Read Kodava 1 ತಿಮೊಥೆಯ 2 Bible Online

1 ತಿಮೊಥೆಯ 2 - Kodava bible

1 ತಿಮೊಥೆಯ 2

¹ಮುಕ್ಯವಾಯಿತ್ ನಾನ್ ನಿಂಗಕ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ, ನಿಂಗ ಎಲ್ಲಾ ಜನಕಾಯಿತ್ ಪ್ರಾರ್ಥನೆ ಮಾಡಿಯಂಡ್, ತುದಿಚಂಡ್, ಬೋಡಿಯಂಡ್, ವಂದನೆ ಮಾಡಿಯಂಡ್ ಇರಿ.

²ನಂಗೆಲ್ಲಾ ಬಕ್ತಿಲ್, ಮರ್ಯಾದೆಲ್, ಏದ್ ತೊಂದರೆ ಇಲ್ಲತೆ, ಸುಕ ಸಮಾದಾನತ್‍ಲ್ ಬದ್‍ಕ್‍ವಕಾಯಿತ್ ನಂಗಡ ರಾಜಂಗಕು ಅದಿಕಾರಿಯಂಗಕು ಪ್ರಾರ್ಥನೆ ಮಾಡಂಡು.

³ಇನ್ನನೆ ಮಾಡ್‍ವದ್ ನಂಗಡ ರಕ್ಷಕನಾನ ದೇವಡ ಮಿಂಞತ್‍ಲ್ ನಲ್ಲದಾಯಿತು ಕುಶಿ ಆಯಿತು ಉಂಡ್.

⁴ಎಲ್ಲಾ ಜನಕು ರಕ್ಷಣೆ ಕ್‍ಟ್ಟಂಡೂಂದು, ಎಲ್ಲಾರ್‌ಕು ಸತ್ಯ ಗೊತ್ತಾಂಡೂಂದು ಉಳ್ಳದೇ ಅಂವೊಂಡ ಚಿತ್ತವಾಯಿತುಂಡ್.

⁵ದೇವ ಒಬ್ಬನೇ, ದೇವ ಪಿಂಞ ಮನುಷ್ಯಂಗಕ್ ಮದ್ಯಸ್ತನು ಒಬ್ಬನೇ. ಅಂವೊನೇ ಮನುಷ್ಯನಾಯಿತ್ ಬಂದ ಯೇಸು ಕ್ರಿಸ್ತ.

⁶ಎಲ್ಲಾ ಜನಳು ಬುಡ್‍ಗಡೆ ಆಂಡೂಂದ್ ಅದ್ಂಗುಳ್ಳ ಬೆಲೆಯಾಯಿತ್ ಅಂವೊನ ಅಂವೊನಾಯಿತೇ ಬಲಿಯಾಪನೆಕೆ ಮರಣಕ್ ಒಪ್ಪ್‌ಚಿಟ್ಟಂವೊನು ಅಂವೊನೇ. ತಕ್ಕ ಸಮಯತ್‍ಲ್ ದೇವ ಈ ನಲ್ಲ ಸುದ್ದಿನ ಈ ಲೋಕಕ್ ಕೊಡ್‌ತಿತುಂಡ್.

⁷ಈ ನಲ್ಲ ಸುದ್ದಿಕಾಯಿತೇ ದೇವ ನನ್ನ ಒರ್ ಬೋದಕನಾಯಿತ್ ಪಿಂಞ ಒರ್ ಅಪೊಸ್ತಲನಾಯಿತ್ ನೇಮಿಚಿಟ್ಟತ್. ನಂಬಿಕೇರ ವಿಷಯತ್‍ನ, ಸತ್ಯತ್‍ರ ವಿಷಯತ್‍ನ ಅನ್ಯ ಜನಕ್ ಬೋದನೆ ಮಾಡ್‌ವಕಾಯಿತ್ ನನ್ನ ಅಯಿಚತ್. ನಾನ್ ಪೊಟ್ಟ್ ಪರಿಯತೆ ಯೇಸು ಕ್ರಿಸ್ತಂಡ ಪೆದತ್‍ಲ್ ಸತ್ಯತ್‍ನ ಎಣ್ಣಿಯಂಡುಂಡ್.

⁸ಅದಲ್ಲತೆ, ಎಲ್ಲಾ ಆಣಾಳ್‍ವ ಚೆಡಿ ಇಲ್ಲತೆ, ತರ್ಕ ಇಲ್ಲತೆ, ಪವಿತ್ರವಾನ ಕೈಯಿನ ನೇತಿತ್, ಎಲ್ಲಾ ಜಾಗತ್‍ಲು ಪ್ರಾರ್ಥನೆ ಮಾಡಂಡೂಂದ್ ನಾಕ್ ಆಸೆ ಉಂಡ್.

⁹ಅನ್ನನೆ ಪೊಣ್ಣಾಳ್‍ವ ಸಹ ಯೋಗ್ಯವಾನ ಪಿಂಞ ಮರ್ಯಾದೆರ ಬಟ್ಟೆ ಇಡಂಡು. ಅಯಿಂಗ ತಲ್‌ಮಿನ ಸಿಂಗಾರ ಮಾಡಿಯಂಡ್, ಪೊನ್ನ್, ಮುತ್ತ್ ಪಿಂಞ ಬೆಲೆ ಉಳ್ಳ ಬಟ್ಟೇಲ್ ಅಲಂಕಾರ ಮಾಡ್‌ವಕ್ಕಾಗ.

¹⁰ಆಚೇಂಗಿ, ದೇವಡ ಮೇಲೆ ಬಕ್ತಿ ಉಂಡ್‍ೕಂದ್ ಎಣ್ಣುವ ಪೊಣ್ಣಾಳ್, ಅಯಿಂಗ ಮಾಡ್‌ವ ನಲ್ಲ ಕೆಲಸತ್‍ಲ್ ಅಲಂಕಾರ ಮಾಡಂಡು.

¹¹ಪೊಣ್ಣಾಳ್‍ವ ಎಲ್ಲಾ ವಿಷಯತ್‍ಲ್ ಮೌನವಾಯಿತ್ಂಜಿತ್ ಅಡಕತ್‍ಲ್ ಪಡಿಕಂಡು.

¹²ಬೋದನೆ ಮಾಡ್‌ವಕ್ ಪಿಂಞ ಆಣಾಳ್‌ರ ಮೇಲೆ ಅದಿಕಾರ ಮಾಡ್‌ವಕ್, ಪೊಣ್ಣಾಳ್‌ಕ್ ನಾನ್ ಅನುಮತಿ ಕೊಡ್‍ಪ್‍ಲೆ. ಅಯಿಂಗ ಮುಂಡತೆ ಇರಂಡು

¹³ಎನ್ನಂಗೆಣ್ಣ್‌ಚೇಂಗಿ, ದೇವ ಆದ್ಯವಾಯಿತ್ ಆದಾಮನ ಸೃಷ್ಟಿ ಮಾಡ್‍ಚಿ. ಬಯ್ಯ ಹವ್ವಳನ ಸೃಷ್ಟಿ ಮಾಡ್‍ಚಿ.

¹⁴ಇಂಞು, ಆದಾಮ, ಸೈತಾನಂಡ ವಂಚನೆಕ್ ಒಳಪಟ್ಟಿತ್‌ಲ್ಲೆ. ಪೊಣ್ಣಾಳೇ ವಂಚನೆಕ್ ಒಳಪಟ್ಟಿತ್ ಪಾಪ ಮಾಡ್‍ಚಿ.

¹⁵ಆಚೇಂಗಿಯು ಪೊಣ್ಣಾಳ್‍ವ ನಲ್ಲರಿಕೆಲ್ ಬದ್‌ಕಿತ್, ನಂಬಿಕೇಲ್, ಪ್ರೀತಿಲ್, ಪವಿತ್ರತ್‍ಲ್ ಬೇರೂರಿತ್ಂಜತೇಂಗಿ ಕುಂಞಿನ ಪೆರುವ ಮೂಲಕ[1] ಅವಕ್ ರಕ್ಷಣೆ ಆಪ.