Read Kodava ಕೊಲೊಸ್ಸೆ 4 Bible Online

ಕೊಲೊಸ್ಸೆ 4 - Kodava bible

ಕೊಲೊಸ್ಸೆ 4

¹ಎಜಮಾನಂಗಳೇ, ನಿಂಗಕ್ ಸಹ ಪರಲೋಕತ್‍ಲ್ ಎಜಮಾನ ಉಂಡ್‍ೕಂದ್ ಗೇನ ಮಾಡಿತ್, ನಿಂಗಡ ಆಳುವಳ ಚಾಯಿತೆ ನೋಟಿಯಂಡ್, ನೀತಿಲ್ ಪಿಂಞ ಏದ್ ನಲ್ಲದೋ ಅದ್‍ನ ಅಯಿಂಗಕ್ ಮಾಡಿ.

²ಎಡೆಬುಡತೆ ಪ್ರಾರ್ಥನೆ ಮಾಡಿಯಂಡ್ ಇರಿ, ಪ್ರಾರ್ಥನೆ ಮಾಡ್‌ವಕ, ದೇವನ ತುದಿಚಂಡ್ ಎಚ್ಚರತ್‍ಲ್ ಇರಿ.

³ನಂಗ ಕ್ರಿಸ್ತಂಡ ಗುಟ್ಟ್‌ನ ಅರಿಚಿಡ್‍ವಕಾಯಿತ್ ದೇವ ಪಡಿ ತೊರ್‌ಕಂಡೂಂದ್ ನಂಗಕ್ ಸಹ ಪ್ರಾರ್ಥನೆ ಮಾಡಿ. ಅದ್‍ನ ಎಣ್ಣ್‌ನ ಕಾರಣಕಾಯಿತೇ ಇಕ್ಕ ನಾನ್ ಕೈದಿಯಾಯಿತ್ ಜೈಲ್‍ಲ್ ಉಳ್ಳ.

⁴ನಾನ್ ಅದ್‍ನ ಎನ್ನನೆ ಎಣ್ಣಂಡುವೊ ಅನ್ನನೆ ಚಾಯಿತೆ ಅರಿಚಿಡಂಡೂಂದ್ ಪ್ರಾರ್ಥನೆ ಮಾಡಿ.

⁵ಸಬೇಕ್ ಪೊರಮೆ ಉಳ್ಳಯಿಂಗಡ ಮಿಂಞತ್ ಜ್ಞಾನತ್‍ಲ್ ನಡ್‌ಂದಿತ್, ಎಚ್ಚರತ್‍ಲ್ ಇರಿ. ನಿಂಗಕ್ ಕ್‍ಟ್ಟುವ ಸಮಯತ್‍ನ ಪ್ರಯೋಜನ ಮಾಡಿಯೊಳಿ.

⁶ನಿಂಗಡ ತಕ್ಕ್‌ನ ಚಾಯಿತೆ ಕ್‍ೕಪಯಿಂಗಕ್ ಇಂಞು ಕ್‍ೕಕಂಡೂಂದ್ ಇಪ್ಪನೆಕೆ ತಕ್ಕ್ ಪರಿ. ಪ್ರತಿ ಒಬ್ಬಂಗು ಎನ್ನನೆ ಉತ್ತರ ಕೊಡ್‍ಕಂಡೂಂದ್ ನಿಂಗಕ್ ಗೊತ್ತಿರಡ್.

⁷ಪ್ರೀತಿರ ತಮ್ಮಣ ತುಖಿಕ, ನಿಂಗಕ್ ನಾಡ ವಿಷಯತ್‌ನೆಲ್ಲ ಎಣ್ಣಿ ತಪ್ಪ. ಅಂವೊ ನಂಬಿಕಸ್ತನಾನ ಸೇವಕನು, ನಂಗಡ ಕೂಡೆ ಒಡೆಯಂಡ ಸೇವೆ ಮಾಡ್‍ವಂವೊನಾಯಿತು ಉಂಡ್.

⁸ನಂಗ ಎನ್ನನೆ ಉಂಡ್‍ೕಂದ್ ಎಣ್ಣಿತ್, ನಿಂಗಡ ಹೃದಯಕ್ ಪುರ್‌ಡ್ ಕೊಡ್‍ಪಕಾಯಿತೇ ನಾನ್ ಅಂವೊನ ನಿಂಗಡ ಪಕ್ಕ ಅಯಿಚಂಡುಳ್ಳ.

⁹ನಿಂಗಡಲ್ಲಿ ಒಬ್ಬನಾಯಿತು, ನಂಬಿಕಸ್ತನಾಯಿತು ಉಳ್ಳ ಪ್ರೀತಿರ ತಮ್ಮಣನಾನ ಒನೇಸಿಮನ ಸಹ ನಿಂಗಡ ಪಕ್ಕ ಅಯಿಚಂಡುಳ್ಳ. ಅಯಿಂಗ ಇಲ್ಲಿ ನಡ್ಂದಂಡುಳ್ಳಾನೆಲ್ಲ ನಿಂಗಕ್ ಎಣ್ಣುವ.

¹⁰ನಾಡ ಕೂಡೆ ಜೈಲ್‍ಲ್ ಉಳ್ಳ ಅರಿಸ್ತಾರ್ಕ ಪಿಂಞ ಬಾರ್ನಬಂಡ ಅಕ್ಕಂಡ ಮೋಂವೊನಾನ ಮಾರ್ಕ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. (ಮಾರ್ಕಂಡ ವಿಷಯತ್ ನಿಂಗಕ್ ಮಿಂಞಲೇ ಅಪ್ಪಣೆ ಕ್‍ಟ್ಟಿತುಂಡ್; ಅಂವೊ ಬಪ್ಪಕ, ನಿಂಗ ಅಂವೊನ ಸತ್ಕಾರ ಮಾಡಂಡು).

¹¹ಯೇಸೂಂದ್ ಪೆದ ಉಳ್ಳ ಯೂಸ್ತ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಯೆಹೂದ್ಯಂಗಡಡೆ‍ಲ್ ಈಂಗ ಮಾತ್ರ ನಾಡ ಕೂಡೆ ದೇವಡ ರಾಜ್ಯತ್‍ರ ಸೇವೇನ ಮಾಡಿಯಂಡ್, ನಾಕ್ ದುಂಬ ಒತ್ತಾಸೆ ತಂದಂಡುಂಡ್.

¹²ಕ್ರಿಸ್ತ ಯೇಸುರ ಸೇವಕನು, ನಿಂಗಡ ಪಟ್ಟಣಕ್ ಕೂಡ್‍ನಂವೊನಾನ ಎಪಫ್ರ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಅಂವೊ ನಿಂಗಕಾಯಿತ್ ಎಕ್ಕಾಲು ದೇವಡ ಪಕ್ಕ ನೇರಾಯಿತು ಪ್ರಾರ್ಥನೆ ಮಾಡಿಯಂಡುಂಡ್. ದೇವ ನಿಂಗಳ ಬಲ ಉಳ್ಳಯಿಂಗಳಾಯಿತ್ ಮಾಡಂಡೂಂದು, ನಿಂಗ ಏದ್ ತಪ್ಪಿಲ್ಲತಯಿಂಗಳಾಯಿತು, ನಿಂಗಕ್ ದೇವಡ ಚಿತ್ತ ಪೂರ್ತಿ ಗೊತ್ತಾಂಡೂಂದೂ ಅಂವೊ ಪ್ರಾರ್ಥನೆ ಮಾಡಿಯಂಡುಂಡ್.

¹³ಅಂವೊ ನಿಂಗಕಾಯಿತ್, ಲವೊದಿಕೆಯ ಪಟ್ಟಣತ್‍ಲ್ ಉಳ್ಳಯಿಂಗಕಾಯಿತ್ ಪಿಂಞ ಹಿರಿಯಾಪೊಲಿ ಪಟ್ಟಣತ್‍ಲ್ ಉಳ್ಳಯಿಂಗಕಾಯಿತ್ ದುಂಬ ಕಠಿಣವಾಯಿತ್ ಕೆಲಸ ಮಾಡಿಯಂಡ್ ಉಂಡ್‍ೕಂದ್ ನಾನ್ ದೈರ್ಯವಾಯಿತ್ ಸಾಕ್ಷಿ ಎಣ್ಣ್‌ವಕ್ ಕಯ್ಯು.

¹⁴ನಂಗಡ ಪ್ರೀತಿರ ವೈದ್ಯ ಲೂಕ ಎಣ್ಣ್‌ವಂವೊನು, ದೇಮ ಎಣ್ಣ್‌ವಂವೊನು ನಿಂಗಕ್ ವಂದನೆ ಎಣ್ಣಿಯಂಡುಂಡ್.

¹⁵ಲವೊದಿಕೀಲ್ ಉಳ್ಳ ಯೇಸುನ ನಂಬ್‍ನ ಅಣ್ಣತಮ್ಮಣಂಗಕು, ನುಂಫ[1] ಎಣ್ಣುವಂವೊಂಗು ಅಂವೊಂಡ ಮನೆಲ್ ಕೂಡಿ ಬಪ್ಪ ಸಬೆರ ಜನಕು ನಾಡ ವಂದನೆನ ಎಣ್ಣ್.

¹⁶ನಾಡ ಈ ಕಾಗದತ್‍ನ ನಿಂಗಡ ಮದ್ಯತ್‍ಲ್ ಓದ್‌ನ ಪಿಂಞ, ಲವೋದಿಕೆ ಸಬೇಲ್ ಸಹ ಇದ್‍ನ ಓದ್‌ವನೆಕೆ ಮಾಡಿ. ನಾನ್ ಅಯಿಂಗಕ್ ಅಯಿಚ ಕಾಗದತ್‍ನ ನಿಂಗಳು ಓದಿ ನೋಟಿ.

¹⁷ಅರ್ಖಿಪ್ಪನ ನೋಟಿತ್, ಒಡೆಯ ಅಂವೊಂಗ್ ಒಪ್ಪ್‌ಚಿಟ್ಟ ಸೇವೇನ ಪೂರ್ತಿ ಮಾಡ್‌ವಕ್ ಎಚ್ಚರತ್‍ಲ್ ಇರಂಡೂಂದ್ ಎಣ್ಣಿ ಕೊಡಿ.

¹⁸ಪೌಲನಾನ ನಾನ್, ನಾಡ ಕೈಯಿಂಜಲೇ ಒಳ್‍ದಿತ್ ನಿಂಗಕ್ ಈ ವಂದನೆ ಎಣ್ಣ್‌ವಿ. ನಾನ್ ಸೆರಮನೇಲ್ ಕೈದಿಯಾಯಿತ್ ಕೆಟ್ಟ್‌ಲ್ ಇಪ್ಪದ್‍ನ ಗೇನ ಬೆಚ್ಚೊಳಿ. ಕೃಪೆ ನಿಂಗಡ ಕೂಡೆ ಇರಡ್.