Read Kodava 2 ಕೊರಿಂಥ 11 Bible Online

2 ಕೊರಿಂಥ 11 - Kodava bible

2 ಕೊರಿಂಥ 11

¹ನಿಂಗ ನಾಡ ಮುಠಾಳತನತ್‍ನ ಚೆನ್ನ ಸಹಿಸಿಯಂಡಿಂಜತೇಂಗಿ ಚಾಯಿಪ್ಪ. ಅನ್ನನೆ ಮಿಂಞಲೇ ನಿಂಗ ನನ್ನ ಸಹಿಸಿಯಂಡಿಂಜಿರ.

²ಕ್ರಿಸ್ತ ಎಣ್ಣುವ ಒರೇ ಪುತ್ತಂಗಾರಂಗ್ ನಿಂಗಳ ಪವಿತ್ರ ಕನ್ನಿ ಮೂಡಿಯಾಯಿತ್ ಒಪ್ಪ್‌ಚಿಡಂಡೂಂದ್ ನಾನ್ ನಿಶ್ಚಯ ಮಾಡ್‍ನಗುಂಡ್, ನಿಂಗಕಾಯಿತ್ ದೇವಡ ವೈರಾಗ್ಯವಾನ ವೈರಾಗ್ಯತ್‍ಲ್ ನಾನ್ ಉಳ್ಳ.

³ಆಚೇಂಗಿ, ಆದ್ಯ ಪೊಣ್ಣಾಳಾನ ಹವ್ವಳ, ಪಾಂಬ್ ತಾಂಡ ತಂತ್ರತ್‍ನಗುಂಡ್ ಮೋಸ ಮಾಡ್‍ನನೆಕೆ, ಕ್ರಿಸ್ತಂಡ ಸತ್ಯತ್‍ನ ಬುಟ್ಟಿತ್ ಬಟ್ಟೆ ತಪ್ಪಿ ಪೋಪನೆಕೆ ನಿಂಗಡ ಮನಸ್ಸ್ ಸಹ ಆಯಿ ಪೋಪಾಂದ್ ನಾಕ್ ಪೋಡಿ ಆಯಂಡುಂಡ್.

⁴ಎನ್ನನೆ ಎಣ್ಣ್‌ಚೇಂಗಿ, ನಿಂಗಡ ಪಕ್ಕ ಬಪ್ಪಂವೊ, ನಂಗ ಬೋದನೆ ಮಾಡತ ಬೋರೆ ಒರು ಯೇಸುನ ಬೋದನೆ ಮಾಡ್‍ಚೇಂಗಿಯು, ಅಲ್ಲತಪೋಚೇಂಗಿ, ನಿಂಗ ಪಡೆಯತ ಬೋರೆ ಒರ್ ಪವಿತ್ರಾತ್ಮತ್‍ನ ಪಡೆಯುವಕಲು, ನಿಂಗ ಸ್ವೀಕಾರ ಮಾಡತ ಬೋರೆ ಒರ್ ದೇವಡ ನಲ್ಲ ಸುದ್ದಿನ ಸ್ವೀಕಾರ ಮಾಡ್‌ವಕಲು, ನಿಂಗ ಅದ್‍ನ ಕುಶೀಲ್ ಸಹಿಸಿಯಂಡ್ ಉಳ್ಳಿರಲ್ಲ.

⁵ನಾನ್ ಮುಕ್ಯಪಟ್ಟ ಅಪೊಸ್ತಲಂಗಕಿಂಜ ಏದ್ ವಿಷಯತ್‍ಲು ಕಮ್ಮಿ ಇಲ್ಲೇಂದ್ ಗೇನ ಮಾಡ್‌ವಿ.

⁶ನಾನ್ ಚಾಯಿ ತಕ್ಕ್ ಪರಿಯುವಕ್ ಪಡಿಕತೆ ಇಂಜತೇಂಗಿಯು, ಬುದ್ದಿಲ್ ಅನ್ನನೆ ಇಲ್ಲೆ; ಆಚೇಂಗಿ ಈ ವಿಷಯತ್‍ನ ಎಲ್ಲಾ ವಿದತ್‍ಲ್ ನಂಗ ನಿಂಗಕ್ ಚಾಯಿತೆ ಎಣ್ಣಿತುಂಡ್.

⁷ನಿಂಗ ಬಲ್ಯದಾಂಡೂಂದ್ ನನ್ನ ತಗ್ಗ್‌ಚಿಟ್ಟಂಡ್ ದೇವಡ ನಲ್ಲ ಸುದ್ದಿನ ಇನಾಮಾಯಿತ್ ನಿಂಗಕ್ ಬೋದನೆ ಮಾಡ್‍ನದ್ ಕುತ್ತವಾ?

⁸ನಿಂಗಕ್ ದೇವಡ ಸೇವೇನ ಮಾಡ್‌ವಕಾಯಿತ್, ಬೋರೆ ಸಬೆರ ಮಕ್ಕಡಲ್ಲಿ ಸಂಬಳ ಎಡ್‍ತಿತ್ ಅಯಿಂಗಳ ಲೂಟಿ ಮಾಡ್‍ನನೆಕೆ ಆಚಿ.

⁹ನಾನ್ ನಿಂಗಡ ಪಕ್ಕ ಇಪ್ಪಕ, ಮಕೆದೋನ್ಯತ್ಂಜ ಬಂದ ನಾಡ ಅಣ್ಣತಮ್ಮಣಂಗ ನಾಕ್ ಬೋಂಡಿಯಾನದ್‍ನ ತಂದತ್. ನಿಂಗಕ್ ಆ ಬಾರತ್‍ನ ಕೊಡ್‍ತಿತ್‌ಲ್ಲೆ. ಎಲ್ಲಾ ವಿಷಯತ್ ನಾನ್ ನಿಂಗಕ್ ಬಾರವಾಯಿತ್ ಇಲ್ಲತಿಪ್ಪನೆಕೆ ಜಾಗ್ರತೆಲ್ ಇಂಜ. ಇಂಞು ಮಿಂಞಕು ಜಾಗ್ರತೆಲ್ ಇಪ್ಪಿ.

¹⁰ಕ್ರಿಸ್ತಂಡ ಸತ್ಯ ನನ್ನಲ್ಲಿ ಇಪ್ಪಗುಂಡ್ ಅಖಾಯ ನಾಡ್‍ರ ಪ್ರಾಂತ್ಯತ್‍ಲ್ ನಾಡ ವಿಷಯತ್‍ರ ಈ ಹೊಗಳಿಕೆನ ನಿಪ್ಪ್‌ಚಿಡುವಕ್ ಕಯ್ಯುಲೇಂದ್ ಎಣ್ಣ್‌ವಿ.

¹¹ಎನ್ನಂಗ್ ಇನ್ನನೆ ಎಣ್ಣಿಯಂಡುಳ್ಳ? ನಾಕ್ ನಿಂಗಡ ಮೇಲೆ ಪ್ರೀತಿ ಇಲ್ಲತಗುಂಡಾ? ನಾಕ್ ಉಂಡ್‍ೕಂದ್ ದೇವಕ್ ಗೊತ್ತುಂಡ್.

¹²ನನ್ನ ವಿರೋದಿಚಿಡುವಕ್ ಅವಕಾಶ ತ್‍ೕಡ್‌ವಯಿಂಗಕ್ ಅವಕಾಶ ಕ್‍ಟ್ಟತನೆಕೆ, ನಾನ್ ಮಾಡಿಯಂಡುಳ್ಳದ್‍ನ ಇಂಞು ಮಿಂಞಕ್ ಮಾಡ್‌ವಿ. ಅಯಿಂಗ ಹೆಮ್ಮೆ ಪಡ್‌ವ ವಿಷಯತ್‍ಲ್ ಅಯಿಂಗ ನಂಗಡನೆಕೆ ಇರಡ್.

¹³ಅನ್ನನೆ ಉಳ್ಳಯಿಂಗ ಕಳ್ಳ ಅಪೊಸ್ತಲಂಗ, ಕಪಟಿಯಾನ ಸೇವಕಂಗ, ಕ್ರಿಸ್ತಂಡ ಅಪೊಸ್ತಲಂಗಡ ವೇಷತ್‍ನ ಇಟ್ಟಂಡುಂಡ್.

¹⁴ಇದ್ ಒಂದು ಆಶ್ಚರ್ಯ ಅಲ್ಲ, ಎನ್ನಂಗೆಣ್ಣ್‌ಚೇಂಗಿ, ಸೈತಾನ ಸಹ ಬೊಳಿರ ದೂತಂಡ ವೇಷತ್‍ನ ಇಟ್ಟಂಡುಂಡಲ್ಲ?

¹⁵ಆನಗುಂಡ್, ಅಂವೊಂಡ ಸೇವಕಂಗಳು ಸಹ, ನೀತಿರ ಸೇವಕಂಗಡ ವೇಷತ್‍ನ ಇಟ್ಟತೇಂಗಿ ಅದ್ ಆಶ್ಚರ್ಯ ಅಲ್ಲ; ಅಯಿಂಗಡ ಅಂತ್ಯ ಅಯಿಂಗಡ ಕ್ರಿಯೇಕ್ ತಕ್ಕಂತದಾಯಿತ್‌ಪ್ಪ.

¹⁶ದಾರೂ ನನ್ನ ಮುಠಾಳಾಂದ್ ಗೇನ ಮಾಡ್‌ವಕ್ಕಾಗಾಂದ್ ನಾನ್ ಪುನಃ ಎಣ್ಣ್‌ವಿ; ಅನ್ನನೆ ಗೇನಮಾಡ್‍ಚೇಂಗಿಯು, ನನ್ನ ಬುದ್ದಿ ಇಲ್ಲತಂವೋಂದ್ ಸ್ವೀಕಾರ ಮಾಡಿಯೊಳಿ, ಆನಗುಂಡ್, ನಾನು ಚೆನ್ನ ಹೊಗಳಂಡೂಂದ್ ಉಳ್ಳ.

¹⁷ನಾನ್ ಇನ್ನನೆ ಎಣ್ಣ್‌ವದ್ ಒಡೆಯಂಡ ಅದಿಕಾರತ್‍ರನೆಕೆ ಅಲ್ಲ, ಈ ಹೊಗಳಿಚಿಡುವ ದೈರ್ಯತ್‍ಲ್ ಮುಠಾಳನೆಕೆ ಎಣ್ಣಿಯಂಡುಳ್ಳ.

¹⁸ದುಂಬ ಜನ ತಡೀರ ಪ್ರಕಾರ ಹೊಗಳಿಯಂಡುಳ್ಳಾಂಗ್ ನಾನು ಹೊಗಳಿಚಿಡುವಿ.

¹⁹ನಿಂಗ ಬುದ್ದಿವಂತಯಿಂಗಳಾಯಿತ್ ಬುದ್ದಿ ಇಲ್ಲತಯಿಂಗಳ ಕುಶೀಲ್ ಸಹಿಸಿಯಂಡಿಂಜಿರಲ್ಲಾ?

²⁰ಒಬ್ಬ ನಿಂಗಳ ಅಡಿಮೆ ಪಡ್‍ತ್‍ಚೇಂಗಿಯು, ಒಬ್ಬ ನಿಂಗಳ ಮುಗ್ಗ್‌ಚಿಟ್ಟತೇಂಗಿಯು, ಒಬ್ಬ ನಿಂಗಳ ಪುಡ್‌ಚಿತ್ ಕೊಂಡ್ ಪೋಚೇಂಗಿಯು, ಒಬ್ಬ ತನ್ನ ತಾನೆ ಕೊಚ್ಚ್‌ತೇಂಗಿಯು, ಒಬ್ಬ ನಿಂಗಡ ಮೂಡ್‍ಕ್ ಪೊಜ್ಜತೇಂಗಿಯು ನಿಂಗ ಸಹಿಸಿಯಂಡಿಂಜಿರ.

²¹ನಂಗ ಬಲ ಇಲ್ಲತಯಿಂಗಳಾನನೆಕೆ, ನಂಗಕ್ ಕ್‍ಟ್ಟ್‌ನ ಅವಮಾನತ್‍ನ ಎಣ್ಣಿಯಂಡುಳ್ಳ; ಒಬ್ಬ ಏದ್ ವಿಷಯತ್‍ಲ್ ದೈರ್ಯವಾಯಿತುಂಡೋ ಅದ್‍ಲ್ ನಾನ್ ಸಹ ದೈರ್ಯವಾಯಿತುಂಡ್; ಇನ್ನನೆ ಬುದ್ದಿ ಇಲ್ಲತಂವೊಂಡನೆಕೆ ತಕ್ಕ್ ಪರ್ಂದಂಡುಳ್ಳ.

²²ಅಯಿಂಗ ಇಬ್ರಿಯರಾ? ನಾನು ಇಬ್ರಿಯನೇ. ಅಯಿಂಗ ಇಸ್ರಾಯೇಲರ? ನಾನು ಇಸ್ರಾಯೇಲನೇ. ಅಯಿಂಗ ಅಬ್ರಹಾಮಂಡ ಸಂತಾನಕಾರಂಗಳಾ? ನಾನು ಅಬ್ರಹಾಮಂಡ ಸಂತಾನಕಾರನೇ.

²³ಅಯಿಂಗ ಕ್ರಿಸ್ತಂಡ ಸೇವಕಂಗಳಾ? ನಾನ್ ಅಯಿಂಗಕಿಂಜ ಕ್ರಿಸ್ತಂಡ ಬಲ್ಯ ಸೇವಕ. ನಾನ್ ಬುದ್ದಿ ಇಲ್ಲತಂವೊಂಡನೆಕೆ ತಕ್ಕ್ ಪರ್ಂದಂಡುಳ್ಳ. ನಾನ್ ದುಂಬ ಕಷ್ಟಪಟ್ಟಂವೊ, ಜನ ನನ್ನ ದುಂಬ ಪೊಜ್ಜಿತುಂಡ್, ಜೈಲ್‍ಲ್ ದುಂಬ ಇಂಜಂವೊ, ದುಂಬ ಕುರಿ ಚಾವ್‍ಕ್ ಚಿಕ್ಕಿತುಳ್ಳ.

²⁴ಯೆಹೂದ್ಯಂಗಡ ಕೈಯಿಂಜ, ನಾಪದ್‍ಕ್ ಒಂದ್ ಕಮ್ಮಿಯಾಯಿತ್ ಅಂಜ್ ಕುರಿ ಚಾಟಿಲ್ ಪೋಯಿತ್ ಕ್‍ಟ್ಟಿತುಂಡ್.

²⁵ಮೂಂದ್ ಕುರಿ ಕೋಲ್‍ಲ್ ನನ್ನ ಪೊಜ್ಜತ್, ಒರ್ ಕುರಿ ಕಲ್ಲ್ ಕನ್‍ಚತ್, ಮೂಂದ್ ಕುರಿ ಹಡಗ್‍ರ ಅಪಾಯತ್‍ಲ್ ನಾನ್ ಇಂಜ, ಒರ್ ಬಯಿಟ್ ಒರ್ ಪೋಲ್ ತ್‍ೕರ ಕಡಲ್‍ಲ್ ಇಂಜ.

²⁶ದುಂಬ ಕುರಿ ಪ್ರಯಾಣ ಮಾಡಿಯೆ, ಪೊಳೇರಗುಂಡ್ ಬಂದ ಅಪಾಯತ್‍ಲ್, ಕಳ್ಳಂಗಡಗುಂಡ್ ಬಂದ ಅಪಾಯತ್‍ಲ್, ನಾಡ ಸ್ವಂತ ಜನತ್‍ರಗುಂಡ್ ಬಂದ ಅಪಾಯತ್‍ಲ್, ಬೋರೆ ಜನತ್‍ರಗುಂಡ್ ಬಂದ ಅಪಾಯತ್‍ಲ್, ಪಟ್ಟಣತ್‍ಲ್ ಬಂದ ಅಪಾಯತ್‍ಲ್, ಮಣಬೂಮಿಲ್ ಬಂದ ಅಪಾಯತ್‍ಲ್, ಸಮುದ್ರತ್‍ಲ್ ಬಂದ ಅಪಾಯತ್‍ಲ್, ಕಳ್ಳಂಗಳಾನ ಅಣ್ಣತಮ್ಮಣಂಗಡಗುಂಡ್ ಬಂದ ಅಪಾಯತ್‍ರಗುಂಡ್,

²⁷ಪ್ರಯತ್ನತ್‍ಲ್, ಕಷ್ಟತ್‍ಲ್, ದುಂಬ ಕುರಿ ವರಿಯತೆ, ಕೆಲ ಪಯಿಚಿತ್, ಬಾಯರಿಕೆಲ್, ದುಂಬ ಕುರಿ ಪಟ್ಟಣಿಲ್, ಕುಳ್‍ರ್‌ಲ್, ಸರಿಯಾನ ಬಟ್ಟೆ ಇಲ್ಲತಂವೊನಾಯಿತ್ ನಾನ್ ಇಂಜ.

²⁸ಇದ್‍ಲ್ಲತೆ, ಎಲ್ಲಾ ಸಬೆರ ವಿಷಯತ್ ನಾಕ್ ಉಳ್ಳ ದುಃಖ ನನ್ನ ಎಕ್ಕಾಲು ನೆರ್‍ಂಗಿಯಂಡುಂಡ್.

²⁹ಒಬ್ಬ ಬಲ ಇಲ್ಲತಂವೊನಾಚೇಂಗಿ, ನಾನ್ ಸಹ ಬಲ ಇಲ್ಲತಂವೊನಾಯಿತ್ ಪೋಪಿಯಲ್ಲಾ? ಒಬ್ಬ ಬಟ್ಟೆ ತಪ್ಪಿ ಪೋಚೇಂಗಿ, ನಾಡ ಮನಸ್ಸ್ ಕಷ್ಟಪಡತೆ ಇಪ್ಪಕಯ್ಯುವಾ?

³⁰ನಾನ್ ಹೊಗಳ್‌ಚಿಡ್‍ವದಾಚೇಂಗಿ, ನಾಕ್ ಎದ್‍ಲ್ ಬಲ ಇಲ್ಲತ ಉಂಡೋ ಅದ್‍ಲ್ ಹೊಗಳ್‌ಚಿಡುವಿ.

³¹ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದೇವನಾಯಿತು ಅಪ್ಪನಾಯಿತು ಎಕ್ಕಾಲು ತುದಿನ ಪಡ್ಂದಂವೊನಾಯಿತ್ ಉಳ್ಳ ಅಂವೊಂಗ್ ನಾನ್ ಪೊಟ್ಟ್ ಪರ್ಂದಂಡಿಲ್ಲೇಂದ್ ಗೊತ್ತುಂಡ್.

³²ದಮಸ್ಕ ಪಟ್ಟಣತ್‍ಲ್ ಅರೇತ ರಾಜಂಡ ಸೇನೆರ ಅದಿಕಾರಿ ನನ್ನ ಪುಡಿಕಂಡೂಂದ್ ದಮಸ್ಕ ಪಟ್ಟಣತ್‍ರ ಬಾಯಿಕಂಡಿಲ್ ಸಿಪಾಯಿಯಳ ಕಾಪಕ್ ನಿಪ್ಪ್‌ಚಿಟ್ಟತ್.

³³ಆಚೇಂಗಿ ನನ್ನ ಒರ್ ಕುಕ್ಕೆಲ್ ಬೆಚ್ಚಿತ್, ಕೋಟೆರ ಗೋಡೆಲ್ ಉಳ್ಳ ಒರ್ ಕ್‍ಡ್‍ಕೆರ ಮೂಲಕ ಅಡಿಕ್ ಇಳ್‌ಪ್‍ಚಿಟ್ಟಿತ್ ಅಂವೊಂಡ ಕೈಯಿಂಜ ನನ್ನ ಕಾಪಾಡ್‍ಚಿ.