Read Kodava 1 ಕೊರಿಂಥ 4 Bible Online

1 ಕೊರಿಂಥ 4 - Kodava bible

1 ಕೊರಿಂಥ 4

¹ನಿಂಗ ಅಪೊಲ್ಲೋಸನ ಪಿಂಞ ನನ್ನ, ದೇವ ನಂಗಕ್ ಕಾಂಬ್‍ಚಿಟ್ಟ ಗುಟ್ಟ್‌ಕ್[7] ನೇಮಿಚಿಟ್ಟಿತುಳ್ಳ ಕ್ರಿಸ್ತಂಡ ಸೇವಕಂಗಾಂದು ಪಿಂಞ ದೇವಡ ಜವಾಬ್ದಾರಂಗಳಾಯಿತ್ ಉಂಡ್‍ೕಂದು ಗೇನ ಮಾಡಂಡು.

²ಅನ್ನನೆ ಉಳ್ಳಂವೊ, ಅಂವೊಂಗ್ ಒಪ್ಪ್‌ಚಿಟ್ಟ ವಿಷಯತ್‍ಲ್ ನಂಬಿಕಸ್ತನಾಯಿತ್ ಇಪ್ಪದ್ ಅಂವೊಂಡ ಜವಾಬ್ದಾರಿ ಆಪ.

³ಆನಗುಂಡ್, ನಾಡ ನಂಬಿಕಸ್ತನ ನಿಂಗ ಎಂತ ತೀರ್ಪ್ ಕೊಡ್‍ಪಿರಾಂದು ಅಥವ ಮನುಷ್ಯಂಡ ನ್ಯಾಯತೀರ್ಪ್ ಎಂತದ್‍ೕಂದು ನಾಕ್ ಬಲ್ಯದಾಯಿತ್ ಕಾಂಬುಲೆ. ನಾಕ್ ನಾನೇ ತೀರ್ಪ್ ಕೊಡ್‌ಪದು ಇಲ್ಲೆ.

⁴ನಾಡ ಮನಸಾಕ್ಷಿ ಶುದ್ದವಾಯಿತ್ ಉಂಡ್, ಆಚೇಂಗಿ ನಾನ್ ಸರಿಯಾನಂವೋಂದ್ ಎಣ್ಣ್‌ವಕ್ ಅದ್ ಆದಾರ ಆಪುಲೆ. ಅದ್‍ನ ಒಡೆಯನೇ ತೀರ್ಪ್ ಮಾಡಂಡು.

⁵ಈ ಕಾರಣಕಾಯಿತ್, ಸರಿಯಾನ ಸಮಯ ಬಪ್ಪಕ್ ಮಿಂಞ ನಿಂಗ ದಾರ್‌ಕು ತೀರ್ಪ್ ಮಾಡಂಡ. ಒಡೆಯ ಬಪ್ಪಕತ್ತನೆ ಪಾರಕಾತಂಡಿರಿ. ಅಂವೊ ಇರ್‌ಟ್‌ಲ್ ಉಳ್ಳ ಒಳಗುಟ್ಟ್‌ನೆಲ್ಲ ಬೊಳಿಕ್ ಕೊಂಡ್ ಬಂದಿತ್, ಹೃದಯತ್‍ರ ಗೇನತ್‍ನ ಪೊರಮೆ ಕಾಂಬ್‌ಚಿಡುವ. ಅಕ್ಕ ಒಬ್ಬೊಬ್ಬಂಗಕ್ ತಕ್ಕ ಹೊಗಳಿಕೆ ದೇವಡಯಿಂಜ ಅಯಿಂಗಕ್ ಕ್‍ಟ್ಟ್‌ವ.

⁶ನಾಡ ಅಣ್ಣತಮ್ಮಣಂಗಳೇ, ದೇವಡ ವಾಕ್ಯತ್‍ಲ್ ಎಣ್ಣ್‌ನಗಿಂಜ ಜಾಸ್ತಿ ಎಣ್ಣತನೆಕೆ ಇಪ್ಪಕ್ ನಿಂಗ ಪಡಿಪಕ್ ಪಿಂಞ ಒಬ್ಬಯಿಂಜ ಇಂಞೊಬ್ಬ ಬಲ್ಯಂವೋಂದ್ ಆಂಗಾರತ್‍ಲ್ ಗೇನ ಮಾಡತೆ ಇಪ್ಪಕ್, ನಾನ್ ನಿಂಗಕಾಯಿತ್ ನನ್ನ ಪಿಂಞ ಅಪೊಲ್ಲೋಸನ ಉದಾರಣೆಯಾಯಿತ್ ಇಲ್ಲಿ ಕಾಂಬ್‌ಚಿಟ್ಟಿತ್ ಒಳ್‍ದಿಯೆ.

⁷ಒಬ್ಬಯಿಂಜ ಇಂಞೊಬ್ಬ ಬಲ್ಯಂವೋಂದ್ ಎಣ್ಣ್‌ವಕ್ ನಿಂಗಳ ಮಾಡ್‍ವದ್ ದಾರ್? ದೇವ ಕೊಡ್‍ಕತದ್ ನೀಡ ಪಕ್ಕ ಎಂತ ಉಂಡ್? ಅನ್ನನೆ ನೀಡ ಪಕ್ಕ ಉಳ್ಳದೆಲ್ಲಾ ದೇವಡಯಿಂಜ ಕ್‍ಟ್ಟ್‌ನದ್‍ೕಂದ್ ಎಣ್ಣ್‌ಚೇಂಗಿ, ದೇವಡಯಿಂಜ ಅದ್‍ನೆಲ್ಲಾ ಕ್‍ಟ್ಟತಂವೊಂಡನೆಕೆ ಎನ್ನಂಗ್ ಹೊಗಳ್‍ವಿಯ?

⁸ನಿಂಗಕ್ ಎಲ್ಲಾ ಕ್‍ಟ್ಟಿತುಂಡ್‍ೕಂದ್ ಗೇನ ಮಾಡ್‌ವಿರ. ಆನಗುಂಡ್ ನಿಂಗಕ್ ಎಲ್ಲಾ ಕ್‍ಟ್ಟಿತುಳ್ಳನೆಕೆ ಕಳಿಪಿರ. ಇಕ್ಕ ನಂಗ ಇಲ್ಲತಿಪ್ಪಕಲೇ ನಿಂಗ ರಾಜ್ಯಬಾರ ಮಾಡ್‌ವಿರ. ಅನ್ನನೆ ನಿಂಗ ರಾಜ್ಯಬಾರ ಮಾಡಿಯಂಡಿಂಜತೇಂಗಿ ಚಾಯಿ ಇಂಜಿತಿಪ್ಪ. ಅಕ್ಕ ನಂಗಳು ನಿಂಗಡ ಕೂಡೆ ರಾಜ್ಯಬಾರ ಮಾಡ್‌ವಕಿಂಜತ್.

⁹ನಾಕ್ ಇನ್ನನೆ ಗೇನ ಆಪ, ಒರ್ ರಾಜ ಒರ್ ರಾಜ್ಯತ್‍ನ ಗೆಲ್ಲ್‌ವಕ, ಕಡೇಲ್ ಆ ರಾಜ್ಯತ್‍ರ ಜನಳ ಕೊಲ್ಲುವಕ್ ಕೊಂಡ್ ಪೋಪನೆಕೆ, ಅಪೊಸ್ತಲಂಗಳಾನ ನಂಗಳ ಎಲ್ಲಾರ್‌ಕು ಕಾಂಬನೆಕೆ ಕಡೇಕ್ ಚಾವಯಿಂಗಳಾಯಿತ್ ಮಾಡಿತುಂಡ್. ಈ ಲೋಕ, ದೇವದೂತಂಗ ಪಿಂಞ ಮುನುಷ್ಯಂಗ ನಂಗಳ ನೋಟಿತ್ ತೆಳಿಪನೆಕೆ ಆಚಿ.

¹⁰ನಂಗ ಕ್ರಿಸ್ತಂಗಾಯಿತ್ ಮುಠಾಳಂಗ, ಆಚೇಂಗಿ ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಿಂಗ ಬುದ್ದಿವಂತಯಿಂಗ; ನಿಂಗ ಬಲಶಾಲಿಯಳಾಯಿತ್ ಉಳ್ಳಿರ ಆಚೇಂಗಿ ನಂಗ ಶಕ್ತಿ ಇಲ್ಲತಯಿಂಗಡನೆಕೆ ಉಂಡ್. ನಿಂಗಕ್ ಬಲ್ಯತರತ್‌ಲ್ ಜನ ಮರ್ಯಾದಿ ತಪ್ಪ, ಆಚೇಂಗಿ ನಂಗಳ ಅಲ್ಲಗೆಳೆಯುವ.

¹¹ಇಕ್ಕಲು ನಂಗ ಕೆಲ ಪಯಿಚಂಡುಳ್ಳಯಿಂಗಳಾಯಿತು, ಬಾಯಾರಿಕೆ ಆನಯಿಂಗಳಾಯಿತು, ನಂಗಡ ತಡಿಕ್ ಇಡ್‌ವಕ್ ಸರಿಯಾನ ಬಟ್ಟೆ ಇಲ್ಲತಯಿಂಗಳಾಯಿತು, ನಂಗಳ ಜನ ಪೊಯ್ಯುವಯಿಂಗಳಾಯಿತು, ವಾಸ ಮಾಡ್‌ವಕ್ ಒರ್ ಮನೆ ಇಲ್ಲತಯಿಂಗಳಾಯಿತು ಬದ್‍ಕಿಯಂಡುಂಡ್.

¹²ನಂಗ ನಂಗಡ ಕೈಯಿಂಜ ಕಷ್ಟಪಟ್ಟಿತ್ ಕೆಲಸ ಮಾಡ್‌ವ. ನಂಗಳ ದಾರ್ ಅವಮಾನ ಮಾಡ್‍ಚೇಂಗಿಯು ನಂಗ ಅಯಿಂಗಳ ಆಶೀರ್ವಾದ ಮಾಡ್‌ವ. ನಂಗಳ ಹಿಂಸೆ ಮಾಡ್‌ವಯಿಂಗಡ ಮೇಲೆ ನಂಗ ತಾಳ್ಮೆನ ಕಾಟುವ.

¹³ನಂಗಡ ವಿಷಯತ್ ಕುತ್ತ ಪರಿಯುವಯಿಂಗಕ್ ನಂಗ ಪೊರುಮೇಲ್ ಜವಾಬ್ ಕೊಡ್‍ಪ, ಈ ನಾಳ್‍ಕತ್ತನೆ ನಂಗ ಈ ಲೋಕತ್‍ರ ಜನಕ್ ಕಚಡರನೆಕೆಯು, ಈ ಲೋಕಕ್ ಹೇಸಿಗೆಯಾಯಿತು ಉಂಡ್.

¹⁴ನಿಂಗಕ್ ಞಾಣ ಆಂಡೂಂದ್ ನಾನ್ ಇದ್‍ನೆಲ್ಲಾ ಒಳ್‍ದಿಯಂಡಿಲ್ಲೆ, ನಾಡ ಪ್ರೀತಿರ ಮಕ್ಕಡರನೆಕೆ ಉಳ್ಳಗುಂಡ್ ನಿಂಗಕ್ ಎಚ್ಚರ ಮಾಡಿಯೆ.

¹⁵ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಿಂಗಕ್ ಪತ್ತಾಯಿರ ಬೋದನೆಕಾರ ಇಂಜತೇಂಗಿಯು, ನಿಂಗಕ್ ಒರೇ ಆತ್ಮೀಯ ಅಪ್ಪ ಉಂಡ್. ನಿಂಗಕ್ ಅಂವೊಂಡ ನಲ್ಲ ಸುದ್ದಿನ ಎಣ್ಣಿಕೊಡ್‍ಪಕ ಕ್ರಿಸ್ತ ಯೇಸುರಲ್ಲಿ ನಿಂಗಡ ಆತ್ಮೀಯ ಬದ್‍ಕ್‍ಕ್ ನಾನ್ ಅಪ್ಪನಾಯಿತ್ ಆನ.

¹⁶ಆನಗುಂಡ್ ನಿಂಗ ನಾಡನೆಕೆ ಆಂಡೂಂದ್ ನಿಂಗಕ್ ಪುರ್‌ಡ್ ಕೊಡ್‍ಪಿ.

¹⁷ಇದ್ಂಗಾಯಿತೇ ನಾನ್ ನಾಡ ಪ್ರೀತಿರ ಮೋಂವೊನು, ಒಡೆಯಂಗ್ ಸತ್ಯವುಳ್ಳಂವೊನು ಆಯಿತುಳ್ಳ ತಿಮೊಥೆಯನ ನಿಂಗಡ ಪಕ್ಕ ಅಯಿಚಂಡುಳ್ಳ. ನಾನ್ ಎಲ್ಲಾ ಜಾಗತ್‍ಲ್ ಎಲ್ಲಾ ಸಬೇಲ್ ಬೋದನೆ ಮಾಡ್‌ವನೆಕೆ, ಕ್ರಿಸ್ತ ಯೇಸುರಲ್ಲಿ ಉಳ್ಳ ನಾಡ ಬದ್‍ಕ್‍ರ ವಿಷಯತ್‍ನ ನಿಂಗಕ್ ಜ್ಞಾಪಕ ಮಾಡ್‌ವಿ.

¹⁸ನಾನ್ ನಿಂಗಡ ಪಕ್ಕ ಬಪ್ಪ್‌ಲೇಂದ್ ಗೇನ ಮಾಡಿತ್, ಚೆನ್ನ ಜನ ಆಂಗಾರತ್‍ಲ್ ಕಳಿಚಂಡುಂಡ್.

¹⁹ಆಚೇಂಗಿಯು, ಒಡೆಯಂಡ ಚಿತ್ತ ಉಂಡೇಂಗಿ ನಾನ್ ನಿಂಗಡ ಪಕ್ಕ ಬೆರಿಯ ಬಪ್ಪಿ. ಬಂದಿತ್, ಆಂಗಾರತ್‍ಲ್ ಬಲ್ಯರಿಕೇಲ್ ಉಳ್ಳ ಜನಡ ತಕ್ಕ್ ಮಾತ್ರ ಅನ್ನನೆ ಉಂಡಾ ಅಥವ ನೇರಾಯಿತು ಅಯಿಂಗಕ್ ಎಂತಾಚು ಶಕ್ತಿ ಉಂಡಾಂದ್ ಕಂಡ್‌ಪುಡಿಪಿ.

²⁰ದೇವಡ ರಾಜ್ಯ ತಕ್ಕ್ ಪರಿವದ್‌ಲ್ ಅಲ್ಲ, ಆಚೇಂಗಿ ದೇವಡ ಶಕ್ತಿಲ್ ನಂಗ ಬದ್‍ಕ್‍ವದ್‍ಲ್ ಉಂಡ್.

²¹ನಿಂಗಕ್ ಏದ್ ಕುಶಿ? ನಾನ್ ನಿಂಗಡ ಪಕ್ಕ ಬಪ್ಪಕ ಕೋಲ್ ಎಡ್‍ತಂಡ್ ಶಿಕ್ಷೆ ಕೊಡ್‍ಪಕ್ ಬಪ್ಪದಾ? ಅಥವ ಪ್ರೀತಿಲ್ ಪಿಂಞ ಶಾಂತ ಗುಣತ್‍ಲ್ ಬಪ್ಪಾದಾ?