Read Kodava 2 ಕೊರಿಂಥ 10 Bible Online

2 ಕೊರಿಂಥ 10 - Kodava bible

2 ಕೊರಿಂಥ 10

¹ನಿಂಗಡ ಪಕ್ಕ ಇಪ್ಪಕ ತಾಳ್ಮೆಲು, ನಿಂಗಡಿಂಜ ದೂರ ಇಪ್ಪಕ ನಿಂಗಡ ಮೇಲೆ ಕಂಡಿತವಾಯಿತ್ ಉಳ್ಳನೆಕೆ ಕಾಂಬ ಪೌಲನಾನ ನಾನ್, ಕ್ರಿಸ್ತಂಡ ಶಾಂತ ಗುಣತ್‍ರ ಪಿಂಞ ದಯೇರ ಮೂಲಕ ನಿಂಗಕ್ ಬೋಡಿಯಂಡುಳ್ಳ.

²ನಂಗ ತಡೀರ ಪ್ರಕಾರ ನಡ್‌ಂದಂಡುಂಡ್‍ೕಂದ್ ಗೇನ ಮಾಡ್‌ವ ಚೆನ್ನ ಜನಡ ವಿಷಯತ್, ನಾನ್ ಕಠಿಣವಾಯಿತ್ ಇಕ್ಕಂಡೂಂದ್ ಗೇನ ಮಾಡಿಯಂಡುಳ್ಳ. ನಾನ್ ನಿಂಗಡ ಪಕ್ಕ ಬಪ್ಪಕ, ಅನ್ನನೆ ಕಠಿಣ ಗುಣತ್‍ನ ದೈರ್ಯವಾಯಿತ್ ಕಾಂಬ್‍ಚಿಡುವಕ್ ಬಟ್ಟೆ ಮಾಡಿ ಕೊಡ್‍ಕತೀಂದ್ ನಿಂಗಳ ಬೋಡುವಿ.

³ನಂಗ ಈ ತಡೀಲ್ ಇಂಜತೇಂಗಿಯು, ತಡೀಲ್ ಯುದ್ದ ಮಾಡ್‌ವನೆಕೆ ನಂಗ ಮಾಡುಲೆ.

⁴ನಂಗ ಉಪಯೋಗ ಮಾಡ್‌ವ ಯುದ್ದತ್‍ರ ಆಯುದ ಈ ತಡೀರ ಆಯುದಂಗ ಅಲ್ಲ, ಅದ್, ಗಟ್ಟಿಯಾಯಿತುಳ್ಳ ಕೋಟೆಯಳ ಪೊಳಿಪಕುಳ್ಳ ದೇವಡ ಶಕ್ತಿಯಾಯಿತುಂಡ್.

⁵ಅದ್ಂಡ ಮೂಲಕ, ನಂಗ ವಾದತ್‍ನ ಪಿಂಞ ದೇವಡ ವಿಷಯತ್‍ನ ಗೊತ್ತ್‌ಮಾಡ್‍ವಕ್ ವಿರೋದವಾಯಿತ್ ನಿಪ್ಪ ಎಲ್ಲಾ ಬಡಾಯಿನ ಪಾಳ್ ಮಾಡಿತ್, ಎಲ್ಲಾ ಯೇಚನೆನ ಕ್ರಿಸ್ತಂಗ್ ತಗ್ಗಿತ್ ನಡ್‍ಪನೆಕೆ ಪುಡ್‍ಚಿ ಬೆಚ್ಚಿತುಂಡ್.

⁶ನಿಂಗ ಪೂರ್ತಿಯಾಯಿತ್ ತಗ್ಗಿತ್ ನಡ್‍ಪದ್ ನೆರವೇರುವಕ, ತಗ್ಗಿತ್ ನಡ್‍ಕತೆ ಇಪ್ಪಾಂಗ್ ತಕ್ಕಂತ ನೀತಿರ ಶಿಕ್ಷೆ ತಪ್ಪಕ್ ತಯಾರಾಯಿತ್ ಉಂಡ್.

⁷ನಿಂಗ ಪೊರಮೆ ಕಾಂಬ ಕೋಲತ್‍ನ ಮಾತ್ರ ನೋಟಿಯಂಡುಳ್ಳಿರ? ಒಬ್ಬ ತಾನ್ ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಳ್ಳ್‌ಂದ್ ನಂಬಿಯಂಡಿಂಜತೇಂಗಿ, ಅಂವೊ ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಇಪ್ಪನೆಕೆ, ನಂಗಳು ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಂಡ್‍ೕಂದ್ ಅಂವೊ ಅಂವೊಂಡಲ್ಲಿ ಗೇನಮಾಡಡ್.

⁸ಒಡೆಯ ನಂಗಕ್ ಕೊಡ್‍ತಿತುಳ್ಳ ಅದಿಕಾರತ್‍ರ ವಿಷಯತ್, ನಾನ್ ಇಂಞು ದುಂಬ ಹೊಗಳಿಚಿಟ್ಟತೇಂಗಿಯು ನಾಕ್ ಞಾಣ ಆಪುಲೆ. ನಿಂಗಳ ಪಾಳ್ ಮಾಡ್‌ವಕಾಯಿತಲ್ಲ, ನಿಂಗಳ ಚಾಯಿ ಬೊಳ್‌ತಿತ್ ಕೆಟ್ಟುವಕಾಯಿತ್ ಈ ಅದಿಕಾರತ್‍ನ ನಂಗಕ್ ಕೊಡ್‍ತತ್.

⁹ನಾನ್ ಕಾಗದತ್‍ರ ಮೂಲಕ ನಿಂಗಳ ಬೊತ್ತ್‌ಚಿಡ್‌ವಂವೊನೆಕೆ ಕಾಟ್‍ವಕ್ ನಾಕ್ ಮನಸ್ಸಿಲ್ಲೆ.

¹⁰ಅಂವೊಂಡ ಕಾಗದ ದುಂಬ ಗಟ್ಟಿಯಾಯಿತು ಒತ್ತಾಯ ಮಾಡ್‌ವದಾಯಿತು ಉಂಡ್, ಆಚೇಂಗಿ ಅಂವೊ ತಡೀಲ್ ಬಲಯಿಲ್ಲತಂವೊನು ಅಂವೊಂಡ ತಕ್ಕ್ ಪ್ರಯೋಜನ ಇಲ್ಲತವಾಯಿತು ಉಂಡ್‍ೕಂದ್ ಚೆನ್ನ ಜನ ನಾಡ ವಿಷಯತ್ ಎಣ್ಣಿಯಂಡುಂಡಲ್ಲ?

¹¹ಅನ್ನನೆ ಎಣ್ಣುವಯಿಂಗಕ್, ನಂಗ ನಿಂಗಡಿಂಜ ದೂರತ್‍ಲ್ ಇಪ್ಪಕ ತಕ್ಕ್‌ಲ್ ಎನ್ನನೆ ಉಂಡೋ, ಅನ್ನನೆ ನಿಂಗಡ ಪಕ್ಕತ್ ಇಪ್ಪಕಲು ನಂಗಡ ಕ್ರಿಯೇಲ್ ಇಪ್ಪಾಂದ್ ಗೊತ್ತಿರಡ್.

¹²ಆಚೇಂಗಿಯು, ತಂಗಳ ತಾಂಗಳೇ ಬಲ್ಯಂಗಳಾಯಿತ್ ಕಾಂಬ್‍ಚಿಡುವಕಾಯಿತ್ ಬಡಾಯಿ ತಕ್ಕ್ ಎಣ್ಣುವ ಚೆನ್ನ ಜನಡ ಕೂಡೆ ನಂಗಳ ಸಮವಾಯಿತ್ ಹೋಲಿಕೆ ಮಾಡ್‌ವಕ್ ನಂಗ ದೈರ್ಯ ಎಡ್‍ಪುಲೆ; ಅಯಿಂಗ, ಅಯಿಂಗಡೊಳ್‌ಲ್ ಅಯಿಂಗ ಅಯಿಂಗಳೇ ಅಳ್‌ತೆ ಮಾಡಿಯಂಡ್, ಅಯಿಂಗಕೇ ಅಯಿಂಗಳ ಹೋಲಿಕೆ ಮಾಡಿಯಂಡುಳ್ಳ ಅಯಿಂಗ ಬುದ್ದಿವಂತಯಿಂಗ ಅಲ್ಲ.

¹³ಆಚೇಂಗಿ ನಂಗ ನಂಗಳ ಮಿತಿಕ್ ಮೀರಿತ್ ಹೊಗ್‍ಳ್‌ಚಿಡತೆ, ನಿಂಗಡ ಪಕ್ಕ ಬಂದಿತ್ ಎತ್ತ್‌ವಚ್ಚಕ್ ದೇವ ನಂಗಕ್ ದಾನಮಾಡ್‍ನ ಅಳ್‌ತೆರಚ್ಚಕ್ ಹೊಗಳಿಯಂಡುಂಡ್.

¹⁴ನಿಂಗಡ ಪಕ್ಕ ಬಂತ್ ಎತ್ತ್‌ವಕ್ ಕಯ್ಯತನೆಕೆ ಮಿತಿ ಮೀರಿತ್ ಪೋಪುಲೆ; ನಂಗ ಕ್ರಿಸ್ತಂಡ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್ ನಿಂಗಡಲ್ಲಿಕತ್ತನೆ ಬಂದತಲ್ಲ?

¹⁵ನಂಗ ಮಿತಿನ ಮೀರಿತ್ ಬೋರೆಯಿಂಗಡ ಸೇವೇನ ಎಡ್‍ತಂಡ್ ಹೊಗಳಿಚಿಡುಲೆ. ಆಚೇಂಗಿ ನಿಂಗಡ ನಂಬಿಕೆ ಬಲ್ಯದಾಚೇಂಗಿ, ನಿಂಗಡ ಮದ್ಯತ್‍ಲ್ ನಂಗಡ ಸೇವೆ ಇಂಞು ಪಬ್ಬ್‌ವಾಂದ್ ನಂಗ ನಂಬಿಯಂಡುಂಡ್.

¹⁶ಅಕ್ಕ, ದೇವಡ ನಲ್ಲ ಸುದ್ದಿನ ನಿಂಗಡ ಜಾಗತ್‍ನ ದಾಟಿತ್ ನಂಗ ಪ್ರಚಾರ ಮಾಡ್‌ವಕಯ್ಯು. ಬೋರೆಯಿಂಗಡ ಮಿತಿರ ಜಾಗತ್‍ಲ್ ಮಾಡ್‍ನ ದೇವಡ ಸೇವೇರ ಫಲತ್‍ರ ವಿಷಯತ್ ನಂಗ ಹೊಗಳಿಚಿಡ್‌ವಕ್ ಪೋಪುಲೆ.

¹⁷ಹೊಗಳಿಚಿಡುವಂವೊ ಒಡೆಯಂಡ ವಿಷಯತ್ ಮಾತ್ರ ಹೊಗ್‍ಳಿಚಿಡಡ್.[10]

¹⁸ತಾಂಗ್ ತಾನೇ ಹೊಗಳಿಚಿಡುವಂವೊ ಯೋಗ್ಯನಲ್ಲ, ಒಡೆಯ ದಾರ್‌ನ ಹೊಗಳಿಚಿಡುಂವೊನೋ ಅಂವೊನೇ ಯೋಗ್ಯವಾನಂವೊ.