Read Kodava 2 ಕೊರಿಂಥ 2 Bible Online

2 ಕೊರಿಂಥ 2 - Kodava bible

2 ಕೊರಿಂಥ 2

¹ಆನಗುಂಡ್, ನಾನ್ ನಿಂಗಡ ಪಕ್ಕ ಪುನಃ ದುಃಖತ್‍ಲ್ ಬಪ್ಪದ್ ಬೋಂಡಾಂದ್ ನಾನ್ ತೀರ್ಮಾನ ಮಾಡ್‍ನ.

²ನಾನ್ ಅನ್ನನೆ ನಿಂಗಳ ದುಃಖ ಪಡ್‍ತ್‍ಚೇಂಗಿ, ನಾನ್ ದುಃಖ ಪಡ್‍ತ್‍ನಂವೊ ಅಲ್ಲತೆ, ನನ್ನ ಕುಶಿ ಪಡ್‍ತ್‍ವಕ್ ಬೋರೆ ದಾರ್ ಉಂಡ್?

³ಅಕ್ಕ ನಾನ್ ನಿಂಗಡ ಪಕ್ಕ ಬಪ್ಪಕ, ನನ್ನ ಕುಶಿಪಡ್‌ತ್‌ವಯಿಂಗಡಗುಂಡ್ ದುಃಖ ಪಡ್‍ವಕ್ ಆಗಾಂದು ಪಿಂಞ ನಾಡ ಕುಶಿ ನಿಂಗ ಎಲ್ಲಾರ್‌ಕು ಕುಶಿಯಾಯಿತಿಕ್ಕಂಡೂಂದು, ನಿಂಗ ಎಲ್ಲಾಡ ವಿಷಯತ್ ನಂಬಿಕೆಯಾಯಿತೇ, ನಿಂಗಡ ಪಕ್ಕ ಬಂದಿತ್ ನಿಂಗಳ ಕಾಂಬಕ್ ಮಿಂಞಲೇ ಅನ್ನನೆ ನಾನ್ ನಿಂಗಕ್ ಈ ಕಾಗದತ್‍ನ ಒಳ್‍ದಿಯೆ.

⁴ಅದಲ್ಲತೆ, ನಿಂಗ ದುಃಖ ಪಡಂಡೂಂದ್ ನಾನ್ ಒಳ್‍ದಿತ್‌ಲ್ಲೆ, ನಿಂಗಡ ಮೇಲೆ ನಾಕ್ ಉಳ್ಳ ಬಲ್ಯ ಪ್ರೀತಿನ ನಿಂಗ ಅರಿಯಂಡೂಂದ್ ನಾನ್ ದುಂಬ ದುಃಖತ್ಂಜಲು, ಹೃದಯತ್‍ರ ನೊಂಬಲತ್ಂಜಲು, ದುಂಬ ಕಣ್ಣೀರಿಂಜಲು ನಿಂಗಕ್ ಒಳ್‍ದಿಯೆ.

⁵ಒಬ್ಬ ದುಃಖಪಡ್‍ತಿತ್ಂಜತೇಂಗಿ, ಅಂವೊ ನನ್ನ ಮಾತ್ರ ದುಃಖಪಡ್‍ತಿತ್‌ಲ್ಲೆ, ಚೆನ್ನಮಟ್ಟಕ್ ನಿಂಗ ಎಲ್ಲಾರ್‌ನ ಸಹ ದುಃಖಪಡ್‍ತಿತುಂಡ್‍ೕಂದ್ ನಿಂಗ ಎಲ್ಲಾಡ ಮೇಲೆ ದುಂಬ ಕಠಿಣವಾಯಿತ್ ಇರತನೆಕೆ ಇದ್‍ನ ಎಣ್ಣ್‌ವಿ.

⁶ಅನ್ನನೆ ದುಃಖ ಪಡ್‍ತ್‍ನಂವೊಂಗ್, ನಿಂಗಡಡೆಲ್ ಉಳ್ಳ ದುಂಬ ಜನತ್‍ರಗುಂಡ್ ಕ್‍ಟ್ಟ್‌ನ ಈ ಶಿಕ್ಷೆಯೇ ಮದಿ ಆಚಿ.

⁷ಆನಗುಂಡ್ ಅಂವೊ, ಬಲ್ಯ ದುಃಖತ್‍ಲ್ ಮನಸ್ಸ್ ಬುಟ್ಟಿತ್ ಪೋಕತನೆಕೆ, ನಿಂಗ ಅಂವೊನ ಮನ್ನಿಚಿಟ್ಟಿತ್ ಸಮಾದಾನ ಮಾಡಂಡು.

⁸ಅನ್ನನೆ ನಿಂಗಡ ಪ್ರೀತಿನ ಅಂವೊಂಗ್ ದೃಡಪಡ್‌ತ್‍ವಕಾಯಿತ್ ನಾನ್ ನಿಂಗಳ ಬೋಡುವಿ.

⁹ನಿಂಗ ಎಲ್ಲಾ ವಿಷಯತ್‍ಲು ತಗ್ಗಿತ್ ನಡ್ಂದಂಡುಳ್ಳಿರಾಂದ್ ಪರೀಕ್ಷೆ ಮಾಡ್‌ವಕಾಯಿತೇ ಅನ್ನನೆ ಒಳ್‍ದಿಯೆ.

¹⁰ನಿಂಗ ದಾರ್‌ಕ್, ಏದ್‍ನ ಮನ್ನಿಚಿಡ್‌ವಿರೋ, ನಾನು ಸಹ ಅಯಿಂಗಳ ಮನ್ನಿಚಿಡುವಿ. ನಾನ್ ಏದ್‍ನ ಮನ್ನಿಚಿಟ್ಟಿತುಂಡೋ, ಅದ್‍ನ ನಿಂಗಕಾಯಿತ್ ಕ್ರಿಸ್ತಂಡ ಸನ್ನಿದಾನತ್‍ಲ್ ಮನ್ನಿಚಿಟ್ಟಿಯೆ.

¹¹ಸೈತಾನಗುಂಡ್ ನಂಗ ಮೋಸ ಪೋಕತನೆಕೆ ನಾನ್ ಅನ್ನನೆ ಮಾಡಿಯೆ; ಸೈತಾನಂಡ ತಂತ್ರ ಎಂತ್‍ೕಂದ್ ನಂಗಕ್ ಚಾಯಿತೆ ಗೊತ್ತುಂಡಲ್ಲ.

¹²ಪಿಂಞ, ಯೇಸು ಕ್ರಿಸ್ತಂಡ ನಲ್ಲ ಸುದ್ದಿನ ಬೋದನೆ ಮಾಡ್‌ವಕಾಯಿತ್ ನಾನ್ ತ್ರೋವ ಪಟ್ಟಣಕ್ ಬಪ್ಪಕ, ಒಡೆಯನಗುಂಡ್ ನಾಕ್ ಪಡಿ ತೊರ್ಂದ್‍ತ್ಂಜತ್.

¹³ಆಚೇಂಗಿಯು, ಅಲ್ಲಿ ನಾಡ ಪ್ರೀತಿರ ತಮ್ಮಣನಾನ ತೀತನ ಕಾಂಗತಗುಂಡ್, ನಾಡ ಮನಸ್ಸ್‌ಕ್ ಸಮಾದಾನ ಇಲ್ಲತಾಚಿ. ಆನಗುಂಡ್, ನಾನ್ ಪೊರಟಿತ್ ಪೋಪೀಂದ್ ಅಯಿಂಗಕ್ ಎಣ್ಣಿತ್, ಮಕೆದೋನ್ಯ ಪ್ರಾಂತ್ಯಕ್ ಪೋಯೆ.

¹⁴ಆಚೇಂಗಿ, ಕ್ರಿಸ್ತಂಡಲ್ಲಿ ಎಕ್ಕಾಲು ನಂಗಕ್ ಜಯ ಕ್‍ಟ್ಟ್‌ವನೆಕೆ ಮಾಡಿತ್, ಎಲ್ಲಾ ಜಾಗತ್‍ಲು ನಂಗಡ ಮೂಲಕ ಅಂವೊನ ಅರಿವಕುಳ್ಳ ಬುದ್ದಿ ಎಣ್ಣುವ ಸುಗಂದ ವಾಸನೆನ ಪಬ್ಬ್‌ಚಿಡ್‌ವ ದೇವಕ್ ವಂದನೆ.

¹⁵ರಕ್ಷಣೆ ಕ್‍ಟ್ಟ್‌ವಯಿಂಗಡ ಮದ್ಯತ್‍ಲು, ಪಾಳಾಯಿ ಪೋಪಯಿಂಗಡ ಮದ್ಯತ್‍ಲು, ನಂಗ ದೇವಕ್ ಕ್ರಿಸ್ತಂಡ ಸುಗಂದ ವಾಸನೆಯಾಯಿತುಂಡ್.

¹⁶ನಂಗ ಪಾಳಾಯಿ ಪೋಪಯಿಂಗಡ ಮದ್ಯತ್‍ಲ್ ಚಾವ್‍ರ ವಾಸನೆಯಾಯಿತು, ರಕ್ಷಣೆ ಕ್‍ಟ್ಟ್‌ವಯಿಂಗಡ ಮದ್ಯತ್‍ಲ್ ಜೀವತ್‍ರ ಸುಗಂದ ವಾಸನೆಯಾಯಿತು ಉಂಡ್. ಇನ್ನನೆ ಮಾಡ್‌ವಕ್ ಯೋಗ್ಯನಾಯಿತುಳ್ಳಂವೊ ದಾರ್?

¹⁷ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.