Read Kodava ಎಫೆಸ 4 Bible Online

ಎಫೆಸ 4 - Kodava bible

ಎಫೆಸ 4

¹ಆನಗುಂಡ್, ದೇವ ನಿಂಗಳ ಕಾಕ್‍ನನೆಕೆ, ನಿಂಗ ಅದ್ಂಗ್ ಯೋಗ್ಯವಾನ ಬದ್‍ಕ್‍ನ ಬಾಳಡೂಂದ್ ಒಡೆಯಂಗಾಯಿತ್ ಕೈದಿಯಾಯಿತ್ ಉಳ್ಳ ನಾನ್, ನಿಂಗಳ ಬೋಡುವಿ.

²ಎಲ್ಲಾ ತಾಳ್ಮೆಲ್, ಶಾಂತಿಲ್, ಪೊರುಮೇಲ್, ಪ್ರೀತಿನಗುಂಡ್ ಒಬ್ಬನ ಒಬ್ಬ ಸಹಿಸಿಯಂಡ್ ಇರಿ.

³ಪವಿತ್ರಾತ್ಮತ್‍ರ ಐಕ್ಯತ್‌ನ ಕಾಪಾಡ್‌ವಕ್ ಸಮಾದಾನತ್‍ಲ್ ಒಂದಾಯಿತ್ ಇಂಜಂಡ್ ಎಚ್ಚರತ್‍ಲ್ ಇರಿ.

⁴ಒರೇ ನಿರೀಕ್ಷೆಕಾಯಿತ್ ದೇವ ನಿಂಗಳ ಕಾಕಿತ್ ಕೂಟ್‍ನನೆಕೆ, ಒರೇ ತಡಿಯು, ಒರೇ ಪವಿತ್ರಾತ್ಮವು ಉಂಡ್.

⁵ಒರೇ ಒಡೆಯನು, ಒರೇ ನಂಬಿಕೆಯು, ಒರೇ ದೀಕ್ಷಾಸ್ನಾನವು,

⁶ಎಲ್ಲಾರ್‌ಕು ಒರೇ ದೇವನಾನ ಅಪ್ಪನು ಉಂಡ್; ಅಂವೊ ಎಲ್ಲಾಡ ಮೇಲೆಯು, ಎಲ್ಲಾಡ ಮೂಲಕವು, ಎಲ್ಲಾಡಲ್ಲಿಯು ವಾಸ ಮಾಡಿಯಂಡ್ ಉಂಡ್.

⁷ಆಚೇಂಗಿ, ಕ್ರಿಸ್ತಂಡ ದಾನತ್‍ರ ಅಳ್‌ತೆರ ಪ್ರಕಾರ ನಂಗ ಒಬ್ಬೊಬ್ಬಂಗು ವರವಾಯಿತ್ ಅಂವೊಂಡ ಕೃಪೇನ ಕೊಡ್‌ತಿತುಂಡ್.

⁸ಅದ್ಂಗೇ ದೇವಡ ವಾಕ್ಯತ್‍ಲ್: ಅಂವೊ ಪರಲೋಕಕ್ ಪತ್ತ್‌ವಕ, ಅಂವೊಂಡ ಕೂಡೆ ದುಂಬ ಕೈದಿಯಳ ಕೈದಿಯಾಯಿತ್ ಕಾಕಿಯಂಡ್ ಪೋಯಿತ್, ಮನುಷ್ಯಂಗಕ್ ವರತ್‍ನ ತಂದತ್‍ೕಂದ್ ಎಣ್ಣಿತುಂಡ್.[2]

⁹ಅಂವೊ ಪರಲೋಕಕ್ ಪತ್ತ್‌ಚೀಂದ್ ಎಣ್ಣುವಕ, ಅದ್ಂಗ್ ಮಿಂಞ ಅಂವೊ ಬೂಮಿರ ಅಡಿಕ್ ಇಳಿಂಜ್‍ತ್‍ೕಂದ್ ಅರ್ಥ ಆಪ ಅಲ್ಲ?

¹⁰ಅನ್ನನೆ ಇಳಿಂಜಂವೊನೇ, ಎಲ್ಲಾನ ದುಂಬ್‍ಚಿಡ್‌ವನೆಕೆ, ಎಲ್ಲಾ ಬಾನಕು ಕೊಡಿಲ್ ಉಳ್ಳ ಪರಲೋಕಕ್ ಪತ್ತ್‌ನಂವೊನಾಯಿತು ಉಂಡ್.

¹¹ಅನ್ನನೆ ಅಂವೊ ಚೆನ್ನ ಜನಳ ಅಪೊಸ್ತಲಂಗಳಾಯಿತ್, ಚೆನ್ನ ಜನಳ ಪ್ರವಾದಿಯಂಗಳಾಯಿತ್, ಚೆನ್ನ ಜನಳ ದೇವಡ ನಲ್ಲ ಸುದ್ದಿ ಅರಿಚಿಡುವಯಿಂಗಳಾಯಿತ್, ಚೆನ್ನ ಜನಳ ಸಬೇನ ನಡ್‌ತ್‌ವಯಿಂಗಳಾಯಿತ್ ಪಿಂಞ ಚೆನ್ನ ಜನಳ ದೇವಡ ವಾಕ್ಯತ್‍ನ ಬೋದನೆ ಮಾಡ್‌ವಯಿಂಗಳಾಯಿತ್ ನೇಮಿಚಿಟ್ಟತ್.

¹²ಈಂಗಡಗುಂಡ್, ದೇವಡ ಮಕ್ಕ ಬೊಳ್ಂದಿತ್ ಅಂವೊಂಡ ಸೇವೇರ ಜವಾಬ್ದಾರಿನ ಮಾಡ್‌ವಕಾಯಿತು, ಪಿಂಞ ಅಂವೊಂಡ ತಡಿಯಾನ ಸಬೇನ ಕೆಟ್ಟ್‌ವಕಾಯಿತು ಮಾಡ್‍ಚಿ.

¹³ಅಕ್ಕ, ನಂಗ ಎಲ್ಲಾರು ದೇವಡ ಮೋಂವೊಂಡ ಮೇಲೆ ಇಟ್ಟಿತುಳ್ಳ ನಂಬಿಕೇಲ್ ಪಿಂಞ ಬುದ್ದಿಲ್ ಒಂದಾಯಿತ್, ಕ್ರಿಸ್ತಂಡ ಪೂರ್ತಿ ಅಳ್‌ತೆಕ್ ಬೊಳ್ಂದಿತ್ ಪೂರ್ತಿ ಮನುಷ್ಯಂಗಳಾಯಿತ್ ಬೊಳಿವಕಯ್ಯು.

¹⁴ನಂಗ ಇಂಞು ಮಿಂಞಕ್ ಕುಂಞಿಯರನೆಕೆ ಇಕ್ಕತೆ, ಮನುಷ್ಯಂಗಡ ಕಪಟ ಪಿಂಞ ವಂಚನೆ ಮಾಡ್‌ವ ತಂತ್ರವುಳ್ಳ ಬೋದನೆಯಾನ, ನಾನಾತರ ಗಾಳಿರಗುಂಡ್ ಅಲ್ಲಾಡಿಯಂಡಿಪ್ಪ, ಅಲೆರನೆಕೆ ಅಪ್ಪರ ಇಪ್ಪರ ಪೋಯಂಡಿಪ್ಪಯಿಂಗಳಾಯಿತ್ ಇರತಿ.

¹⁵ಅದ್ಂಡ ಬದ್‍ಲ್, ಪ್ರೀತಿಲ್ ಸತ್ಯತ್‍ನ ಪುಡ್‍ಚಂಡ್, ಮಂಡೆಯಾಯಿತುಳ್ಳ ಕ್ರಿಸ್ತಂಡಲ್ಲಿ ಎಲ್ಲಾ ವಿಷಯತ್‍ಲು, ನಂಗ ಬೊಳ್ಂದಂಡ್ ಇಪ್ಪಯಿಂಗಳಾಯಿತ್ ಇರಂಡು.

¹⁶ಅಂವೊನಗುಂಡ್, ತಡಿ ಪೂರ್ತಿಯು, ತಡೀನ ಒಂದಾಯಿತ್ ಪುಡ್‌ಚಿತಿಪ್ಪಕ್ ಸಹಾಯ ಮಾಡ್‌ವ ಅದ್ಂಡ ಯರ್ಚಿ ಕಂಡವು ಒಂದಾಯಿತ್ ಕೂಡಿತ್, ಓರೋರ್ ಬಾಗವು, ಅದ್ಂಗದ್ಂಗ್ ತಕ್ಕ ಅಳ್‌ತೆಲ್ ಕೆಲಸತ್‍ನ ಮಾಡ್‌ವಕ, ಪ್ರೀತಿನಗುಂಡ್ ತಡಿ ಬೊಳ್ಂದಿತ್ ಅದ್ಂಡದ್ಂಡ ಕೆಲಸತ್‍ನ ಮಾಡ್‌ವ.

¹⁷ಆನಗುಂಡ್, ಒಡೆಯಂಡಲ್ಲಿ ನಾನ್ ನಿಂಗಕ್ ಸಾಕ್ಷಿಯಾಯಿತ್ ಎಚ್ಚರ ಮಾಡಿತ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗಲ್ಲತ ಬೋರೆ ಜನ ಪ್ರಯೋಜನ ಇಲ್ಲತ ಗೇನತ್‍ಲ್ ಬದ್‍ಕ್‍ವನೆಕೆ ನಿಂಗ ಇಂಞು ಮಿಂಞಕ್ ಬದ್‍ಕಂಡ.

¹⁸ಅಯಿಂಗಡ ಮನಸ್ಸ್ ಇರ್‌ಟಾಯಿತ್ ಉಂಡ್, ಅಯಿಂಗಡ ಹೃದಯತ್‍ನ ಅಯಿಂಗ ಕಠಿಣ ಮಾಡಿತುಳ್ಳಗುಂಡ್ ಅಯಿಂಗಡ ಮನಸ್ಸ್‌ಕ್ ಒಂದು ಅರ್ಥ ಆಕತನೆಕೆ, ದೇವಡ ಜೀವಕ್ ಅನ್ಯರಾಯಿತ್ ಉಂಡ್.

¹⁹ಸೊಯ ತಪ್ಪಿತ್, ಎಲ್ಲಾ ಅಶುದ್ದ ಕ್ರಿಯೇನ ಕುಶೀಲ್ ಮಾಡಿಯಂಡಿಪ್ಪಕಾಯಿತ್, ಲೈಂಗಿಕ ಪಾಪಕ್ ಅಯಿಂಗಳ ಅಯಿಂಗ ಒಪ್ಪ್‌ಚಿಟ್ಟಯಿಂಗಾಳಾಯಿತುಂಡ್.

²⁰ಆಚೇಂಗಿ, ನಿಂಗ ಕ್ರಿಸ್ತನ ಇನ್ನನೆ ಪಡಿಚಿತ್‌ಲ್ಲೆ.

²¹ಯೇಸುರಲ್ಲಿ ಉಳ್ಳ ಸತ್ಯತ್‍ರನೆಕೆ, ನಿಂಗ ಅಂವೊಂಡಲ್ಲಿ ಕ್‍ೕಟಿತ್ ಅಂವೊನಗಂಡ್ ಬೋದನೆನ ನೇರಾಯಿತು ಪಡ್ಂದಿತುಳ್ಳಿರ.

²²ಆನಗುಂಡ್, ಪಂಡತ ಬದ್‍ಕ್‍ರ, ಇಚ್ಛೆಯಿಂಜ ನಿಂಗಳ ಪಾಳ್ ಮಾಡ್‌ವ ಪಳೆಯ ಮನುಷ್ಯನ ಉತ್ತಿತ್ ಕಳೆಯುವಿರ.

²³ನಿಂಗಡ ಮನಸ್ಸ್‌ಲ್, ಪುದಿಯ ಆತ್ಮತ್‍ರಗುಂಡ್ ಬದ್‍ಲಾನಯಿಂಗಳಾಯಿತ್,

²⁴ನೇರಾನ ನೀತಿಲು, ಪವಿತ್ರತ್‍ಲು, ದೇವಡ ರೂಪತ್‍ರನೆಕೆ ಸೃಷ್ಟಿ ಮಾಡ್‍ನ ಪುದಿಯ ಮನುಷ್ಯನ ಇಟ್ಟೊಳಿ.

²⁵ಪಿಂಞ, ನಂಗ ಒಬ್ಬೊಬ್ಬಂಗಳು ಒರೇ ತಡೀರ ಬಾಗವಾಯಿತ್ ಉಳ್ಳಾಂಗ್, ಪೊಟ್ಟ್ ಪರಿವಾನ ಬುಟ್ಟಿತ್, ಒಬ್ಬೊಬ್ಬಂಡ ಕೂಡೆ ಸತ್ಯ ಪರಿಯುವಯಿಂಗಳಾಯಿತ್ ಇರಿ.

²⁶ನಿಂಗಕ್ ಚೆಡಿ ಬಾತೇಂಗಿಯು, ಪಾಪ ಮಾಡತೆ ಇರಿ; ಸೂರ್ಯ ಮುಳುವಕ್ ಮಿಂಞಲೇ ನಿಂಗಡ ಚೆಡಿ ತಣ್ಂಜ್ ಪೋಡ್.[3]

²⁷ಸೈತಾನಂಗ್ ಬಟ್ಟೆ ಕೊಡ್‌ಕತಿ.

²⁸ಕಳ್ಳತನ ಮಾಡ್‌ವಯಿಂಗ ಇಂಞು ಮಿಂಞಕ್ ಕಕ್ಕತೆ, ತಾಂಡ ಕೈಯಿನಗುಂಡ್ ನಲ್ಲ ಕೆಲಸ ಮಾಡಿತ್, ಬೋಂಡಿಯಾನಯಿಂಗಕ್ ಕೊಡ್‍ಕಂಡು.

²⁹ಏದ್ ಒರ್ ಕೆಟ್ಟ ತಕ್ಕು ನಿಂಗಡ ಬಾಯಿಂಜ ಬಪ್ಪಕ್ಕಾಗ. ದೇವಡ ಮೇಲೆ ಬಕ್ತಿ ಬಪ್ಪನೆಕೆ ಬೋರೆಯಿಂಗಳ ಚಾಯಿ ಬೊಳಿಯುವಕುಳ್ಳ ತಕ್ಕ್ ಉಂಡೇಂಗಿ, ಆ ತಕ್ಕ್ ಕ್‍ೕಪಯಿಂಗಕ್ ಪ್ರಯೋಜನ ಆಪನೆಕೆ ಪರಿವಿರ.

³⁰ವಿಮೋಚನ ಕ್‍ಟ್ಟ್‌ವ ನಾಳ್‍ಕಾಯಿತ್, ನಿಂಗಕ್ ಮುದ್ರೆ ಇಟ್ಟಿತ್ತುಳ್ಳ ದೇವಡ ಪವಿತ್ರಾತ್ಮನ ದುಃಖಪಡ್‌ತತಿ.

³¹ಎಲ್ಲಾ ಕೈಪ್‍ತನ, ಬೈಗಳ, ಚೆಡಿ, ಜೋರ್ ಮಾಡ್‍ವದ್, ಕೆಟ್ಟ ತಕ್ಕ್ ಪಿಂಞ ಎಲ್ಲಾ ಕೆಟ್ಟ ಗುಣವು ನಿಂಗಳ ಬುಟ್ಟಿತ್ ಪೋಡ್.

³²ಒಬ್ಬಂಡ ಮೇಲೆ ಒಬ್ಬ ದಯೆ ಕಾಟಿತ್, ಕರುಣೆ ಉಳ್ಳಯಿಂಗಳಾಯಿತ್, ಕ್ರಿಸ್ತಂಡ ಮೂಲಕ ದೇವ ನಿಂಗಕ್ ಮನ್ನಿಚಿಟ್ಟನೆಕೆ, ನಿಂಗಳು ಒಬ್ಬಂಗ್ ಒಬ್ಬ ಮನ್ನಿಚಿಡಿ.