Read Kodava 2 ಕೊರಿಂಥ 9 Bible Online

2 ಕೊರಿಂಥ 9 - Kodava bible

2 ಕೊರಿಂಥ 9

¹ದೇವಡ ಮಕ್ಕಕ್ ಮಾಡ್‌ವಕುಳ್ಳ ಪಣ ಸಹಾಯತ್‍ರ ವಿಷಯತ್ ನಿಂಗಕ್ ನಾನ್ ದುಂಬ ಒಳ್‍ದಂಡೂಂದ್ ಇಲ್ಲೆ.

²ನಿಂಗಡ ಮನಸ್ಸ್‌ರ ಆಸೆ ನಾಕ್ ಗೊತ್ತುಂಡ್; ಅಖಾಯ ಪ್ರಾಂತ್ಯತ್‍ಲ್ ಉಳ್ಳ ದೇವಡ ಮಕ್ಕ ಇದ್‍ನ ಮಾಡ್‌ವಕ್ ಒರ್ ಕಾಲತ್ಂಜ ತಯಾರಾಯಿತ್ ಉಂಡ್‍ೕಂದ್, ಮಕೆದೋನ್ಯ ಪಟ್ಟಣತ್‍ರ ಮಕ್ಕಕ್ ಎಣ್ಣಿತ್ ನಿಂಗಳ ಹೊಗಳ್‍ಚಿಟ್ಟಿಯೆ; ನಿಂಗಡ ಅಪೇಕ್ಷೆ ದುಂಬ ಜನಕ್ ಪುರ್‌ಡ್ ಕೊಡ್‍ತತ್.

³ಆಚೇಂಗಿ, ನಿಂಗಡ ವಿಷಯತ್ ನಾನ್ ಎಣ್ಣ್‌ನ ಹೊಗಳಿಕೆ ಈ ವಿಷಯತ್‍ಲ್ ಪ್ರಯೋಜನ ಇಲ್ಲತೆ ಪೋಕತನೆಕೆ, ನಾನ್ ಎಣ್ಣ್‌ನನೆಕೆ ನಿಂಗ ತಯಾರಾಯಿತ್ ಇಪ್ಪಕ್, ಈ ತಮ್ಮಣಂಗಳ ನಾನ್ ಅಯಿಚಿಯೆ.

⁴ಮಕೆದೋನ್ಯತ್‍ರ ಜನ ನಾಡ ಕೂಡೆ ಬಂದಿತ್, ನಿಂಗ ತಯಾರಾಯಿತ್ ಇಲ್ಲತದ್‍ನ ಕಾಂಬಕ, ಇಚ್ಚಕ್ ಬಲ್ಯದಾಯಿತ್ ನಾನ್ ನಿಂಗಡ ವಿಷಯತ್‍ನ ಎಣ್ಣ್‌ನಾಂಗ್, ನಿಂಗಕ್ ಞಾಣ ಆಪಾಂದ್ ನಾನ್ ಎಣ್ಣುವಕ್ ಬದ್‍ಲಾಯಿತ್, ನಂಗಳೇ ಞಾಣ ಪಡುವನೆಕೆ ಆಪ.

⁵ಆನಗುಂಡ್, ನಿಂಗ ವಾಗ್ದಾನ ಮಾಡ್‍ನ ಈ ಪಣದಾನ ಒತ್ತಾಯ ಮಾಡ್‍ನಗುಂಡ್ ಅಲ್ಲ, ನಿಂಗಡ ಉದಾರ ಮನಸ್ಸ್‌ಲ್ ಕೊಡ್‍ಪನೆಕೆ, ನಿಂಗಳ ತಯಾರ್ ಮಾಡ್‌ವಕಾಯಿತ್ ಈಂಗಳ ನಾನ್ ನಿಂಗಡ ಪಕ್ಕ ಮಿಂಞಲೇ ಅಯಿಕಂಡೂಂದ್ ನಾಕ್ ಗೇನ ಆಚಿ.

⁶ಚೆನ್ನ ಬಿತ್ತ್ ಇಡ್‌ವಂವೊ ಚೆನ್ನ ಕೊಯ್ಯುವ, ದುಂಬ ಬಿತ್ತ್ ಇಡ್‌ವಂವೊ, ದುಂಬ ಕೊಯ್ಯುವಾಂದ್ ಉಳ್ಳದ್‍ನ ಗೇನ ಮಾಡಿಯೊಳಿ.

⁷ಒಬ್ಬೊಬ್ಬನು ಮನಸ್ಸ್ ಕಷ್ಟಪಟ್ಟಿತೋ ಒತ್ತಾಯ ಮಾಡಿತೋ ಅಲ್ಲ, ತಾಂಡ ಮನಸ್ಸ್‌ಲ್ ತೀರ್ಮಾನ ಮಾಡ್‍ನನೆಕೆ ಕೊಡ್‌ಕಡ್; ಕುಶೀಲ್ ಕೊಡ್‍ಪಂವೊನ ದೇವ ಪ್ರೀತಿಚಿಡುವ.

⁸ನಿಂಗ ಎಕ್ಕಾಲು ಎಲ್ಲಾ ವಿಷಯತ್‍ಲು ಪೂರ್ತಿಯಾಯಿತ್ ಇಪ್ಪಕು, ಎಲ್ಲಾ ನಲ್ಲ ಕ್ರಿಯೇಲ್ ಬೊಳಿಯುವಕು ದೇವ ನಿಂಗಕ್ ಎಲ್ಲಾ ಕೃಪೇನ ದಾರಾಳಾವಾಯಿತ್ ತಪ್ಪಕ್ ಶಕ್ತಿವಂತಂವೊನಾಯಿತುಂಡ್.

⁹ದಾರಾಳವಾಯಿತ್ ಕೊಡ್‍ತತ್, ಗರೀಬಂಗಕ್ ದಾನ ಮಾಡ್‍ಚಿ, ಅಂವೊಂಡ ನೀತಿ ಎಕ್ಕಾಲು ನಿಪ್ಪಾಂದ್ ಒಳ್‍ದಿತುಳ್ಳನೆಕೆ ಆಪ.[9]

¹⁰ಬಿತ್ತ್‌ವಂವೊಂಗ್ ಕುರುನ ಪಿಂಞ ತಿಂಬಕ್ ಕೂಳ್‌ನ ತಪ್ಪ ದೇವ, ನಿಂಗಕ್ ಕುರುನ ತಂದಿತ್, ಅದ್‍ನ ಜಾಸ್ತಿ ಮಾಡಿತ್, ನಿಂಗಡ ನೀತಿರ ಬೊಳೆನ ಜಾಸ್ತಿ ಮಾಡ್‌ವ.

¹¹ಇನ್ನನೆ ನಿಂಗ ಎಲ್ಲಾ ವಿಷಯತ್‍ಲ್ ಐಶ್ವರ್ಯವಂತಯಿಂಗಳಾಯಿತ್ ದಾರಾಳವಾಯಿತ್ ಕೊಡ್‍ಪಕ್ ಶಕ್ತಿವಂತಯಿಂಗಳಾಪಿರ. ಅದ್ ನಂಗಡ ಮೂಲಕ ದೇವಕ್ ವಂದನೆ ಕ್‍ಟ್ಟುವಕ್ ಕಾರಣವಾಯಿತ್‌ಪ್ಪ.

¹²ಈ ಪಣದಾನ ಸೇವೆ ದೇವಡ ಮಕ್ಕಡ ಗರೀಬತನತ್‍ನ ಬದ್‍ಲ್ ಮಾಡ್‌ವ, ಅದಲ್ಲತೆ, ದುಂಬ ಜನ ದೇವಕ್ ವಂದನೆ ಎಣ್ಣ್‌ವಗುಂಡ್, ಪೂರ್ತಿ ಫಲವು ಕ್‍ಟ್ಟುವ.

¹³ಅಯಿಂಗ ಈ ಪಣದಾನತ್‍ರ ಸಹಾಯತ್‍ನ ಅನುಬವಿಚಿಟ್ಟಿತ್, ನಿಂಗ ಕ್ರಿಸ್ತಂಡ ನಲ್ಲ ಸುದ್ದಿಕ್ ತಗ್ಗಿತ್ ಅರಿಕೆ ಮಾಡ್‍ನಗುಂಡ್, ಅಯಿಂಗಕು ಬೋರೆ ಎಲ್ಲಾರ್‌ಕು ನಿಂಗ ದಾರಾಳವಾಯಿತ್ ದಾನ ಮಾಡ್‍ನಂಗಾಯಿತ್ ದೇವನ ತುದಿಪ.

¹⁴ಆನಗುಂಡ್ ದೇವ ನಿಂಗಕ್ ದಾರಾಳವಾಯಿತ್ ಕೊಡ್‍ತ ಕೃಪೆಕಾಯಿತ್ ನಿಂಗಕ್ ಪ್ರಾರ್ಥನೆ ಮಾಡಿತ್, ನಿಂಗಡ ಮೇಲೆ ದುಂಬ ಪ್ರೀತಿಲ್ ಇಪ್ಪ.

¹⁵ದೇವ ಮಾಡ್‍ನ ಎಣ್ಣ್‌ವಕಯ್ಯತ ಅಂವೊಂಡ ಇನಾಮ್‍ಕಾಯಿತ್ ಅಂವೊಂಗ್ ವಂದನೆ.