Read Kodava 1 ಕೊರಿಂಥ 9 Bible Online

1 ಕೊರಿಂಥ 9 - Kodava bible

1 ಕೊರಿಂಥ 9

¹ನಾನ್ ದಾರ್‌ಕ್ ಅಡಿಯಾಳಾಯಿತ್ಂಜ? ನಾನ್ ಅಪೊಸ್ತಲನಲ್ಲಾ? ನಾನ್ ನಂಗಡ ಒಡೆಯನಾನ ಯೇಸುನ ಕಂಡಿತಿಲ್ಲೆಯಾ? ನಾನ್ ಮಾಡ್‍ನ ಒಡೆಯಂಡ ಸೇವೇರ ಫಲವಾಯಿತ್ ನಿಂಗ ಉಳ್ಳಿರಲ್ಲ?

²ಬೋರೆಯಿಂಗಕ್ ನಾನ್ ಅಪೊಸ್ತಲನಾಯಿತ್ ಇಲ್ಲತೆ ಇಂಜತೇಂಗಿಯು, ನಿಂಗಕ್ ನಾನ್ ಕಂಡಿತವಾಯಿತ್ ಅಪೊಸ್ತಲನಾಯಿತುಂಡಲ್ಲ? ನಾನ್ ಕ್ರಿಸ್ತಂಡ ಅಪೊಸ್ತಲಾಂದ್ ಎಣ್ಣ್‌ವಕ್ ನಿಂಗ ಒರ್ ಗುರ್‌ತಾಯಿತ್ ಉಳ್ಳಿರ.

³ನಾಡ ಅಪೊಸ್ತಲ ಅದಿಕಾರತ್‍ರ ಮೇಲೆ ಪ್ರಶ್ನೆ ಮಾಡ್‌ವಯಿಂಗಕ್ ನಾಡ ಜವಾಬ್ ಎಂತ ಎಣ್ಣ್‌ಚೇಂಗಿ:

⁴ನಂಗ ನಿಂಗಡ ಮನೆಲ್ ಒಳಿಂಜಿತ್, ಕುಡಿಪಕ್ ತಿಂಬಕ್ ನಂಗಕ್ ಅದಿಕಾರ ಇಲ್ಲೆಯ?

⁵ಬೋರೆ ಅಪೊಸ್ತಲಂಗಳು, ಒಡೆಯಂಡ ತಮ್ಮಣಂಗಳು, ಪೇತ್ರನು ಮಾಡ್‌ವನೆಕೆ, ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ನಂಗಡ ಪೊಣ್ಣ್‌ನ ನಂಗಡ ಕೂಡೆ ಕಾಕಿಯಂಡ್ ಪೋಪಕ್ ನಂಗಕ್ ಅದಿಕಾರ ಇಲ್ಲೆಯ?

⁶ಇಂಞು ನಾನ್ ಪಿಂಞ ಬಾರ್ನಬ ಮಾತ್ರ ಕೆಲಸ ಮಾಡಿತ್, ನಂಗಕ್ ಬೋಂಡಿಯಾನದ್‍ನ ಎಡ್‍ಕಂಡುವ?

⁷ದಾರ್ ತಾಂಡ ಸ್ವಂತ ಪಣತ್‍ನ ಕರ್ಚ್ ಮಾಡಿತ್ ಯುದ್ದತ್‍ಲ್ ಸೇವೆ ಮಾಡ್‌ವ? ದಾರ್ ದ್ರಾಕ್ಷಿ ತೋಟ ಮಾಡಿತ್ ಅದ್ಂಡ ಪಣ್ಣ್‌ನ ತಿಂಗತೆ ಇಪ್ಪ? ದಾರ್ ಕೊರಿ ಕಾತಂಡ್, ಅದ್ಂಡ ಪಾಲ್‍ನ ಕುಡಿಕತೆ ಇಪ್ಪ?

⁸ನಾನ್ ಇನ್ನನೆ, ಮನುಷ್ಯಂಡ ದೃಷ್ಟಿಲ್ ಎಣ್ಣಿಯಂಡುಳ್ಳದಾ? ನಂಗಡ ನ್ಯಾಯಪ್ರಮಾಣ ಸಹ ಇದ್‍ನ ಎಣ್ಣಿಯಂಡುಂಡಲ್ಲ?

⁹ಎತ್ತ್ ಒಕ್ಕಾಟಿಯಂಡ್ ಇಪ್ಪಕ ಬಾಯಿನ ಕೆಟ್ಟ್‌ವಕ್ಕಾಗಾಂದ್ ಮೋಶೇರ ನ್ಯಾಯಪ್ರಮಾಣತ್‍ಲ್ ಒಳ್‍ದಿತುಂಡ್. ಅಕ್ಕ, ದೇವ ಎತ್ತ್‌ವಳ ಗೇನ ಮಾಡಿತ್ ಅನ್ನನೆ ಎಣ್ಣ್‌ಚಾ?[12]

¹⁰ಅಥವ, ದೇವ, ನೇರಾಯಿತು ನಂಗಳ ಗೇನ ಮಾಡಿತ್ ಎಣ್ಣ್‌ಚಾ? ಬೇಲ್‍ನ ಉಪ್ಪವಂವೊನು, ಒಕ್ಕ್ ಪಣಿ ಮಾಡ್‌ವಂವೊನು, ಅಯಿಂಗಡ ಪಾಲ್‍ಕ್ ಫಲ ಕ್‍ಟ್ಟ್‌ವಾಂದ್ ಗೇನ ಮಾಡ್‌ವಲ್ಲ? ಆನಗುಂಡ್, ಅದ್‍ನ ನಂಗಕಾಯಿತೇ ಒಳ್‍ದ್‍ಚಿ.

¹¹ಅನ್ನನೆ ನಂಗ, ನಿಂಗಕ್ ಆತ್ಮೀಯ ಬೋದನೆ ಎಣ್ಣುವ ಕುರುನ ಬಿತ್ತಿತ್‌ಪ್ಪಕ ನಿಂಗಡಿಂಜ ನಂಗಕ್ ಈ ಬದ್‍ಕ್‍ಕ್ ಬೋಂಡಿಯಾನ ವಸ್ತುನ ಪಡೆಯುವಕ್ ಅದಿಕಾರ ಉಂಡಲ್ಲ.

¹²ಬೋರೆ ಜನಕ್ ನಿಂಗಡ ಮೇಲೆ ಇಚ್ಚಕ್ ಹಕ್ಕ್ ಉಂಡೇಂಗಿ, ನಂಗಕ್ ಇಂಞು ಎಚ್ಚಕ್ ಹಕ್ಕ್ ಉಂಡ್! ಆಚೇಂಗಿಯು, ಕ್ರಿಸ್ತಂಡ ನಲ್ಲ ಸುದ್ದಿ ಎಣ್ಣುವಕ್ ಏದ್ ತಡೆಯು ಬರತನೆಕೆ, ನಂಗಕ್ ಉಳ್ಳ ಅದಿಕಾರತ್‍ನ ಉಪಯೋಗಿಚಿಡತೆ, ಎಲ್ಲಾ ಕಷ್ಟತ್‍ನ ನಂಗ ಸಹಿಸಿಯಂಡುಂಡ್.

¹³ದೇವಾಲಯತ್‍ಲ್ ಸೇವೆ ಮಾಡ್‌ವ ಜನಕ್ ದೇವಾಲಯತ್ಂಜ ಆಹಾರ ಕ್‍ಟ್ಟ್‌ವಾಂದು, ಬಲಿಪೀಠತ್‍ಲ್ ಸೇವ ಮಾಡ್‌ವ ಜನಕ್, ಬಲಿಪೀಠತ್‍ಲ್ ಎಂತ ಉಂಡೋ, ಅದ್‍ಯಿಂಜ ಅಯಿಂಗಕ್ ಪಾಲ್ ಕ್‍ಟ್ಟ್‌ವಾಂದು ನಿಂಗಕ್ ಗೊತ್ತ್‌ಲ್ಲೆಯಾ?

¹⁴ಅನ್ನನೆ, ದೇವಡ ನಲ್ಲ ಸುದ್ದಿ ಪ್ರಚಾರ ಮಾಡ್‌ವ ಸೇವೇಲ್ ಉಳ್ಳಯಿಂಗಕ್, ಅಯಿಂಗಡ ಬದ್‍ಕ್‍ಕ್ ಬೋಂಡಿಯಾನದ್‍ನ, ಈ ಸೇವೇಯಿಂಜಲೇ ಕ್‍ಟ್ಟಂಡೂಂದ್ ದೇವ ಆಜ್ಞೆ ಕೊಡ್‌ತಿತುಂಡ್.

¹⁵ಅನ್ನನೆ ಇಂಜತೇಂಗಿಯು, ಈ ವಿಷಯತ್‍ಲ್ ನಾಕ್ ಉಳ್ಳ ಈ ಹಕ್ಕ್‌ಲ್ ಒಂದ್‌ನ ಸಹ ಪ್ರಯೋಜನಪಡ್‍ತಿತ್‌ಲ್ಲೆ; ನಾಕ್ ಎಂತಾಚು ಕ್‍ಟ್ಟ್‌ವಾಂದ್ ಗೇನ ಮಾಡಿಯಂಡ್ ಇನ್ನನೆ ಒಳ್‍ದಿಯಂಡಿಲ್ಲೆ. ನಾಡ ಈ ನಲ್ಲರಿಕೆನ ದಾರು ಪಾಳ್ ಮಾಡ್‌ವಕ್ ಬದ್‍ಲ್ ನಾನ್ ಚಾವದೇ ನಲ್ಲದ್‍ೕಂದ್ ಗೇನ ಮಾಡ್‌ವಿ.

¹⁶ನಾನ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‍ಚೇಂಗಿಯು ನಾನ್ ಅದ್‍ನ ಹೊಗಳ್‍ವಕ್ ಒಂದು ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ ಅದ್ ನಾಡ ಮೇಲೆ ಬುದ್ದ ಜವಾಬ್ದಾರಿಯಾಯಿತುಂಡ್. ದೇವಡ ನಲ್ಲ ಸುದ್ದಿನ ನಾನ್ ಪ್ರಚಾರ ಮಾಡತೆ ಪೋಚೇಂಗಿ, ನಾಕ್ ಅಯ್ಯೋ!

¹⁷ನಾನ್ ನಾಡ ಕುಶೀಲ್ ಈ ಸೇವೇನ ಮಾಡ್‍ಚೇಂಗಿ, ನಾಕ್ ಫಲ ಉಂಡ್; ಆಚೇಂಗಿ ಇದ್‍ನ ಮಾಡಂಡೂಂದ್ ನಾನ್ ತೀರ್ಮಾನ ಮಾಡಿತ್ತ್‌ಲ್ಲೆ. ನನ್ನ ನಂಬಿತ್, ಈ ಜವಾಬ್ದಾರಿನ ದೇವ ನಾಕ್ ಕೊಡ್‌ತಿತುಂಡ್. ನಾನ್ ಇದ್‍ಯಿಂಜ ತಪ್ಪಿಚಿಡ್‌ವಕ್ ಕಯ್ಯುಲೆ.

¹⁸ನಾನ್ ಈ ಸೇವೇನ ಮಾಡಿಯಂಡ್ ಉಳ್ಳಾಂಗ್, ನಾಕ್ ಎಂತ ಫಲ? ನಾನ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ, ದಾರ್‌ಕು ಕಷ್ಟ ಕೊಡ್‍ಕತೆ ಮಾಡ್‌ವದೇ ನಾಕ್ ದುಂಬ ಕುಶಿ. ಆನಗುಂಡ್, ನಾಕ್ ಉಳ್ಳ ಅದಿಕಾರತ್‍ನ ನಾನ್ ಉಪಯೋಗಿಚಿಡತೆ, ಕ್ರಿಸ್ತಂಡ ಸುದ್ದಿನ ಪುಕ್ಕಟೆಯಾಯಿತ್ ಎಣ್ಣ್‌ವದೇ ನಾಡ ಲಾಬ.

¹⁹ನಾನ್ ದಾರ್‌ಕು ಗುಲಾಮನಲ್ಲ, ಆಚೇಂಗಿ ದುಂಬ ಜನತ್‍ನ ಕ್ರಿಸ್ತಂಡ ಜನಳಾಯಿತ್ ಮಾಡ್‌ವಕ್, ಎಲ್ಲಾ ಜನಡ ಗುಲಾಮನಾಯಿತ್ ನನ್ನ ಮಾಡಿಯಂಡಿಯೆ.

²⁰ಯೆಹೂದ್ಯಂಗಳ ದೇವಕ್ ಸಂಪಾದನೆ ಮಾಡ್‌ವಕಾಯಿತ್, ಒರ್ ಯಹೂದ್ಯಂಡನೆಕೆಯು, ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್‍ಪಯಿಂಗಳ, ದೇವಕ್ ಸಂಪಾದನೆ ಮಾಡ್‌ವಕಾಯಿತ್, ನ್ಯಾಯಪ್ರಮಾಣಕ್ ನಾನ್ ಗುಲಾಮನಾಯಿತ್ ಇಲ್ಲತೆ ಇಂಜತೇಂಗಿಯು, ಅದ್‍ನ ಮಾಡ್‌ವಂವೊನಾಯಿತ್ ನಾನ್ ಆನ.

²¹ನ್ಯಾಯಪ್ರಮಾಣತ್‍ನ ಗೊತ್ತಿಲ್ಲತ ಯೆಹೂದ್ಯರಲ್ಲತ ಜನಡ ಕೂಡೆ ಇಪ್ಪಕ, ಅಯಿಂಗಳ ಸಂಪಾದನೆ ಮಾಡ್‌ವಕಾಯಿತ್ ನಾನು ನ್ಯಾಯಪ್ರಮಾಣತ್‍ನ ಮಾಡತಂವೊನಾಯಿತ್ ಇಂಜ್. ಆಚೇಂಗಿಯು, ನಾನ್ ನ್ಯಾಯಪ್ರಮಾಣತ್‍ನ ತ್‍ಕ್ಕಾರ ಮಾಡಿತ್ತ್‌ಲ್ಲೆ; ಕ್ರಿಸ್ತಂಡ ಕಾನೂನ್‍ಕ್ ತಗ್ಗಿತ್ ನಡ್‍ಪಂವೊನಾಯಿತ್ ಉಂಡ್.

²²ದೇವಡ ನಂಬಿಕೇಲ್ ಬಲಹೀನಯಿಂಗಳಾಯಿತ್ ಉಳ್ಳಯಿಂಗ, ದೇವಡ ಮೇಲೆ ನಂಬಿಕೆ ಇಡ್‌ವಕಾಯಿತ್, ಒರ್ ತಡೆಯು ಮಾಡತಂವೊನಾಯಿತ್ ಆನ. ಎನ್ನನೆ ಆಚೇಂಗಿಯು, ಚೆನ್ನ ಜನಳ ದೇವಡ ಪಕ್ಕ ಕೊಂಡ್ ಬಪ್ಪಕಾಯಿತ್, ನಾನ್ ಎಂತೆಲ್ಲಾ ಆಪಕ್ ಕಯ್ಯುವೋ ಅನ್ನನೆಲ್ಲಾ ಆನ.

²³ನಾನ್ ಇದ್‍ನೆಲ್ಲಾ ಎನ್ನಂಗ್ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚೇಂಗಿ, ದೇವಡ ನಲ್ಲ ಸುದ್ದಿನ ದುಂಬ ಜನ ನಂಬುವ. ಆನಗುಂಡ್ ಅದ್ಂಡ ಆಶೀರ್ವಾದತ್‍ಲ್ ನಾನ್ ಪಾಲ್‍ದಾರನಾಯಿತ್‌ಪ್ಪಿ.

²⁴ಪೈಪೋಟೀಲ್ ಓಡುವಯಿಂಗ ಎಲ್ಲಾರು ಓಡುವ, ಆಚೇಂಗಿ ಒಬ್ಬಂಗ್ ಮಾತ್ರ ಇನಾಮ್ ಕ್‍ಟ್ಟ್‌ವಾಂದ್ ನಿಂಗಕ್ ಗೊತ್ತುಂಡಲ್ಲ? ಆನಗುಂಡ್ ನಿಂಗಳು, ದೇವ ನಿಂಗಕಾಯಿತ್ ಬೆಚ್ಚಿತುಳ್ಳ ಕಿರೀಟ ಕ್‍ಟ್ಟ್‌ವಕಾಯಿತ್ ಓಡಿ.

²⁵ಪೈಪೋಟೀಲ್ ಕಳಿಪಯಿಂಗ, ಎಲ್ಲಾ ರೀತಿಲ್ ತಡೀನ ಚಾಯಿತೆ ಬೆಪ್ಪಕ್ ಅಬ್ಯಾಸ ಮಾಡ್‌ವ; ಅಯಿಂಗ ಪಾಳಾಯಿ ಪೋಪ ಕಿರೀಟ ಕ್‍ಟ್ಟ್‌ವಕಾಯಿತ್ ಅನ್ನನೆ ಮಾಡ್‌ವ, ಆಚೇಂಗಿ ನಂಗ ಕಾಲಕಾಲಕು ಪಾಳಾಕತ ಕಿರೀಟ ಕ್‍ಟ್ಟ್‌ವಕಾಯಿತ್ ಇನ್ನನೆ ಮಾಡಿಯಂಡುಂಡ್.

²⁶ಆನಗುಂಡ್, ನಾನ್ ಒರ್ ಗುರಿ ಇಲ್ಲತ ಮನುಷ್ಯಂಡನೆಕೆ ಓಡಿಯಂಡಿಲ್ಲೆ; ಗಾಳಿಕ್ ಬಡಿಪಂವೊನೆಕೆ ನಾನ್ ಬಡ್‌ಚಂಡಿಲ್ಲೆ.

²⁷ಬೋರೆಯಿಂಗಕ್ ಬೋದನೆ ಮಾಡ್‌ವ ನನ್ನ, ದೇವ ಅರ್ಹದೆ ಇಲ್ಲೇಂದ್ ಮಾಡತನೆಕೆ, ಒರ್ ಕಳಿಕಾರಂಡನೆಕೆ ನಾನ್ ನಾಡ ತಡೀನ ಶಿಸ್ತ್‌ಲ್ ಅಬ್ಯಾಸ ಮಾಡಿಯಂಡುಂಡ್.