Read Kodava 1 ಥೆಸಲೊನೀಕ 4 Bible Online

1 ಥೆಸಲೊನೀಕ 4 - Kodava bible

1 ಥೆಸಲೊನೀಕ 4

¹ನಂಗಡ ಅಣ್ಣತಮ್ಮಣಂಗಳೇ, ಆಕೀರಾಯಿತ್ ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದೇವನ ಕುಶಿಪಡ್‌ತ್‌ವಕಾಯಿತ್ ನಿಂಗ ಎನ್ನನೆಯೆಲ್ಲಾ ಬದ್‍ಕಂಡೂಂದ್ ನಂಗ ಎಣ್ಣಿತಂದದ್‍ನ ನಿಂಗ ಸ್ವೀಕಾರ ಮಾಡ್‍ನನೆಕೆ, ಇಂಞು ಅದ್‍ಲ್ ದುಂಬ ಬೊಳಿಯುವಕ್ ಒಡೆಯನಾನ ಯೇಸುರಗುಂಡ್ ನಿಂಗಳ ಬೋಡಿತ್, ನಿಂಗಕ್ ಬುದ್ದಿ ಎಣ್ಣಿಯಂಡ್ ಉಂಡ್.

²ಒಡೆಯನಾನ ಯೇಸುರಗುಂಡ್ ನಂಗಕ್ ಕ್‍ಟ್ಟ್‌ನ ಆಜ್ಞೆರನೆಕೆ, ನಿಂಗಕ್ ನಂಗ ಮಾಡ್‍ನ ಆಜ್ಞೆನ ನಿಂಗ ಗೇನ ಬೆಚ್ಚಿತುಳ್ಳಿರ.

³ನಿಂಗ ಪವಿತ್ರವಾನಯಿಂಗಳಾಯಿತ್ ಬದ್‍ಕಂಡೂಂದ್ ಉಳ್ಳದೇ ದೇವಡ ಚಿತ್ತ. ಆನಗುಂಡ್ ನಿಂಗ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡು.

⁴ನಿಂಗ, ಅಯಿಂಗಯಿಂಗಡ ಪೊಣ್ಣ್‌ರ ಕೂಡೆ[1], ವಡಿಯಂಡ ಕೂಡೆ ಪವಿತ್ರವಾಯಿತ್, ದಾರೂ ತಪ್ಪ್ ಕಂಡ್‍ಪುಡಿಕತನೆಕೆ ಮರ್ಯಾದೆಲ್ ಬದ್‍ಕಂಡು.

⁵ದೇವನ ನಂಬತಯಿಂಗ ಪಿಂಞ ಗೊತ್ತಿಲ್ಲತಯಿಂಗ ಬದ್‍ಕ್‍ವನೆಕೆ, ಮೋಹತ್‍ಲ್ ಬದ್‍ಕವಕ್ಕಾಗ.

⁶ಈ ವಿಷಯತ್‍ಲ್ ಯೇಸುನ ನಂಬ್‍ನ ನಿಂಗಡ ಅಣ್ಣತಮ್ಮಣಂಗಳ ವಂಚನೆ ಮಾಡ್‌ವಕ್ಕಾಗ; ಮಿಂಞಲೇ ನಂಗ ನಿಂಗಕ್ ಎಣ್ಣಿತ್ ಸಾಕ್ಷಿಯಾಯಿತ್ ಎಚ್ಚರ ಮಾಡ್‍ನನೆಕೆ, ಇನ್ನನೆ ಮಾಡ್‌ವಯಿಂಗಕ್ ದೇವ ಕಂಡಿತವಾಯಿತ್ ಶಿಕ್ಷೆ ತಪ್ಪ.

⁷ಈ ತರ ಪವಿತ್ರ ಇಲ್ಲತ ಕೆಲಸ ಮಾಡ್‌ವಕ್ ದೇವ ನಂಗಳ ಕಾಕಿತ್‌ಲ್ಲೆ, ದೇವ ನಂಗಳ ಪವಿತ್ರವಾಯಿತ್ ಪಾಪ ಇಲ್ಲತೆ ಬದ್‍ಕಂಡೂಂದ್ ಕಾಕಿತುಂಡ್.

⁸ಆನಗುಂಡ್, ಈ ಬೋದನೆನ ದಾರೇಂಗಿ ಅಲ್ಲಗೆಳೆದ್‌ಚೇಂಗಿ, ಅಯಿಂಗ ಮನುಷ್ಯನ ಅಲ್ಲ, ನಂಗಕ್ ಪವಿತ್ರಾತ್ಮತ್‍ನ ತಂದ ದೇವನ ಅಲ್ಲಗೆಳ್ಂದನೆಕೆ ಆಪ.

⁹ಯೇಸುನ ನಂಬ್‍ನಯಿಂಗಳ ಪ್ರೀತಿ ಮಾಡ್‌ವ ವಿಷಯತ್‍ನ ನಾನ್ ನಿಂಗಕ್ ಒಳ್‍ದ್‍ವಕ್ ಅವಸ್ಯ ಇಲ್ಲೆ; ಎಲ್ಲಾರು ಒಬ್ಬೊಬ್ಬನ ಎನ್ನನೆ ಪ್ರೀತಿ ಮಾಡಂಡೂಂದ್ ದೇವ ನಿಂಗಕೇ ಪಡಿಪ್‌ಚಿಟ್ಟಿತಲ್ಲ.

¹⁰ಅನ್ನನೆ ಮಕೆದೋನ್ಯ ನಾಡ್‍ಲ್ ಉಳ್ಳ ಯೇಸುನ ನಂಬ್‍ನ ಅಣ್ಣತಮ್ಮಣಂಗಳ ನಿಂಗ ಪ್ರೀತಿ ಮಾಡಿಯಂಡ್ ಉಳ್ಳಿರ. ಆಚೇಂಗಿ, ನಿಂಗ ಇಂಞು ಪ್ರೀತಿಲ್ ಬೊಳಿಯಂಡೂಂದ್ ನಂಗ ನಿಂಗಳ ಬೋಡುವ.

¹¹ಇದ್ ನಿಂಗಡ ನೋಕವಾಯಿತ್ ಇರಂಡು. ನಿಂಗ ಸಮಾದಾನತ್‍ರ ಬದ್‍ಕ್ ಬದ್‍ಕ್‍ವಕ್, ಪೊರಮೆ ಉಳ್ಳಯಿಂಗಡ ಬದ್‍ಕ್‍ರ ವಿಷಯತ್ ನುಗ್ಗ್‌ವಕ್ಕಾಗ. ನಿಂಗ ನಿಂಗಡ ಸ್ವಂತ ಕೆಲಸ ಮಾಡಂಡೂಂದ್ ನಿಂಗಕ್ ನಂಗ ಮಿಂಞಲೇ ಎಣ್ಣಿತುಂಡ್.

¹²ನಿಂಗ ಇನ್ನನೆ ಮಾಡ್‍ಚೇಂಗಿ, ನಿಂಗಡ ಪ್ರತಿ ದಿನ ಬದ್‍ಕ್‍ಲ್ ಚಾಯಿತೆ ಬದ್‍ಕಿಯಂಡ್ ಉಳ್ಳಾನ ಪೊರಮೆ ಉಳ್ಳಯಿಂಗ ಕಾಂಬ, ಪಿಂಞ ಎಲ್ಲಾರು ನಿಂಗಕ್ ಮರ್ಯಾದೆ ತಪ್ಪ. ಅಕ್ಕ ನಿಂಗ ದಾಡ ಮೇಲೆಯು ಬಾರ ಇಟ್ಟಿತ್ ಬದ್‌ಕುವನೆಕೆ ಇಪ್ಪುಲೆ.

¹³ನಂಗಡ ಅಣ್ಣತಮ್ಮಣಂಗಳೇ, ನಂಗಡ ಆಸೆ ಎಂತ ಎಣ್ಣ್‌ಚೇಂಗಿ, ಚತ್ತಯಿಂಗಕಾಯಿತ್, ಯೇಸುನ ನಂಬತಯಿಂಗ ನಂಬಿಕೆ ಇಲ್ಲತೆ ವ್ಯಸನ ಪಡ್‌ವನೆಕೆ, ದೇವಡ ಮೇಲೆ ನಂಬಿಕೆ ಬೆಚ್ಚಿತ್ ಚತ್ತಯಿಂಗಕಾಯಿತ್ ನಿಂಗ ವ್ಯಸನಪಟ್ಟಿತ್, ಅಯಿಂಗಡ ವಿಷಯತ್ ಸತ್ಯ ಎಂತ್‍ೕಂದ್ ಗೊತ್ತಿಲ್ಲತೆ ಇಪ್ಪಕ್ಕಾಗ.

¹⁴ಯೇಸು ಚತ್ತಿತ್, ಪುನಃ ಜೀವವಾಯಿತ್ ಎದ್ದಿತ್ ಬಾತ್‍ೕಂದ್ ನಂಗ ನಂಬಿಯಂಡುಂಡಲ್ಲ? ಅನ್ನನೆ ಯೇಸುನ ನಂಬಿತ್ ದೇವಡ ಮಕ್ಕಳಾಯಿತ್ ಚತ್ತಯಿಂಗಳ, ಯೇಸು ಬಪ್ಪಕಾಪಕ, ಯೇಸುರ ಕೂಡೆ ದೇವ ಕೊಂಡ್ ಬಪ್ಪ.

¹⁵ಒಡೆಯ ನಂಗಕ್ ಪಡಿಪಿಚಿಟ್ಟನೆಕೆ ನಂಗ ನಿಂಗಕ್ ಎಣ್ಣಿಯಂಡುಂಡ್: ಯೇಸು ಬಪ್ಪಕತ್ತನೆ ಬದ್‍ಕಿಯಂಡ್ ಉಳ್ಳ ನಂಗ, ಯೇಸುನ ನಂಬಿತ್ ದೇವಡ ಮಕ್ಕಳಾಯಿತ್ ಚತ್ತ್ ಪೋನಯಿಂಗ, ಅಂವೊ ಬಪ್ಪಕ, ಅಂವೊಂಡ ಕೂಡೆ ಪೋಪಕ್ ಮಿಂಞ ನಂಗ ಅಂವೊಂಡ ಪಕ್ಕ ಪೋಪುಲೆ.

¹⁶ಎನ್ನಂಗೆಣ್ಣ್‌ಚೇಂಗಿ, ಅಕ್ಕ ಒಡೆಯನೇ ಪರಲೋಕತ್ಂಜ ಇಳಿಂಜಿತ್ ಬಪ್ಪ. ಅಕ್ಕ ಅಂವೊ ಬಲ್ಯ ಸ್ವರತ್‍ಲ್ ಹುಕುಮ್ ತಪ್ಪ, ದೇವಡ ಸೈನ್ಯತ್‍ರ ದೂತ ತಕ್ಕ್ ಪರಿಯುವ, ದೇವದೂತ ದೇವಡ ವಾಲಗತ್‌ನ ಊದ್‍ವ. ಆ ವಾಣಿನ ನಂಗ ಕ್‍ೕಪಕ, ಯೇಸುನ ನಂಬಿತ್ ಚತ್ತ್ ಪೋನಯಿಂಗ ಪುನಃ ಜೀವವಾಯಿತ್ ಆದ್ಯ ಎದ್ದಿತ್ ಬಪ್ಪ.

¹⁷ಅದಾನ ಪಿಂಞ ಬದ್‍ಕಿಯಂಡ್ ಉಳ್ಳ ನಂಗಳು, ಅಯಿಂಗಡ ಕೂಡೆ ಒಟ್ಟ್ ಕೂಡಿತ್, ಗಾಳಿಲ್ ಮೋಡತ್‍ಲ್ ಉಳ್ಳ ಒಡೆಯನ ಕಾಂಬಕಾಯಿತ್ ಕೊಡಿಕ್ ಪೋಪ. ಇನ್ನನೆ ನಂಗ ಒಡೆಯಂಡ ಕೂಡೆ ಎಕ್ಕಾಲು ಇಪ್ಪಕಾಪ.

¹⁸ಇದ್ ಸತ್ಯವಾಯಿತ್ ಆಪಗುಂಡ್, ಈ ತಕ್ಕ್‌ನ ನಿಂಗ ಎಲ್ಲಾರ್‌ಕು ಎಣ್ಣಿಯಂಡ್ ಪುರ್‌ಡ್ ಕೊಡ್‌ತಂಡ್ ಇರಿ.