Read Kodava ಕೊಲೊಸ್ಸೆ 3 Bible Online

ಕೊಲೊಸ್ಸೆ 3 - Kodava bible

ಕೊಲೊಸ್ಸೆ 3

¹ಆನಗುಂಡ್, ಕ್ರಿಸ್ತಂಡ ಕೂಡೆ ಆತ್ಮೀಯವಾಯಿತ್ ಜೀವತ್‍ಲ್ ಎದ್ದಿತ್ ಉಂಡೇಂಗಿ, ಕ್ರಿಸ್ತ, ದೇವಡ ಬಲ್‌ತೆ ಬರಿಲ್ ಅಳ್‌ತಂಡುಳ್ಳ ಜಾಗತ್‍ಲ್ ಉಳ್ಳ ಪರಲೋಕತ್‍ರ ವಿಷಯತ್‍ನ ತ್‍ೕಡಂಡು.

²ಈ ಬೂಲೋಕತ್‌ರ ವಿಷಯಕಾಯಿತ್ ಮನಸ್ಸ್ ಬೆಕ್ಕತೆ, ಪರಲೋಕತ್‍ಲ್ ಉಳ್ಳ ವಿಷಯಕಾಯಿತೇ ನಿಂಗಡ ಮನಸ್ಸ್‌ನ ಬೆಕ್ಕಂಡು.

³ಎನ್ನಂಗೆಣ್ಣ್‌ಚೇಂಗಿ, ನಿಂಗ ಈ ಬದ್‍ಕ್‍ಕ್ ಚತ್ತ್ ಪೋಯಿತುಳ್ಳಿರ, ನಿಂಗಡ ನೇರಾನ ಜೀವ ಕ್ರಿಸ್ತಂಡ ಕೂಡೆ ದೇವಡಲ್ಲಿ ಒಳ್‌ಪ್‌ಚಿಟ್ಟಿತ್ ಉಂಡ್.

⁴ನಿಂಗಡ ನೇರಾನ ಜೀವವಾಯಿತುಳ್ಳ ಕ್ರಿಸ್ತ, ಅಂವೊ ಪುನಃ ಬಪ್ಪಕ, ನಿಂಗಳು ಸಹ ಅಂವೊಂಡ ಮಹಿಮೆಲ್ ಬಪ್ಪಿರ.

⁵ಆನಗುಂಡ್, ಲೈಂಗಿಕ ಪಾಪ, ಪವಿತ್ರಯಿಲ್ಲತ ವಿಷಯ, ಇಚ್ಛೆ, ಕೆಟ್ಟ ಆಸೆ, ದುಷ್ಟತನ, ಅತಿ ಆಸೆಯಾಯಿತುಳ್ಳ ವಿಗ್ರಹ ಆರಾದನೆ, ಈ ಲೋಕತ್‍ರ ಗುಣವಾಯಿತುಳ್ಳ ಇದೆಲ್ಲಾ ನಿಂಗಡಿಂಜ ಪಾಳ್ ಆಪನೆಕೆ ಬುಡ್‍ವಿರ.

⁶ಇದ್‍ನೆಲ್ಲಾ ಮಾಡ್‌ವಯಿಂಗಡ ಮೇಲೆ ದೇವಡ ಬಲ್ಯ ಚೆಡಿ ಬಪ್ಪ.

⁷ಪಂಡ್ ನಿಂಗ ಇನ್ನನೆ ಬದ್‍ಕಿಯಂಡ್ ಇಪ್ಪಕ, ನಿಂಗಳು ಸಹ ಈ ಬಟ್ಟೇಲ್ ನಡ್‌ಂದಂಡಿಂಜಿರ.

⁸ಆಚೇಂಗಿ, ಇಕ್ಕ ನಿಂಗ ಇದ್‍ನೆಲ್ಲಾ ಬುಡಂಡು. ಅದಲ್ಲತೆ, ಚೆಡಿ, ಬಲ್ಯ ಚೆಡಿ, ಕೆಟ್ಟದ್ ಪರಿಯುವ ಗುಣ, ನಿಂಗಡ ಬಾಯಿಂಜ ಬಪ್ಪ ಅಶುದ್ದ ತಕ್ಕ್, ಇದ್‍ನೆಲ್ಲಾ ಬುಡಂಡು.

⁹ನಿಂಗ ಒಬ್ಬಂಡ ಪಕ್ಕ ಒಬ್ಬ ಪೊಟ್ಟ್ ಪರಿಯತೆ ಇರಿ. ಎನ್ನಂಗೆಣ್ಣ್‌ಚೇಂಗಿ, ನಿಂಗ ನಿಂಗಡ ಪಳೆಯ ಮನುಷ್ಯಂಡ ಗುಣತ್‍ನ ಪಿಂಞ ಅಂವೊ ಮಾಡಿಯಂಡಿಂಜ ಕ್ರಿಯೇನೆಲ್ಲ ಕಳೆಂದಿತ್ ಉಳ್ಳಿರ.

¹⁰ಇಕ್ಕ ನಿಂಗ, ಒರ್ ಪುದಿಯ ಮನುಷ್ಯಂಡ ಗುಣತ್‍ನ ಇಟ್ಟಿತುಳ್ಳಿರ. ನಿಂಗಡಲ್ಲಿ ಈ ಪುದಿಯ ಮನುಷ್ಯನ ಸೃಷ್ಟಿ ಮಾಡ್‍ನ ದೇವ, ನಿಂಗ ಕ್ರಿಸ್ತನ ಪೂರ್ತಿಯಾಯಿತ್ ಅರಿಯಂಡೂಂದ್ ನಿಂಗಳ ಪುದಿಯದಾಯಿತ್ ಬದ್‍ಲ್ ಮಾಡಿಯಂಡ್ ಉಂಡ್.

¹¹ಇದ್‍ಲ್ ಯೆಹೂದ್ಯಂಗಲ್ಲತಯಿಂಗಾಂದ್, ಯೆಹೂದ್ಯಂಗಾಂದ್, ಸುನ್ನತಿ ಮಾಡ್‌ನಯಿಂಗಾಂದ್, ಸುನ್ನತಿ ಮಾಡತಯಿಂಗಾಂದ್, ಚಾಯಿ ಇಪ್ಪಕ್ ಗೊತ್ತುಳ್ಳಯಿಂಗಾಂದ್, ಚಾಯಿ ಇಪ್ಪಕ್ ಗೊತ್ತ್‌ಲ್ಲತಯಿಂಗಾಂದ್, ಅಡಿಯಾಳ್‍ೕಂದ್, ಅಡಿಯಾಳ್ ಅಲ್ಲತಯಿಂಗಾಂದ್, ಇದ್‍ನೆಲ್ಲಾ ದೇವ ನೋಟಿಯಂಡ್ ಇಲ್ಲೆ; ಕ್ರಿಸ್ತನೇ ಎಲ್ಲಾಡ ಒಳ್‍ಲ್ ಎಲ್ಲಾವಾಯಿತ್ ಉಂಡ್.

¹²ಆನಗುಂಡ್ ನಿಂಗ, ದೇವ ಗೊತ್ತ್ ಮಾಡ್‍ನ ಅಂವೊಂಡ ಮಕ್ಕಳಾಯಿತ್ ಪಿಂಞ ಅಂವೊ ಪ್ರೀತಿ ಮಾಡ್‌ವಯಿಂಗಳಾಯಿತ್ ಉಳ್ಳಾಂಗ್, ನಿಂಗ ಕರುಣೆ, ದಯೆ, ತಾಳ್ಮೆ, ಶಾಂತ ಗುಣ ಪಿಂಞ ಪೊರುಮೆ ಎಣ್ಣುವ ಗುಣತ್‍ನೆಲ್ಲ ನಿಂಗ ಇಟ್ಟೊಳಿ.

¹³ನಿಂಗ ಒಬ್ಬೊಬ್ಬನ ಸಹಿಸಿಯಂಡ್, ಒಬ್ಬಂಡ ಮೇಲೆ ಒಬ್ಬಂಗ್ ಉಳ್ಳ ಪುಕಾರ್‍ನ, ಕ್ರಿಸ್ತ ನಿಂಗಡ ಪಾಪತ್‍ನ ಮನ್ನಿಚಿಟ್ಟನೆಕೆ ನಿಂಗ ಒಬ್ಬೊಬ್ಬನ ಮನ್ನಿಚಿಡಂಡು.

¹⁴ಎಲ್ಲಾಕಿಂಜ ಬಲ್ಯದಾಯಿತ್, ಎಲ್ಲಾನ ಒಂದಾಯಿತ್ ಪೂರ್ತಿ ಐಕ್ಯತ್‍ಲ್ ಪುಡ್‌ಚಿತ್ ಬೆಪ್ಪ ಗುಣವಾಯಿತುಳ್ಳ ಪ್ರೀತಿನ ನಿಂಗಡ ಮೇಲೆ ಒರ್ ಬಟ್ಟೇರನೆಕೆ ಇಟ್ಟೊಳಿ.

¹⁵ಕ್ರಿಸ್ತಂಡ ಸಮಾದಾನ ನಿಂಗಡ ಹೃದಯತ್‍ನ ಆಳ್ವಿಕೆ ಮಾಡಡ್. ಸಮಾದಾನತ್‍ಲ್ ಇಪ್ಪಕಾಯಿತೇ ಒರೇ ತಡಿಯಾಯಿತ್ ದೇವ ನಿಂಗಳ ಕಾಕ್‍ಚಿ. ಆನಗುಂಡ್ ದೇವಕ್ ವಂದನೆ ಮಾಡ್‌ವಯಿಂಗಳಾಯಿತ್ ಸಹ ಇರಂಡು.

¹⁶ಕ್ರಿಸ್ತಂಡ ವಾಕ್ಯ, ನಿಂಗಡ ಹೃದಯತ್‍ಲ್ ಪೂರ್ತಿಯಾಯಿತ್ ಇರಡ್. ನಿಂಗ ಎಲ್ಲಾ ಜ್ಞಾನತ್‍ಲ್ ಒಬ್ಬಂಗ್ ಒಬ್ಬ ಬೋದನೆ ಮಾಡಿತ್ ಬುದ್ದಿ ಎಣ್ಣಿಯಂಡ್ ಇರಿ. ಕೀರ್ತನೆ ಪಾಡಿಯಂಡ್, ದೇವಡ ಪಾಟ್ ಪಾಡಿಯಂಡ್, ಆತ್ಮೀಯ ಪಾಟ್ ಪಾಡಿಯಂಡ್ ನಿಂಗಡ ಹೃದಯತ್‍ಲ್ ದೇವನ ತುದಿಚಂಡ್ ಇರಿ.

¹⁷ತಕ್ಕ್ ಪರಿವದಾಡ್, ಕೆಲಸ ಮಾಡ್‌ವದಾಡ್, ನಿಂಗ ಎಂತ ಮಾಡ್‍ಚೇಂಗಿಯು, ಅದ್‍ನೆಲ್ಲಾ ಒಡೆಯನಾನ ಯೇಸುರ ಪೆದತ್‍ಲ್ ಮಾಡಿಯಂಡ್, ಅಂವೊಂಡ ಮೂಲಕ ಅಪ್ಪನಾನ ದೇವಕ್ ವಂದನೆ ಎಣ್ಣಿಯಂಡಿರಿ.

¹⁸ಪೊಣ್ಣಾಳುವಳೇ! ಒಡೆಯಂಗ್ ಯೋಗ್ಯವಾಯಿತ್ ನಡ್‍ಪನೆಕೆ ನಿಂಗ ನಿಂಗಡ ವಡಿಯಂಗಕ್ ತಗ್ಗಿತ್ ನಡ್‌ಕಂಡು.

¹⁹ವಡಿಯಂಗಳೇ, ನಿಂಗ ನಿಂಗಡ ಪೊಣ್ಣಾಳುವಳ ಪ್ರೀತಿ ಮಾಡಂಡು, ಅಯಿಂಗಡ ಮೇಲೆ ಕಯಿಪ್‌ಲ್ ಇಪ್ಪಕ್ಕಾಗ.

²⁰ಮಕ್ಕಳೇ, ನಿಂಗ ಎಲ್ಲಾ ವಿಷಯತ್‍ಲು ನಿಂಗಡ ಅಪ್ಪವ್ವಂಗಕ್ ತಗ್ಗಿತ್ ನಡ್‌ಕಂಡು. ಇನ್ನನೆ ಮಾಡ್‍ಚೇಂಗಿ, ದೇವ ದುಂಬ ಕುಶಿ ಪಡುವ.

²¹ಅಪ್ಪಂಗಳೇ, ನಿಂಗಡ ಮಕ್ಕ ನಿಂಗಡ ಮೇಲೆ ಕಡ್‍ಪ ಆಕತನೆಕೆ ಮಾಡತಿ, ಅಯಿಂಗ ನಲ್ಲದ್ ಮಾಡಂಡೂಂದ್ ಉಳ್ಳ ಮನಸ್ಸ್‌ನ ಬುಟ್ಟ್‌ರ್‌ವ.

²²ಅಡಿಯಾಳ್‌ವಳೇ, ಈ ಲೋಕತ್‍ಲ್ ಉಳ್ಳ ನಿಂಗಡ ಎಜಮಾನಂಗ್ ಎಲ್ಲಾ ವಿಷಯತ್‍ಲು ತಗ್ಗಿತ್ ನಡ್‌ಕಂಡು. ಅಯಿಂಗಡ ದಯೆ ಕ್‍ಟ್ಟುವಕಾಯಿತ್, ಅಯಿಂಗ ನಿಂಗಳ ನೋಟಿಯಂಡಿಪ್ಪ ಸಮಯತ್‍ಲ್ ಮಾತ್ರ ಕೆಲಸ ಮಾಡತೆ, ಒಡೆಯಂಡ ಬಕ್ತಿ ಉಳ್ಳಯಿಂಗಳಾಯಿತ್, ಕಪಟ ಇಲ್ಲತ ಮನಸ್ಸ್‌ಲ್ ಕೆಲಸ ಮಾಡಂಡು.

²³ನಿಂಗ ಎಂತ ಮಾಡ್‍ಚೇಂಗಿಯು, ಅದ್‍ನ ಮನುಷ್ಯಂಗಕಾಯಿತ್ ಮಾಡ್‌ವನೆಕೆ ಮಾಡತೆ, ಪೂರ್ತಿ ಹೃದಯತ್‍ಲ್ ದೇವಕ್ ಮಾಡ್‌ವನೆಕೆ ಮಾಡಂಡು.

²⁴ಎನ್ನಂಗೆಣ್ಣ್‌ಚೇಂಗಿ, ನಿಂಗಕ್ ಒಡೆಯಂಡಿಂಜ ಕ್‍ಟ್ಟುವ ಇನಾಮ್‍ಕ್ ಬಾದ್ಯತೆ ಉಳ್ಳಯಿಂಗಾಂದ್ ಗೊತ್ತುಳ್ಳಗುಂಡ್, ನಿಂಗಡ ಒಡೆಯನಾಯಿತುಳ್ಳ ಕ್ರಿಸ್ತಂಗ್ ಸೇವೆ ಮಾಡಿ.

²⁵ಆಚೇಂಗಿ, ನಿಂಗ ಅನ್ಯಾಯ ಮಾಡ್‍ಚೇಂಗಿ, ನಿಂಗ ಮಾಡ್‍ನ ಅನ್ಯಾಯಕ್ ತಕ್ಕಂತ ಫಲ ಕ್‍ಟ್ಟುವ, ಎನ್ನಂಗೆಣ್ಣ್‌ಚೇಂಗಿ, ದೇವ ದಾರ್‌ಕು ಪಕ್ಷಪಾತ ಮಾಡುಲೆ.