Read Kodava 2 ಕೊರಿಂಥ 4 Bible Online

2 ಕೊರಿಂಥ 4 - Kodava bible

2 ಕೊರಿಂಥ 4

¹ದೇವ ಅಂವೊಂಡ ಕರುಣೇಲ್ ಈ ಸೇವೇನ ನಂಗಕ್ ಕೊಡ್‍ತಿತುಳ್ಳಾಂಗ್, ನಂಗ ತಳ್ಂದ್ ಪೋಯಂಡಿಲ್ಲೆ.

²ಅದ್ಂಡ ಬದ್‍ಲ್, ಞಾಣ ಆಪಕುಳ್ಳ ಪಿಂಞ ಗುಟ್ಟಾಯಿತುಳ್ಳ ವಿಷಯತ್‍ನೆಲ್ಲಾ ನಂಗ ತ್‍ಕ್ಕಾರ ಮಾಡಿತ್, ಕಪಟಿಯರನೆಕೆ ನಡ್‍ಕತೆ, ದೇವಡ ವಾಕ್ಯತ್‍ನ ತಪ್ಪಾಯಿತ್ ಬೋದನೆ ಮಾಡಿಯಂಡಿಲ್ಲೆ. ಆಚೇಂಗಿ, ಸತ್ಯತ್‍ನ ಎಲ್ಲಾರ್‌ಕು ಗೊತ್ತಾಪನೆಕೆ ಅರಿಚಿಟ್ಟಿತ್, ದೇವಡ ಮಿಂಞತ್ ಎಲ್ಲಾ ಮನುಷ್ಯಂಗಡ ಮನಸಾಕ್ಷಿಕ್ ನಂಗ ಸತ್ಯವಂತಯಿಂಗಾಂದ್ ಕಾಂಬ್‍ಚಿಟ್ಟಂಡುಂಡ್.

³ನಂಗ ಬೋದನೆ ಮಾಡ್‌ವ ದೇವಡ ನಲ್ಲ ಸುದ್ದಿ ಮುಚ್ಚಿತ್ ಇಂಜತೇಂಗಿ, ಅದ್ ನಾಶ ಆಯಿಪೋಪಯಿಂಗಕೇ ಮುಚ್ಚಿತ್‌ಪ್ಪ.

⁴ದೇವಡ ರೂಪವಾಯಿತುಳ್ಳ ಕ್ರಿಸ್ತಂಡ ಮಹಿಮೇರ ನಲ್ಲ ಸುದ್ದಿರ ಬೊಳಿ, ಕ್ರಿಸ್ತನ ನಂಬತಯಿಂಗಕ್ ಬೊಳಿಯಾಯಿತ್ ಇಲ್ಲತಿಪ್ಪನೆಕೆ, ಈ ಲೋಕತ್‍ರ ದೇವನಾಯಿತಳ್ಳ ಸೈತಾನ ಅಯಿಂಗಡ ಮನಸ್ಸ್‌ನ ಕುರ್‌ಡ್ ಮಾಡ್‍ಚಿ.

⁵ನಂಗ ನಂಗಡ ವಿಷಯತ್‍ನ ಬೋದನೆ ಮಾಡಿಯಂಡಿಲ್ಲೆ. ಯೇಸು ಕ್ರಿಸ್ತ ಒಡೆಯಾಂದೂ, ಆಚೇಂಗಿ ನಂಗಳ ಯೇಸುರಗುಂಡ್ ನಿಂಗಡ ಸೇವಕಂಗಾಂದೂ ಪ್ರಚಾರ ಮಾಡಿಯಂಡುಂಡ್.

⁶ಇರ್‌ಟ್‌ಂಜ ಬೊಳಿನ ಮಿನ್ನ್‌ವಕ್ ಎಣ್ಣ್‌ನ ದೇವ, ಯೇಸು ಕ್ರಿಸ್ತಂಡ ಮೂಡ್‍ಲ್ ಉಳ್ಳ ತಾಂಡ ಮಹಿಮೇರ ಜ್ಞಾನತ್‍ರ ಬೊಳಿನ ತಪ್ಪಕಾಯಿತ್, ನಂಗಡ ಹೃದಯತ್‍ಲ್ ಮಿನ್ನ್‌ಚಿ.[1]

⁷ಈ ಮಹತ್ವತ್‍ರ ಶಕ್ತಿ ನಂಗಡಗುಂಡ್ ಬಂದದಲ್ಲ, ಆಚೇಂಗಿ ದೇವಡಗುಂಡ್ ಬಂದದ್‍ೕಂದ್ ಕಾಂಬ್‍ಚಿಡುವನೆಕೆ, ಈ ಬಂಡಾರತ್‍ನ ಮಣ್ಣ್‌ರ ಪಾತ್ರತ್‍ರನೆಕೆ ಉಳ್ಳ ನಂಗಡ ತಡೀಲ್ ಪಡ್ಂದಿತುಂಡ್.

⁸ನಂಗಕ್ ಎಲ್ಲಾ ಕಡೇಯಿಂಜ ನೊಂಬಲ ಬಾತೇಂಗಿಯು ನಂಗ ನೆರ್ಂಗಿ ಪೋಯಂಡಿಲ್ಲೆ, ಕಷ್ಟಪಟ್ಟಂಡಿಂಜತೇಂಗಿಯು ಮನಸ್ಸ್ ಬುಟ್ಟ್ ಪೋಪುಲೆ.

⁹ಹಿಂಸೆ ಪಟ್ಟಂಡುಂಡೇಂಗಿಯು, ಕೈ ಬುಟ್ಟ ಜನಾಂಗ ಅಲ್ಲ; ಅಡಿಕ್ ತಳ್ಳ್‌ಚೇಂಗಿಯು, ನಾಶ ಆಯಂಡಿಲ್ಲೆ.

¹⁰ಯೇಸುರ ಜೀವ ನಂಗಡ ತಡೀಲ್ ಉಂಡ್‍ೕಂದ್ ಕಾಂಬ್‍ಚಿಡುವನೆಕೆ, ಯೇಸುರ ಚಾವ್‍ನ ಎಕ್ಕಾಲು ನಂಗ ನಂಗಡ ತಡೀಲ್ ಪೊರ್‍ತಂಡುಂಡ್.

¹¹ಎನ್ನನೆ ಎಣ್ಣ್‌ಚೇಂಗಿ, ಚತ್ತ್ ಪೋಪಕುಳ್ಳ ನಂಗಡ ತಡೀಲ್, ಯೇಸುರ ಜೀವ ಗೊತ್ತಾಪಕಾಯಿತ್ ಬದ್‍ಕಿಯಂಡುಳ್ಳ ನಂಗ ಎಕ್ಕಾಲು ಯೇಸುರಗುಂಡ್ ಚಾವಕ್ ಒಪ್ಪ್‌ಚಿಟ್ಟಯಿಂಗಡನೆಕೆ ಉಂಡ್.

¹²ಇನ್ನನೆ ಚಾವ್ ನಂಗಡಲ್ಲಿಯು, ಜೀವ ನಿಂಗಡಲ್ಲಿಯು ಕ್ರಿಯೆ ಮಾಡಿಯಂಡುಂಡ್.

¹³ನಾನ್ ನಂಬಿಯೆ, ಆನಗುಂಡ್ ತಕ್ಕ್ ಪರ್ಂದಂಡುಳ್ಳ್‌ೕಂದ್ ಒಳ್‍ದಿತುಳ್ಳನೆಕೆ, ನಂಗಳು ಆ ನಂಬಿಕೇರ ಆತ್ಮತ್‌ನ ಪಡ್ಂದಯಿಂಗಳಾಯಿತ್, ನಂಬಿಕೇರಗುಂಡ್ ತಕ್ಕ್ ಪರ್ಂದಂಡುಂಡ್.[2]

¹⁴ಒಡೆಯನಾನ ಯೇಸು ಕ್ರಿಸ್ತನ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ಚಿಟ್ಟಂವೊ, ನಂಗಳ ಸಹ ಯೇಸುರಗುಂಡ್ ಎಪ್ಪಿತ್, ನಿಂಗಡ ಕೂಡೆ ತಾಂಡ ಮಿಂಞತ್ ನಿಪ್ಪ್‌ಚಿಡುವಾಂದ್ ನಂಗಕ್ ಗೊತ್ತುಂಡ್.

¹⁵ದೇವಡ ಕೃಪೆ ದುಂಬ ಜನಡ ಪಕ್ಕ ಪೋಯಂಡ್, ದೇವಡ ಮಹಿಮೆಕಾಯಿತ್ ಅಂವೊಂಗ್ ವಂದನೆ ಎಣ್ಣುವದ್ ಅದಿಯಾಯಂಡಿಪ್ಪನೆಕೆ ಇದೆಲ್ಲಾ ನಿಂಗಕಾಯಿತ್ ಆಯಂಡುಂಡ್.

¹⁶ಆನಗುಂಡ್ ನಂಗ ತಳ್ಂದ್ ಪೋಪುಲೆ. ನಂಗಡ ಪೊರಮೆ ಉಳ್ಳ ಮನುಷ್ಯ ಪಾಳಾಯಿ ಪೋಯಂಡಿಂಜತೇಂಗಿಯು, ನಂಗಡ ಒಳ್‍ಲ್ ಉಳ್ಳ ಮನುಷ್ಯ ಓರೋರ್ ದಿನವು ಪುದಿಯದಾಯಂಡುಂಡ್.

¹⁷ಇಂಞು, ಒರ್ ಗಳಿಗೆಲ್ ಕಾಂಗತ ಆಪ ತೂವೆಯಾಯಿತುಳ್ಳ ನಂಗಡ ಈ ಕಷ್ಟ, ನಂಗಕ್ ದುಂಬ ಬಲ್ಯ ನಿತ್ಯ ಗನಪಟ್ಟ ಮಹಿಮೆನ ಉಂಟ್ ಮಾಡ್‌ವ.

¹⁸ನಂಗ ಇಕ್ಕ ಕಣ್ಣ್‌ಕ್ ಕಾಂಬದ್‍ನ ಅಲ್ಲ, ಆಚೇಂಗಿ ಕಾಂಗತದ್‍ನ ನೋಟಿಯಂಡುಂಡ್. ಎನ್ನಂಗೆಣ್ಣ್‌ಚೇಂಗಿ, ಇಕ್ಕ ನಂಗ ಕಾಂಬದ್ ಚೆನ್ನ ಕಾಲ ಮಾತ್ರ ಇಪ್ಪ, ಕಾಂಗತದ್ ನಿತ್ಯ ಕಾಲಕ್ ಇಪ್ಪ.