Read Kodava 2 ಕೊರಿಂಥ 3 Bible Online

2 ಕೊರಿಂಥ 3 - Kodava bible

2 ಕೊರಿಂಥ 3

¹ನಂಗ ನಂಗಳ ಹೊಗಳ್‍ಚಿಡ್‍ವಕ್ ಪುನಃ ಸುರ್ ಮಾಡ್‍ಚಾ? ಅಥವ, ಚೆನ್ನ ಜನಕ್ ಬೋಂಡುವನೆಕೆ, ನಂಗಡಿಂಜ ನಿಂಗಕು, ನಿಂಗಡಿಂಜ ನಂಗಕು ಸಿಪಾರ್‍ಸ್ ಕಾಗದ ಎನ್ನಂಗ್ ಬೋಂಡು?

²ನಂಗಡ ಹೃದಯತ್‍ಲ್ ಒಳ್‍ದಿ ಬೆಚ್ಚಿತ್, ಎಲ್ಲಾರ್‌ಕು ಗೊತ್ತಾಯಿತ್ ಪಿಂಞ ಅಯಿಂಗ ಓದಿಯಂಡುಳ್ಳ ನಂಗಡ ಕಾಗದ ನಿಂಗಳೇ.

³ಎನ್ನಂಗೆಣ್ಣ್‌ಚೇಂಗಿ ನಿಂಗ, ನಂಗ ಮಾಡ್‍ನ ಸೇವೇರ ಫಲವಾಯಿತ್ ಕ್‍ಟ್ಟ್‌ನ ಕ್ರಿಸ್ತಂಡ ಕಾಗದವಾಯಿತುಳ್ಳಿರಾಂದ್ ಎಲ್ಲಾರು ಕಾಂಬನೆಕೆ ಆಚಿ; ಅದ್ ಮಸಿಯಿಂಜ ಅಲ್ಲ ಆಚೇಂಗಿ ಜೀವವಾಯಿತ್ತುಳ್ಳ ದೇವಡ ಆತ್ಮತ್‍ರಗುಂಡ್ ಪಿಂಞ ಕಲ್ಲ್‌ರ ಅಟ್ಟತ್‍ಲ್ ಅಲ್ಲ, ಆಚೇಂಗಿ, ಮನುಷ್ಯಂಡ ಹೃದಯವಾನ ಅಟ್ಟತ್‍ಲ್ ಒಳ್‍ದಿ ಬೆಚ್ಚಿತುಂಡ್.

⁴ನಂಗ ಕ್ರಿಸ್ತಂಡ ಮೂಲಕ ದೇವಡ ಮಿಂಞತ್ ಅನ್ನತ ನಂಬಿಕೇನ ಬೆಚ್ಚಿತುಂಡ್.

⁵ನಂಗಳಾಯಿತ್ ಎಂತಾಚು ಮಾಡ್‌ವಕ್ ಕಯ್ಯೂಂದ್ ಗೇನಮಾಡ್‌ವಕ್ ನಂಗಕ್ ಯೋಗ್ಯತೆ ಇಲ್ಲೆ; ನಂಗಡ ಯೋಗ್ಯತೆ ದೇವಡಯಿಂಜ ಬಂದಂಡುಂಡ್.

⁶ಪುದಿಯ ಒಪ್ಪಂದತ್‍ರ ಸೇವಕಂಗಳಾಯಿತ್ ಇಪ್ಪಕ್, ಅಂವೊನೇ ನಂಗಳ ಯೋಗ್ಯವಂತಯಿಂಗಳಾಯಿತ್ ಮಾಡಿತುಂಡ್; ಈ ಒಪ್ಪಂದ ಒಳ್‍ತ್‍ರ ಪ್ರಕಾರ ಅಲ್ಲ ಆಚೇಂಗಿ ಪವಿತ್ರಾತ್ಮತ್‍ರ ಪ್ರಕಾರ ಆನದ್. ಎನ್ನಂಗೆಣ್ಣ್‌ಚೇಂಗಿ, ಒಳ್‍ತ್ ನಂಗಳ ಕೊಲ್ಲುವ; ದೇವಡ ಆತ್ಮವೋ ನಂಗಕ್ ಜೀವ ತಪ್ಪ.

⁷ಒಳ್‍ತ್‍ಯಿಂಜ ಒಳ್‍ದಿತ್ ಕಲ್ಲ್‌ಲ್ ಕೆತ್ತ್‌ಪಣಿ ಮಾಡಿತ್ಂಜ ಚಾವ್‍ಕ್ ನಡ್‍ತಿಯಂಡ್ ಪೋಪ ಸೇವೇನ ಮಾಡ್‍ನ, ಮೋಶೇರ ಮೂಡ್‍ಲ್ ಮಹಿಮೇರ ಬೊಳಿ ಮಿನ್ನಿಯಂಡಿಂಜಗುಂಡ್, ಇಸ್ರಾಯೇಲ್ ಜನಕ್ ಅಂವೊಂಡ ಮೂಡ್‍ನ ನೋಟ್‍ವಕ್ ಕಯ್ಯತ ಆಚಿ.

⁸ಕಾಂಗತೆ ಆಯಿಪೋಪ ಮಹಿಮೇರ ಸೇವೆ ಅಚ್ಚಕ್ ಮಹಿಮೆ ಉಳ್ಳದಾಯಿತ್ಂಜತೇಂಗಿ, ಪವಿತ್ರಾತ್ಮತ್‍ರ ಸೇವ ಇಂಞು ಎಚ್ಚಕ್ ಮಹಿಮೆ ದುಂಬ್‍ನದಾಯಿತ್‌ಪ್ಪ?

⁹ಕಂಡನೆ ಮಾಡ್‌ವ ಸೇವೆ ಮಹಿಮೆ ತಪ್ಪದಾಯಿತ್ಂಜತೇಂಗಿ, ನೀತಿನ ತಪ್ಪ ಸೇವೆ ಇಂಞು ದುಂಬ ಮಹಿಮೆ ತಪ್ಪದಾಯಿತ್‌ಪ್ಪ ಅಲ್ಲ.

¹⁰ಅನ್ನನೆ, ಮಹಿಮೆಲ್ ದುಂಬಿತ್ಂಜ ಆ ಸೇವೆ, ಇಕ್ಕತ್‍ರ ಸೇವೇಕ್ ಕ್‍ಟ್ಟುವ ವಿಶೇಷ ಮಹಿಮೇರ ಮಿಂಞತ್ ಬಲ್ಯದಲ್ಲ.

¹¹ಅದಲ್ಲತೆ, ಕಾಂಗತೆ ಆಯಿಪೋಪ ಸೇವೆ ಮಹಿಮೆ ಉಳ್ಳದಾಯಿತ್ಂಜತೇಂಗಿ, ಎಕ್ಕಾಲು ನಿಂದಂಡಿಪ್ಪ ಸೇವೆ ಇಂಞು ದುಂಬ ಮಹಿಮೆ ಉಳ್ಳದಾಯಿತಿಪ್ಪಲ್ಲ.

¹²ನಂಗಕ್ ಇಚ್ಚಕ್ ನಿರೀಕ್ಷೆ ಉಳ್ಳಾಂಗ್, ನಂಗ ದುಂಬ ದೈರ್ಯ ಉಳ್ಳಯಿಂಗಳಾಯಿತುಂಡ್.

¹³ಅದಲ್ಲತೆ, ಕಾಂಗತೆ ಆಯಿ ಪೋಯಂಡುಳ್ಳ ಮಹಿಮೆನ ಇಸ್ರಾಯೇಲ್ ಜನ ಕಾಂಬಕ್ಕಾಗಾಂದ್ ಮೋಶೆ ಅಂವೊಂಡ ಮೂಡ್‌ರ ಮೇಲೆ ತುಣಿ ಇಟ್ಟಂಡನೆಕೆ, ನಂಗ ಇಟ್ಟಂಡಿಲ್ಲೆ.

¹⁴ಆಚೇಂಗಿ ಅಯಿಂಗಡ ಮನಸ್ಸ್ ಕಲ್ಲ್‌ರನೆಕೆ ಗಟ್ಟಿಯಾಯಿ ಪೋಚಿ; ಇಲ್ಲಿಕತ್ತನೆ, ಪಳೆಯ ಒಪ್ಪಂದತ್‍ನ ಓದ್‍ವಕ, ಆ ತುಣಿನ ನೀಕಿತ್‌ಲ್ಲೆ; ಅದ್ ಕ್ರಿಸ್ತನಗುಂಡ್ ಮಾತ್ರ ನೀಂಗ್‍ಚಿ.

¹⁵ಅಕ್ಕು, ಈ ದಿನಕತ್ತನೆ ಮೋಶೇರ ಪುಸ್ತಕ ಓದ್‍ವಕ ಅಯಿಂಗಡ ಹೃದಯತ್‍ರ ಮೇಲೆ ತುಣಿ ಇಟ್ಟಿತುಂಡಲ್ಲ.

¹⁶ಆಚೇಂಗಿ ಅಯಿಂಗ ಒಡೆಯಂಡ ಪಕ್ಕ ಮನಸ್ಸ್ ತಿರ್‌ಗಿತ್ ಬಪ್ಪಕ, ಆ ತುಣಿ ನೀಂಗುವ.

¹⁷ಇಕ್ಕ ಒಡೆಯನೇ ಆತ್ಮವಾಯಿತುಂಡ್; ಒಡೆಯಂಡ ಆತ್ಮ ಎಲ್ಲಿ ಉಂಡೋ ಅಲ್ಲಿ ಬುಡುಗಡೆ ಉಂಡ್.

¹⁸ನಂಗ ಎಲ್ಲಾರು, ಮೂಡ್‌ರ ಮೇಲೆ ಬಟ್ಟೆ ಇಲ್ಲತಯಿಂಗಳಾಯಿತ್, ಒಡೆಯಂಡ ಮಹಿಮೆನ ಒರ್ ಕನ್ನಡಿಲ್ ಕಾಂಬನೆಕೆ ಕಂಡಂಡುಂಡ್. ಆತ್ಮವಾಯಿತುಳ್ಳ ಒಡೆಯನಗುಂಡ್, ಅಂವೊಂಡನೆಕೆ ಮಹಿಮೇರ ಮೇಲೆ ಮಹಿಮೆ ಪಡ್ಂದಿತ್, ಅಂವೊಂಡ ಮಹಿಮೇರ ರೂಪತ್‍ರನೆಕೆ ಬದ್‍ಲಾಯಂಡುಂಡ್.