Read Kodava 2 ಕೊರಿಂಥ 13 Bible Online

2 ಕೊರಿಂಥ 13 - Kodava bible

2 ಕೊರಿಂಥ 13

¹ಇಕ್ಕ ನಾನ್ ನಿಂಗಡ ಪಕ್ಕ ಬಪ್ಪದ್ ಮೂಂದನೆ ಕುರಿ; ಏದ್ ವಿಷಯವಾಚೇಂಗಿಯು ದಂಡ್ ಅಲ್ಲ ಮೂಂದ್ ಸಾಕ್ಷಿರಗುಂಡ್ ಸ್ತಾಪನೆ ಆಪ.[12]

²ನಾನ್ ದಂಡನೆ ಕುರಿ ನಿಂಗಡಲ್ಲಿ ಇಪ್ಪಕ ಎಣ್ಣ್‌ನನೆಕೆ, ಇಕ್ಕ ದೂರವಾಯಿತ್ ಇಂಜತೇಂಗಿಯು, ನಿಂಗಡ ಪಕ್ಕ ಇಪ್ಪನೆಕೆ, ನಾನ್ ಪುನಃ ಬಾತೇಂಗಿ ನಿಂಗಳ ತಪ್ಪಿಚಿಡ್‌ವಕ್ ಬುಡ್‍ಲೇಂದ್ ಮಿಂಞ ಪಾಪ ಮಾಡ್‍ನಯಿಂಗಕು ಇಂಞು ಎಲ್ಲಾರ್‌ಕು ಎಚ್ಚರ ಮಾಡಿತ್ ಒಳ್‌ದಿಯಂಡುಳ್ಳ.

³ಕ್ರಿಸ್ತ ನಾಡಲ್ಲಿ ತಕ್ಕ್ ಪರ್‌ಂದಂಡುಂಡಾಂದ್ ಸಾಕ್ಷಿ ತ್‍ೕಡಿಯಂಡುಳ್ಳಿರಾ? ಅಂವೊ ನಿಂಗಡಲ್ಲಿ ಬಲ ಇಲ್ಲತಂವೊನಾಯಿತ್‌ಲ್ಲೆ, ಶಕ್ತಿ ಉಳ್ಳಂವೊನಾಯಿತ್ ಉಂಡ್.

⁴ಅಂವೊನ ಬಲ ಇಲ್ಲತಂವೊನಾಯಿತ್ ಶಿಲುಬೇಲ್ ಇಟ್ಟತೇಂಗಿಯು, ದೇವಡ ಶಕ್ತಿರಗುಂಡ್ ಬದ್‍ಕಿಯಂಡುಂಡ್; ಅನ್ನನೆ ನಂಗಳು ಅಂವೊಂಡಲ್ಲಿ ಬಲ ಇಲ್ಲತಯಿಂಗಳಾಯಿತ್ ಇಂಜತೇಂಗಿಯು, ನಿಂಗಕ್ ಸೇವೆ ಮಾಡ್‌ವಕಾಯಿತ್ ದೇವಡ ಶಕ್ತಿರಗುಂಡ್ ಅಂವೊಂಡಲ್ಲಿ ನಂಗ ಬದ್‍ಕಿಯಂಡಿಪ್ಪ.

⁵ನಿಂಗಕ್ ನಂಬಿಕೆ ಉಂಡಾಂದ್ ನಿಂಗಳ ನಿಂಗಳೇ ಪರೀಕ್ಷೆ ಮಾಡಿತ್ ನೋಟಿ. ನಿಂಗಳ ನಿಂಗಳೇ ಪರೀಕ್ಷೆ ಮಾಡಿ ನೋಟಿ. ಯೇಸು ಕ್ರಿಸ್ತ ನಿಂಗಡಲ್ಲಿ ಉಂಡ್‍ೕಂದ್ ನಿಂಗಕೇ ಗೊತ್ತಿಲ್ಲೆಯಾ? ನಿಂಗ ಪರಿಕ್ಷೇಕ್ ನಿಕ್ಕತಯಿಂಗಳಾಯಿತ್ಂಜತೇಂಗಿ ನಿಂಗಡ ನಂಬಿಕೆ ನಿಂಗಕ್ ಗೊತ್ತಾಪುಲೆ.

⁶ಆಚೇಂಗಿ ನಂಗ, ಪರಿಕ್ಷೇಕ್ ನಿಂದಯಿಂಗಾಂದ್ ನಿಂಗಕ್ ಗೊತ್ತುಂಡ್‍ೕಂದ್ ನಂಬುವಿ.

⁷ನಿಂಗ ಒರ್ ತಪ್ಪು ಮಾಡತೆ ಇಪ್ಪಕ್ ನಾನ್ ನಿಂಗಕಾಯಿತ್ ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವಿ. ನಂಗ ಪರಿಕ್ಷೇಕ್ ನಿಂದಯಿಂಗಾಂದ್ ಗೊತ್ತಾಪಕಾಯಿತ್ ಅಲ್ಲ, ನಂಗ ಪರಿಕ್ಷೇಕ್ ನಿಕ್ಕತಯಿಂಗಡನೆಕೆ ಇಂಜತೇಂಗಿಯು, ನಿಂಗ ನಲ್ಲದ್ ಮಾಡ್‌ವಕಾಯಿತ್ ಪ್ರಾರ್ಥನೆ ಮಾಡ್‌ವಿ

⁸ಸತ್ಯಕ್ ವಿರೋದವಾಯಿತ್ ನಂಗ ಏದು ಮಾಡ್‌ವಕ್ ಕಯ್ಯುಲೆ, ಸತ್ಯಕಾಯಿತೇ ಮಾಡ್‌ವ.

⁹ನಂಗ ಬಲ ಇಲ್ಲತಯಿಂಗಳು, ನಿಂಗ ಬಲ ಉಳ್ಳಯಿಂಗಳುವಾಯಿತಿಪ್ಪಕ ನಂಗ ಕುಶಿಪಟ್ಟಂಡುಂಡ್; ನಿಂಗ ಪೂರ್ತಿಯಾಯಿತ್ ಬೊಳಿಯಂಡೂಂದ್ ಪ್ರಾರ್ಥನೆ ಮಾಡಿಯಂಡುಂಡ್.

¹⁰ಆನಗುಂಡ್ ನಿಂಗಡ ಕೂಡೆ ಇಲ್ಲತಿಪ್ಪಕಲೇ ಇದ್‍ನೆಲ್ಲಾ ಒಳ್‍ದಿಯೆ; ನಿಂಗಳ ಪೊಳಿಪಕಾಯಿತ್ ಅಲ್ಲ, ಕೆ‍ಟ್ಟ್‌ವಕಾಯಿತೇ ಒಡೆಯ ನಾಕ್ ತಂದಿತುಳ್ಳ ಅದಿಕಾರತ್‍ರನೆಕೆ, ನಾನ್ ನಿಂಗಡ ಪಕ್ಕ ಬಪ್ಪಕ, ಕಠಿಣವಾಯಿತ್ ಇಪ್ಪದ್ ಬೋಂಡಾಂದ್ ಕುಶಿ ಪಡುವಿ.

¹¹ಆಕೀರ್‌ಲ್, ನಾಡ ಅಣ್ಣತಮ್ಮಣಂಗಳೇ, ನಿಂಗ ಕುಶೀಲ್ ಇರಿ, ಪೂರ್ತಿಯಾಯಿತ್ ಇರಿ, ಒಬ್ಬಂಗ್ ಒಬ್ಬ ಪುರ್‌ಡ್ ಕೊಡಿ, ಒರೇ ಮನಸ್ಸ್ ಉಳ್ಳಯಿಂಗಳಾಯಿತಿರಿ, ಸಮಾದಾನತ್‍ಲ್ ಇರಿ, ಅಕ್ಕ ಪ್ರೀತಿರ ಪಿಂಞ ಸಮಾದಾನತ್‍ರ ದೇವ ನಿಂಗಡ ಕೂಡೆ ಇಪ್ಪ.

¹²ಒಬ್ಬಂಗ್ ಒಬ್ಬ ಪವಿತ್ರವಾನ ಮುತ್ತ್ ಕೊಡ್‌ತಿತ್[13] ವಂದನೆ ಮಾಡಿ.

¹³ದೇವಡ ಮಕ್ಕ ಎಲ್ಲಾರು ನಿಂಗಕ್ ವಂದನೆ ಎಣ್ಣಿಯಂಡುಂಡ್.

¹⁴ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು, ದೇವಡ ಪ್ರೀತಿಯು, ಪವಿತ್ರಾತ್ಮಂಡ ಐಕ್ಯವು ನಿಂಗ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್.