Read Kodava ಎಫೆಸ 1 Bible Online

ಎಫೆಸ 1 - Kodava bible

ಎಫೆಸ 1

¹ದೇವಡ ಚಿತ್ತತ್‍ರನೆಕೆ ಯೇಸು ಕ್ರಿಸ್ತಂಡ ಅಪೊಸ್ತಲನಾನ ಪೌಲ, ಎಫೆಸ ಪಟ್ಟಣತ್‍ಲ್, ಯೇಸು ಕ್ರಿಸ್ತಂಡಲ್ಲಿ ನಂಬಿಕೆ ಇಟ್ಟಿತುಳ್ಳ ದೇವಡ ಮಕ್ಕಕ್ ಒಳ್‍ದ್‍ವ ಕಾಗದ ಇದ್.

²ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

³ಪರಲೋಕತ್‍ರ ಎಲ್ಲಾ ಆತ್ಮೀಯ ಆಶೀರ್ವಾದತ್‍ರಗುಂಡ್ ನಂಗಳ ಕ್ರಿಸ್ತಂಡಲ್ಲಿ ಆಶೀರ್ವಾದ ಮಾಡಿತುಳ್ಳ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಅಪ್ಪನಾನ ದೇವಕ್ ತುದಿ ಆಡ್.

⁴ತಾಂಡ ಮಿಂಞತ್, ನಂಗ ಪ್ರೀತಿಲ್ ಪವಿತ್ರವಾನಯಿಂಗಳಾಯಿತು, ಒರ್ ಕುತ್ತ ಇಲ್ಲತಯಿಂಗಳಾಯಿತು ಇಪ್ಪಕ್, ಲೋಕ ಉಂಟಾಪಕ್ ಮಿಂಞಲೇ ದೇವ ನಂಗಳ ಅಂವೊಂಡ ಜನವಾಯಿತ್ ಇಪ್ಪಕ್ ಕ್ರಿಸ್ತಂಡಲ್ಲಿ ಗೊತ್ತ್ ಮಾಡಿರ್‌ತ್.

⁵ಅಂವೊ ನಂಗಳ ಪ್ರೀತಿ ಮಾಡ್‍ನಗುಂಡ್, ಯೇಸು ಕ್ರಿಸ್ತಂಡ ಮೂಲಕ, ನಂಗಳ ಅಂವೊಂಡ ಹಕ್ಕ್‌ದಾರಂಗಳಾನ ಮಕ್ಕಳಾಯಿತ್, ಅಂವೊಂಡ ಕುಶಿಕಾಯಿತ್, ಅಂವೊಂಡ ಚಿತ್ತತ್‍ರನೆಕೆ ಮಿಂಞಲೇ ಗೊತ್ತ್ ಮಾಡ್‍ಚಿ.

⁶ಅನ್ನನೆ, ದೇವ ಪ್ರೀತಿ ಮಾಡ್‌ವ ಅಂವೊಂಡ ಮೋಂವೊಂಡಲ್ಲಿ ನಂಗಡ ಮೇಲೆ ಇನಾಮಾಯಿತ್ ಬೂಕ್‌ನ ಅಂವೊಂಡ ಮಹಿಮೇರ ಕೃಪೆಕಾಯಿತ್ ಅಂವೊನ ತುದಿಪನೆಕೆ ಮಾಡ್‍ಚಿ.

⁷ಅಂವೊಂಡ ಕೃಪೇರ ಐಶ್ವರ್ಯತ್‍ರಗುಂಡ್, ಅಂವೊಂಡ ಮೋಂವೊಂಡ ಚೋರೆರ ಮೂಲಕ ನಂಗಡ ಪಾಪಕ್ ಮನ್ನಿಪ್ ಕ್‍ಟ್ಟಿತ್, ವಿಮೋಚನ ಕ್‍ಟ್ಟ್‌ಚಿ.

⁸ಅನ್ನನೆ ಆ ಕೃಪೇನ ಎಲ್ಲಾ ಜ್ಞಾನತ್ಂಜಲು, ಎಲ್ಲಾ ಬುದ್ದಿಯಿಂಜಲು ನಂಗಕ್ ದುಂಬ ಜಾಸ್ತಿ ತಂದಿತುಂಡ್.

⁹ದೇವ ಕ್ರಿಸ್ತಂಡ ಮೂಲಕ ಮಾಡಂಡೂಂದ್ ತೀರ್ಮಾನ ಮಾಡಿತ್ಂಜ, ಅಂವೊಂಡ ಕುಶೀರ ಚಿತ್ತತ್‍ರ ಗುಟ್ಟ್‌ನ ನಂಗ ಗೊತ್ತಾಪನೆಕೆ ಮಾಡ್‍ಚಿ.

¹⁰ಅದ್ ಎಂತ ಎಣ್ಣ್‌ಚೇಂಗಿ, ಅಂವೊ ತೀರ್ಮಾನ ಮಾಡ್‍ನ ಕಾಲ ನೆರವೇರುವಕ, ಪರಲೋಕತ್‍ಲ್ ಪಿಂಞ ಬೂಲೋಕತ್‍ಲ್ ಉಳ್ಳ ಎಲ್ಲಾನ ಕೂಟಿತ್, ಕ್ರಿಸ್ತಂಡ ಅದಿಕಾರತ್‍ರ ಅಡಿಕ್ ಕೊಂಡ್ ಬರಂಡೂಂದ್ ಉಳ್ಳದ್‍ನ ದೇವ ಪೂರ್ತಿ ಮಾಡ್‌ವ.

¹¹ದೇವಡ ಏರ್ಪಾಡ್‌ರ ಪ್ರಕಾರ ಅಂವೊಂಡ ತೀರ್ಮಾನತ್‍ರನೆಕೆ ಎಲ್ಲಾ ಆಯಂಡುಂಡ್. ಅನ್ನನೆ, ಅಂವೊಂಡ ಚಿತ್ತತ್‍ರನೆಕೆ, ನಂಗ ಅಂವೊಂಡ ಕೂಡೆ ಒಂದಾಯಿತ್ ಇಪ್ಪಕು, ಅಂವೊಂಡ ಕೂಡೆ ಪಾಲ್‍ದಾರಂಗಳಾಯಿತ್ ಇಪ್ಪಕು ಎಲ್ಲಾಕಿಂಜ ಮಿಂಞಲೇ, ದೇವ ನಂಗಳ ಗೊತ್ತ್ ಮಾಡ್‍ಚಿ.

¹²ಕ್ರಿಸ್ತಂಡ ಮೇಲೆ ಮಿಂಞಲೇ ನಿರೀಕ್ಷೆ ಬೆಚ್ಚಿತುಳ್ಳಯಿಂಗಳಾನ ನಂಗ ಅಂವೊನ ಕೊಂಡಾಡಿತ್ ಮಹಿಮೆ ಕೊಡುಕಂಡೂಂದ್ ಅಂವೊ ಇನ್ನನೆ ಮಾಡ್‍ಚಿ.

¹³ನಿಂಗಕ್ ರಕ್ಷಣೆ ತಪ್ಪ ಕ್ರಿಸ್ತಂಡ ನೇರಾನ ನಲ್ಲ ಸುದ್ದಿ ನಿಂಗಡ ಪಕ್ಕ ಬಪ್ಪಕ, ಅದ್‍ನ ಕ್‍ೕಟಿತ್ ನಿಂಗಳು ಸಹ ನಂಬಿತುಳ್ಳಿರ. ಅದ್‍ನ ನಿಂಗ ನಂಬ್‌ವಕ, ಅಂವೊ ವಾಗ್ದಾನ ಮಾಡ್‍ನ ಪವಿತ್ರಾತ್ಮತ್‍ರಗುಂಡ್, ಅಂವೊಂಡಲ್ಲಿ ನಿಂಗ ಅಂವೊಂಗ್ ಸ್ವಂತವಾನಯಿಂಗಾಂದ್ ಉಳ್ಳ ಮುದ್ರೆನ ಪಡ್ಂದಿತುಳ್ಳಿರ.

¹⁴ಅಂವೊಂಡ ಮಕ್ಕಳಾಯಿತ್ ಉಳ್ಳ ನಂಗಕ್ ಅಂವೊ ವಾಗ್ದಾನ ಮಾಡ್‍ನನೆಕೆ, ಪೂರ್ತಿ ವಿಮೋಚನ ಕ್‌ಟ್ಟ್‌ವಾಂದ್ ಪವಿತ್ರಾತ್ಮನೇ ನಂಗಕ್ ದೀರ್ಗ ಸಾಕ್ಷಿಯಾಯಿತ್ ಉಂಡ್. ಅಂವೊಂಡ ಮಹಿಮೆನ ನಂಗ ಕೊಂಡಾಡಂಡೂಂದ್ ಅಂವೊ ಇನ್ನನೆ ಮಾಡ್‍ಚಿ.

¹⁵ಇದ್ಂಗಾಯಿತ್, ಒಡೆಯನಾನ ಯೇಸುರಲ್ಲಿ ನಿಂಗ ಬೆಚ್ಚಿತುಳ್ಳ ನಂಬಿಕೆ ಪಿಂಞ ದೇವಡ ಮಕ್ಕಡ ಮೇಲೆ ಬೆಚ್ಚಿತುಳ್ಳ ಪ್ರೀತಿನ ನಾನ್‌ ಕ್‍ೕಟ ದಿವಸತ್ಂಜ,

¹⁶ನಿಂಗಕಾಯಿತ್ ಎಡೆಬುಡತೆ ದೇವಕ್ ವಂದನೆ ಮಾಡಿಯಂಡುಳ್ಳ. ನಾಡ ಪ್ರಾರ್ಥನೆಲ್ ನಿಂಗಳ ಗೇನ ಮಾಡಿತ್,

¹⁷ಯೇಸು ಕ್ರಿಸ್ತಂಡ ಒಡೆಯನು, ಮಹಿಮೇರ ಅಪ್ಪನು ಆಯಿತುಳ್ಳ ದೇವನ, ನಿಂಗ ಚಾಯಿತೆ ಗೊತ್ತಾಪಕುಳ್ಳ ಜ್ಞಾನತ್‍ನ ಪಿಂಞ ಪ್ರಕಟನೆನ ತಪ್ಪ ಪವಿತ್ರಾತ್ಮತ್‍ನ ನಿಂಗಕ್ ತರಂಡೂಂದ್ ಪ್ರಾರ್ಥನೆ ಮಾಡಿಯಂಡುಳ್ಳ.

¹⁸ಅಂವೊ ನಿಂಗಳ ಕಾಕ್‍ನಗುಂಡ್ ನಿಂಗಕುಳ್ಳ ನಿರೀಕ್ಷೆ ಎಂತದ್‍ೕಂದು, ದೇವಡ ಮಕ್ಕಡ ಪಕ್ಕ ನಂಗಕುಳ್ಳ ಬಾದ್ಯತೆರ ಮಹಿಮೇರ ಐಶ್ವರ್ಯ ಎಂತದ್‍ೕಂದ್ ಗೊತ್ತಾಪಕು,

¹⁹ಅಂವೊ ಕ್ರಿಸ್ತನ ಚತ್ತಯಿಂಗಡ ಮದ್ಯತ್ಂಜ ಜೀವವಾಯಿತ್ ಎಪ್ಪಿತ್, ಅಂವೊಂಡಲ್ಲಿ ಮಾಡ್‍ನ ಅಂವೊಂಡ ಬಲ್ಯ ಶಕ್ತಿರ ಬಲತ್‍ರನೆಕೆ, ಅಂವೊಂಡ ಮೇಲೆ ನಂಬಿಕೆ ಇಟ್ಟಿತುಳ್ಳ ನಂಗಡಲ್ಲಿ ಮಾಡಿಯಂಡುಳ್ಳ ಅಂವೊಂಡ ಬಲ್ಯ ಗನತ್‍ರ ಮಹತ್ವ ಎಂತದ್‍ೕಂದ್ ಗೊತ್ತಾಪಕು ಅಂವೊ ನಿಂಗಕ್ ಬಲ್ಯ ಬೊಳಿರ ಆತ್ಮೀಯ ಕಣ್ಣ್‌ನ ತರಂಡೂಂದ್ ಪ್ರಾರ್ಥನೆ ಮಾಡಿಯಂಡುಂಡ್.

²⁰ಪರಲೋಕತ್‍ರ ಎಲ್ಲಾ ಅದಿಕಾರಕು, ಬೋರೆ ಎಲ್ಲಾ ಅದಿಕಾರಕು, ಎಲ್ಲಾ ಶಕ್ತಿಕು, ಅದಿಕಾರಿಯಂಗಕು, ಈ ಲೋಕತ್‍ಲ್ ಮಾತ್ರ ಅಲ್ಲತೆ, ಬಪ್ಪಕುಳ್ಳ ಲೋಕತ್‍ಲ್ ಅರಿಂಜಿತುಳ್ಳ ಎಲ್ಲಾ ಪೆದಕು ಬಲ್ಯ ಪೆದವಾಯಿತ್ ಕೊಡಿಲ್ ಇಪ್ಪನೆಕೆ,

²¹ಅಂವೊನ ಪರಲೋಕತ್‍ಲ್ ತಾಂಡ ಬಲ್‌ತೆ ಬರಿಲ್ ಅಳ್‌ಪಕ್ ಮಾಡ್‍ಚಿ.

²²ಪಿಂಞ ಎಲ್ಲಾನ ಅಂವೊಂಡ ಕಾಲ್‍ರ ಅಡಿಕ್ ಇಟ್ಟಿತ್,

²³ಎಲ್ಲಾನ ಎಲ್ಲಾನಗುಂಡ್ ದುಂಬ್‌ಚಿಡುವ ಪರಿಪೂರ್ಣವಾನ ಅಂವೊಂಡ ತಡೀಯಾಯಿತುಳ್ಳ ಸಬೇಕ್, ಎಲ್ಲಾಕಿಂಜ ಮೇಲೆ ಅಂವೊನ ಮಂಡೆಯಾಯಿತ್ ಮಾಡ್‍ಚಿ.