Read Kodava 1 ಕೊರಿಂಥ 7 Bible Online

1 ಕೊರಿಂಥ 7 - Kodava bible

1 ಕೊರಿಂಥ 7

¹ನಿಂಗ ನಾಕ್ ಒಳ್‍ದ್‍ನ ವಿಷಯಕ್, ನಾನ್ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ: ಒರ್ ಮನುಷ್ಯ, ಮಂಗಲ ಕಯಿಕತೆ ಇಪ್ಪದ್ ನಲ್ಲದ್.

²ಆಚೇಂಗಿ, ಇಚ್ಚಕ್ ಲೈಂಗಿಕ ಪಾಪತ್‍ರ ಸೋದನೆ ಉಳ್ಳಗುಂಡ್ ಪ್ರತಿಯೊರ್ ಮನುಷ್ಯಂಗು ಒರ್ ಸ್ವಂತ ಪೊಣ್ಣ್ ಬೋಂಡು, ಪ್ರತಿಯೊರ್ ಪೊಣ್ಣಾಳ್‍ಕು ಒರ್ ಸ್ವಂತ ವಡಿಯ ಬೋಂಡು.

³ಒರ್ ವಡಿಯ, ಅಂವೊಂಡ ಪೊಣ್ಣ್‌ಕ್, ವಡಿಯಂಡ ಕರ್ತವ್ಯತ್‍ನ ಪೂರೈಚಿಡಂಡು. ಅನ್ನನೆ ಒರ್ ಪೊಣ್ಣ್ ಅವಡ ಕರ್ತವ್ಯತ್‍ನ ಅವಡ ವಡಿಯಂಗ್ ಪೂರೈಚಿಡಂಡು.

⁴ಒರ್ ಪೊಣ್ಣ್, ಅವಡ ತಡಿಕ್ ಹಕ್ಕ್‌ದಾರಿ ಅಲ್ಲ, ಅವಡ ವಡಿಯನೇ ಅವಡ ತಡಿಕ್ ಹಕ್ಕ್‌ದಾರ. ಅನ್ನನೆ ವಡಿಯ ಅಂವೊಂಡ ತಡಿಕ್ ಹಕ್ಕ್‌ದಾರನಲ್ಲ, ಅಂವೊಂಡ ಪೊಣ್ಣ್ ಅಂವೊಂಡ ತಡಿಕ್ ಹಕ್ಕ್‌ದಾರಿ.

⁵ಪ್ರಾರ್ಥನೆಲ್[9] ಚೆನ್ನ ಕಾಲ ಇರಂಡೂಂದ್ ನಿಂಗ ದಂಡಾಳು ತೀರ್ಮಾನ ಮಾಡಿತ್ ದಂಡಾಳು ಒತ್ತತೇಂಗಿ ಮಾತ್ರ ಚೆನ್ನ ಕಾಲ ಬೋರೆ ಬೋರೆಯಾಯಿತ್ ಇಪ್ಪಕ್ ಆಪ. ನಿಂಗಕ್ ತನ್ನಡಕ ಇಲ್ಲತಗುಂಡ್ ಬೋರೆಯಿಂಗಡ ಕೂಡೆ ತಪ್ಪ್ ಮಾಡ್‌ವನೆಕೆ ಸೈತಾನ ನಿಂಗಳ ಸೋದನೆ ಮಾಡತನೆಕೆ ಪುನಃ ಕೂಡಿ ಬಂದಿತ್ ಒಕ್ಕಚೆ ಇರಂಡು.

⁶ನಾನ್ ನಿಂಗಕ್ ಇದ್‍ನ ಒರ್ ಆಲೋಚನೆಯಾಯಿತ್ ಎಣ್ಣಿಯಂಡ್ ಉಂಡ್, ಇದ್ ಒರ್ ಆಜ್ಞೆ ಅಲ್ಲ.

⁷ನಾಡನೆಕೆ ಎಲ್ಲಾರು ಇರಂಡೂಂದ್ ನಾಕ್ ಆಸೆ. ಆಚೇಂಗಿಯು, ದೇವ ಒಬ್ಬೊಬ್ಬಂಗಕು ಬೋರೆ ಬೋರೆ ವರ ತಂದಿತುಂಡ್. ಒಬ್ಬಂಗ್ ಒರ್ ತರ ವರ, ಇಂಞೊಬ್ಬಂಗ್, ಇಂಞೊರ್ ತರ ವರ.

⁸ನಾನ್ ಮಂಗಲ ಕಯಿಕತಯಿಂಗಕ್ ಪಿಂಞ ವಿದವೆಯಂಗಕ್ ಒರ್ ವಿಷಯ ಎಣ್ಣ್‌ವಿ: ನಾನ್ ಉಳ್ಳನೆಕೆ ನಿಂಗಳು ಒಂಟಿಯಾಯಿತ್ ಇಪ್ಪದ್ ನಲ್ಲದ್.

⁹ಆಚೇಂಗಿ, ನಿಂಗಕ್ ತನ್ನಡಕತ್‍ಲ್ ಇಪ್ಪಕ್ ಕಯ್ಯುಲೇಂದೆಣ್ಣ್‌ಚೇಂಗಿ, ನಿಂಗ ಮಂಗಲ ಕಯಿಕಲು; ಎನ್ನಂಗೆಣ್ಣ್‌ಚೇಂಗಿ, ನಿಂಗ ಒಂಟಿ ಬದ್‍ಕ್ ಬದ್‍ಕಿಯಂಡ್ ತಡೀರ ಇಚ್ಛೆಲ್ ಬೆಂಜಿ ಪೋಪಗಿಂಜ ಮಂಗಲ ಕಯಿಪದೇ ನಲ್ಲದ್.

¹⁰ಮಂಗಲ ಆನಯಿಂಗಕ್ ಒರ್ ಆಜ್ಞೆ ಎಣ್ಣ್‌ವಿ. ಇದ್ ನಾಡ ಆಜ್ಞೆ ಅಲ್ಲ ಆಚೇಂಗಿ ಒಡೆಯಂಡದ್. ಒರ್ ಪೊಣ್ಣ್ ವಡಿಯನ ಬುಡ್‌ವಕ್ಕಾಗ.

¹¹ಅನ್ನನೆ ಮಾಡ್‍ಚೇಂಗಿ ಅವ ಪುನಃ ಮಂಗಲ ಕಯಿಕತೆ ಒಬ್ಬಳೇ ಇಕ್ಕಂಡು, ಇಲ್ಲತಪೋಚೇಂಗಿ, ವಡಿಯಂಡ ಕೂಡೆ ಸಮಾದಾನತ್‌ಲ್‌ ಬದ್‍ಕಂಡು. ವಡಿಯ ಸಹ ಪೊಣ್ಣ್‌ನ ಬುಡ್‌ವಕ್ಕಾಗ.

¹²ಮಂಗಲ ಆನ ಪಿಂಞ ಕ್ರಿಸ್ತಂಗಳಾನ ಜನಕ್, ಒಡೆಯಂಡದ್ ಅಲ್ಲ, ನಾಡ ಅಬಿಪ್ರಾಯ ಎಂತ ಎಣ್ಣ್‌ಚೇಂಗಿ: ಕ್ರಿಸ್ತಂಗ್ ಕೂಡ್‍ನ ಒಬ್ಬಂಡ ಪೊಣ್ಣ್, ಕ್ರಿಸ್ತನ ನಂಬತ ಪೊಣ್ಣಾಳಾಯಿತ್ಂಜತೇಂಗಿಯು, ಅವ ಅಂವೊಂಡ ಕೂಡೆ ಬದ್‌ಕ್‌ವೀಂದ್ ಒತ್ತಂಡಕ ಅವಳ ಅಂವೊ ಬುಡ್‌ವಕ್ಕಾಗ.

¹³ಅನ್ನನೆ ಒರ್ ಪೊಣ್ಣ್‌ಕ್ ಕ್ರಿಸ್ತನ ನಂಬತ ಒರ್ ವಡಿಯ ಇಂಜತೇಂಗಿ, ಅಂವೊ ಅವಡ ಕೂಡೆ ಬದ್‌ಕ್‌ವೀಂದ್ ಒತ್ತಂಡಕ ಅಂವೊನ ಆ ಪೊಣ್ಣ್ ಬುಡ್‌ವಕ್ಕಾಗ.

¹⁴ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತನ ನಂಬತ ವಡಿಯನ ಅಂವೊಂಡ ಪೊಣ್ಣ್‌ರಗುಂಡ್ ದೇವ ಅಂವೊನ ಪವಿತ್ರವಾನಂವೊನಾಯಿತ್ ಮಾಡ್‌ವ. ಕ್ರಿಸ್ತನ ನಂಬತ ಪೊಣ್ಣ್‌ನ ಅವಡ ವಡಿಯನಗುಂಡ್ ದೇವ ಅವಳ ಶುದ್ದ ಮಾಡ್‌ವ. ಅನ್ನನೆ ಇಲ್ಲತೆಪೋಚೇಂಗಿ, ಅಯಿಂಗಡ ಮಕ್ಕ ಎನ್ನನೆ ಶುದ್ದವಾಯಿತ್ ಇಪ್ಪ? ಇಕ್ಕ ನೋಟಿ, ಅಯಿಂಗಡ ಮಕ್ಕಳ ದೇವ ಶುದ್ದ ಮಾಡಿತ್‌ಲ್ಲೆಯಾ?

¹⁵ಆಚೇಂಗಿ, ಕ್ರಿಸ್ತನ ನಂಬತ ಪೊಣ್ಣ್ ಅಥವ ವಡಿಯ, ಕ್ರಿಸ್ತನ ನಂಬ್‍ನ ವಡಿಯನ ಅಥವ ಪೊಣ್ಣ್‌ನ ಬುಟ್ಟಿತ್ ಪೋಂಡೂಂದ್ ತೀರ್ಮಾನ ಮಾಡ್‍ಚೇಂಗಿ, ಅಯಿಂಗ ಅನ್ನನೆ ಮಾಡಡ್. ಅನ್ನನೆ ಅಯಿಂಗ ಮಾಡ್‌ವಕ, ಕ್ರಿಸ್ತನ ನಂಬ್‍ನಯಿಂಗ ಅಯಿಂಗಳ ಪೋಪಕ್ಕಾಗಾಂದ್ ಒತ್ತಾಯ ಮಾಡಂಡ. ದೇವ ನಂಗಳ ಸಮಾದಾನತ್‍ಲ್ ಜೀವನ ಮಾಡ್‌ವಕೇ ಕಾಕಿತುಂಡ್.

¹⁶ಪೊಣ್ಣಾಳುವಳೇ, ಕ್ರಿಸ್ತಂಡ ಮೇಲೆ ನಂಬಿಕೆ ಇಲ್ಲತೆ ವಡಿಯಂಡ ಕೂಡೆ ನೀನ್ ಬದ್‍ಕ್‍ವಗುಂಡ್ ಅಂವೊಂಗ್ ರಕ್ಷಣೆ ಕ್‍ಟ್ಟ್‌ವಾಂದ್ ನೀನ್ ಎನ್ನನೆ ಎಣ್ಣ್‌ವಕ್ ಕಯ್ಯು? ಅಥವ ವಡಿಯಂಗಳೇ, ಕ್ರಿಸ್ತಂಡ ಮೇಲೆ ನಂಬಿಕೆ ಇಲ್ಲತ ಪೊಣ್ಣ್‌ರ ಕೂಡೆ ನೀನ್ ಬದ್‍ಕ್‍ವಗುಂಡ್ ಅವಕ್ ರಕ್ಷಣೆ ಕ್‍ಟ್ಟ್‌ವಾಂದ್ ನೀನ್ ಎನ್ನನೆ ಎಣ್ಣ್‌ವಕ್ ಕಯ್ಯು?

¹⁷ದೇವ ನಿಂಗಕ್ ಎಂತ ಬದ್‍ಕ್‍ನ ಪಾಲ್ ಮಾಡಿತ್ ತಂದಿತುಂಡೋ ಅನ್ನನೆ ನಿಂಗ ಬದ್‍ಕ್‍ವದ್ ನಲ್ಲದ್. ದೇವ ನಿಂಗಳ ಎನ್ನನೆ ಕಾಕಿತುಂಡೋ ಅನ್ನನೆ ಬದ್‍ಕ್‍ವದ್ ನಲ್ಲದ್. ಇನ್ನನೆ ನಾನ್ ಎಲ್ಲಾ ಸಬೇಕು ಬೋದನೆ ಮಾಡಿಯಂಡುಳ್ಳ.

¹⁸ಸುನ್ನತಿ ಆನ ಮನುಷ್ಯ ಕ್ರಿಸ್ತನ ನಂಬಿತ್ ಬಾತೇಂಗಿ, ಆ ಮನುಷ್ಯ ಸುನ್ನತಿ ಆನ ಮನುಷ್ಯಂಡನೆಕೆ ಇರಡ್. ಒರ್ ಮನುಷ್ಯ ಸುನ್ನತಿ ಮಾಡತಂವೊನಾಯಿತ್ ಕ್ರಿಸ್ತನ ನಂಬಿತ್ ಬಾತೇಂಗಿ, ಆ ಮನುಷ್ಯ ಸುನ್ನತಿ ಮಾಡಂಡೂಂದ್ ಇಲ್ಲೆ.

¹⁹ನೀಕ್ ಸುನ್ನತಿ ಆಯಿತ್ಂಜತೇಂಗಿಯು, ಸುನ್ನತಿ ಆಕತ ಇಂಜತೇಂಗಿಯು ಅದ್ ನಿಂಗಳ ದೇವಡ ಪಕ್ಕ ಬಲ್ಯಂಗಳಾಯಿತ್ ಕಾಟ್‌ಲೆ. ಅದ್ಂಡ ಬದ್‍ಲ್ ದೇವಡ ಆಜ್ಞೆರನೆಕೆ ಮಾಡ್‌ವದೇ ಮುಕ್ಯ.

²⁰ದೇವ ನಿಂಗಳ ಕಾಕ್‍ವಕ ಏದ್ ಸ್ತಿತಿಲ್ ಇಂಜಿರೋ ಅನ್ನನೆ ಇರಿ.

²¹ದೇವ ನಿಂಗಳ ಕಾಕ್‍ವಕ ನಿಂಗ ಅಡಿಯಾಳಾಯಿತ್ ಇಂಜತೇಂಗಿ, ನಿಂಗ ಅದ್ಂಡ ವಿಷಯತ್ ಬೇಜಾರ್ ಮಾಡತಿ; ಅಲ್ಲಿಂಜ ಸ್ವಾತಂತ್ರ ಆಪಕ್ ಕಯ್ಯುವೇಂಗಿ ಅನ್ನನೆ ಮಾಡಿ.

²²ದೇವ ನಿಂಗಳ ಕಾಕ್‍ವಕ ನಿಂಗ ಒರ್ ಅಡಿಯಾಳಾಯಿತ್ ಇಂಜತೇಂಗಿಯು, ಒಡೆಯಂಡಲ್ಲಿ ನಿಂಗ ಇಕ್ಕ ಸ್ವಾತಂತ್ರವಾಯಿತುಳ್ಳಿರ. ಅನ್ನನೆ ದೇವ ನಿಂಗಳ ಕಾಕ್‍ವಕ ನಿಂಗ ಸ್ವಾತಂತ್ರ ಮನುಷ್ಯನಾಯಿತ್ ಇಂಜತೇಂಗಿಯು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಅಂವೊ ಎಣ್ಣ್‌ವಾನ ಮಾಡ್‌ವಗುಂಡ್ ನಿಂಗ ಇಕ್ಕ ಅಂವೊಂಗ್ ಅಡಿಯಾಳಾಯಿತುಳ್ಳಿರ.

²³ದೇವ[10] ನಿಂಗಳ ಬೆಲೆ ಕೊಡ್‌ತಿತ್ ಎಡ್‌ತಿಯೆ; ನಿಂಗ ಮನುಷ್ಯಂಡ ಅಡಿಯಾಳಾಯಿತ್ ಅಯಿಂಗ ಎಣ್ಣ್‌ವಾನೆಲ್ಲ ಮಾಡತಿ.

²⁴ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ದೇವ ನಿಂಗಳ ಕಾಕ್‍ವಕ್ ಮಿಂಞ ಏದ್ ಸ್ತಿತಿಲ್ ಇಂಜಿರೋ, ಅನ್ನನೆ ಇಕ್ಕಲು ದೇವಡ ಮಿಂಞ ಇರಿ.

²⁵ಇಕ್ಕ ಮಂಗಲ ಕಯಿಕತೆ ಉಳ್ಳ ಕನ್ನಿ ಮೂಡಿಯಂಗಡ ವಿಷಯತ್‍ಲ್, ನಾಕ್ ಒಡೆಯಂಡ ಆಜ್ಞೆ ಕ್‍ಟ್ಟಿತ್ತ್‌ಲ್ಲೆ. ಆಚೇಂಗಿ, ನಾನ್ ಎಣ್ಣ್‌ವದ್ ಸತ್ಯವಾಯಿತ್ ಇಪ್ಪನೆಕೆ, ನಾಕ್ ದೇವ ಕರುಣೆ ಕಾಟಿಯಂಡ್ ಉಳ್ಳಾಂಗ್, ನಾಡ ಅಬಿಪ್ರಾಯತ್‍ನ ಎಣ್ಣ್‌ವಿ.

²⁶ಅದ್ ಎಂತ ಎಣ್ಣ್‌ಚೇಂಗಿ, ಇಕ್ಕತ್‍ರ ಕಾಲತ್‍ಲ್ ಆಪ ಕಷ್ಟತ್‍ನ ನೋಟ್‍ಚೇಂಗಿ, ಒರ್ ಮನುಷ್ಯ ಮಂಗಲ ಆಕತೆ ಅನ್ನನೆ ಇಪ್ಪದ್ ನಲ್ಲದ್‍ೕಂದ್ ನಾನ್ ಗೇನ ಮಾಡ್‌ವಿ.

²⁷ನೀಕ್ ಪೊಣ್ಣ್ ಇಂಜತೇಂಗಿ ಅವಳ ಬುಡ್‌ವಕ್ ಬಟ್ಟೆ ನೋಟಂಡ. ನೀಕ್ ಪೊಣ್ಣ್ ಇಲ್ಲತಿಪ್ಪಕ, ಮಂಗಲ ಕಯಿಪಕ್ ಗೇನ ಮಾಡತೆ.

²⁸ಒರ್ ಮನುಷ್ಯ ಮಂಗಲ ಕಯಿಚತೇಂಗಿ, ಅದ್ ಪಾಪ ಅಲ್ಲ, ಒರ್ ಕನ್ನಿ ಮೂಡಿ ಮಂಗಲ ಕಯಿಚ್‍ತೇಂಗಿಯು ಅದ್ ಪಾಪ ಅಲ್ಲ; ಆಚೇಂಗಿಯು ಮಂಗಲ ಕಯಿಪಯಿಂಗಕ್ ದುಂಬ ತೊಂದರೆ ಉಳ್ಳಗುಂಡ್, ನಿಂಗ ಆ ತೊಂದರೆಯಿಂಜ ಬಚಾವ್ ಆಂಡೂಂದ್ ನಾಕ್ ಆಸೆ.

²⁹ನಾಡ ಅಣ್ಣತಮ್ಮಣಂಗಳೇ, ನಾನ್ ಎಣ್ಣಿಯಂಡುಳ್ಳದ್ ಎಂತ ಎಣ್ಣ್‌ಚೇಂಗಿ: ನಂಗಕ್ ದುಂಬ ಸಮಯ ಇಲ್ಲೆ. ಆನಗುಂಡ್, ಇಕ್ಕಯಿಂಜ ಪೊಣ್ಣ್ ಉಳ್ಳ ಆಣಾಳ್‍ವ, ಪೊಣ್ಣ್ ಇಲ್ಲತನೆಕೆ ಇಕ್ಕಂಡು.

³⁰ಮೊರಟಂಡುಳ್ಳಯಿಂಗ ಮೊರಡತಯಿಂಗಡನೆಕೆಯು, ಕುಶೀಲ್ ಉಳ್ಳಯಿಂಗ ಕುಶೀಲ್ ಇಲ್ಲತಯಿಂಗಡನೆಕೆಯು ಪಿಂಞ ಎಂತಾಚೇಂಗಿ ಎಡ್‍ಪಯಿಂಗ ಅದ್‍ನ ಎಕ್ಕಾಲು ಅಯಿಂಗಡ ಪಕ್ಕ ಬೆಕ್ಕತನೆಕೆಯು ಇಕ್ಕಂಡು.

³¹ಈ ಲೋಕತ್‍ರ ಸೊತ್ತ್‌ನ ಅನುಬವಿಚಿಡ್‍ವಯಿಂಗ ಅದ್‍ನ ಅನುಬವಿಚಿಡತಯಿಂಳಾಯಿತ್ ಇಕ್ಕಂಡು. ಎನ್ನಂಗೆಣ್ಣ್‌ಚೇಂಗಿ, ಈ ಲೋಕ ಇಕ್ಕ ಉಳ್ಳನೆಕೆ ದುಂಬ ಕಾಲ ಇಪ್ಪುಲೆ.

³²ನಿಂಗ ಒರ್ ಬೇಜಾರವು ಇಲ್ಲತಯಿಂಗಳಾಯಿತ್ ಬದ್‍ಕಂಡೂಂದ್ ನಾನ್ ಇನ್ನನೆ ಕುಶೀಲ್ ಎಣ್ಣ್‌ವಿ. ಮಂಗಲ ಕಯಿಕತ ಮನುಷ್ಯ, ಒಡೆಯನ ಎನ್ನನೆ ಇಂಞು ಕುಶಿ ಪಡ್‍ತ್‍ವಕ್ ಕಯ್ಯೂಂದ್ ಒಡೆಯಂಡ ವಿಷಯತ್‍ನ ಗೇನ ಮಾಡಿಯಂಡಿಪ್ಪ.

³³ಮಂಗಲ ಆನಂವೊ ಈ ಲೋಕತ್‍ರ ವಿಷಯತ್‍ನ ನೋಟಿಯಂಡ್, ಅಂವೊಂಡ ಪೊಣ್ಣ್‌ನ ಎನ್ನನೆ ಕುಶಿ ಪಡ್‍ತ್‍ವಕ್ ಕಯ್ಯೂಂದ್ ಗೇನ ಮಾಡಿಯಂಡಿಪ್ಪ. ಅಂವೊಂಡ ನೋಕ ಬದ್‍ಲಾಯಿತ್‌ಪ್ಪ.

³⁴ಅನ್ನನೆ, ಒರ್ ಕನ್ನಿ ಮೂಡಿಕ್ ಪಿಂಞ ಒರ್ ಪೊಣ್ಣ್‌ಕ್ ವ್ಯತ್ಯಾಸ ಉಂಡ್. ಒರ್ ಕನ್ನಿ ಮೂಡಿ ಅವಡ ತಡೀನ, ಆತ್ಮತ್‌ನ ಪವಿತ್ರವಾಯಿತ್ ಕಾಪಾಡಿಯಂಡ್ ಒಡೆಯಂಡ ವಿಷಯತ್‍ನ ಗೇನ ಮಾಡಿಯಂಡಿಪ್ಪ. ಆಚೇಂಗಿ ಒರ್ ಪೊಣ್ಣ್, ಈ ಲೋಕತ್‍ರ ವಿಷಯತ್‍ನೇ ಗೇನ ಮಾಡಿಯಂಡ್, ಅವಡ ವಡಿಯನ ಎನ್ನನೆ ಕುಶಿ ಪಡ್‍ತ್‍ವಕ್ ಕಯ್ಯೂಂದ್ ಗೇನ ಮಾಡಿಯಂಡಿಪ್ಪ.

³⁵ನಿಂಗಳ ತಡ್‌ಪಕಾಯಿತ್ ಅಲ್ಲ ಆಚೇಂಗಿ, ನಿಂಗಕ್ ಸಹಾಯ ಮಾಡ್‌ವಕಾಯಿತ್ ನಾನ್ ಇದ್‍ನ ಎಣ್ಣಿಯಂಡ್ ಉಳ್ಳ. ನಿಂಗಡ ಬದ್‍ಕ್‍ಕ್ ಏದ್ ತೊಂದರೆಯು ಇಲ್ಲತೆ, ಒಡೆಯನ ಪುಡ್‍ಚಂಡ್ ಬದ್‍ಕ್‍ವನೆಕೆ ಆಪಲ್ಲಾ?

³⁶ಒಬ್ಬ[11], ತಾಂಡ ಕನ್ನಿ ಮೂಡಿಕ್ ಮಂಗಲತ್‍ರ ವಯಸ್ ಮೀರಿ ಪೋಚೀಂದ್ ಗೇನ ಮಾಡಿತ್, ಅವಕ್ ಮಂಗಲ ಬೋಂಡಾಂದ್ ತೀರ್ಮಾನ ಮಾಡಿತ್ಂಜತೇಂಗಿಯು ಇಕ್ಕ, ಅವ ಮಂಗಲ ಮಾಡತೆ ಇಪ್ಪದ್ ಸರಿ ಅಲ್ಲ, ಅವಕ್ ಮಂಗಲ ಮಾಡಿತೇ ಆಂಡೂಂದ್ ಗೇನ ಮಾಡ್‍ಚೇಂಗಿ, ಅಂವೊಂಡ ಮನಸ್ಸ್‌ಲ್ ಉಳ್ಳನೆಕೆ ಮಾಡಡ್; ಅನ್ನನೆ ಮಾಡ್‍ಚೇಂಗಿ ಅದ್ ಪಾಪ ಅಲ್ಲ. ಮಂಗಲ ಮಾಡಡ್.

³⁷ಆಚೇಂಗಿಯು, ಅನ್ನನೆ ಅವ ಮಂಗಲ ಮಾಡತೆ ಇಪ್ಪದ್ ಅವಕ್ ನಲ್ಲದ್ ಪಿಂಞ ಅವ ಮಂಗಲ ಮಾಡ್‌ವಕ್ ಏದ್ ಅವಸ್ಯವು ಇಲ್ಲೇಂದ್ ತೀರ್ಮಾನ ಮಾಡ್‍ಚೇಂಗಿ, ಅನ್ನನೆ ಮಾಡ್‌ವಕ್ ಅಂವೊಂಗ್ ಎಲ್ಲಾ ಅದಿಕಾರವು ಉಂಡ್. ಅನ್ನನೆ ಅಂವೊ ಮಾಡ್‍ಚೇಂಗಿ ಅಂವೊ ನಲ್ಲದ್ ಮಾಡಿಯಂಡುಂಡ್.

³⁸ಆನಗುಂಡ್, ಅವಳ ಮಂಗಲ ಮಾಡಿಕೊಡ್‍ಪಂವೊ ಅವಕ್ ನಲ್ಲದ್ ಮಾಡಿಯಂಡುಂಡ್, ಮಂಗಲ ಮಾಡಿ ಕೊಡ್‍ಕತಂವೊ ಅವಕ್ ಇಂಞು ದುಂಬ ನಲ್ಲದ್ ಮಾಡಿಯಂಡುಂಡ್.

³⁹ಒರ್ ಪೊಣ್ಣ್‌ರ ವಡಿಯ ಬದ್‌ಕಿತ್ ಇಪ್ಪಕತ್ತನೆ, ಮಂಗಲತ್‍ರ ಪ್ರಮಾಣಕ್ ಅವ ಒಳಪಟ್ಟಿತುಂಡ್. ಆಚೇಂಗಿ ಅವಡ ವಡಿಯ ಚತ್ತ್ ಪೋಪಕ, ಅವಕ್ ಪುನಃ ಮಂಗಲ ಕಯಿಪಕ್ ಕುಶಿ ಇಂಜತೇಂಗಿ ಮಂಗಲ ಕಯಿಕಡ್. ಅನ್ನನೆ ಮಾಡ್‌ವದಾಚೇಂಗಿ, ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತುಳ್ಳ ಒಬ್ಬನ ಮಾಡಂಡು.

⁴⁰ನಾಡ ಅಬಿಪ್ರಾಯತ್‌ರನೆಕೆ, ಅವ ಪುನಃ ಮಂಗಲ ಕಯಿಕತೆ ಇಂಜತೇಂಗಿ, ಅದ್ ನಲ್ಲದ್‍ೕಂದ್ ನಾಕ್ ಆಪ. ನಾನ್ ಇನ್ನನೆ ಎಣ್ಣ್‌ವಕ್ ದೇವಡ ಆತ್ಮವೇ ನನ್ನ ನಡ್‍ತಿಯಂಡುಂಡ್‍ೕಂದ್ ನಂಬ್‌ವಿ.