Read Kodava 2 ಕೊರಿಂಥ 8 Bible Online

2 ಕೊರಿಂಥ 8 - Kodava bible

2 ಕೊರಿಂಥ 8

¹ನಾಡ ಅಣ್ಣತಮ್ಮಣಂಗಳೇ, ಮಕೆದೋನ್ಯ ಪ್ರಾಂತ್ಯತ್‍ರ ಸಬೇಕ್ ದೇವ ಕೊಡ್‍ತ ಕೃಪೇನ ನಿಂಗಕ್ ಅರಿಚಿಟ್ಟಂಡುಂಡ್.

²ಅಯಿಂಗ ದುಂಬ ಹಿಂಸೇಲ್ ಪರೀಕ್ಷೆ ಪಟ್ಟಂಡಿಪ್ಪಕ, ಅಯಿಂಗ ದುಂಬ ಗರಿಬಂಗಳಾಯಿತ್ ಇಂಜತೇಂಗಿಯು, ಅಯಿಂಗಡ ತ್‍ೕರ ಕುಶೀಲ್ ದುಂಬ ದಾರಾಳವಾಯಿತ್ ಕೊಡ್‍ತತ್.

³ಅದಲ್ಲತೆ, ಅಯಿಂಗ ಅಯಿಂಗಡ ಶಕ್ತಿಕ್ ತಕ್ಕಂತೆ ಪಿಂಞ ಅಯಿಂಗಡ ಶಕ್ತಿಕ್ ಜಾಸ್ತಿಯಾಯಿತು ಕೊಡ್‍ಪಕ್ ಮನಸ್ಸ್ ಉಳ್ಳಯಿಂಗಳಾಯಿತ್ ಇಂಜಾಂಗ್ ನಾನ್ ಸಾಕ್ಷಿಯಾಯಿತುಳ್ಳ.

⁴ಅಯಿಂಗಡ ಸಹಾಯತ್‍ನ ಪಿಂಞ ದೇವಡ ಮಕ್ಕಕ್ ದಾನ ಮಾಡ್‌ವಕ್ ಕ್‍ಟ್ಟ್‌ನ ಐಕ್ಯತ್‍ಲ್ ಪಾಲ್‍ದಾರಂಗಳಾನದ್‌ನ, ಸ್ವೀಕಾರ ಮಾಡಂಡೂಂದ್ ಅಯಿಂಗ ನಂಗಳ ದುಂಬ ಬೋಡಿಯಂಡತ್.

⁵ಅದಲ್ಲತೆ, ನಂಗ ಗೇನಮಾಡ್‍ನನೆಕೆ ಮಾತ್ರ ಮಾಡತೆ, ದೇವಡ ಚಿತ್ತತ್‍ರನೆಕೆ, ಆದ್ಯವಾಯಿತ್ ಅಯಿಂಗಳ ಒಡೆಯಂಗು, ಬಯ್ಯ ಅಯಿಂಗಳ ನಂಗಕು ಒಪ್ಪ್‌ಚಿಟ್ಟತ್.

⁶ಆನಗುಂಡ್, ತೀತ ಈ ದಾನತ್‍ರ ಸೇವೇನ ನಿಂಗಡಲ್ಲಿ ಸುರು ಮಾಡ್‍ನನೆಕೆ, ಅದ್‍ನ ಪೂರ್ತಿ ಮಾಡಂಡೂಂದ್ ನಂಗ ಅಂವೊನ ಬೋಡ್‍ಚಿ.

⁷ಅನ್ನನೆ, ನಂಬಿಕೇಲ್, ಬೋದನೆಲ್, ಬುದ್ದಿಲ್, ಎಲ್ಲಾ ಜಾಗ್ರತೆಲ್, ನಂಗಡ ಮೇಲೆ ಬೆಚ್ಚಿತುಳ್ಳ ಪ್ರತಿಲ್ ಪಿಂಞ ಬೋರೆ ಎಲ್ಲಾ ವಿಷಯತ್‍ಲು ನಿಂಗ ಚಾಯಿತೆ ಬೊಳ್‌ಂದಿತುಳ್ಳನೆಕೆ, ಈ ದಾನ ಮಾಡ್‌ವ ವಿಷಯತ್‍ಲು ದಾರಳವಾಯಿತ್ ಇರಿ.

⁸ನಾನ್ ಇದ್‍ನ ಆಜ್ಞೆಯಾಯಿತ್ ಎಣ್ಣತೆ, ಬೋರೆಯಿಂಗಡ ಜಾಗ್ರತೆನ ಎಣ್ಣಿತ್, ನಿಂಗ ಪ್ರೀತಿಲ್ ಸತ್ಯವಂತಯಿಂಗಳಾಂದ್ ಪರೀಕ್ಷೆ ಮಾಡ್‌ವಕಾಯಿತೇ ಇನ್ನನೆ ಎಣ್ಣಿಯಂಡುಂಡ್.

⁹ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಕ್ ಗೊತ್ತುಂಡ್; ಅಂವೊ ಐಶ್ವರ್ಯವಂತಂವೊನಾಯಿತ್ ಇಂಜತೇಂಗಿಯು, ಅಂವೊಂಡ ಗರೀಬತನತ್‍ರಗುಂಡ್ ನಿಂಗ ಐಶ್ವರ್ಯವಂತಯಿಂಗಳಾಯಿತ್ ಆಪನೆಕೆ ಅಂವೊ ನಿಂಗಕಾಯಿತ್ ಗರೀಬನಾಚಿ.

¹⁰ಈ ವಿಷಯತ್‍ಲ್ ನಾಡ ಆಲೋಚನೆನ ಎಣ್ಣ್‌ವಿ; ಇದ್‍ನ ಮಾಡಂಡೂಂದ್ ಒರ್ ಕಾಲಕ್ ಮಿಂಞ ಸುರು ಮಾಡ್‍ನದ್‍ಲ್ ಪಿಂಞ ಅದ್‍ನ ಮಾಡಂಡೂಂದ್ ಮಿಂಞಕ್ ಎಡ್‍ತಂಡ್ ಪೋಪದ್‍ಲ್ ಕುಶಿಪಡ್‌ವಕು ನಿಂಗಕ್ ಯೋಗ್ಯವಾಯಿತ್‌ಪ್ಪ.

¹¹ಆನಗುಂಡ್, ಅದ್‍ನ ಇಕ್ಕ ಪೂರ್ತಿ ಮಾಡಿ. ದಾನಮಾಡಂಡೂಂದ್ ಉಳ್ಳ ಆಸೆ ಉಳ್ಳನೆಕೆ, ನಿಂಗಕ್ ಉಳ್ಳದ್‍ಲ್ ಕೊಡ್‌ತಿತ್ ಅದ್‍ನ ಪೂರ್ತಿ ಮಾಡಿ.

¹²ಒಬ್ಬಂಗ್ ಮನಸ್ಸ್ ಇಂಜತೇಂಗಿ, ಅಂವೊಂಗ್ ಇಲ್ಲತ ಅಳ್‌ತೆರಚ್ಚಕ್ ಅಲ್ಲ, ಅಂವೊಂಗ್ ಉಳ್ಳಚ್ಚಕ್ ಕೊಡ್‍ತತೇಂಗಿ ಅದ್ಂಗ್ ಅಂಗಿಕಾರ ಕ್‍ಟ್ಟುವ.

¹³ಬೋರೆಯಿಂಗಕ್ ಸಹಾಯವು ನಿಂಗಕ್ ಬಾರವು ಕೊಡ್‍ಪಕಾಯಿತ್ ಅಲ್ಲ, ಎಲ್ಲಾರು ಸಮವಾಯಿತ್ ಇಪ್ಪಕೇ ಎಣ್ಣಿಯಂಡುಳ್ಳ.

¹⁴ಎನ್ನನೆ ಎಣ್ಣ್‌ಚೇಂಗಿ, ದುಂಬ ಗುಡ್ಡೆ ಕೂಟ್‍ನಂವೊಂಗ್ ದುಂಬ ಕ್‍ಟ್ಟಿತು ಇಲ್ಲೆ, ಚೆನ್ನ ಗುಡ್ಡೆ ಕೂಟ್‍ನಂವೊಂಗ್ ಕಮ್ಮಿಯಾಯಿತ್ ಕ್‍ಟ್ಟಿತು ಇಲ್ಲೇಂದ್ ಒಳ್‍ದಿತುಳ್ಳನೆಕೆ,

¹⁵ಸಮವಾಯಿತ್ ಇಕ್ಕಂಡೂಂದ್ ಉಳ್ಳ ಪ್ರಮಾಣತ್‍ರ ಪ್ರಕಾರ, ಅಯಿಂಗಡ ಐಶ್ವರ್ಯ ನಿಂಗಡ ಬಡತನಕ್ ಸಹಾಯ ಆಪಕಾಯಿತು, ಇಕ್ಕ ನಿಂಗಡ ಐಶ್ವರ್ಯ ಅಯಿಂಗಡ ಬಡತನಕು ಸಹಾಯ ಆಡ್.[8]

¹⁶ಆಚೇಂಗಿ, ನಿಂಗಕಾಯಿತ್ ತೀತಂಡ ಹೃದಯತ್‍ಲ್ ಈ ಪುರಡ್‍ನ ಉಂಟ್‍ಮಾಡ್‍ನ ದೇವಕ್ ವಂದನೆ.

¹⁷ನಂಗ ಬೋಡ್‍ನದ್‍ನ ಅಂವೊ ಅಂಗಿಕಾರ ಮಾಡ್‍ನದ್ ಮಾತ್ರವಲ್ಲತೆ, ಅಂವೊ ದುಂಬ ಎಚ್ಚರತ್‍ಲ್ ತಾಂಡ ಮನಸ್ಸ್‌ಲ್ ದುಂಬ ಕುಶಿಪಟ್ಟಿತ್ ನಿಂಗಡ ಪಕ್ಕ ಬಪ್ಪಕ್ ಪೊರಟತ್.

¹⁸ಇದ್‍ಲ್ಲತೆ ದೇವಡ ನಲ್ಲ ಸುದ್ದಿ ಎಣ್ಣುವ ಸೇವೇರ ವಿಷಯತ್‍ಲ್ ಎಲ್ಲಾ ಸಬೇಲು ಹೊಗಳಿಯಂಡುಳ್ಳ ಒರ್ ತಮ್ಮಣನ ಅಂವೊಂಡ ಕೂಡೆ ಅಯಿಚಿತುಂಡ್.

¹⁹ಅದಲ್ಲತೆ, ಒಡೆಯಂಗ್ ಮಹಿಮೆ ಕ್‍ಟ್ಟುವಕಾಯಿತ್, ನಿಂಗಡ ಮನಸ್ಸ್‌ರ ಆಸೆ ಗೊತ್ತಾಪಕು, ನಂಗಡ ಸೇವೇರ ಮೂಲಕ ಕೂಟ್‍ನ ದಾನತ್‍ರ ಪಣತ್‍ನ ಕೊಂಡ್ ಪೋಪಕ, ನಂಗಡ ಕೂಡೆ ಬಟ್ಟೇಲ್ ಬಪ್ಪಕಾಯಿತು, ಅಂವೊನ ಸಬೆ ಗೊತ್ತ್ ಮಾಡಿತ್ ನೇಮಿಚಿಟ್ಟತ್.

²⁰ನಂಗಡ ಸೇವೇರ ಮೂಲಕ ದಾರಾಳವಾಯಿತ್ ಕೂಟ್‍ನ ಈ ದಾನ ಪಣತ್‍ರ ವಿಷಯತ್ ಒಬ್ಬನು ನಂಗಳ ಕುತ್ತ ಪರಿಯತನೆಕೆ, ನಂಗ ಎಚ್ಚರತ್‍ಲ್ ಉಂಡ್.

²¹ಒಡೆಯಂಡ ಮಿಂಞತ್ ಮಾತ್ರ ಅಲ್ಲತೆ, ಮನುಷ್ಯಂಗಡ ಮಿಂಞತು ಯೋಗ್ಯವಾನ ವಿಷಯತ್‍ನ ಮಾಡ್‌ವಕ್ ಆಸೆ ಪಟ್ಟಂಡುಂಡ್.

²²ಈಂಗಡ ಕೂಡೆ ನಂಗಡ ಇಂಞೊಬ್ಬನ ಸಹ ನಂಗ ಅಯಿಚಂಡುಂಡ್. ಅಂವೊ ದುಂಬ ವಿಷಯತ್‍ಲ್ ಜಾಗ್ರತೆಲ್ ಉಳ್ಳಂವೊನಾಯಿತ್ ನಂಗ ದುಂಬ ಸಮಯ ಅಂವೊನ ಕಂಡಿತುಂಡ್. ಇಕ್ಕ ನಿಂಗಡ ಮೇಲೆ ಬೆಚ್ಚಿತುಳ್ಳ ಬಲ್ಯ ನಂಬಿಕೇಲ್ ಇಂಞು ದುಂಬ ಜಾಗ್ರತೆಲ್ ಉಂಡ್.

²³ತೀತಂಡ ವಿಷಯತ್ ದಾರ್ ಒಬ್ಬ ಕ್‍ೕಟತೇಂಗಿ, ಅಂವೊ ನಾಡ ಕೂಟ್‍ಕಾರಾಂದೂ, ನಿಂಗಕಾಯಿತ್ ನಾಡ ಕೂಡೆ ದೇವಡ ಸೇವೆ ಮಾಡ್‌ವಂವೊನಾಯಿತ್ ಉಂಡ್‍ೕಂದು ಗೊತ್ತಿರಡ್. ನಂಗಡ ಅಣ್ಣತಮ್ಮಣಂಗಡ ವಿಷಯತ್ ಕ್‍ೕಟತೇಂಗಿ: ಅಯಿಂಗ ಸಬೆರ ಸೇವಕಂಗಳು, ಕ್ರಿಸ್ತಂಗ್ ಮಹಿಮೆಯಾಯಿತು ಉಂಡ್‍ೕಂದ್ ಗೊತ್ತಿರಡ್.

²⁴ಆನಗುಂಡ್, ನಿಂಗಡ ಪ್ರೀತಿನ ಪಿಂಞ ನಿಂಗಡ ವಿಷಯವಾಯಿತ್ ನಂಗ ಕೊಂಡಾಡ್‍ನದ್‍ನ, ಸಬೆರ ಮಿಂಞತ್ ಅಯಿಂಗಕ್ ಕಾಂಬ್‍ಚಿಡಿ.