Read Kodava 2 ಕೊರಿಂಥ 6 Bible Online

2 ಕೊರಿಂಥ 6 - Kodava bible

2 ಕೊರಿಂಥ 6

¹ದೇವಡ ಕೃಪೇನ ನಿಂಗ ಸ್ವೀಕಾರ ಮಾಡ್‍ನ ಪಿಂಞ ಅದ್‍ನ ಪ್ರಯೋಜನ ಇಲ್ಲತನೆಕೆ ಮಾಡ್‌ವಕ್ಕಾಗಾಂದ್ ದೇವಡ ಕೂಡೆ ಸೇವೆ ಮಾಡ್‌ವಯಿಂಗಳಾನ ನಂಗ ನಿಂಗಕ್ ಬುದ್ದಿ ಎಣ್ಣುವ.

²ನಾಡ ಸರಿಯಾನ ಕಾಲತ್‍ಲ್ ನೀಕ್ ಕೆಮಿ ಕೊಡ್‌ತಿತ್, ರಕ್ಷಣೆ ಮಾಡ್‌ವ ದಿವಸತ್‍ಲ್ ನಾನ್ ನೀಕ್ ಸಹಾಯ ಮಾಡಿಯೇಂದ್ ಅಂವೊ ಎಣ್ಣಿತುಂಡಲ್ಲ! ನೋಟಿ, ಇಕ್ಕಲೆ ಸರಿಯಾನ ಕಾಲ, ಇಕ್ಕಲೆ ರಕ್ಷಣೆರ ಸಮಯ.[4]

³ಈ ಸೇವೇನ ದಾರೂ ಕುತ್ತ ಪರಿಯತನೆಕೆ, ನಂಗಡಗುಂಡ್ ಒಬ್ಬನು ಬೂವತನೆಕೆ ಎಲ್ಲಾ ವಿಷಯತ್‍ಲು ದೇವಡ ಸೇವಕಂಗಳಾಯಿತ್ ಬದ್‍ಕಿಯಂಡುಂಡ್.

⁴ಬಲ್ಯ ಪೊರುಮೇಲ್ ಎಲ್ಲಾ ಹಿಂಸೆನ, ಕಷ್ಟತ್‍ನ, ನೊಂಬಲತ್‍ನ ನಂಗ ಸಹಿಸಿಯಂಡ್ ಉಂಡ್.

⁵ನಂಗಳ ಜನ ಪೊಜ್ಜಿತುಂಡ್, ಜೈಲ್‍ಲ್ ಇಟ್ಟಿತುಂಡ್, ಕಲಹ ಮಾಡ್‌ವ ಗುಂಪ್‌ಲ್ ನಂಗಳ ಚಿಕ್ಕಿಚಿಟ್ಟಿತುಂಡ್, ಕಷ್ಟವಾಯಿತುಳ್ಳ ಕೆಲಸತ್‍ನ ಮಾಡಿತುಂಡ್, ಬಯಿಟ್ ವರಿಯಕ್ ಕಯ್ಯತೆ ಇಂಜಿತುಂಡ್, ಕೆಲ ಪಯಿಚಿತ್ ಇಂಜಿತುಂಡ್.

⁶ನಂಗ ನಂಗಳ ಪವಿತ್ರತ್‍ಲ್, ಅರ್ಥಮಾಡ್‌ವದ್‍ಲ್, ಪೊರುಮೇಲ್, ದಯೇಲ್, ನಂಗಡ ಒಳ್‍ಲ್ ಉಳ್ಳ ಪವಿತ್ರಾತ್ಮತ್‍ರಗುಂಡ್ ಕಪಟ ಇಲ್ಲತ ಪ್ರೀತಿಲ್ ನಿರೂಬಿಚಿಟ್ಟಂಡುಂಡ್.

⁷ನಂಗ ಸತ್ಯ ತಕ್ಕ್ ಪರ್ಂದಂಡುಂಡ್. ದೇವಡ ಶಕ್ತಿ ನಂಗಡಲ್ಲಿ ಕ್ರಿಯೆ ಮಾಡಿಯಂಡುಂಡ್. ನೀತಿಯಾಯಿತುಳ್ಳ ಬಲ್‌ತೆ ಬರಿ ಎಡ್‍ತೆ ಬರೀರ ಆಯುದತ್‍ನ ಇಡ್‌ವಯಿಂಗಳಾಯಿತುಂಡ್.

⁸ಜನ ನಂಗಳ ಗನ ಪಡ್‍ತ್‍ಚೇಂಗಿಯು, ಗನ ಪಡ್‍ತತೆ ಪೋಚೇಂಗಿಯು, ಕೆಟ್ಟ ಪೆದ ಕ್‍ಟ್ಟ್‌ಚೇಂಗಿಯು, ನಲ್ಲ ಪೆದ ಕ್‍ಟ್ಟ್‌ಚೇಂಗಿಯು ದೇವಕ್ ಸೇವೆ ಮಾಡಿಯಂಡುಂಡ್. ಕಳ್ಳಂಗಾಂದ್ ಎಣ್ಣ್‌ಚೇಂಗಿಯು ಸತ್ಯವಂತಯಿಂಗಳಾಯಿತ್ ನಡ್ಂದಂಡುಂಡ್.

⁹ಚಾಯಿತೆ ಗೊತ್ತುಳ್ಳಯಿಂಗಳಾಯಿತ್ ಇಂಜತೇಂಗಿಯು, ಗೊತ್ತ್‌ಲ್ಲತಯಿಂಗಳಾಯಿತ್ ಇಂಜತೇಂಗಿಯು, ಚಾವನೆಕೆ ಇಂಜತೇಂಗಿಯು ಬದ್‍ಕಿಯಂಡುಳ್ಳಯಿಂಗಳಾಯಿತ್, ಶಿಕ್ಷೆಕ್ ಯೋಗ್ಯರಾಯಿತ್ ಇಂಜತೇಂಗಿಯು, ಕೊಲೆ ಆಕತಯಿಂಗಳಾಯಿತ್ ಉಂಡ್.

¹⁰ದುಃಖತ್‍ಲ್ ಇಂಜತೇಂಗಿಯು, ಎಕ್ಕಾಲು ಕುಶೀಲ್ ಉಳ್ಳಯಿಂಗಳಾಯಿತು, ಗರಿಬಂಗಳಾಯಿತ್ ಇಂಜತೇಂಗಿಯು, ದುಂಬ ಜನಳ ಐಶ್ವರ್ಯವಂತಯಿಂಗಳಾಯಿತ್ ಮಾಡ್‌ವಯಿಂಗಳಾಯಿತು, ಒಂದು ಇಲ್ಲತಯಿಂಗಳಾಯಿತ್ ಇಂಜತೇಂಗಿಯು, ಎಲ್ಲಾ ಉಳ್ಳಯಿಂಗಡನೆಕೆ ನಂಗಳ ಕಾಂಬ್‍ಚಿಟ್ಟಂಡುಂಡ್.

¹¹ಓ ಕೊರಿಂಥ ಜನಳೇ! ನಂಗ ನಿಂಗಡ ಕೂಡೆ ಸಹ ಎಣ್ಣಿಯಂಡುಂಡ್. ನಂಗಡ ಹೃದಯ ನಿಂಗಕಾಯಿತ್ ತೊರ್‌ಂದಿತುಂಡ್.

¹²ನಿಂಗಡ ಮೇಲೆ ಉಳ್ಳ ನಂಗಡ ಪ್ರೀತಿ ಕಮ್ಮಿ ಆಯಂಡಿಲ್ಲೆ. ಆಚೇಂಗಿ ನಂಗಡ ಮೇಲೆ ಉಳ್ಳ ನಿಂಗಡ ಪ್ರೀತಿಯೇ ಕಮ್ಮಿ ಆಯಂಡುಂಡ್.

¹³ಆಂಡ ಬದ್‍ಲ್ ನಿಂಗಡ ಮನಸ್ಸ್‌ನ ತೊರಕಂಡೂಂದ್ ಒರ್ ಅಪ್ಪ ಮಕ್ಕಕ್ ಎಣ್ಣುವನೆಕೆ ನಿಂಗಕ್ ಎಣ್ಣಿಯಂಡುಂಡ್.

¹⁴ಕ್ರಿಸ್ತನ ನಂಬತಯಿಂಗಡ ಕೂಟ್‌ಲ್ ಕೂಡಿತ್ ಸಮವಲ್ಲತ ನೊಗತ್‌ನ ಪೊರ್‍ಕತೆ ಇರಿ. ನೀತಿಕು ಅನೀತಿಕು ಎಂತ ಸಂಬಂದ? ಬೊಳಿಕು ಇರ್‌ಟ್‌ಕು ಎಂತ ಸಂಬಂದ?

¹⁵ಕ್ರಿಸ್ತಂಗು ಸೈತಾನಂಗು ಎಂತ ಐಕ್ಯ? ಯೇಸುನ ನಂಬಿತ್ ದೇವಡ ಮಕ್ಕ ಆನಯಿಂಗಕು, ಕ್ರಿಸ್ತನ ನಂಬತಯಿಂಗಕು ಎಂತ ಬಾದ್ಯತೆ?

¹⁶ದೇವಡ ಆಲಯಕು ವಿಗ್ರಹಕು ಎಂತ ಐಕ್ಯ? ನಂಗಳೇ ಜೀವವಾಯಿತುಳ್ಳ ದೇವಡ ಆಲಯವಾಯಿತುಂಡಲ್ಲ! ನಾನ್ ಅಯಿಂಗಡ ಮದ್ಯತ್‍ಲ್ ವಾಸ ಮಾಡಿತ್, ನಡ್ಂದಂಡ್, ನಾನ್ ಅಯಿಂಗಡ ದೇವನಾಯಿತು, ಅಯಿಂಗ ನಾಡ ಜನವಾಯಿತು ಇಪ್ಪಾಂದ್ ದೇವ ಎಣ್ಣಿತುಂಡ್.[5]

¹⁷ಆನಗುಂಡ್, ನಿಂಗ ಅಯಿಂಗಡ ಮದ್ಯತ್ಂಜ ಪೊರಟಿತ್, ಅಯಿಂಗಡಿಂಜ ಬೋರೆ ಆಯಿತ್, ಅಶುದ್ದವಾನದ್‍ನ ಮುಟ್ಟತೀಂದ್ ಒಡೆಯ ಎಣ್ಣಿಯಂಡುಂಡ್.[6]

¹⁸ಅಕ್ಕ ನಾನ್ ನಿಂಗಳ ಸ್ವೀಕಾರ ಮಾಡಿತ್, ನಿಂಗಡ ಅಪ್ಪನಾಯಿತಿಪ್ಪಿ, ನಿಂಗ ನಾಡ ಮೋನಿಯಂಗಳು ಮೋಳಿಯಂಗಳು ಆಯಿತಿಪ್ಪಿರಾಂದ್ ಸರ್ವ ಶಕ್ತಿವಂತನಾನ ಒಡೆಯ ಎಣ್ಣಿಯಂಡುಂಡ್.[7]