Read Kodava 1 ಥೆಸಲೊನೀಕ 5 Bible Online

1 ಥೆಸಲೊನೀಕ 5 - Kodava bible

1 ಥೆಸಲೊನೀಕ 5

¹ನಂಗಡ ಅಣ್ಣತಮ್ಮಣಂಗಳೇ, ಇದೆಲ್ಲಾ ಎಕ್ಕ ಆಪಾಂದು, ಎನ್ನನೆ ಆಪಾಂದು ನಾನ್ ನಿಂಗಕ್ ಒಳ್‍ದ್‍ವಕ್ ಅವಸ್ಯ ಇಲ್ಲೆ.

²ನಿಂಗಕ್ ಚಾಯಿ ಗೊತ್ತುಳ್ಳನೆಕೆ, ಬಯಿಟ್ ದಾರ್‌ಕು ಗೊತ್ತಿಲ್ಲತ ಸಮಯತ್‍ಲ್ ಕಳ್ಳ ಬಪ್ಪನೆಕೆ ಒಡೆಯಂಡ ದಿವಸ ಬಪ್ಪ.

³ಜನ ಸಮಾದಾನ ಉಂಡ್‍ೕಂದು, ಒರ್ ತೊಂದರೆಯು ಇಲ್ಲೇಂದು ಎಣ್ಣುವಕ, ಒರ್ ಪೊಣ್ಣಾಳ್‌ಕ್ ಪೆರುವ ನೊಂಬಲ ಎನ್ನನೆ ಒಮ್ಮಕೆ ಬಪ್ಪ, ಅನ್ನನೆ ಅಯಿಂಗಡ ಮೇಲೆ ನಾಶ ಬಪ್ಪ; ಅಕ್ಕ ದಾರೂ ತಪ್ಪ್‌ಚಿಡ್‌ವಕ್ ಕಯ್ಯುಲೆ.

⁴ಅಣ್ಣತಮ್ಮಣಂಗಳೇ, ಆ ದಿನ ಒರ್ ಕಳ್ಳ ಬಪ್ಪನೆಕೆ ಬಪ್ಪ. ನಿಂಗ ಬೊಳಿರ ಮಕ್ಕಳಾಯಿತುಳ್ಳಗುಂಡ್ ನಿಂಗಕ್ ಇದ್ ಆಶ್ಚರ್ಯ ಪಡ್‌ವಕುಳ್ಳ ವಿಷಯ ಆಯಿತಿಪ್ಪುಲೆ.

⁵ನಿಂಗೆಲ್ಲಾರು ಬೊಳಿರ ಮಕ್ಕಳಾಯಿತ್, ಪೋಲ್‍ರ ಮಕ್ಕಳಾಯಿತ್ ಉಳ್ಳಿರ; ನಂಗ ಬಯಿಟ್‌ಲ್ ಪಿಂಞ ಇರ್‌ಟ್‌ಲ್ ಬದ್‍ಕ್‍ವಯಿಂಗ ಅಲ್ಲ.

⁶ಆನಗುಂಡ್, ವರಿಯಂಡಿಪ್ಪಯಿಂಗ ಎನ್ನನೆ ಉಂಡೋ ಅನ್ನನೆ ಯೇಸುನ ನಂಬತಯಿಂಗ ಉಳ್ಳಗುಂಡ್, ನಿಂಗ ಅನ್ನನೆ ಇಪ್ಪಕ್ಕಾಗ. ಅದ್ಂಡ ಬದ್‍ಲ್, ಎಂತ ಆಯಂಡುಂಡ್‍ೕಂದ್ ನೋಟಿಯಂಡ್ ಎಚ್ಚರತ್‍ಲ್ ಇರಂಡು.

⁷ವರಿವಯಿಂಗ ಎಲ್ಲಾರು ಬಯಿಟ್ ವರಿವ; ದಾರ್ ಕಳ್ಳ್ ಕುಡಿಪ ಅಯಿಂಗ ಬಯಿಟ್ ಕಳ್ಳ್ ಕುಡಿಪ.

⁸ಆಚೇಂಗಿ, ನಂಗ ಪೋಲ್‍ಕ್ ಕೂಡ್‍ನಯಿಂಗ. ಆನಗುಂಡ್ ಎಚ್ಚರತ್‍ಲ್ ಬದ್‌ಕಿತ್, ಎದೆತಟ್ಟೆರನೆಕೆ ಉಳ್ಳ ನಂಬಿಕೆ ಪಿಂಞ ಪ್ರೀತಿನ ಎದೇಲ್ ಇಟ್ಟಂಡ್, ಇರ್‍ಂಬ್ ತೊಪ್ಪಿರನೆಕೆ ಉಳ್ಳ ರಕ್ಷಣೆರ ನಿರಿಕ್ಷೇನ ಮಂಡೆಕ್ ಇಟ್ಟಂಡ್ ಇರಂಡು.

⁹ದೇವ ಅಂವೊಂಡ ಚೆಡಿರ ತೀರ್ಪ್‌ಕಾಯಿತ್ ನಂಗಳ ನೇಮಿಚಿಟ್ಟಿತ್‌ಲ್ಲೆ. ಅದ್ಂಡ ಬದ್‍ಲ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ನಂಗ ಬಚಾವಾಪಕ್ ನೇಮಿಚಿಟ್ಟತ್.

¹⁰ಯೇಸು ನಂಗಕಾಯಿತ್ ಚತ್ತತ್. ಆನಗುಂಡ್, ಅಂವೊ ಬಪ್ಪಕ ನಂಗ ತಡೀಲ್ ಚತ್ತ್ ಪೋಯಿತ್ಂಜತೇಂಗಿಯು, ಬದ್‍ಕಿಯಂಡಿಂಜತೇಂಗಿಯು ಅಂವೊ ಎಕ್ಕಾಲು ಬದ್‍ಕ್‍ವನೆಕೆ, ನಂಗಳು ಅಂವೊಂಡ ಕೂಡೆ ಎಕ್ಕಾಲು ಬದ್‍ಕ್‌ವಕಾಪ.

¹¹ಅದ್ಂಗಾಯಿತ್, ನಿಂಗ ಇಕ್ಕ ಮಾಡಿಯಂಡಿಪ್ಪನೆಕೆ, ಒಬ್ಬೊಬ್ಬಂಗ್ ಒತ್ತಾಸೆ ಕೊಡಿ. ನಿಂಗ ಅನ್ನನೆ ಮಾಡಿತ್ ಒಬ್ಬೊಬ್ಬಂಗಳ ಬೊಳಿಯುವಕ್ ಸಹಾಯ ಮಾಡಿ.

¹²ನಂಗಡ ಅಣ್ಣತಮ್ಮಣಂಗಳೇ, ಇಂಞು ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ನಿಂಗಕಾಯಿತ್ ಕಷ್ಟಪಟ್ಟಿತ್ ಸೇವೆ ಮಾಡಿಯಂಡ್, ನಿಂಗಳ ಒಡೆಯಂಡಲ್ಲಿಕ್ ನಡ್‍ತಿಯಂಡ್, ನಿಂಗಕ್ ಬೋದನೆ ಮಾಡಿಯಂಡ್ ಉಳ್ಳಯಿಂಗಳ ನಿಂಗ ಗನಪಡ್‍ತಂಡೂಂದ್ ನಂಗ ನಿಂಗಳ ಬೋಡಿಯಂಡುಂಡ್.

¹³ಅಯಿಂಗಡ ಸೇವೆಕಾಯಿತ್ ನಿಂಗ, ಅಯಿಂಗಡ ಮೇಲೆ ಪ್ರೀತಿಲ್ ಬಲ್ಯ ಮರ್ಯಾದೆ ಕೊಡ್‌ತಂಡ್ ಇರಂಡೂಂದ್ ನಂಗ ಬೋಡುವ. ನಿಂಗ ಒಬ್ಬೊಬ್ಬಂಡ ಕೂಡೆಯು ಶಾಂತಿಲ್, ಸಮಾದಾನತ್‍ಲ್ ಇಕ್ಕಂಡು.

¹⁴ನಂಗಡ ಅಣ್ಣತಮ್ಮಣಂಗಳೇ, ಇಂಞು ನಂಗ ನಿಂಗಕ್ ಎಣ್ಣುವ ಆಲೋಚನೆ ಎಂತ ಎಣ್ಣ್‌ಚೇಂಗಿ, ಕೆಲಸ ಮಾಡತ ಇಪ್ಪಯಿಂಗಳ ಎಚ್ಚರ ಮಾಡಿ. ಒತ್ತಾಸೆ ಇಲ್ಲತಯಿಂಗಕ್ ಒತ್ತಾಸೆ ಕೊಡಿ, ಬಲ ಇಲ್ಲತಯಿಂಗಕ್ ಸಹಾಯ ಮಾಡಿ, ಎಲ್ಲಾಡ ಕೂಡೆ ಶಾಂತವಾಯಿತ್ ಇರಿ.

¹⁵ಕೆಟ್ಟದ್ ಮಾಡ್‍ನಯಿಂಗಕ್ ದಾರೂ ಕೆಟ್ಟದ್ ಮಾಡ್‌ವಕ್ ಬುಡತಿ; ನಿಂಗಡ ಮದ್ಯತ್‍ಲ್ ಉಳ್ಳ ಒಬ್ಬೊಬ್ಬಂಗಕು, ಬೋರೆಯಿಂಗಕು ನಲ್ಲದ್ ಮಾಡ್‌ವಕ್ ಪ್ರಯತ್ನ ಪಡಿ.

¹⁶ಎಕ್ಕಾಲು ಕುಶೀಲ್ ಇರಿ.

¹⁷ಎಕ್ಕಾಲು ಪ್ರಾರ್ಥನೆ ಮಾಡಿಯಂಡ್ ಇರಿ.

¹⁸ಎಂತ ನಡ್‌ಂದತೇಂಗಿಯು ದೇವಕ್ ವಂದನೆ ಎಣ್ಣಿಯಂಡ್ ಇರಿ; ಎನ್ನಂಗೆಣ್ಣ್‌ಚೇಂಗಿ, ಇನ್ನನೆ ಮಾಡ್‌ವದೇ ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ರ ಮೂಲಕ, ನಿಂಗಡ ಮೇಲೆ ಉಳ್ಳ ದೇವಡ ಚಿತ್ತವಾಯಿತ್ ಉಂಡ್.

¹⁹ಪವಿತ್ರಾತ್ಮತ್‍ರ ಕ್ರಿಯೇನ ಪುಡ್‌ಚಿತ್ ಬೆಪ್ಪಕ್ಕಾಗ.

²⁰ಪ್ರವಾದನೆನ ಬೋಂಡತದ್‍ೕಂದ್ ಗೇನ ಮಾಡತಿ.

²¹ಆಚೇಂಗಿ, ಎಲ್ಲಾನ ಪರೀಕ್ಷೆ ಮಾಡಿತ್ ದೇವಡಿಂಜ ಬಪ್ಪದ್ ಎಂ‍ತಾಂದ್ ನೋಟಿತ್ ನಲ್ಲದ್‍ನ ಎಡ್‌ತೊಳಿ.

²²ಕೆಟ್ಟದ್‍ನೆಲ್ಲಾ ಬುಟ್ಟಿತ್ ಪೋಯಿ.

²³ಸಮಾದಾನತ್‍ರ ದೇವ ನಿಂಗಳ ಪರಿಪೂರ್ಣವಾಯಿತ್ ಪಿಂಞ ಅಂವೊಂಗಾಯಿತ್ ಬೋರೆ ಮಾಡಿತ್ ಪವಿತ್ರವಾನಯಿಂಗಳಾಯಿತ್ ಮಾಡಡ್. ನಿಂಗಡ ಗೇನ, ನಿಂಗಡ ಆಸೆ ಪಿಂಞ ನಿಂಗ ಮಾಡ್‍ವದ್[2] ನಂಗಡ ಒಡೆಯನಾನ ಯೇಸು ಕ್ರಿಸ್ತ ಬಪ್ಪಕತ್ತನೆ ಒರ್ ತಪ್ಪು ಇಲ್ಲತನೆಕೆ ಇಪ್ಪಕ್ ಅಂವೊ ನಿಂಗಳ ಕಾಪಾಡಡ್.

²⁴ಯೇಸುರ ಮೇಲೆ ನಂಬಿಕೆ ಬೆಪ್ಪಕ್ ನಿಂಗಳ ಕಾಕ್‍ನ ದೇವ ಸತ್ಯವಂತಂವೊ, ಆನಗುಂಡ್ ಅಂವೊ ನಿಂಗಳ ಪವಿತ್ರವಾನಯಿಂಗಳಾಯಿತ್ ಮಾಡ್‌ವ.

²⁵ನಂಗಡ ಅಣ್ಣತಮ್ಮಣಂಗಳೇ, ನಂಗಕಾಯಿತ್ ಪ್ರಾರ್ಥನೆ ಮಾಡಿ.

²⁶ಯೇಸುನ ನಂಬ್‍ನ ಅಣ್ಣತಮ್ಮಣಂಗಕ್ ಪವಿತ್ರವಾನ ಮುತ್ತ್ ಕೊಡ್‌ತಿತ್[3] ಸತ್ಕಾರ ಮಾಡಿ.

²⁷ಯೇಸುನ ನಂಬ್‍ನ ಅಣ್ಣತಮ್ಮಣಂಗಕೆಲ್ಲ ಈ ಕಾಗದತ್‍ನ ನಿಂಗ ಓದಿತ್ ಕಾಟಂಡೂಂದ್ ಒಡೆಯ ನಾಕ್ ತಂದಿತುಳ್ಳ ಅದಿಕಾರತ್‍ಲ್ ಹುಕುಮಾಯಿತ್ ಎಣ್ಣ್‌ವಿ.

²⁸ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ನಿಂಗ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್.