Read Kodava ಎಫೆಸ 2 Bible Online

ಎಫೆಸ 2 - Kodava bible

ಎಫೆಸ 2

¹ಪಂಡ್ ನಿಂಗ ನಿಂಗಡ ಅಪರಾದತ್‍ಲ್ ಪಿಂಞ ಪಾಪತ್‍ಲ್ ಚತ್ತ್ ಪೋಯಿತ್ಂಜಿರ.

²ಅದ್‍ಲ್, ಪಂಡ್ ನಿಂಗ, ಈ ಲೋಕತ್‍ರ ಪದ್ದತಿರ ಪ್ರಕಾರ, ಪಿಂಞ ದೇವಡ ವಾಕ್ಯಕ್ ತಗ್ಗಿತ್ ನಡ್‍ಕತ ಜನತ್‍ರ ಮದ್ಯತ್‍ಲ್, ಇಕ್ಕ ಕ್ರಿಯೆ ಮಾಡಿಯಂಡುಳ್ಳ ದೆವ್ವ ಲೋಕತ್‍ರ ಅದಿಕಾರತ್‍ರ ಅದಿಕಾರಿಯಡ ಆತ್ಮತ್‍ರ ಪ್ರಕಾರ ಬದ್‍ಕಿಯಂಡಿಂಜಿರ.

³ನಂಗಳು ಸಹ ಅನ್ನನೆ ನಂಗಡ ತಡೀರ ಇಚ್ಛೆರ ಪ್ರಕಾರ ನಡ್ಂದಂಡ್, ನಂಗಡ ತಡಿ ಪಿಂಞ ಮನಸ್ಸ್ ಇಷ್ಟ ಪಟ್ಟಾನ ಮಾಡಿಯಂಡ್ ಇಂಜತ್. ಅನ್ನನೆ ನಂಗಡ ಪಾಪ ಗುಣತ್‍ರ ಪ್ರಕಾರ ಬೋರೆಯಿಂಗಡನೆಕೆ ದೇವಡ ಬಲ್ಯ ಚೆಡಿರ ಮಕ್ಕಳಾಯಿತ್ ಶಿಕ್ಷೆಕ್ ಒಳಪಟ್ಟಿತ್ಂಜತ್.

⁴ಆಚೇಂಗಿ, ಕರುಣೆ ದುಂಬ್‍ನ ದೇವನಾನ ಅಂವೊ ನಂಗಡ ಮೇಲೆ ಬೆಚ್ಚ ಬಲ್ಯ ಪ್ರೀತಿರಗುಂಡ್,

⁵ಅಪರಾದತ್‍ಲ್ ಚತ್ತ್ ಪೋಯಿತ್ಂಜ ನಂಗಳ ಕ್ರಿಸ್ತಂಡ ಕೂಡೆ ಜೀವವಾಯಿತ್ ಎಪ್ಪ್‌ಚಿಟ್ಟತ್; ಕೃಪೇರ ಮೂಲಕ ನಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ.

⁶ಕ್ರಿಸ್ತ ಯೇಸುರಲ್ಲಿ, ಅಂವೊ ನಂಗಡ ಮೇಲೆ ಬೆಚ್ಚಿತ್ಂಜ ದಯೇರಗುಂಡ್, ತಾಂಡ ಕೃಪೇರ ಬಲ್ಯ ಗನತ್‍ರ ಐಶ್ವರ್ಯತ್‍ನ ಬಪ್ಪ ಕಾಲತ್‍ಲ್ ಕಾಂಬ್‍ಚಿಡುವಕಾಯಿತ್, ದೇವ ನಂಗಳ ಕ್ರಿಸ್ತಂಡ ಕೂಡೆ ಚಾವ್‍ಯಿಂಜ ಎಪ್ಪಿತ್, ಪರಲೋಕತ್‍ಲ್ ಕ್ರಿಸ್ತ ಯೇಸುರಲ್ಲಿ ನಂಗಳ ಅಂವೊಂಡ ಕೂಡೆ ಅಳ್‍ಪ್‍ಚಿಟ್ಟತ್.

⁸ಕೃಪೇರಗುಂಡ್ ನಂಬಿಕೇರ ಮೂಲಕ ನಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ, ಇದ್ ನಿಂಗಡಗುಂಡ್ ಕ್‍ಟ್ಟ್‌ನದ್ ಅಲ್ಲ, ಇದ್ ದೇವಡ ಇನಾಮ್.

⁹ದಾರೂ ಹೊಗಳ್‌ಚಿಡತನೆಕೆ, ಕ್ರಿಯೇನಗುಂಡ್ ಕ್‍ಟ್ಟ್‌ನದ್ ಅಲ್ಲ.

¹⁰ಎನ್ನನೆ ಎಣ್ಣ್‌ಚೇಂಗಿ, ನಲ್ಲ ಕೆಲಸ ಮಾಡ್‌ವಕಾಯಿತ್ ನಂಗಳ ಪುದಿಯದಾಯಿತ್ ಕ್ರಿಸ್ತ ಯೇಸುರಲ್ಲಿ ಸೃಷ್ಟಿ ಮಾಡ್‍ನ ದೇವಡ ಕ್ರಿಯೇಯಾಯಿತುಂಡ್; ಅದ್‍ಲ್ ನಂಗ ನಡ್‍ಕಂಡೂಂದ್ ದೇವ ಮಿಂಞಲೇ ತಯಾರ್ ಮಾಡಿತುಂಡ್.

¹¹ಆನಗುಂಡ್, ಮಿಂಞತ್‍ರ ಕಾಲತ್‍ಲ್ ಎನ್ನನೆ ಇಂಜಿರಾಂದ್ ಗೇನ ಮಾಡಿಯೊಳಿ; ನಿಂಗ ಯೆಹೂದ್ಯಂಗಳಾಯಿತ್ ತಡೀರ ಪ್ರಕಾರ ಪುಟ್ಟಿತ್‌ಲ್ಲೆ, ತಡೀಲ್ ಸುನ್ನತಿ ಮಾಡ್‍ನಯಿಂಗ ನಿಂಗಳ ಸುನ್ನತಿ ಮಾಡತಯಿಂಗಾಂದ್ ಕಾಕಿಯಂಡಿಂಜತ್.

¹²ಅಕ್ಕ ನಿಂಗ ಕ್ರಿಸ್ತಂಡಲ್ಲಿ ಕೂಡತಯಿಂಗಳಾಯಿತ್, ಇಸ್ರಾಯೇಲ್ ರಾಜ್ಯಕ್ ಕೂಡತಯಿಂಗಳಾಯಿತ್, ದೇವಡ ಒಪ್ಪಂದತ್‍ರ ವಾಗ್ದಾನಕ್ ಕೂಡತಯಿಂಗಳಾಯಿತ್, ನಿರೀಕ್ಷೆ ಇಲ್ಲತಯಿಂಗಳಾಯಿತ್, ಈ ಲೋಕತ್‍ಲ್ ದೇವ ಇಲ್ಲತಯಿಂಗಳಾಯಿತ್ ಬದ್‌ಕಿಯಂಡಿಂಜಿರಾಂದ್ ಗೇನ ಬೆಚ್ಚೊಳಿ.

¹³ಆಚೇಂಗಿ ಇಕ್ಕ, ದೂರವಾಯಿತ್ಂಜ ನಿಂಗ, ಕ್ರಿಸ್ತ ಯೇಸರಲ್ಲಿ ಕ್ರಿಸ್ತಂಡ ಚೋರೆರ ಮೂಲಕ ದೇವಡ ಪಕ್ಕ ಬಂದಿತುಳ್ಳಿರ.

¹⁴ಎನ್ನನೆ ಎಣ್ಣ್‌ಚೇಂಗಿ, ಅಂವೊನೇ ನಂಗಕ್ ಸಮಾದಾನ ತಪ್ಪಂವೊನಾಯಿತು, ಯೆಹೂದ್ಯಂಗ ಪಿಂಞ ಯೆಹೂದ್ಯಂಗಲ್ಲತಯಿಂಗಾಂದ್ ಇಂಜ ದಂಡ್ ಜನತ್‍ನ ಒಂದ್ ಮಾಡಿತ್, ಬೋರೆ ಬೋರೇಂದ್ ಮಾಡಿಯಂಡ್ ವಿರೋದವಾಯಿತ್ ಮದ್ಯತ್‍ಲ್ ನಿಂದಂಡಿಂಜ ಗೋಡೆನ ಪೊಳಿಚತ್.

¹⁵ನ್ಯಾಯಪ್ರಮಾಣತ್‍ನ ಪಿಂಞ ಅದ್ಂಡ ನೇಮತ್‍ನ ತಾಂಡ ತಡೀರಗುಂಡ್ ನಾಶ ಮಾಡ್‍ಚಿ. ಅನ್ನನೆ ಈ ದಂಡ್ ಜನತ್‍ನ ತಾಂಡ ಮೂಲಕ ಒರೇ ಪುದಿಯ ಮನುಷ್ಯನಾಯಿತ್ ಸೃಷ್ಟಿ ಮಾಡಿತ್, ಸಮಾದಾನ ಮಾಡ್‍ಚಿ.

¹⁶ಅಯಿಂಗಕ್ ವಿರೋದವಾಯಿತ್ ಇಂಜ ಪಗೇನ ಅಂವೊ ಶಿಲುಬೇಲ್ ಚತ್ತಿತ್ ನಾಶ ಮಾಡ್‍ಚಿ; ಅನ್ನನೆ ಈ ದಂಡ್ ಜನತ್‍ನ ಒರೇ ತಡಿಯಾಯಿತ್ ದೇವಡ ಪಕ್ಕ ಇಂಜ ವಿರೋದತ್‍ನ ಕಳೆಂದಿತ್ ಸಮಾದಾನತ್‍ನ ಕೊಂಡ್ ಬಾತ್.

¹⁷ಅದಲ್ಲತೆ, ಅಂವೊ ಬಂದಿತ್, ದೂರವಾಯಿತ್ಂಜ ನಿಂಗಕು, ಪಕ್ಕತ್‍ಲ್ ಇಂಜ ಯೆಹೂದ್ಯಂಗಕು ಸಮಾದಾನತ್‍ನ ದೇವಡ ನಲ್ಲ ಸುದ್ದಿಯಾಯಿತ್ ಅರಿಚಿಟ್ಟತ್.

¹⁸ಅನ್ನನೆ ನಂಗ ದಂಡ್ ಜನವು, ಒರೇ ಪವಿತ್ರಾತ್ಮತ್‍ರ ಮೂಲಕ, ಅಪ್ಪನಾನ ದೇವಡ ಪಕ್ಕ ಕೂಡುವಕುಳ್ಳ ಬಾಗ್ಯ ಅಂವೊಂಡ ಮೂಲಕ ಕ್‍ಟ್ಟ್‌ಚಿ.

¹⁹ಆನಗುಂಡ್, ನಿಂಗ ಇಂಞು ಮಿಂಞಕ್ ಬೋರೆಯಿಂಗಾಂದ್ ಪಿಂಞ ಅನ್ಯ ಜನಾಂದ್ ಇಲ್ಲತೆ, ದೇವಡ ಮಕ್ಕಡ ಕೂಟ್‌ಲ್ ಒರೇ ದೇಶಕ್ ಕೂಡ್‍ನಯಿಂಗಳು, ದೇವಡ ಮನೆಕಾರಂಗಳಾಯಿತ್ ಇಂಜಂಡ್,

²⁰ಅಪೊಸ್ತಲಂಗ ಪಿಂಞ ಪ್ರವಾದಿಯಂಗ ಎಣ್ಣುವಯಿಂಗಡ ಅಡಿಪಾಯತ್‍ರ ಮೇಲೆ ಕೆಟ್ಟಿತುಳ್ಳಯಿಂಗಳಾಯಿತುಳ್ಳಿರ; ಅದ್ಂಗ್ ಯೇಸು ಕ್ರಿಸ್ತತನೇ ಮೂಲೆ ಕಲ್ಲಾಯಿತ್ ಉಂಡ್.

²¹ಅಂವೊಂಡ ಮೇಲೆ ಆ ಕಟ್ಟಡ ಒಂದಾಂಗ್ ಒಂದ್ ಕೂಟಾಯಿತ್ ಒಕ್ಕಿಯಂಡ್, ಒಡೆಯಂಡಲ್ಲಿ ಪವಿತ್ರವಾನ ಆಲಯವಾಯಿತ್ ಬೊಳ್‌ಂದಿಯಂಡ್ ಉಂಡ್.

²²ಅಂವೊಂಡ ಮೇಲೆ ನಿಂಗಳು, ಆತ್ಮತ್‍ರಗುಂಡ್ ದೇವ ವಾಸ ಮಾಡ್‌ವ ಜಾಗವಾಯಿತ್ ಕೂಟಾಯಿತ್ ಕೆಟ್ಟಿಯಂಡ್ ಬಂದಂಡುಳ್ಳಿರ.