Read Kodava 2 ಕೊರಿಂಥ 1 Bible Online

2 ಕೊರಿಂಥ 1 - Kodava bible

2 ಕೊರಿಂಥ 1

¹ದೇವಡ ಚಿತ್ತತ್‍ರನೆಕೆ ಯೇಸು ಕ್ರಿಸ್ತಂಡ ಅಪೊಸ್ತಲನಾನ ಪೌಲ ಪಿಂಞ ನಂಗಡ ತಮ್ಮಣನಾನ ತಿಮೊಥೆಯ ಕೂಡಿತ್, ಕೊರಿಂಥ ಪಟ್ಟಣತ್‍ಲ್ ಉಳ್ಳ ಸಬೇಕ್ ಪಿಂಞ ಅಖಾಯ ಪ್ರಾಂತ್ಯತ್‍ರ ಎಲ್ಲಾ ಜಾಗತ್‍ಲ್ ಉಳ್ಳ ಯೇಸುನ ನಂಬ್‍ನ ಎಲ್ಲಾ ಜನಕ್ ಒಳ್‍ದ್‍ವ ಕಾಗದ ಇದ್.

²ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

³ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಅಪ್ಪನಾಯಿತು, ಕನಿಕರತ್‍ರ ಅಪ್ಪನಾಯಿತು, ಎಲ್ಲಾ ಸಮಾದಾನವು ತಪ್ಪ ದೇವನಾಯಿತುಳ್ಳ ದೇವಕ್ ವಂದನೆ.

⁴ಎಂತ ಕಷ್ಟತ್‍ಲ್ ಇಂಜತೇಂಗಿಯು ಅಯಿಂಗಳ ಸಮಾದಾನ ಮಾಡ್‌ವಕ್ ಬಲ ಉಳ್ಳಯಿಂಗಳಾಯಿತ್ ನಂಗ ಬೊಳಿಯುವನೆಕೆ, ನಂಗಕ್ ಬಪ್ಪ ಎಲ್ಲಾ ಕಷ್ಟತ್‍ಲು, ದೇವ ಮಾತ್ರ ನಂಗಕ್ ಸಮಾದಾನ ತಂದಂಡುಂಡ್.

⁵ಅದ್ ಎನ್ನನೆ ಎಣ್ಣ್‌ಚೇಂಗಿ, ಕ್ರಿಸ್ತಂಡ ಕಷ್ಟ ನಂಗಡಲ್ಲಿ ಎನ್ನನೆ ಜಾಸ್ತಿ ಆಯಂಡುಂಡೊ ಅನ್ನನೆ ಕ್ರಿಸ್ತನಗುಂಡ್ ನಂಗಕ್ ಸುಕವೂ ಜಾಸ್ತಿ ಆಯಂಡುಂಡ್.

⁶ಆನಗುಂಡ್, ನಂಗ ಹಿಂಸೆ ಪಟ್ಟತೇಂಗಿಯು, ಅದ್ ನಿಂಗಡ ಸುಕಕು ರಕ್ಷಣೆಕು ಆಯಿತ್‌ಪ್ಪ; ನಂಗಕ್ ಸಮಾದಾನ ಕ್‍ಟ್ಟ್‌ಚೇಂಗಿಯು ಅದ್ ಸಹ ನಿಂಗಡ ಸಮಾದಾನಕು ರಕ್ಷಣೆಕು ಆಯಿತ್‌ಪ್ಪ; ನಂಗ ಕಷ್ಟಪಡ್‌ವನೆಕೆ ನಿಂಗಳು ಕಷ್ಟಪಟ್ಟಿತ್ ಸಹಿಸಿಯಂಡ್ ಉಳ್ಳಗುಂಡ್, ಆ ರಕ್ಷಣೆ ಫಲ ತಂದಂಡುಂಡ್.

⁷ನಿಂಗ ಸಹ ನಂಗಡ ಕೂಡೆ ಕಷ್ಟ ಅನುಬವಿಚಿಡುವಗುಂಡ್, ನಂಗಡ ಕೂಡೆ ನಿಂಗಕ್ ಸುಕ ಕ್‍ಟ್ಟಿಯಂಡುಂಡ್‍ೕಂದ್ ನಂಗಕ್ ಗೊತ್ತಾಯಿತ್, ನಿಂಗಡ ವಿಷಯತ್‍ಲ್ ನಂಗಕ್ ದೃಡವಾನ ನಿರೀಕ್ಷೆ ಉಂಡ್.

⁸ಆನಗುಂಡ್, ನಾಡ ಅಣ್ಣತಮ್ಮಣಂಗಳೇ, ಆಸ್ಯ ಪ್ರಾಂತ್ಯತ್‍ಲ್ ನಂಗಕ್ ಉಂಟಾನ ಕಷ್ಟತ್‍ನ ನಿಂಗ ಅರಿಯತೆ ಇಪ್ಪಕ್ ನಂಗಕ್ ಮನಸ್ಸಿಲ್ಲೆ. ಅದ್ ಎನ್ನನೆ ಎಣ್ಣ್‌ಚೇಂಗಿ, ನಂಗ ಇಂಞು ಮಿಂಞಕ್ ಬದ್‌ಕ್‌ವಾಂದ್ ಉಳ್ಳ ನಂಬಿಕೆ ಇಲ್ಲತಚ್ಚಕ್ ನಂಗ ಸಹಿಸುವಕ್ ಕಯ್ಯತನೆಕೆ ದುಂಬ ಕಷ್ಟಪಟ್ಟತ್.

⁹ನಂಗ ಎಲ್ಲಾರು ಚತ್ತ್ ಪೋಪಾಂದ್ ಗೇನ ಮಾಡ್‍ಚಿ. ಆಚೇಂಗಿ, ನಂಗ ನಂಗಡ ಮೇಲೆ ನಂಬಿಕೆ ಬೆಕ್ಕತೆ, ಚತ್ತಯಿಂಗಳ ಜೀವವಾಯಿತ್ ಎಪ್ಪ್‌ಚಿಡುವ ದೇವಡ ಮೇಲೆ ನಂಬಿಕೆ ಬೆಪ್ಪನೆಕೆ ನಂಗಕ್ ಅನ್ನನೆ ನಡ್ಂದತ್.

¹⁰ಅಂಥಾ ಒರ್ ಚಾವ್‍ಯಿಂಜ ಅಂವೊ ನಂಗಳ ಕಾಪಾಡ್‍ಚಿ. ಇಕ್ಕಲು ನಂಗಳ ಕಾಪಾಡಿಯಂಡುಂಡ್, ಇಂಞು ಮಿಂಞಕು ಅಂವೊ ನಂಗಳ ಕಾಪಾಡ್‌ವಾಂದ್ ಅಂವೊಂಡ ಮೇಲೆ ನಿರೀಕ್ಷೆ ಬಿಚ್ಚಿತುಂಡ್.

¹¹ನಿಂಗ ನಿಂಗಡ ಪ್ರಾರ್ಥನೆರ ಮೂಲಕ ನಂಗಕ್ ಸಹಾಯ ಮಾಡಂಡು. ಅಕ್ಕ, ನಂಗಡ ಬದ್ರತೆಕಾಯಿತ್ ಮಾಡ್‍ನ ಪ್ರಾರ್ಥನೆಕ್ ದೇವ ಉತ್ತರ ಕೊಡ್‌ತಿತ್ ನಂಗಳ ಆಶೀರ್ವಾದ ಮಾಡ್‍ಚೇಂದ್ ದುಂಬ ಜನ ನಂಗಕಾಯಿತ್ ವಂದನೆ ಎಣ್ಣುವ.

¹²ನಂಗ ಮನುಷ್ಯಂಗಡಿಂಜ ಬಂದ ಜ್ಞಾನತ್‍ಲ್ ನಡ್‍ಕತೆ, ದೇವಡ ಕೃಪೇರಗುಂಡ್, ಈ ಲೋಕತ್‌ಲು, ಮುಕ್ಯವಾಯಿತ್ ನಿಂಗಡ ಕೂಡೆಯು, ಕಪಟ ಇಲ್ಲತ ಪವಿತ್ರವಾನ ಸತ್ಯತ್‍ಲ್ ನಡ್ಂದತ್‍ೕಂದ್, ನಂಗಡ ಮನಸಾಕ್ಷಿ ನಂಗಕ್ ಎಣ್ಣುವ ಸಾಕ್ಷಿಯೇ ನಂಗಡ ಹೆಮ್ಮೆ ಆಯಿತುಂಡ್.

¹³ನಿಂಗ ಓದಿತು, ಒತ್ತಂಡು ಉಳ್ಳ ಕಾರ್ಯತ್‍ನ ಬುಟ್ಟಿತ್ ಬೋರೆ ಏದುನು ಒಳ್‍ದಿತ್‌ಲ್ಲೆ. ಪಿಂಞ ಅರ್ಥ ಮಾಡ್‌ವಕ್ ಕಯ್ಯತ್ತದ್‍ನ ನಂಗ ನಿಂಗಕ್ ಒಳ್‍ದಿತ್‌ಲ್ಲೆ; ಕಡೇಕತ್ತನೆ ಅನ್ನನೆ ಒತ್ತೊವಿರಾಂದ್ ನಾನ್ ನಂಬುವಿ.

¹⁴ಒಡೆಯನಾನ ಯೇಸು ಪುನಃ ಬಪ್ಪ ದಿವಸತ್‍ಲ್, ನಿಂಗಡ ವಿಷಯತ್ ನಂಗ ಹೆಮ್ಮೆ ಪಡ್‌ವನೆಕೆ, ನಿಂಗಳು ಸಹ ನಂಗಡ ವಿಷಯತ್ ಹೆಮ್ಮೆ ಪಡ್‍ವಿರಾಂದ್ ಚೆನ್ನಮಟ್ಟಕ್ ನಿಂಗ ಒತ್ತಂಡುಳ್ಳಿರಲ್ಲ.

¹⁵ಇದ್‍ಲ್ ನಾಕ್ ದೃಡವಾನ ನಂಬಿಕೆ ಇಂಜಗುಂಡ್, ನಿಂಗಕ್ ದಂಡನೆ ಕುರಿಯು ಪ್ರಯೋಜನವಾಯಿತ್ ಇಪ್ಪಕ್, ಮಿಂಞ ನಿಂಗಡ ಪಕ್ಕ ಬಪ್ಪಿ.

¹⁶ನಾನ್ ಮಕೆದೋನ್ಯ ಪ್ರಾಂತ್ಯಕ್ ಪೋಪಕ ನಿಂಗಳ ಕಂಡಿತ್ ಪೋಪಿ, ಪುನಃ ಅಲ್ಲಿಂಜ ಬಪ್ಪಕಲು ನಿಂಗಳ ಕಂಡಿತ್ ಬಪ್ಪಕ್ ಗೇನ ಮಾಡಿಯಂಡುಳ್ಳ. ಬಯ್ಯ ನಿಂಗ ನನ್ನ ಯೂದಾಯಕ್ ಅಯಿಕಲು.

¹⁷ನಾನ್ ಇನ್ನನೆ ಗೇನ ಮಾಡ್‍ನದ್ ವ್ಯಾರ್ತಾಂದ್ ನಾನ್ ಗೇನ ಮಾಡ್‍ನನಾ? ಅಥವ ಅಕ್ಕು ಅಕ್ಕೂಂದು, ಇಲ್ಲೆ ಇಲ್ಲೇಂದು, ನಾಡಲ್ಲಿ ಇಪ್ಪನೆಕೆ ಮನುಷ್ಯ ರೀತಿಲ್ ಒರೇ ಸಮಯತ್‍ಲ್ ಗೇನಮಾಡಿಯಂಡುಂಡಾ?

¹⁸ನಾನ್ ನಿಂಗಕ್ ಎಣ್ಣ್‌ನ ತಕ್ಕ್ ಒರ್ ಕುರಿ ಅಕ್ಕೂಂದು ಇಂಞೊರ್ ಕುರಿ ಇಲ್ಲೇಂದು ಇಂಜಿತ್‌ಲ್ಲೆ, ಅದ್ಂಗ್ ಸತ್ಯವಂತ ದೇವ ಸಾಕ್ಷಿಯಾಯಿತುಂಡ್.

¹⁹ನಾನು, ಸಿಲ್ವಾನನೂ ತಿಮೊಥೆಯನು ನಿಂಗಡ ಮದ್ಯತ್‍ಲ್ ಬೋದನೆ ಮಾಡ್‍ನ ದೇವಡ ಮೋಂವೊನಾನ ಯೇಸು ಕ್ರಿಸ್ತನು ಅಕ್ಕೂಂದು, ಇಲ್ಲೇಂದು ಇಕ್ಕತೆ, ಅಕ್ಕೂಂದ್ ಮಾತ್ರ ಉಂಡ್.

²⁰ಅನ್ನನೆ ನಂಗಡಗುಂಡ್ ದೇವಕ್ ಮಹಿಮೆ ಕ್‍ಟ್ಟ್‌ವಕಾಯಿತ್, ದೇವಡ ವಾಗ್ದಾನವೆಲ್ಲಾ ಕ್ರಿಸ್ತಂಡಲ್ಲಿ ಅಕ್ಕೂಂದು, ಅಂವೊಂಡಲ್ಲಿ ಆಮೆನ್‍ಂದು ಉಂಡಲ್ಲ.

²¹ಆಚೇಂಗಿ, ಇಕ್ಕ ದೇವನೇ ನಂಗಳ ಕ್ರಿಸ್ತಂಡಲ್ಲಿ ನಿಂಗಡ ಕೂಡೆ ಸ್ತಿರಪಡ್‌ತಿತ್, ಅಂವೊನೇ ನಂಗಳ ಅಬಿಷೇಕವೂ ಮಾಡ್‍ಚಿ.

²²ಅಂವೊನೇ ನಂಗಕ್ ಮುದ್ರೆ ಇಟ್ಟಿತ್, ನಂಗಡ ಹೃದಯತ್‍ಲ್ ಪವಿತ್ರಾತ್ಮತ್‍ನ ಬಪ್ಪಕುಳ್ಳ ವಿಷಯಕ್ ಸಂಚಕಾರವಾಯಿತ್ ತಂದಿತುಂಡ್.

²³ನಿಂಗಳ ನಾನ್ ಜೋರ್ ಮಾಡತನೆಕೆ ಇಪ್ಪಕಾಯಿತೇ ಇಲ್ಲಿಕತ್ತನೆ ಕೊರಿಂಥ ಪಟ್ಟಣಕ್ ಬಂತ್‌ಲ್ಲೇಂದ್ ದೇವಡ ಮೇಲೆ ನಾಡ ಸಾಕ್ಷಿಯಾಯಿತ್ ಎಣ್ಣ್‌ವಿ.

²⁴ನಿಂಗಡ ನಂಬಿಕೇಕ್ ನಂಗ ಅದಿಕಾರ ಉಳ್ಳಯಿಂಗಳಾಯಿತ್ ಇಕ್ಕತೆ, ನಿಂಗಡ ಕುಶೀಕ್ ಸಹಾಯ ಮಾಡ್‌ವಯಿಂಗಳಾಯಿತುಂಡ್; ನಂಬಿಕೇರಗುಂಡ್ ನಿಂಗ ನಿಂದಂಡುಳ್ಳಿರಲ್ಲ.