ ನಷ್ಟ ಆಪ. ಆಚೇಂಗಿ, ಕೆಟ್ಟ್‌ನಂವೊ ಮಾತ್ರ ರಕ್ಷಣೆ ಆಪ, ಅದೂ, ಕತ್ತಿಯಂಡುಳ್ಳ ತಿತ್ತ್ಂಜ ಬಚಾವ್ ಆನನೆಕೆ ಇಪ್ಪ.

¹⁶ನಿಂಗ ದೇವಡ ಆಲಯವಾಯಿತ್ ಉಳ್ಳೀರಾಂದೂ, ನಿಂಗಡ ಹೃದಯತ್‍ಲ್ ದೇವಡ ಆತ್ಮ ವಾಸ ಮಾಡಿಯಂಡ್ ಉಂಡ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ?

¹⁷ದೇವಡ ಆಲಯತ್‍ನ ಪಾಳ್ ಮಾಡ್‍ವಂವೊನ ದೇವ ಪಾಳ್ ಮಾಡ್‌ವ; ಎನ್ನಂಗೆಣ್ಣ್‌ಚೇಂಗಿ ದೇವಡ ಆಲಯ ಪವಿತ್ರವಾಯಿತ್ ಉಂಡ್. ನಿಂಗಳೇ ಆ ದೇವಡ ಆಲಯ.

¹⁸ನಿಂಗಡಲ್ಲಿ ದಾರೂ ನಿಂಗಳ ನಿಂಗಳೇ ವಂಚನೆ ಮಾಡ್‌ವಕ್ಕಾಗ, ಈ ಲೋಕತ್‍ರ ಜನತ್‍ರ ಮಿಂಞತ್‍ಲ್ ನಿಂಗ ಬಲ್ಯ ಬುದ್ದಿವಂತಯಿಂಗಾಂದ್ ನಿಂಗ ಗೇನಮಾಡಿಯಂಡಿಂಜತೇಂಗಿ, ಅಯಿಂಗಡ ಮಿಂಞತ್ ನಿಂಗ ಮುಠಾಳಂಗಳಾಯಿತ್ ಇರಂಡು, ಅಕ್ಕ ನಿಂಗ ಬುದ್ದಿವಂತಯಿಂಗಳಾಯಿತಿಪ್ಪಿರ.

¹⁹ಎನ್ನಂಗೆಣ್ಣ್‌ಚೇಂಗಿ ಈ ಲೋಕತ್‍ರ ಜ್ಞಾನ ದೇವಡ ಮಿಂಞತ್ ಪುಚ್ಚಿರನೆಕೆ ಉಂಡ್. ಜ್ಞಾನಿಯಡ ಮುಠಾಳತನತ್‍ರ ಮೂಲಕ ದೇವ ಅಯಿಂಗಳ ಪುಡ್‍ಚಿರುವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್.[5]

²⁰ಪಿಂಞ ಜ್ಞಾನಿಯಡ ಗೇನ ಎಲ್ಲ ಒಂದಾಂಗು ಪ್ರಯೋಜನಯಿಲ್ಲತದ್‍ೕಂದ್ ದೇವಕ್ ಗೊತ್ತುಂಡ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್.[6]

²¹ಆನಗುಂಡ್ ಒಬ್ಬಂಗಿಂಜ ಇಂಞೊಬ್ಬ ಬಲ್ಯಂವೋಂದ್ ಹೊಗಳುವದ್‍ನ ಬುಡಿ, ಎಲ್ಲಾ ನಿಂಗಡದೇ.

²²ಪೌಲ ಆಡ್, ಅಪೊಲ್ಲೋಸ ಆಡ್ ಅಲ್ಲತಪೋಚೇಂಗಿ ಕೇಫ ಆಡ್, ಈ ಲೋಕ ಆಡ್, ಬದ್‍ಕ್ ಆಡ್, ಚಾವ್ ಆಡ್, ಇಕ್ಕತ್‍ರ ಕಾಲ ಆಡ್ ಅಥವ ಬಪ್ಪ ಕಾಲ ಆಡ್, ಎಲ್ಲಾ ನಿಂಗಡದೇ.

²³ನಿಂಗ ಕ್ರಿಸ್ತಂಗ್ ಕೂಡ್‍ನಯಿಂಗ, ಕ್ರಿಸ್ತ ದೇವಕ್ ಕೂಡ್‍ನಂವೊ.