Read Kodava 2 ಥೆಸಲೊನೀಕ 3 Bible Online

2 ಥೆಸಲೊನೀಕ 3 - Kodava bible

2 ಥೆಸಲೊನೀಕ 3

¹ನಂಗಡ ಅಣ್ಣತಮ್ಮಣಂಗಳೇ, ಕಡೇಕ್ ನಾನ್ ಎಣ್ಣುವ ವಿಷಯ ಎಂತ ಎಣ್ಣ್‌ಚೇಂಗಿ: ನಿಂಗಡ ಪಕ್ಕ ನಂಗ ಬಂದಿತ್ ದೇವಡ ನಲ್ಲ ಸುದ್ದಿನ ಎಣ್ಣ್‌ವಕ, ಎನ್ನನೆ ಅದ್‍ನ ಎಲ್ಲಾರು ಬೆರಿಯ ನಂಬಿತ್, ಒಡೆಯಂಡ ವಾಕ್ಯ ಪಬ್ಬಿತ್ ಗನಪಡ್‌ವನೆಕೆ, ಬೋರೆ ಜಾಗತ್‍ಲ್ ಸಹ ಪಬ್ಬಿತ್ ಗನಪಡುವಕಾಯಿತ್ ನಿಂಗ ಪ್ರಾರ್ಥನೆ ಮಾಡಿ.

²ಇಲ್ಲಿ ನಂಗಕ್ ವಿರೋದವಾಯಿತ್ ತೊಂದರೆ ಮಾಡ್‌ವ ಮೋಸವಾನ ಕೆಟ್ಟ ಮನುಷ್ಯಂಗಡ ಕೈಯಿಂಜ ದೇವ ನಂಗಳ ಕಾಪಾಡ್‌ವಕಾಯಿತ್ ಪ್ರಾರ್ಥನೆ ಮಾಡಿ. ಎಲ್ಲಾರು ಸತ್ಯತ್‍ನ ನಂಬಿಯಂಡಿಲ್ಲೆ.

³ಆಚೇಂಗಿ, ನಂಗಡ ದೇವ ಸತ್ಯವಂತಂವೊ, ಆನಗುಂಡ್, ಅಂವೊ ನಿಂಗಳ ಸ್ತಿರಪಡ್‌ತಿತ್, ಮೋಸ ಮಾಡ್‌ವ ಸೈತಾನಂಡ ಕೈಯಿಂಜ ಕಾಪಾಡ್‌ವ.

⁴ನಂಗ ನಿಂಗಕ್ ಬೋದನೆ ಮಾಡ್‍ನನೆಕೆ, ನಿಂಗ ನಂಗಡ ಆಜ್ಞೆನ ಪಾಲ್ ಮಾಡಿಯಂಡ್ ಉಂಡ್, ಇಂಞು ಅನ್ನನೆ ಮಾಡ್‌ವಿರಾಂದ್ ನಂಗಕ್ ನಿಂಗಡ ಮೇಲೆ ನಂಬಿಕೇನ ದೇವ ತಂದಿಯತ್.

⁵ಒಡೆಯನಾನ ದೇವ ನಿಂಗಳ, ದೇವಡ ಪ್ರೀತಿರ ಬಟ್ಟೇಲ್, ಕ್ರಿಸ್ತಂಡ ತಾಳ್ಮೆರ ಬಟ್ಟೇಲ್ ಕಾಕಿಯಂಡ್ ಪೋಡ್.

⁶ನಂಗಡ ಅಣ್ಣತಮ್ಮಣಂಗಳೇ, ಸೋಮಾರಿಯಾಯಿತ್ ಬದ್‍ಕಿಯಂಡ್, ನಂಗ ನಿಂಗಕ್ ಎಣ್ಣ್‌ನ ಪದ್ದತಿರ ಪ್ರಕಾರ ನಡ್‌ಂದಂಡಿಲ್ಲತ ಯೇಸುನ ನಂಬ್‍ನಯಿಂಗಳ ದೂರಮಾಡಿತ್ ಬೆಕ್ಕಂಡೂಂದ್ ಒಡೆಯನಾನ ಯೇಸು ಕ್ರಿಸ್ತ ನಂಗಕ್ ತಂದಿತುಳ್ಳ ಅದಿಕಾರತ್‍ಲ್ ನಂಗ ನಿಂಗಕ್ ಆಜ್ಞೆ ಮಾಡ್‌ವ.

⁷ನಂಗಳ ಉದಾರಣೆಯಾಯಿತ್ ಬೆಚ್ಚಂಡ್ ನಿಂಗ ಎನ್ನನೆ ನಡ್‍ಕಂಡೂಂದ್ ನಿಂಗಕ್ ಗೊತ್ತುಂಡಲ್ಲ! ನಂಗ ನಿಂಗಡ ಪಕ್ಕ ಇಪ್ಪಕ, ಸೋಮಾರಿಯಾಯಿತ್ ಇಂಜಿತ್‌ಲ್ಲೆ.

⁸ನಂಗ ಒಬ್ಬಂಡಿಂಜ ಸಹ ದುಡ್ಡ್ ಕೊಡ್‍ಕತೆ ಉಂಡಿತ್‌ಲ್ಲೆ. ಆಂಡ ಬದ್‍ಲ್ ನಂಗ ಬಯಿಟ್ ಪೋಲ್ ಕಷ್ಟಪಟ್ಟಿತ್, ಕೆಲಸ ಮಾಡಿತ್, ನಂಗ ದಾರ್‌ಕು ಬಾರವಾಯಿತ್ ಇಕ್ಕತನೆಕೆ ಇಂಜತ್.

⁹ನಿಂಗಡ ಮೇಲೆ ಬಾರತ್‍ನ ಬೆಪ್ಪಕ್ ನಂಗಕ್ ಅದಿಕಾರ ಉಂಡ್, ಆಚೇಂಗಿ ನಂಗ ಅನ್ನನೆ ಮಾಡಿತ್‌ಲ್ಲೆ. ನಿಂಗಳು ಇನ್ನನೆ ಮಾಡಂಡೂಂದ್, ನಿಂಗಕ್ ಒರ್ ಉದಾರಣೆಯಾಯಿತ್ ಇಪ್ಪಕ್ ನಂಗ ಅನ್ನನೆ ಮಾಡಿಯೆ.

¹⁰ಒಬ್ಬಂಗ್ ಕೆಲಸ ಮಾಡ್‌ವಕ್ ಮನಸ್ಸ್ ಇಲ್ಲತಪೋಚೇಂಗಿ, ಅಂವೊ ಉಂಬಕ್ಕಾಗಾಂದ್ ನಂಗ ನಿಂಗಡ ಕೂಡೆ ಇಪ್ಪಕ್ ಸಹ ಈ ಕಾನೂನ್‌ನ ಎಣ್ಣಿ ತಂದಿಯೆ.

¹¹ನಿಂಗಡಲ್ಲಿ, ಯೇಸುನ ನಂಬ್‍ನ ಚೆನ್ನ ಜನ, ಒರ್ ಕೆಲಸವು ಮಾಡತೆ, ಕಾಲ ಕಳಂದಂಡ್, ಬೋರೆಯಿಂಗಡ ಕೆಲಸತ್‍ಲ್ ನುಗ್ಗಿಯಂಡ್ ಉಂಡ್‍ೕಂದ್ ನಂಗಡ ಕೆಮಿಕ್ ಸುದ್ದಿ ಬಾತ್.

¹²ಇನ್ನನೆ ಉಳ್ಳಯಿಂಗ, ಎಂತಾಚು ಕೆಲಸ ಮಾಡಿತ್, ಅಯಿಂಗಡ ಸಂಪಾದೆನೆಲ್ ಬದ್‍ಕಂಡೂಂದ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್ ಹುಕುಮ್ ಕೊಡ್‌ತಿತ್ ಬೋಡಿಯಂಡುಂಡ್.

¹³ಅಣ್ಣತಮ್ಮಣಂಗಳೇ, ನಲ್ಲದ್ ಮಾಡ್‌ವದ್‍ಲ್ ತಳ್ಂದ್ ಪೋಕತಿ.

¹⁴ಈ ಕಾಗದತ್‍ಲ್ ಉಳ್ಳ ಬೋದನೆಕ್ ಒಬ್ಬ ತಗ್ಗಿತ್ ನಡ್‍ಕತೆ ಪೋನಕ, ಅಂವೊನ ಎಲ್ಲಾಡ ಮಿಂಞ ಕಂಡ್‍ಪುಡ್‌ಚಿತ್, ಅಂವೊನ ದೂರ ಮಾಡಂಡು. ಅಕ್ಕ ಅಂವೊ ಅನ್ನನೆ ಮಾಡ್‌ನಾಂಗ್ ಅಂವೊಂಗ್ ಞಾಣ ಆಪ.

¹⁵ಆಚೇಂಗಿಯು, ನಿಂಗ ಅಂವೊನ ಒರ್ ವಿರೋದಿರನೆಕೆ ಕಾಂಗತಿ. ಯೇಸುನ ನಂಬ್‍ನ ಅಣ್ಣತಮ್ಮಣಂಗಕ್ ಎನ್ನನೆ ಬುದ್ದಿ ಎಣ್ಣಿ ಕೊಡ್‍ಪಿರ ಅನ್ನನೆ ಅಂವೊನ ಎಚ್ಚರಮಾಡಿ.

¹⁶ಸಮಾದಾನತ್‍ರ ಒಡೆಯನೇ ಎಲ್ಲಾ ಸಮಯತ್‍ಲು ಎಲ್ಲಾ ವಿದತ್‌ಲು ನಿಂಗಕ್ ಸಮಾದಾನ ತರಡ್. ಒಡೆಯ ಎಕ್ಕಾಲು ನಿಂಗಡ ಕೂಡೆ ಇಕ್ಕಡ್.

¹⁷ಪೌಲನಾನ ನಾನ್ ನಾಡ ಸ್ವಂತ ಕೈಯಿಲ್ ಒಳ್‍ದಿತ್ ನಿಂಗಕ್ ವಂದನೆ ಮಾಡ್‌ವಿ. ನಾನ್ ಒಳ್‍ದ್‍ವ ಕಾಗದಕೆಲ್ಲ ಅದ್ ಒರ್ ಗುರ್‌ತಾಯಿತ್‌ಪ್ಪ. ನಾನ್ ಇನ್ನನೆ ಎಕ್ಕಾಲು ಒಳ್‍ದಿಯಂಡುಳ್ಳ.

¹⁸ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್.