Read Kodava 1 ಕೊರಿಂಥ 6 Bible Online

1 ಕೊರಿಂಥ 6 - Kodava bible

1 ಕೊರಿಂಥ 6

¹ನಿಂಗಡಲ್ಲಿ ಒಬ್ಬಂಗ್, ಇಂಞೊಬ್ಬಂಡ ಕೂಡೆ ತಕ್‌ರಾರ್ ಉಂಡೇಂಗಿ, ನಿಂಗಕ್ ತೀರ್ಪ್ ಕ್‍ಟ್ಟ್‌ವಕಾಯಿತ್, ದೇವಡ ಮಕ್ಕಡ ಪಕ್ಕ ಪೋಕತೆ, ದೇವಡ ಮಕ್ಕ ಅಲ್ಲತಯಿಂಗಡ ಪಕ್ಕ ಪೋಪಕ್ ನಿಂಗಕ್ ಎಚ್ಚಕ್ ದೈರ್ಯ?

²ಆಕೀರ್ ದಿವಸತ್‍ಲ್ ದೇವಡ ಮಕ್ಕ ಈ ಲೋಕತ್‍ನ ನ್ಯಾಯತೀರ್ಪ್ ಮಾಡ್‌ವಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗಡಗುಂಡ್ ಈ ಲೋಕಕ್ ನ್ಯಾಯತೀರ್ಪ್ ಕ್‍ಟ್ಟ್‌ವಕ್ ಇಪ್ಪಕ, ಈ ಚೆರಿಯ ಚೆರಿಯ ವಿಷಯತ್‍ನ ನಿಂಗ ನಿಂಗಳೇ ಸರಿ ಮಾಡ್‌ವಕ್ ಕಯ್ಯುಲೆಯಾ?

³ದೇವದೂತಂಗಳ ಸಹ ನಂಗ ತೀರ್ಪ್ ಮಾಡ್‌ವಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ಅನ್ನನಾಚೇಂಗಿ ಈ ಬದ್‍ಕ್‍ರ ವಿಷಯತ್ ಬಪ್ಪ ಚೆರಿಯ ಚೆರಿಯ ತಕ್‌ರಾರ್‍ನ ತೀರ್ಪ್ ಮಾಡ್‌ವಕ್ ನಿಂಗಕ್ ಕಂಡಿತವಾಯಿತ್ ಕಯ್ಯು.

⁴ನಿಂಗಕ್ ಎಂತಾಚೇಂಗಿ ತಕ್‌ರಾರ್ ಇಂಜತೇಂಗಿ, ನಿಂಗ ಸಬೇಲ್ ಕಮ್ಮಿಯಾಯಿತ್ ಕಾಂಬಯಿಂಗಳ, ನಿಂಗಕ್ ತೀರ್ಪ್ ಕೊಡ್‍ಪಕ್ ನೇಮಿಚಿಡೀಂದ್ ನಾನ್ ಎಣ್ಣಂಡುವಾ?

⁵ನಿಂಗಳ ಞಾಣ ಪಡ್‍ತ್‍ವಕಾಯಿತ್ ನಾನ್ ಇದ್‍ನ ಎಣ್ಣ್‌ವಿ. ಇಂತ ವಿಷಯತ್‍ನ ಸರಿಯಾಯಿತ್ ತೀರ್ಪ್ ಮಾಡ್‌ವಕ್ ನಿಂಗಡ ಸಬೇಲ್ ಒರ್ ಬುದ್ದಿವಂತಂವೊ ಸಹ ಇಲ್ಲೆಯಾ?

⁶ಅದ್ಂಡ ಬದ್‍ಲ್ ಯೇಸುನ ನಂಬ್‍ನ ಒರ್ ಅಣ್ಣತಮ್ಮಣನ ಇಂಞೊರ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಕ್ ವಿರೋದವಾಯಿತ್ ದೇವಡ ಮಕ್ಕಳಾಯಿತ್ ಇಲ್ಲತಯಿಂಗಡ ಮಿಂಞತ್‍ ಜಗಳ ಮಾಡ್‍ವಿರಲ್ಲ.

⁷ನಿಂಗ ಒಬ್ಬಂಗ್ ವಿರೋದವಾಯಿತ್ ಪುಕಾರ್ ಕೊಡ್‍ಪಕಲೆ, ನಿಂಗ ಚೋತ್ ಪೋಯಿತುಳ್ಳಿರ. ನಿಂಗಕ್ ವಿರೋದವಾಯಿತ್ ಅನ್ಯಾಯ ಮಾಡ್‌ವಯಿಂಗಳ ನಿಂಗ ಎನ್ನಂಗ್ ಸಯಿಸುಲೆ? ನಿಂಗಳ ವಂಚನೆ ಮಾಡ್‌ವಯಿಂಗಕ್ ನಿಂಗ ಎನ್ನಂಗ್ ಬುಟ್ಟ್ ಕೊಡ್‍ತಂಡಿಲ್ಲೆ?

⁸ಆಂಡ ಬದ್‍ಲ್, ನಿಂಗಳೇ ಯೇಸುನ ನಂಬ್‍ನ ಆತ್ಮೀಯ ಅಣ್ಣತಮ್ಮಣಂಗಕ್ ಅನ್ಯಾಯ ಮಾಡಿಯಂಡ್, ಒಬ್ಬನ ಒಬ್ಬ ವಂಚನೆ ಮಾಡಿಯಂಡುಳ್ಳಿರ.

⁹ಅನೀತಿ ಮಾಡ್‌ವಯಿಂಗ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೇಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ನಿಂಗ ಮೋಸ ಪೋಕತಿ; ಕಳ್ಳ ಸಂಬಂದ ಉಳ್ಳಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವ ಆಣಾಳ್‌ಂಗ, ಆಣ್-ಆಣ್, ಪೊಣ್ಣಾಳ್-ಪೊಣ್ಣಾಳ್ ವ್ಯಬಿಚಾರ ಮಾಡ್‌ವಯಿಂಗ,

¹⁰ಕಳ್ಳಂಗ, ಅತಿ ಆಸೆ ಉಳ್ಳಯಿಂಗ, ಕುಡ್‍ಕಂಗ, ತಪ್ಪಿಲ್ಲತದ್‍ನ ತಪ್ಪ್‍ೕಂದ್ ಎಣ್ಣ್‌ವಯಿಂಗ, ಲೂಟಿಕಾರಂಗ, ಈಂಗ ದಾರೂ ದೇವಡ ರಾಜ್ಯಕ್ ಬಾದ್ಯತೆ ಉಳ್ಳಯಿಂಗಳಾಯಿತ್ ಇಪ್ಪುಲೆ.

¹¹ನಿಂಗಡಲ್ಲಿ ಚೆನ್ನ ಜನ ಇನ್ನನೆ ಇಂಜಿರ. ಆಚೇಂಗಿಯು, ದೇವ ಇಕ್ಕ ನಿಂಗಳ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲು, ನಂಗಡ ದೇವಡ ಆತ್ಮತ್ಂಜಲು ಕತ್ತಿತ್, ಪವಿತ್ರವಾನಯಿಂಗಳಾಯಿತು, ನೀತಿವಂತಯಿಂಗಳಾಯಿತು ಮಾಡ್‍ಚಿ.

¹²ಈ ಲೋಕತ್‍ಲ್ ಎಲ್ಲಾನ ಅನುಬವಿಚಿಡುವಕ್ ನಾಕ್ ಅನುಮತಿ ಉಂಡ್, ಆಚೇಂಗಿ ಎಲ್ಲಾ ನಾಕ್ ಪ್ರಯೋಜನ ಆಪುಲೆ. ಎಲ್ಲಾನ ಮಾಡ್‌ವಕ್ ನಾಕ್ ಅದಿಕಾರ ಉಂಡ್, ಆಚೇಂಗಿಯು ಒಂದಾಂಗ್ ಸಹ ನಾನ್ ಗುಲಾಮನಾಯಿತ್‌ಪ್ಪುಲೆ.

¹³ನಿಂಗ ಕೆಲಕಾಯಿತ್ ಕೂಳ್, ಕೂಳ್‍ಕಾಯಿತ್ ಕೆಲಾಂದ್ ಎಣ್ಣುವಿರ, ಅದ್ ನೇರ್. ಆಚೇಂಗಿಯು, ದೇವ ಅದ್ ದಂಡನೂ ಪಾಳ್ ಮಾಡ್‌ವ. ಆನಗುಂಡ್ ನಿಂಗ, ಈ ತಡಿನ ಲೈಂಗಿಕ ಕುಶಿಕಾಯಿತ್‍ೕಂದ್‌ ಎಣ್ಣ್‌ವಕ್ ಕಯ್ಯುಲೆ. ಅದ್ ಒಡೆಯಂಗಾಯಿತ್ ಮಾಡ್‍ನದ್, ಒಡೆಯ ನಂಗಡ ತಡಿಕ್ ಜವಾಬ್ದಾರನಾಯಿತ್ ಉಂಡ್.

¹⁴ದೇವ ಒಡೆಯನ, ಚಾವ್‍ಯಿಂಜ ಎಪ್ಪ್‌ಚಿಟ್ಟನೆಕೆ, ನಂಗಡ ತಡೀನ ಸಹ ಅದೇ ಶಕ್ತಿಲ್ ಎಪ್ಪುವ.

¹⁵ನಿಂಗಡ ತಡಿ ಕ್ರಿಸ್ತಂಡ ತಡೀರ ಬಾಗವಾಯಿತುಂಡ್‍ೕಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ಅಕ್ಕ ನಾನ್, ಅದ್‍ನ ಎಡ್‍ತಂಡ್ ಪೋಯಿತ್ ವ್ಯಬಿಚಾರಿಯಡ ತಡಿಕ್ ಬಾಗವಾಯಿತ್ ಕೂಟ್‍ವಕಯ್ಯುವ? ಕಯ್ಯುಲೆ!

¹⁶ವ್ಯಬಿಚಾರಿಯಡ ಕೂಡೆ ಕೂಡ್‍ವಂವೊ, ಅವಡ ಕೂಡೆ ಒರೇ ತಡಿಯಾಯಿತ್ ಇಪ್ಪಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ದಂಡಾಳು ಒರೇ ತಡಿಯಾಯಿತ್‌ಪ್ಪಾಂದ್ ದೇವಡ ವಾಕ್ಯತ್‍ಲ್ ಎಣ್ಣಿತುಂಡಲ್ಲ?[8]

¹⁷ಆಚೇಂಗಿ ಒರ್ ಮನುಷ್ಯ ಕ್ರಿಸ್ತಂಡ ಕೂಡೆ ಕೂಡ್‌ನಕ, ಅಂವೊ ಕ್ರಿಸ್ತಂಡ ಆತ್ಮತ್‍ರ ಕೂಡೆ ಒಂದಾಯಿತ್‌ಪ್ಪ.

¹⁸ಲೈಂಗಿಕ ಪಾಪತ್ಂಜ ಓಡಿ ಪೋಯಿ! ಒರ್ ಮನುಷ್ಯ ಮಾಡ್‌ವ ಬೋರೆ ಏದ್ ಪಾಪವು ಅಂವೊಂಡ ತಡಿಕ್ ಪೊರಮೆ ಆಯಿತಿಪ್ಪ, ಆಚೇಂಗಿ ಲೈಂಗಿಕ ಪಾಪ ಮಾಡ್‌ವಂವೊ ತಾಂಡ ಸ್ವಂತ ತಡಿಕ್ ವಿರೋದವಾಯಿತ್ ಪಾಪ ಮಾಡ್‌ವ.

¹⁹ನಿಂಗಡ ತಡಿ ಪವಿತ್ರಾತ್ಮ ವಾಸ ಮಾಡ್‌ವ ಆಲಯವಾಯಿತ್ ಉಂಡ್‍ೕಂದು, ಪವಿತ್ರಾತ್ಮತ್‍ನ ನಿಂಗಕ್ ದೇವ ಕೊಡ್‍ತತ್‍ೕಂದು ನಿಂಗಕ್ ಗೊತ್ತ್‌ಲ್ಲೆಯಾ? ಆನಗುಂಡ್ ನಿಂಗ ನಿಂಗಕ್ ಸ್ವಂತ ಅಲ್ಲ.

²⁰ದೇವ ನಿಂಗಳ ಬಲ್ಯ ಕ್ರಯ ಕೊಡ್‌ತಿತ್ ಎಡ್‍ತ್‍ಚಿ, ಆನಗುಂಡ್ ನಿಂಗಡ ತಡಿಯಿಂಜ ದೇವನ ಮಹಿಮೆಪಡ್‍ತಂಡು.