Read Kodava ಗಲಾತ್ಯ 3 Bible Online

ಗಲಾತ್ಯ 3 - Kodava bible

ಗಲಾತ್ಯ 3

¹ಓ ಮುಠಾಳ ಗಲಾತ್ಯ ಜನಳೇ! ಯೇಸು ಕ್ರಿಸ್ತ ಶಿಲುಬೇಲ್ ನಿಂಗಡ ಕಣ್ಣ್‌ರ ಮಿಂಞತ್ ಚತ್ತನೆಕೆ, ನಿಂಗಕ್ ಅಂವೊಂಡ ಚಾವ್‍ರ ವಿಷಯತ್‍ನ ನಾನ್ ವಿವರಿಚಿಟ್ಟತೇಂಗಿಯು, ಇಕ್ಕ ನಿಂಗಳ ಸೊಯ ಇಲ್ಲತನೆಕೆ ಮಾಡ್‍ನಂವೊ ದಾರ್?

²ನಾನ್ ನಿಂಗಳ ಒಂದ್ ಕ್‍ೕಪಿ; ನಿಂಗ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್ಂದಗುಂಡ್ ನಿಂಗಕ್ ಪವಿತ್ರಾತ್ಮ ಕ್‍ಟ್ಟ್‌ಚಾ ಅಥವ ನಿಂಗ ಯೇಸು ಕ್ರಿಸ್ತಂಡ ವಿಷಯ ಕ್‍ೕಟಿತ್ ಅದ್‍ನ ನಂಬ್‍ನಗುಂಡ್ ಕ್‍ಟ್ಟ್‌ಚಾ?

³ಪವಿತ್ರಾತ್ಮತ್‍ಲ್ ಕ್ರಿಸ್ತ ಬದ್‍ಕ್‍ನ ಸುರು ಮಾಡ್‍ನ ನಿಂಗ, ಎನ್ನಂಗ್ ನಿಂಗಡ ಸ್ವಂತ ಶಕ್ತಿಲ್ ಸರಿಯಾಯಿತ್ ಬದ್‍ಕಂಡೂಂದ್ ಪ್ರಯತ್ನ ಪಟ್ಟಂಡುಳ್ಳಿರಾ? ನಿಂಗ ಇಚ್ಚಕ್ ಬುದ್ದಿ ಇಲ್ಲತಯಿಂಗಳಾಯಿತ್ ಉಳ್ಳಿರಾ?

⁴ನಿಂಗ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿನ ನಂಬ್‍ನಗುಂಡ್ ದುಂಬ ತೊಂದರೆ ಎಡ್‍ತಿತುಳ್ಳಿರ. ಈ ತೊಂದರೆನೆಲ್ಲ ಮುಂಡತೆ ಎಡ್‌ತಿರ? ಇಲ್ಲೆ, ಇದಂಗೆಲ್ಲ ಕಾರಣ ಉಂಡ್.

⁵ಅದಲ್ಲತೆ, ನಿಂಗಕ್ ಪವಿತ್ರಾತ್ಮತ್‍ನ ತಂದಿತ್, ನಿಂಗಡ ಮದ್ಯತ್‍ಲ್ ಅದ್ಬುತ ಕಾರ್ಯತ್‍ನ ಮಾಡ್‍ಚಿ. ನಿಂಗ ನ್ಯಾಯಪ್ರಮಾಣಕ್ ಬಗ್ಗಿತ್ ನಡ್‍ಪಗುಂಡ್ ಅನ್ನನೆ ಮಾಡ್‍ಚಾ? ಅನ್ನನೆ ಅಲ್ಲ. ನಿಂಗ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿನ ಕ್‍ೕಟಿತ್ ಅದ್‍ನ ನಂಬ್‍ನಗುಂಡ್ ಮಾತ್ರ ಅನ್ನನೆ ಮಾಡ್‍ಚಿ.

⁶ಇದೇ ತರತ್‍ಲ್ ಅಬ್ರಹಾಮ ದೇವನ ನಂಬ್‍ಚಿ, ಆನಗುಂಡ್ ದೇವ ಅಂವೊನ ನೀತಿವಂತಂವೋಂದ್ ಲೆಕ್ಕ ಮಾಡ್‍ಚಿ.[3]

⁷ಆನಗುಂಡ್ ದೇವಡ ಮೇಲೆ ನಂಬಿಕೆ ಬೆಪ್ಪ ಜನ ಮಾತ್ರ ಅಬ್ರಹಾಮಂಡ ನೇರಾನ ಸಂತಾನಕಾರಂಗಳಾಪಾಂದ್ ನಿಂಗ ಅರ್ಥ ಮಾಡಿಯೊಳಿ.

⁸ಇದ್‍ಲ್ಲತೆ, ದೇವ ನಂಬಿಕೇರಗುಂಡ್ ಯೆಹೂದ್ಯ ಅಲ್ಲತೆ ಬೋರೆ ಜನಳ ನೀತಿವಂತಯಿಂಗಳಾಯಿತ್ ಮಾಡ್‌ವಾಂದ್ ದೇವಡ ವಾಕ್ಯ ಮಿಂಞಲೇ ಗೊತ್ತ್ ಮಾಡ್‍ಚಿ. ಆನಗುಂಡ್ ದೇವ ಅಬ್ರಹಾಮಂಗ್ ನೀಡಗುಂಡ್ ಲೋಕತ್‍ರ ಎಲ್ಲಾ ಜಾತಿಯಕ್ ಆಶೀರ್ವಾದ ಕ್‍ಟ್ಟ್‌ವಾಂದ್ ಮಿಂಞಲೇ ಈ ನಲ್ಲ ಸುದ್ದಿನ ಎಣ್ಣ್‌ಚಿ.[4]

⁹ಅನ್ನನೆ ಕ್ರಿಸ್ತಂಡ ಮೇಲೆ ನಂಬಿಕೆ ಬೆಪ್ಪ ಎಲ್ಲಾ ಜನಕು, ನಂಬಿಕೇರಂವೊನಾನ ಅಬ್ರಹಾಮಂಡ ಆಶೀರ್ವಾದತ್‍ರನೆಕೆ ಅಯಿಂಗಕು ಆಶೀರ್ವಾದ ಕ್‍ಟ್ಟುವ.

¹⁰ಆಚೇಂಗಿ, ನ್ಯಾಯಪ್ರಮಾಣತ್‍ರ ಮೂಲಕ ದೇವಡ ಮಿಂಞತ್‍ಲ್ ನೀತಿವಂತಂವೊಂಡನೆಕೆ ನಿಪ್ಪಕ್ ಕಯ್ಯೂಂದ್ ನಂಬುವಯಿಂಗೆಲ್ಲ ಶಾಪತ್‍ಲ್ ಉಂಡ್; ಎನ್ನಂಗೆಣ್ಣ್‌ಚೇಂಗಿ, ನ್ಯಾಯಪ್ರಮಾಣಕ್ ತಗ್ಗಿತ್ ನಡ್‍ಕತೆ, ಅದ್ ಎಣ್ಣ್‌ನನೆಕೆ ಮಾಡತಯಿಂಗೆಲ್ಲಾ ಶಾಪತ್‍ಲ್ ಉಳ್ಳಯಿಂಗಾಂದ್ ಒಳ್‍ದಿತುಂಡಲ್ಲ.[5]

¹¹ಅನ್ನನೆ ಆಚೇಂಗಿ, ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನನೆಕೆ ಮಾಡ್‌ವಕ್ ಎಚ್ಚಕ್ ಪ್ರಯತ್ನ ಪಟ್ಟತೇಂಗಿಯು, ದೇವಡ ಪಕ್ಕ ಒಬ್ಬನು ಸಮಾದಾನ ಆಪಕ್ ಕಯ್ಯುಲೇಂದ್ ಉಳ್ಳದ್ ಚಾಯಿತೆ ಗೊತ್ತಾಯಂಡುಂಡ್. ದೇವಡ ವಾಕ್ಯತ್‍ಲ್ ನಂಬಿಕೇರ ಮೂಲಕ ನೀತಿವಂತಯಿಂಗ ಬದ್‌ಕ್‌ವಾಂದ್ ಎಣ್ಣಿತುಂಡ್.[6]

¹²ನ್ಯಾಯಪ್ರಮಾಣ ನಂಬಿಕೇರಗುಂಡಲ್ಲ; ಆಂಡ ಬದ್‍ಲ್, ನ್ಯಾಯಪ್ರಮಾಣತ್‍ಲ್ ಎಣ್ಣಿತುಳ್ಳನೆಕೆ ನಡ್‍ಪಯಿಂಗ ಅದ್ಂಡ ಮೂಲಕ ಬದ್‌ಕ್‌ವಾಂದ್ ಅದ್ ಎಣ್ಣುವ.[7]

¹³ಮರತ್‍ಲ್ ತೂಂಗಿತ್ ಚತ್ತ್‌ಪೋನ ಏದ್ ಮನುಷ್ಯನು ಶಾಪ ಪಡ್ಂದವೋಂದ್ ದೇವಡ ವಾಕ್ಯತ್‍ಲ್ ಉಂಡ್.[8] ಅನ್ನನೆ, ಕ್ರಿಸ್ತ ನಂಗಕಾಯಿತ್ ಶಾಪವಾಯಿತ್, ನ್ಯಾಯಪ್ರಮಾಣತ್‍ರ ಶಾಪತ್ಂಜ ನಂಗಳ ಬುಡುಗಡೆ ಮಾಡಿತ್ ಕಾಪಾಡ್‍ಚಿ.

¹⁴ಅಬ್ರಹಾಮಂಗ್ ಕ್‍ಟ್ಟ್‌ನ ಆಶೀರ್ವಾದ, ಯೆಹೂದ್ಯರಲ್ಲತಯಿಂಗಕ್ ಯೇಸು ಕ್ರಿಸ್ತಂಡ ಮೂಲಕ ಬಪ್ಪಕಾಯಿತು, ನಂಬಿಕೇರ ಮೂಲಕ ವಾಗ್ದಾನ ಮಾಡ್‍ನ ಪವಿತ್ರಾತ್ಮ ನಂಗಕ್ ಕ್‍ಟ್ಟ್‌ವಕಾಯಿತೂ ಇನ್ನನೆ ಆಚಿ.

¹⁵ನಾಡ ಅಣ್ಣತಮ್ಮಣಂಗಳೇ, ನಾನ್ ನಂಗಡ ಬದ್‍ಕಿಂಜ ಒರ್ ಉದಾರಣೆ ತಂದಿತ್ ಎಣ್ಣ್‌ವಿ; ಒರ್ ವಿಷಯತ್‍ಲ್ ದಂಡ್ ಮನುಷ್ಯಂಗ ಒತ್ತಂಡ್, ಆ ವಿಷಯಕ್ ಒಪ್ಪಂದ ಮಾಡ್‍ಚೇಂಗಿ, ಅಯಿಂಗ ಅಲ್ಲತ ಬೋರೆ ದಾರ್‌ಕು ಆ ಒಪ್ಪಂದತ್‍ನ ಪೊಳಿಪಕ್ ಕಯ್ಯುಲೆ. ಅದ್ಂಗ್ ಬೋರೆ ಒಂದು ಕೂಟ್‌ವಕೂ ಕಯ್ಯುಲೆ.

¹⁶ದೇವ ಅಬ್ರಹಾಮಂಗು ಅಂವೊಂಡ ಸಂತಾನಕಾರಂಗಕು ವಾಗ್ದಾನ ಮಾಡ್‍ಚಿ. ಅಂವೊಂಡ ಸಂತಾನಕಾರಂಗಕ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತ್‌ಲ್ಲೆ.[9] ವಾಗ್ದಾನ ಅಂವೊಂಡ ಮೋಂವೊಂಗ್‍ೕಂದ್ ಎಣ್ಣ್‌ನಗುಂಡ್ ಆ ಸಂತಾನಕಾರ ಒಬ್ಬನೇ; ಅಂವೊ ಯೇಸು ಕ್ರಿಸ್ತನೇ.

¹⁷ಆನಗುಂಡ್ ನಾನ್ ಎಂತ ಎಣ್ಣಿಯಂಡುಳ್ಳ್‍ೕಂದ್ ಎಣ್ಣ್‌ಚೇಂಗಿ, ಕ್ರಿಸ್ತಂಡ ವಿಷಯತ್‍ಲ್ ಮಿಂಞಲೇ ದೇವ ಅಬ್ರಹಾಮಂಡ ಕೂಡೆ ದೃಡವಾಯಿತ್ ಮಾಡ್‍ನ ಒಪ್ಪಂದತ್‍ನ, ನಾನೂಟ್ಯ ನುಪ್ಪದ್ ಕಾಲಕ್ ಬಯ್ಯ ಬಂದ ನ್ಯಾಯಪ್ರಮಾಣ ಪೊರಮೆ ತಳ್ಳಿತ್ ವಾಗ್ದಾನತ್‍ನ ಒಂದು ಇಲ್ಲತನೆಕೆ ಮಾಡ್‌ವಕ್ ಕಯ್ಯುಲೆ.

¹⁸ಅದಲ್ಲತೆ ದೇವಡ ಬಾದ್ಯತೆ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್‍ಪಯಿಂಗಕ್ ಮಾತ್ರ ಕ್‍ಟ್ಟ್‌ಚೇಂಗಿ, ಅದ್ ದೇವಡ ವಾಗ್ದಾನತ್‍ರಗುಂಡ್ ಕ್‍ಟ್ಟ್‌ನದಾಯಿತ್ ಆಪಕಿಂಜಿಲೆ. ಆಚೇಂಗಿ ದೇವ ಕೃಪೆಯಾಯಿತ್ ಇದ್‍ನ ಅಬ್ರಹಾಮಂಗ್ ವಾಗ್ದಾನವಾಯಿತ್ ಕೊಡ್‍ತತ್.

¹⁹ಅಕ್ಕ, ನ್ಯಾಯಪ್ರಮಾಣತ್‍ರ ಅರ್ಥ ಎಂತ? ಇದ್ ಜನಡ ಪಾಪತ್‍ನ ಕಾಟಿ ಕೊಡ್‍ಪಕಾಯಿತ್ ತಾತ್. ದಾಡ ವಿಷಯತ್ ವಾಗ್ದಾನ ಮಾಡ್‍ಚೋ ಆ ಮೋಂವೊ ಬಪ್ಪಕತ್ತನೆ ನ್ಯಾಯಪ್ರಮಾಣಕ್ ಶಕ್ತಿಯಿಂಜತ್. ದೇವದೂತಂಗ, ಮದ್ಯಸ್ತನಾನ ಮೋಶೇರ ಕೈಯಿಲ್ ನ್ಯಾಯಪ್ರಮಾಣತ್‍ನ ಕೊಡ್‍ತತ್, ಅಂವೊ ಅದ್‍ನ ಅಂವೊಂಡ ಸಂತಾನಕಾರಂಗಕ್ ಕೊಡ್‍ತತ್.

²⁰ದಂಡಾಳ್ ಒಪ್ಪಂದ ಮಾಡ್‌ವಕ, ಒರ್ ಮದ್ಯಸ್ತ ಬೋಂಡು, ಆಚೇಂಗಿ ಒಬ್ಬನೇ ಆನ ದೇವ ಅಬ್ರಹಾಮಂಗ್ ಒಪ್ಪಂದ ಮಾಡ್‌ವಕ ಒರ್ ಮದ್ಯಸ್ತನನೂ ಕಾಕಿತ್‌ಲ್ಲೆ.

²¹ಅನ್ನನಾಚೇಂಗಿ, ನ್ಯಾಯಪ್ರಮಾಣ ದೇವ ಮಾಡ್‍ನ ವಾಗ್ದಾನಕ್ ವಿರೋದವಾ? ಅನ್ನನೆ ಇಲ್ಲವೇ ಇಲ್ಲೆ. ನ್ಯಾಯಪ್ರಮಾಣ ಎಣ್ಣ್‌ವನೆಕೆ ನಡ್‍ಪ ಮನುಷ್ಯಂಗಕ್ ಜೀವ ಕ್‍ಟ್ಟ್‌ಚೇಂಗಿ, ಎಲ್ಲಾರು ದೇವಡ ಪಕ್ಕ ನೀತಿವಂತಯಂಗಳಾಯಿತ್ ಬದ್‍ಕ್‍ವಯಿಂಜತ್.

²²ಆಚೇಂಗಿ ಈ ಬೂಲೋಕ ಪಾಪತ್‍ರ ಶಕ್ತಿಕ್ ಅಡಿಮೆಯಾಯಿತುಂಡ್‍ೕಂದ್ ದೇವಡ ವಾಕ್ಯ ಎಣ್ಣಿಯಂಡುಂಡ್. ಆಂಗ್ ಯೇಸು ಕ್ರಿಸ್ತಂಡ ಮೇಲೆ ಬೆಪ್ಪ ನಂಬಿಕೇರಗುಂಡ್ ವಾಗ್ದಾನ ಮಾಡ್‍ನ ಆಶೀರ್ವಾದ ಅಂವೊಂಡ ಮೇಲೆ ನಂಬಿಕೆ ಬೆಪ್ಪಯಿಂಗಕ್ ಮಾತ್ರ ಕ್‍ಟ್ಟ್‌ವ.

²³ನಂಗಕ್ ಕ್ರಿಸ್ತಂಡಲ್ಲಿ ಉಳ್ಳ ನಂಬಿಕೇರೆ ಬಟ್ಟೆ ಕ್‍ಟ್ಟ್‌ವಕ್ ಮಿಂಞ ನಂಗೆಲ್ಲಾ ಕೈದಿಯಂಡನೆಕೆ ಇಂಜಿತ್, ನಂಬಿಕೇರ ಬಟ್ಟೆ ಗೊತ್ತಾಪನೆಕೆ, ನ್ಯಾಯಪ್ರಮಾಣ ನಂಗಕ್ ಬೀಗ ಇಟ್ಟಿತ್ಂಜತ್.

²⁴ಇನ್ನನೆ ನ್ಯಾಯಪ್ರಮಾಣ, ನಂಗ ನಂಬಿಕೇರಗುಂಡ್ ನೀತಿವಂತಂಗಳಾಯಿತ್ ಆಪಕ್ ನಂಗಳ ಕ್ರಿಸ್ತಂಡ ಪಕ್ಕ ಕಾಕಿಯಂಡ್ ಪೋಪ ಉಪಾದ್ಯನಾಯಿತ್ಂಜತ್.

²⁵ಇಕ್ಕ ನಂಬಿಕೆ ಬಂದಗುಂಡ್, ನಂಗಕ್ ನ್ಯಾಯಪ್ರಮಾಣ ಉಪಾದ್ಯನಾಯಿತ್ ಇಪ್ಪದ್ ಬೋಂಡ.

²⁶ಯೇಸು ಕ್ರಿಸ್ತಂಡ ಮೇಲೆ ನಿಂಗಕ್ ಉಳ್ಳ ನಂಬಿಕೇರಗುಂಡ್ ಇಕ್ಕ ನಿಂಗ ದೇವಡ ಮಕ್ಕಳಾಯಿತ್ ಉಳ್ಳಿರ.

²⁷ಎನ್ನಂಗೆಣ್ಣ್‌ಚೇಂಗಿ, ದಾರೆಲ್ಲಾ ಕ್ರಿಸ್ತಂಡಲ್ಲಿ ದೀಕ್ಷಾಸ್ನಾನ ಎಡ್‍ತತೋ ಅಯಿಂಗೆಲ್ಲಾ, ಒಬ್ಬ ಪುದಿಯ ಬಟ್ಟೇನ ಇಡ್‍ವನೆಕೆ ಕ್ರಿಸ್ತನ ಇಟ್ಟಿತುಂಡ್.

²⁸ಯೆಹೂದ್ಯಂಗಾಂದು ಇಲ್ಲೆ ಯೆಹೂದ್ಯಲ್ಲತಯಿಂಗಾಂದು ಇಲ್ಲೆ, ಅಡಿಯಾಳ್‍ೕಂದು ಇಲ್ಲೆ, ಎಜಮಾನಾಂದು ಇಲ್ಲೆ, ಆಣಾಳ್‍ೕಂದು ಇಲ್ಲೆ, ಪೊಣ್ಣಾಳ್‍ೕಂದು ಇಲ್ಲೆ. ನಿಂಗೆಲ್ಲಾರು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಒಂದಾಯಿತ್ ಉಂಡ್.

²⁹ನಿಂಗ ಕ್ರಿಸ್ತಂಡ ಜನವಾಯಿತ್ಂಜತೇಂಗಿ ನಿಂಗ ಅಬ್ರಹಾಮಂಡ ಸಂತಾನಕಾರಂಗ, ಪಿಂಞ ದೇವ ಎಂತ ವಾಗ್ದಾನ ಮಾಡ್‍ಚೋ ಅದ್ ನಿಂಗಕ್ ಕ್‍ಟ್ಟ್‌ವ.