Read Kodava 2 ಕೊರಿಂಥ 12 Bible Online

2 ಕೊರಿಂಥ 12 - Kodava bible

2 ಕೊರಿಂಥ 12

¹ಹೊಗಳಿಚಿಡುವದ್‍ಲ್ ಒರ್ ಪ್ರಯೋಜನವು ನಾಕ್ ಇಲ್ಲೆ ಆಚೇಂಗಿಯು, ಅದ್ಂಗ್ ಅವಸ್ಯ ಉಂಡ್. ಒಡೆಯ ನಾಕ್ ಕಾಂಬ್‍ಚಿಟ್ಟ ದರ್ಶನತ್‍ನ ಪಿಂಞ ಪ್ರಕಟನೆರ ವಿಷಯತ್‍ನ ಎಣ್ಣ್‌ವಿ.

²ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಇಂಜ ಒರ್ ಮನುಷ್ಯನ ನಾಕ್ ಗೊತ್ತುಂಡ್; ಪದನಾಲ್ ಕಾಲಕ್ ಮಿಂಞ ದೇವ ಅಂವೊನ ಮೂಂದನೆ ಪರಲೋಕಕತ್ತನೆ ಎಡ್‍ತಂಡತ್. ಅಂವೊ ಅಂವೊಂಡ ತಡೀಲ್ ಇಂಜತಾ ಅಥವ ತಡಿಕ್ ಪೊರಮೆ ಇಂಜತಾಂದ್ ನಾಕ್ ಗೊತ್ತ್‌ಲ್ಲೆ; ದೇವಕ್ ಗೊತ್ತುಂಡ್.

³ಅಂವೊ ತಡೀಲ್ ಇಂಜತಾ ಅಥವ ತಡಿಕ್ ಪೊರಮೆ ಇಂಜತಾಂದ್ ನಾಕ್ ಗೊತ್ತ್‌ಲ್ಲೆ, ಆಚೇಂಗಿ ದೇವಕ್ ಮಾತ್ರ ಗೊತ್ತುಂಡ್.

⁴ಆ ಮನುಷ್ಯನ ಪರದೈಸ[11] ಎಣ್ಣುವ ಜಾಗತ್‍ರ ಒಳ್‍ಕ್ ಎಡ್‍ತಂಡತ್. ಅಲ್ಲಿ ಮನುಷ್ಯಂಗ ಪರಿಯುವಕಯ್ಯತ ಪಿಂಞ ಪೊರಮೆ ಎಣ್ಣುವಕ್ ಕಯ್ಯತ ತಕ್ಕ್‌ನ ಅಂವೊ ಕ್‍ೕಟತ್.

⁵ಇಂವೊಂಡ ವಿಷಯತ್ ಹೊಗಳುವಿ; ಆಚೇಂಗಿಯು ನಾಡ ವಿಷಯತ್, ನಾಡ ಬಲಹೀನವಾನ ವಿಷಯತ್‍ನ ಬುಟ್ಟಿತ್ ಬೋರೆ ಏದ್ ವಿಷಯತ್‍ಲು ಹೊಗಳಿಚಿಡುಲೆ.

⁶ಹೊಗಳಿಚಿಡ್‌ವಕ್ ನಾಕ್ ಮನಸ್ಸ್ ಇಂಜತೇಂಗಿಯು, ನಾನ್ ಬುದ್ದಿ ಇಲ್ಲತಂವೊ ಅಲ್ಲ, ನಾನ್ ಸತ್ಯತ್‍ನ ಎಣ್ಣ್‌ವಿ. ಆಚೇಂಗಿಯು, ಒಬ್ಬನು ನಾಡಲ್ಲಿ ಕಾಂಬ ಪಿಂಞ ನನ್ನಿಂಜ ಕ್‍ೕಪ ವಿಷಯಕ್ ಜಾಸ್ತಿಯಾಯಿತ್ ನನ್ನ ಗೇನಮಾಡತನೆಕೆ ಅನ್ನನೆ ಮಾಡತೆ ಇಪ್ಪಿ.

⁷ನಾಕ್ ಕ್‍ಟ್ಟ್‌ನ ಅನೇಕ ಪ್ರಕಟನೆರಗುಂಡ್, ನಾನ್ ನನ್ನ ಬಲ್ಯಂವೋಂದ್ ಗೇನಮಾಡತನೆಕೆ, ನಾಡ ತಡೀಲ್ ಒರ್ ಮುಳ್ಳ್‌ನ ಕೊಡ್‌ತಿತುಂಡ್; ನಾನ್ ನನ್ನ ಬಲ್ಯಂವೋಂದ್ ಗೇನಮಾಡತನೆಕೆ, ಅದ್ ನಾಕ್ ಹಿಂಸೆ ತಪ್ಪ ಸೈತಾನಂಡ ದೂತನಾಯಿತುಂಡ್.

⁸ಅದ್ ನನ್ನ ಬುಟ್ಟಿತ್ ಪೋಪಕಾಯಿತ್ ಮೂಂದ್ ಕುರಿ ಒಡೆಯಂಡಲ್ಲಿ ಬೋಡ್‌ನ.

⁹ಅದ್ಂಗ್ ಅಂವೊ: ನಾಡ ಕೃಪೆ ನೀಕ್ ಮದಿ, ಬಲಹೀನವಾನ ಸಮಯತ್‍ಲ್ ನಾಡ ಬಲ ನೀಕ್ ಪೂರ್ತಿಯಾಯಿತ್ ಕ್‌ಟ್ಟುವಾಂದ್ ಎಣ್ಣ್‌ಚಿ. ಆನಗುಂಡ್ ಕ್ರಿಸ್ತಂಡ ಶಕ್ತಿ ನಾಡಲ್ಲಿ ನಿಪ್ಪಕಾಯಿತ್, ನಾಡ ಬಲಹೀನವಾನ ವಿಷಯತ್‍ಲ್ ನಾನ್ ದುಂಬ ಕುಶೀಲ್ ಹೊಗಳಿಯಂಡುಳ್ಳ.

¹⁰ಆನಗುಂಡ್, ಕ್ರಿಸ್ತಂಗಾಯಿತ್ ನಾಕ್ ಬಪ್ಪ ಬಲಹೀನವಾನ ವಿಷಯತ್‍ಲ್, ಜನ ಎಣ್ಣುವ ದೂಷಣೇಲ್, ಹಿಂಸೇಲ್, ಕಷ್ಟತ್‍ಲ್, ದುಃಖತ್‍ಲ್ ನಾನ್ ಕುಶಿಪಟ್ಟಂಡುಳ್ಳ. ಅನ್ನನೆ, ನಾನ್ ಬಲಹೀನವಾಯಿತ್ ಇಪ್ಪಕಲೆ ಬಲ ಉಳ್ಳಂವೊನಾಯಿತುಳ್ಳ.

¹¹ಒರ್ ಬುದ್ದಿ ಇಲ್ಲತಂವೊನನೆಕೆ ಹೊಗಳ್‌ಚಿಡುವಕ್ ಬಲ ಇಲ್ಲತಂವೊನಾಯಿತ್ ನಾನ್ ಆಯೆ, ನಾನ್ ಅನ್ನನೆ ಆಪಕ್ ನಿಂಗಳೇ ಮಾಡಿರ. ನಿಂಗಡಗುಂಡೇ ನಾಕ್ ಹೊಗಳ್‍ಚಿಡುವನೆಕೆ ಆಪಕಿಂಜತ್. ನಾನ್ ಒಂದು ಇಲ್ಲೇಂದ್ ಗೇನಮಾಡ್‍ಚೇಂಗಿಯು, ದುಂಬ ಮುಕ್ಯಪಟ್ಟ ಅಪೊಸ್ತಲಂಗಕಿಂಜ ಒರ್ ವಿಷಯತ್‍ಲ್ ಕೂಡೆ ಅಯಿಂಗಕಿಂಜ ನಾನ್ ಕಮ್ಮಿ ಆನಂವೊ ಇಲ್ಲೆ.

¹²ಅಪೊಸ್ತಲಂಗಕುಳ್ಳ ಗುರ್‍ತ್‍ನ ಎಲ್ಲಾ ವಿದವಾನ ಪೊರುಮೆಯಿಂಜ ಆಶ್ಚರ್ಯತ್ಂಜ, ಅದ್ಬುತತ್‌ಂಜ, ಶಕ್ತಿರ ಕೈಯಿಂಜ ನಿಂಗಡ ಮದ್ಯತ್‍ಲ್ ನಡ್ಂದತಲ್ಲಾ?

¹³ನಿಂಗ ಏದ್ ವಿಷಯತ್‍ಲ್ ಬೋರೆ ಸಬೇಕಿಂಜ ಕಮ್ಮಿ ಇಂಜಿರ? ನಾನ್ ನಿಂಗಕ್ ಬಾರವಾಯಿತಿಲ್ಲತದೇ ನಿಂಗಕ್ ಕಮ್ಮಿಯಾಯಿತ್ಂಜತ್; ನಾನ್ ಮಾಡ್‍ನ ಈ ಅನ್ಯಾಯಕಾರ್ಯತ್‍ನ ಮನ್ನಿಚಿಡಿ.

¹⁴ನೋಟಿ, ನಿಂಗಡ ಪಕ್ಕ ಮೂಂದನೆ ಕುರಿ ಬಪ್ಪಕ್ ನಾನ್ ತಯಾರಾಯಿತುಳ್ಳ; ನಾನ್ ನಿಂಗಕ್ ಬಾರವಾಯಿತ್‌ಪ್ಪುಲೆ; ನಿಂಗಡ ಪಕ್ಕ ಉಳ್ಳದ್‍ನ ಅಲ್ಲ, ನಿಂಗಳೇ ನಾಕ್ ಬೋಂಡಿಯತ್. ಅಪ್ಪವ್ವಂಗಕ್ ಮಕ್ಕ ಅಲ್ಲ, ಆಚೇಂಗಿ ಮಕ್ಕಕ್ ಅಪ್ಪವ್ವಂಗಳೇ ಉಳಿಕೆ ಮಾಡಿ ಬೆಪ್ಪ.

¹⁵ಆನಗುಂಡ್, ನಾನ್ ನಿಂಗಡಲ್ಲಿ ಎಚ್ಚಕ್ ಜಾಸ್ತಿಯಾಯಿತ್ ಪ್ರೀತಿ ಮಾಡಿಯಂಡ್ ಉಂಡೋ, ಅಚ್ಚಕ್ ಕಮ್ಮಿಯಾಯಿತ್ ನಿಂಗ ನನ್ನ ಪ್ರೀತಿ ಮಾಡ್‍ಚೇಂಗಿಯು, ನಿಂಗಕಾಯಿತ್ ನಾಡ ಪಕ್ಕ ಉಳ್ಳದ್‍ನ ಕೊಡ್‌ಪಕು, ನನ್ನ ಸಹ ಕೊಡ್‌ಪಕು ದುಂಬ ಕುಶಿ ಪಡುವಿ.

¹⁶ನಾನ್ ನಿಂಗಕ್ ಬಾರವಾಯಿತ್ ಇಂಜಿತ್‌ಲ್ಲೆ, ಆಚೇಂಗಿಯು, ನಾನ್ ತಂತ್ರ ಮಾಡಿತ್, ನಿಂಗಳ ಕಳಿಪ್‍ಚಿಟ್ಟಿತ್ ಪುಡ್‌ಚಿಯೇಂದ್ ಚೆನ್ನ ಜನ ಎಣ್ಣುವ.

¹⁷ನಾನ್ ನಿಂಗಡ ಪಕ್ಕ ಅಯಿಚಯಿಂಗಡ ಮೂಲಕ ನಿಂಗಡಿಂಜ ಎಂತಾಚು ಲಾಬ ಪಡ್ಂದಿತುಂಡಾ?

¹⁸ತೀತ ನಿಂಗಡ ಪಕ್ಕ ಬಪ್ಪಕ್ ನಾನ್ ಅಂವೊನ ಕ್‍ೕಟಿಯೆ, ಅಂವೊಂಡ ಕೂಡೆ ಇಂಞೊಬ್ಬನ ಅಯಿಚಿಯೆ; ತೀತಂಗ್ ನಿಂಗಡಿಂಜ ಎಂತಾಚು ಲಾಬ ಕ್‍ಟ್ಟ್‌ಚಾ? ನಂಗ ಒರೇ ಆತ್ಮ ಉಳ್ಳಯಿಂಗಳಾಯಿತ್ ಒರೇ ಕಾಲ್‍ರ ಗುರ್‌ತ್‌ಲ್ ನಡ್ಂದಂಡುಂಡಲ್ಲಾ?

¹⁹ನಂಗ ಯೋಗ್ಯವಾನಯಿಂಗಾಂದ್ ಕಾಂಬ್‍ಚಿಡುವಕಾಯಿತ್ ಇನ್ನನೆ ತಕ್ಕ್ ಪರ್ಂದಂಡುಳ್ಳ್ಂದ್ ಗೇನಮಾಡಿಯಡುಳ್ಳಿರಾ? ದೇವಡ ಮಿಂಞತ್ ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ತಕ್ಕ್ ಪರ್ಂದಂಡುಳ್ಳ. ನಾಡ ಪ್ರೀತಿರ ಜನಳೇ, ನಿಂಗ ಬಕ್ತಿಲ್ ಬೊಳಿಯುವಕಾಯಿತೇ ಇದ್‍ನೆಲ್ಲಾ ಮಾಡಿಯಂಡುಳ್ಳ.

²⁰ನಾನ್ ಬಪ್ಪಕ, ನಿಂಗ ಎನ್ನನೆ ಇಕ್ಕಂಡೂಂದ್ ನಾನ್ ಗೇನ ಮಾಡಿಯಂಡ್ ಉಂಡೋ ಅನ್ನನೆ ನಿಂಗ ಇಪ್ಪುಲೇಂದು ಪಿಂಞ ನಿಂಗ ಗೇನ ಮಾಡಿಯಂಡುಳ್ಳನೆಕೆ ನಾನ್ ಇಪ್ಪುಲೆಯೋಂದು ನಾಕ್ ಪೋಡಿ ಉಂಡ್. ನಿಂಗಡ ಮದ್ಯತ್‍ಲ್ ಪಗೆ, ವೈರಾಗ್ಯ, ಚೆಡಿ, ತರ್ಕ, ಒಟ್ಟೆಕಿಚ್ಚ್, ಒಬ್ಬಂಡ ಮೇಲೆ ಒಬ್ಬ ಕುತ್ತ ಪರಿವದ್, ಬೋಂಡತ ವೈರಾಗ್ಯ, ಕಲಹ ಇನ್ನತಾನೆಲ್ಲ ಇಪ್ಪಾಂದ್ ನಾಕ್ ಪೋಡಿ ಆಯಂಡುಂಡ್.

²¹ಪುನಃ ನಾನ್ ನಿಂಗಡ ಪಕ್ಕ ಬಪ್ಪಕ, ನಾಡ ದೇವ ನಿಂಗಡ ಮಿಂಞ ನನ್ನ ತಗ್ಗ್‌ಚಿಡುವಕಾಯಿತ್, ಮಿಂಞ ಪಾಪ ಮಾಡ್‍ನ ದುಂಬ ಜನ ಅಯಿಂಗ ಮಾಡ್‍ನ ಅಶುದ್ದತ್‍ನ, ಲೈಂಗಿಕ ಪಾಪತ್‍ನ ಪಿಂಞ ತಡೀರ ಮೋಹತ್‍ನ ಬುಟ್ಟಿತ್ ಪಶ್ಚಾತಾಪ ಪಡತೆ ಇಪ್ಪದ್‍ನ ಕಂಡಿತ್ ನಾನ್ ದುಃಖಪಡುವಕ್ ಇಪ್ಪೋಂದ್ ನಾಕ್ ಪೋಡಿ ಆಯಂಡುಂಡ್.