Read Kodava ಎಫೆಸ 6 Bible Online

ಎಫೆಸ 6 - Kodava bible

ಎಫೆಸ 6

¹ಕುಂಞಿಯಳೇ, ನಿಂಗ ಒಡೆಯಂಡ ಐಕ್ಯತ್‍ಲ್ ಉಳ್ಳಗುಂಡ್, ನಿಂಗಡ ಅಪ್ಪವ್ವಂಗಕ್ ತಗ್ಗಿತ್ ನಡ್‌ಕಂಡು. ಇದ್ ನ್ಯಾಯ.

²ನಿಂಗಕ್ ನಲ್ಲದ್ ಆಪಕಾಯಿತು, ಈ ಲೋಕತ್‍ಲ್ ದುಂಬ ಕಾಲ ಬದ್‌ಕ್‌ವಕಾಯಿತು,

³ನಿಂಗಡ ಅಪ್ಪವ್ವನ ಗನಪಡ್‍ತಂಡೂಂದ್ ಉಳ್ಳದೇ ದೇವಡ ವಾಗ್ದಾನ ತಪ್ಪ ಆದ್ಯ ಆಜ್ಞೆಯಾಯಿತ್ ಉಂಡ್.[6]

⁴ಅಪ್ಪಂಗಳೇ, ನಿಂಗ ನಿಂಗಡ ಮಕ್ಕಕ್ ಚೆಡಿ ಬಪ್ಪನೆಕೆ ಮಾಡತಿ, ಒಡೆಯಂಗ್ ಒತ್ತ ಶಿಸ್ತ್‌ಲ್ ಪಿಂಞ ಉಪದೇಶತ್‍ಲ್ ಅಯಿಂಗಳ ಬೊಳ್‍ತಿ.

⁵ಅಡಿಯಾಳ್‌ವಳೇ, ನಿಂಗ ಕ್ರಿಸ್ತಂಗ್ ತಗ್ಗಿತ್ ನಡ್‍ಪನೆಕೆ, ಈ ಲೋಕತ್‍ರ ನಿಂಗಡ ಎಜಮಾನಂಗಕ್ ಬೊತ್ತಿತ್, ಪಿಂಞ ನಡ್‍ಗಿಯಂಡ್, ಕಪಟಯಿಲ್ಲತ ಮನಸ್ಸ್‌ಲ್ ನಡ್‌ಕಂಡು.

⁶ಮನುಷ್ಯಂಗ ಕುಶಿಪಡ್‌ವನೆಕೆ ಅಯಿಂಗ ನೋಟ್‍ವಕ ಮಾತ್ರ ಕೆಲಸ ಮಾಡತೆ, ಕ್ರಿಸ್ತಂಡ ಅಡಿಯಾಳಾಯಿತ್, ಪೂರ್ತಿ ಮನಸ್ಸ್‌ಲ್ ದೇವಡ ಚಿತ್ತತ್‍ನ ಮಾಡಿ.

⁷ಮನುಷ್ಯಂಗಕಾಯಿತ್ ಅಲ್ಲತೆ ಒಡೆಯಂಗ್ ಸೇವೆ ಮಾಡ್‌ವನೆಕೆ ನಲ್ಲ ಮನಸ್ಸ್‌ಲ್ ಮಾಡಿ.

⁸ಅಡಿಯಾಳಾಯಿತ್ಂಜತೇಂಗಿಯು, ಸ್ವಾತಂತ್ರ ಆನಯಿಂಗಳಾಯಿತ್ಂಜತೇಂಗಿಯು, ಅಯಿಂಗಯಿಂಗ ಮಾಡ್‌ವ ಸೇವೇಕ್ ತಕ್ಕಂತ ಇನಾಮ್‍ನ ದೇವ ತಪ್ಪಾಂದ್ ಗೇನ ಬೆಚ್ಚೊಳಿ.

⁹ಎಜಮಾನಂಗಳೇ, ನಿಂಗಳು ಸಹ, ಅಡಿಯಾಳ್‌ವಕ್ ಮಾಡ್‌ವಕ್ಕುಳ್ಳಾನ ಮಾಡಿತ್, ಅಯಿಂಗಕು ನಿಂಗಕು ಒರೇ ಎಜಮಾನ ಪರಲೋಕತ್‍ಲ್ ಉಂಡ್‍ೕಂದು ಪಿಂಞ ಅಂವೊ ದಾರ್‌ಕು ಪಕ್ಷಪಾತ ಮಾಡುಲೇಂದ್ ಗೇನ ಮಾಡಿತ್, ಅಯಿಂಗಳ ಬೊತ್ತ್‌ಚಿಡತಿ.

¹⁰ಆಕೀರ್‌ಲ್ ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ಒಡೆಯಂಡಲ್ಲಿ ಪಿಂಞ ಅಂವೊಂಡ ಬಲ್ಯ ಶಕ್ತಿಲ್ ಬಲಪಡಿ.

¹¹ನಿಂಗ ಸೈತಾನಂಡ ತಂತ್ರಕ್ ಎದ್‍ರ್ ನಿಪ್ಪಕ್ ಶಕ್ತಿ ಉಳ್ಳಯಿಂಗಳಾಯಿತ್ ಇಪ್ಪಕ್ ದೇವಡ ಸರ್ವ ಆಯುದತ್‍ನ ಇಟ್ಟೊಳಿ.

¹²ಎನ್ನಂಗೆಣ್ಣ್‌ಚೇಂಗಿ, ನಂಗಡ ಪೋರಾಟ ಮನುಷ್ಯಂಗಕ್ ವಿರೋದವಾಯಿತ್ ಅಲ್ಲ, ಅದಿಕಾರಕ್ ವಿರೋದವಾಯಿತ್, ಕೂಳಿಯಡ ಅದಿಕಾರಿಯಂಗಕ್ ವಿರೋದವಾಯಿತ್, ಈ ಇರ್‌ಟ್ ಲೋಕತ್‍ರ ಅದಿಪತಿಯಂಗಕ್ ವಿರೋದವಾಯಿತ್ ಪಿಂಞ ಬಾನತ್‍ಲ್ ವಾಸ ಮಾಡಿಯಂಡುಳ್ಳ ಕೂಳಿಯಡ ಸೇನೆಕ್ ವಿರೋದವಾಯಿತ್ ಉಂಡ್.

¹³ಆನಗುಂಡ್ ಕೆಟ್ಟ ದಿವಸತ್‍ಲ್ ನಿಂಗ ಅಯಿಂಗಕ್ ಎದ್‍ರ್ ನಿಪ್ಪಕ, ಎಲ್ಲಾನ ಪೂರ್ತಿ ಮಾಡ್‍ನಯಿಂಗಳಾಯಿತ್ ನಿಪ್ಪಕ್ ಶಕ್ತಿ ಉಳ್ಳಯಿಂಗಳಾಯಿತ್ ಇಪ್ಪನೆಕೆ ದೇವಡ ಸರ್ವ ಆಯುದತ್‍ನ ಇಟ್ಟೊಳಿ.

¹⁴ಸತ್ಯ ಎಣ್ಣುವ ಅರೆ ಪಟ್ಟಿ ಕೆಟ್ಟ್‌ನಯಿಂಗಳಾಯಿತು, ನೀತಿ ಎಣ್ಣುವ ಎದೆ ತಟ್ಟೆನ ಇಟ್ಟಯಿಂಗಳಾಯಿತು,

¹⁵ಸಮಾದಾನತ್‍ರ ನಲ್ಲ ಸುದ್ದಿನ ಎಣ್ಣುವಕ್ ತಯಾರ್‍ೕಂದ್ ಎಣ್ಣುವ ಎಕ್ಕಡತ್‌ನ ಕಾಲ್‌ಲ್ ಇಟ್ಟಯಿಂಗಳಾಯಿತು ಇರಿ.

¹⁶ಎಲ್ಲಾಕಿಂಜ ಬಲ್ಯದಾಯಿತ್, ವಿರೋದಿಯಾನ ಸೈತಾನ ಕೆಣಿಪ ತಿತ್ತ್‌ರ ಅಂಬ್‍ನ ತಡ್‍ಪಕ್ ನಂಬಿಕೆ ಎಣ್ಣುವ ಪಡೆತಟ್ಟೆನ ಪುಡ್‌ಚಯಿಂಗಳಾಯಿತ್ ಇರಿ.

¹⁷ರಕ್ಷಣೆ ಎಣ್ಣುವ ಇರ್‍ಂಬ್ ತೊಪ್ಪಿನ ಇಟ್ಟಂಡ್, ದೇವಡ ವಾಕ್ಯವಾಯಿತುಳ್ಳ ಪವಿತ್ರಾತ್ಮತ್‍ರ ಬಾಳ್ ಕತ್ತಿನ ಪುಡ್‍ಚಂಡ್ ಇರಿ.

¹⁸ನಿಂಗ ಎಲ್ಲಾ ಸಮಯತ್‍ಲು, ಎಲ್ಲಾ ತರತ್‍ರ ಪ್ರಾರ್ಥನೆರ ಮೂಲಕ ಪಿಂಞ ಬೋಡಿಕೆರ ಮೂಲಕ ಎಚ್ಚರ ಎಡ್‍ತಂಡ್, ದುಂಬ ಸ್ತಿರವಾಯಿತ್ ಎಲ್ಲಾ ದೇವಡ ಮಕ್ಕಕಾಯಿತ್ ಪ್ರಾರ್ಥನೆ ಮಾಡಿಯಂಡೇ ಇರಿ.

¹⁹ದೇವಡ ನಲ್ಲ ಸುದ್ದಿಕಾಯಿತ್ ಕೈದಿಯಾಯಿತ್ ಉಳ್ಳ ರಾಯಬಾರಿಯಾನ ನಾನ್, ಅದ್‍ನ ಎನ್ನನೆ ಎಣ್ಣಂಡುವೊ ಅನ್ನನೆ ಅದ್‍ನ ದೈರ್ಯವಾಯಿತ್ ಎಣ್ಣ್‌ವಕು,

²⁰ದೇವಡ ನಲ್ಲ ಸುದ್ದಿರ ಗುಟ್ಟ್‌ನ ಎಣ್ಣುವಕ್ ಸರಿಯಾನ ಬಾಕ್ ನಾಕ್ ಕ್‍ಟ್ಟ್‌ವಕಾಯಿತ್‌ ಪ್ರಾರ್ಥನೆ ಮಾಡಿ.

²¹ನಾನ್ ಎನ್ನನೆ ಉಂಡ್‍ೕಂದು, ನಾನ ಎಂತ ಮಾಡಿಯಂಡುಳ್ಳ್‌ಂದು, ನಂಗಡ ಪ್ರೀತಿರ ತಮ್ಮಣನು ಒಡೆಯಂಡಲ್ಲಿ ನಂಬಿಕಸ್ತನು ಆಯಿತುಳ್ಳ ಸೇವಕನಾನ ತುಖಿಕ ನಿಂಗಕ್ ಚಾಯಿತೆ ಎಣ್ಣಿ ತಪ್ಪ.

²²ನಿಂಗ ನಂಗಡ ವಿಷಯತ್‍ನ ಗೊತ್ತಾಪಕು, ನಿಂಗಡ ಹೃದಯಕ್ ಸಮಾದಾನ ಕ್‍ಟ್ಟ್‌ವಕಾಯಿತ್‌ ಅಂವೊನ ನಾನ್ ಅಯಿಚಿಯೆ.

²³ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ಅಣ್ಣತಮ್ಮಣಂಗಕ್ ಸಮಾದಾನ ಪಿಂಞ ನಂಬಿಕೇರ ಕೂಡೆ ಪ್ರೀತಿಯು ಕ್‍ಟ್ಟಡ್.

²⁴ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೇಲೆ ಕಾಲಕಾಲಕು ಪಾಳಾಕತ ಪ್ರೀತಿ ಮಾಡ್‌ವ ಎಲ್ಲಾಡ ಕೂಡೆ ಕೃಪೆ ಇಕ್ಕಡ್. ಆಮೆನ್.