Read Kodava 1 ತಿಮೊಥೆಯ 5 Bible Online

1 ತಿಮೊಥೆಯ 5 - Kodava bible

1 ತಿಮೊಥೆಯ 5

¹ವಯಸಾನಯಿಂಗಳ ಎಕ್ಕಾಲು ಜೋರ್ ಮಾಡತೆ, ನೀಡ ಅಪ್ಪಂಗ್ ಎನ್ನನೆ ಮರ್ಯಾದೆಲ್ ಬುದ್ದಿ ಎಣ್ಣ್‌ವಿಯೊ ಅನ್ನನೆ ಅಯಿಂಗಕ್ ಬುದ್ದಿ ಎಣ್ಣ್. ಯೌವನಸ್ತನ ನೀಡ ಸ್ವಂತ ಅಣ್ಣತಮ್ಮಣಂಗಡನೆಕೆ ನೋಟ್.

²ವಯಸಾನ ಪೊಣ್ಣಾಳ್‍ನ ನೀಡ ಅವ್ವಂಡನೆಕೆ ನೋಟ್, ಪಿಂಞ ಬಾಲೆಕಾರ್ತಿಯಂಗಳ ನೀಡ ಸ್ವಂತ ಅಕ್ಕತಂಗೆರನೆಕೆ ಪೂರ್ತಿ ಪವಿತ್ರತ್‍ಲ್ ನೋಟ್.

³ದಾರೂ ಇಲ್ಲತೆ, ವಡಿಯ ಚತ್ತ್‌ಪೋನ ಪೊಣ್ಣಾಳ್‌ಕ್ ಸಹಾಯ ಮಾಡ್.

⁴ಆಚೇಂಗಿ ಅವಕ್ ಮಕ್ಕ, ಕ್‍ರ್‍ಮಕ್ಕ ಉಂಡೇಂಗಿ, ಅಯಿಂಗ ಆದ್ಯವಾಯಿತ್ ತಾಂಡ ಸ್ವಂತ ಕುಟುಂಬತ್‍ನ ದೇವಡ ಬಕ್ತಿಲ್ ನೋಟಂಡು. ಅನ್ನನೆ ಮಾಡ್‍ಚೇಂಗಿ, ಪೆತ್ತಯಿಂಗ ಮಾಡ್‍ನ ಎಲ್ಲಾ ನಲ್ಲ ಕಾರ್ಯಕ್ ಬದ್‍ಲಾಯಿತ್ ಅಯಿಂಗಳ ಚಾಯಿತೆ ನೋಟ್‍ವಕ್, ಅಯಿಂಗ ಪಡಿಪ. ಇದ್ ದೇವನ ಕುಶಿಪಡ್‌ತ್‌ವ.

⁵ದಾರೂ ಸಹಾಯ ಮಾಡ್‌ವಕ್ ಇಲ್ಲತೆ, ಒರ್ ವಡಿಯ ಚತ್ತ್‌ಪೋನ ಪೊಣ್ಣಾಳ್, ದೇವಡ ಮೇಲೆ ನಂಬಿಕೆ ಬೆಚ್ಚಿತ್, ಬಯಿಟ್ ಪೋಲ್ ದೇವಡ ಪಕ್ಕ ಪ್ರಾರ್ಥನೆ ಮಾಡಿಯಂಡ್, ದೇವ ಸಹಾಯ ಮಾಡ್‌ವಕಾಯಿತ್ ಅವ ಬೋಡಿಯಂಡಿಪ್ಪ.

⁶ಆಚೇಂಗಿ ಸುಕ ಬೋಗತ್‍ಲ್ ಬದ್‍ಕ್‍ವಕ್ ಕುಶಿ ಪಡುವ ಒರ್ ವಿದವೆ ಜೀವವಾಯಿತ್ ಉಂಡೇಂಗಿಯು, ಆತ್ಮೀಯ ಬದ್‍ಕ್‍ಲ್, ಅವ ಚತ್ತನೆಕೆ.

⁷ದಾರೂ ಅಯಿಂಗಳ ಕುತ್ತ ಪರಿಯತನೆಕೆ, ಈ ತಕ್ಕ್‌ನ ಎಲ್ಲಾರ್‌ಕು ಎಣ್ಣಿ ಕೊಡ್.

⁸ಆಚೇಂಗಿ ಒಬ್ಬ ತಾಂಡ ಬೆಂದ್‍ಕಕ್, ಮುಕ್ಯವಾಯಿತ್ ಅಂವೊಂಡ ಸ್ವಂತ ಕುಟುಂಬಕ್ ಸಹಾಯ ಮಾಡತೆ ಪೋಚೇಂಗಿ, ಅಂವೊ ದೇವಡ ನಂಬಿಕೇಕ್ ಮೋಸ ಮಾಡ್‍ನನೆಕೆ ಪಿಂಞ ದೇವಡ ನಂಬಿಕೇಲ್ ಇಲ್ಲತಯಿಂಗಕಿಂಜ ಕ್‍ೕಳಾನಂವೊ.

⁹ವಡಿಯ ಚತ್ತ್‌ಪೋನ ಪೊಣ್ಣಾಳ್‍ರ ಕೂಟ್‍ಕ್ ದಾರ್‌ನ ಕೂಟೊಂಡೂಂದ್ ಎಣ್ಣ್‌ಚೇಂಗಿ; ಅರ್‌ವದ್ ವಯಸ್‍ಕ್ ಮೇಲೆ ಉಳ್ಳ ವಡಿಯ ಚತ್ತ್‌ಪೋನ ಪೊಣ್ಣಾಳಾಯಿತ್ ಇರಂಡು. ವಡಿಯಂಗ್ ನಂಬಿಕಸ್ತಳಾಯಿತ್ ಇಂಜವ,

¹⁰ಮಕ್ಕಳ ಚಾಯಿತೆ ಚಾಕ್‍ನವ, ಮನೆಕ್ ಬಂದಯಿಂಗಳ ಚಾಯಿತೆ ಸತ್ಕಾರ ಮಾಡ್‍ನವ, ಯೇಸುನ ನಂಬ್‍ನಯಿಂಗಕ್ ಸೇವೆ ಮಾಡ್‍ನವ, ಕಷ್ಟತ್‍ಲ್ ಉಳ್ಳಯಿಂಗಕ್ ಸಹಾಯ ಮಾಡ್‍ನವ, ಎಲ್ಲಾ ನಲ್ಲ ಕೆಲಸತ್‍ನ ಎಚ್ಚರತ್‍ಲ್ ಮಾಡ್‍ನವ, ನಲ್ಲ ಕೆಲಸ ಮಾಡ್‍ನವ, ಈ ಎಲ್ಲಾಂಗು ನಲ್ಲ ಪೆದ ಎಡ್‍ತವಳಾಯಿತ್ ಉಳ್ಳವಳ ನೀನ್ ಈ ಕೂಟ್‍ಕ್ ಕೂಟಂಡು.

¹¹ಆಚೇಂಗಿ ಚೆರಿಯ ವಯಸ್ಸುಳ್ಳ ವಿದವೆಯಳ ಈ ಕೂಟ್‍ಕ್ ಕೂಟತೆ. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗಡ ತಡೀರ ಇಚ್ಛೆ, ಕ್ರಿಸ್ತಂಡ ಮೇಲೆ ಉಳ್ಳ ಅರ್ಪಣೆಕಿಂಜ ಜಾಸ್ತಿ ಆಯಿತ್, ಕ್ರಿಸ್ತಂಡ ಪಕ್ಕ ಮಾಡ್‍ನ ಒಪ್ಪಂದತ್‍ನ ಬುಟ್ಟಿತ್, ಪುನಃ ಮಂಗಲ ಮಾಡಂಡೂಂದ್ ಆಸೆ ಪಡುವ.

¹²ಅನ್ನನೆ ಮಾಡ್‌ವಯಿಂಗ, ಆದ್ಯ ಕೊಡ್‍ತ ವಾಕ್ಯತ್ಂಜ ತಪ್ಪ್‌ನಗುಂಡ್, ಅಯಿಂಗ ತೀರ್ಪ್‌ಕ್ ಒಳಪಡ್‌ವ.

¹³ಅದೂ ಅಲ್ಲತೆ ಅಯಿಂಗ ಸೋಮಾರಿಯಾಯಿತ್, ಮನೆಮನೆಕ್ ಸುತ್ತಿಯಂಡಿಪ್ಪ. ಸೋಮಾರಿಯಾಯಿತ್ ಮಾತ್ರ ಅಲ್ಲತೆ, ಬೋರೆಯಿಂಗಡ ಕೆಲಸತ್‍ಲ್ ಬಂತ್, ಎಣ್ಣುವಕ್ಕಾಗಾಂತ ವಿಷಯತ್‍ನ ಪರ್‌ದಂಡ್, ಹರಟೆ ಪೊಯ್ಯುವ.

¹⁴ಅದ್ಂಗಾಯಿತ್, ಚೆರಿಯ ವಯಸ್ಸುಳ್ಳ ವಿದವೆಯಂಗ ಪುನಃ ಮಂಗಲ ಕಯಿಚಿತ್, ಮಕ್ಕಳ ಪೆತ್ತಿತ್, ಮನೆರ ಜವಾಬ್ದಾರಿನ ಎಡ್‍ತಂಡ್ ಇರಂಡೂಂದ್ ನಾನ್ ಅಯಿಂಗಕ್ ಬುದ್ದಿ ಎಣ್ಣ್‌ವಿ. ಅನ್ನನೆ ಮಾಡ್‍ನಕ ವಿರೋದಿಯಾನಂವೊ ಕುತ್ತ ಪರಿಯುವಕ್ ಬಟ್ಟೆ ಕ್‍ಟ್ಟ್‌ಲೆ.

¹⁵ಚೆನ್ನ ವಿದವೆಯಂಗ ಇಕ್ಕಲೆ ದೂರ ಪೋಯಂಡ್, ಸೈತಾನಂಗ್ ಬಗ್ಗಿತ್ ನಡ್ಂದಂಡುಂಡ್.

¹⁶ಯೇಸು ನಂಬುನ ಒರ್ ಪೊಣ್ಣಾಳ್‌ಕ್, ಅವಡ ಮನೆಕಾರಂಗ ದಾರೇಂಗಿ ವಿದವೆಯಂಗ ಉಂಡೇಂಗಿ, ಅವ ಆ ವಿದವೆಯಂಗಕ್ ಸಹಾಯ ಮಾಡಂಡು. ಆ ಬಾರತ್‍ನ ಅವ ಸಬೆರ ಮೇಲೆ ಇಡ್‍ವದ್ ಬೋಂಡ. ಅಕ್ಕ ಒರ್ ಸಬೆ, ನೇರಾಯಿತು ದಾರೂ ಇಲ್ಲತೆ ವಿದವೆಯಂಗಕ್ ಸಹಾಯ ಮಾಡಡ್.

¹⁷ಸಬೆರ ಜವಾಬ್ದಾರಿನ ಚಾಯಿತೆ ಮಾಡಿಯಂಡುಳ್ಳ ಪೆರಿಯಯಿಂಗಕ್ ದಂಡ್ ಅಳ್‌ತೆಲ್ ಮರ್ಯಾದೆ ಕ್‍ಟ್ಟ್‌ವಕ್ ಯೋಗ್ಯವಾಯಿತುಂಡ್. ಎನ್ನಂಗೆಣ್ಣ್‌ಚೇಂಗಿ ಮುಕ್ಯವಾಯಿತ್ ಅಯಿಂಗ ದುಂಬ ಪ್ರಯತ್ನ ಪಟ್ಟಿತ್ ದೇವಡ ವಾಕ್ಯತ್‍ನ ಚಾಯಿತೆ ಪ್ರಸಂಗ ಮಾಡಿಯಂಡ್ ಪಿಂಞ ಬೋದನೆ ಮಾಡಿಯಂಡುಂಡ್.

¹⁸ಎತ್ತ್ ಒಕ್ಕಾಟಿಯಂಡ್ ಇಪ್ಪಕ ಬಾಯಿನ ಕೆಟ್ಟ್‌ವಕ್ಕಾಗಾಂದ್ ಪಿಂಞ ಒರ್ ಆಳ್‍ಕ್ ಅಂವೊಂಡ ಕೂಲಿನ ಕೊಡ್‍ಕಂಡೂಂದೂ ದೇವಡ ವಾಕ್ಯ ಎಣ್ಣಿತುಂಡಲ್ಲ?[2]

¹⁹ಒರ್ ಸಬೆರ ಪೆರಿಯಯಿಂಗಕ್ ವಿರೋದವಾಯಿತ್ ದಾರೇಂಗಿ ಕುತ್ತಪರ್ಂದತೇಂಗಿ, ಅದ್ಂಗ್ ದಂಡ್ ಅಥವ ಮೂಂದ್ ಸಾಕ್ಷಿ ಇಲ್ಲತೆಪೋಚೇಂಗಿ ಅದ್ಂಗ್ ಒತ್ತತೆ.

²⁰ಅನ್ನನೆ ಅಂವೊ ಪಾಪ ಮಾಡಿಯಂಡೇ ಇಂಜತೇಂಗಿ, ಅಲ್ಲಿ ಉಳ್ಳಯಿಂಗಕ್ ಪಾಪ ಮಾಡ್‌ವಕ್ ಪೋಡಿ ಬಪ್ಪನೆಕೆ ಎಲ್ಲಾಡ ಮಿಂಞತ್ ಅಂವೊನ ಎಚ್ಚರ ಮಾಡ್.

²¹ನೀನ್ ದಾರ್‌ನು ಮೂಡ್ ನೋಟಿತ್ ನ್ಯಾಯಮಾಡತ, ಪಕ್ಷಪಾತ ಮಾಡತೆ, ನೀನ್ ಇದ್‍ನೆಲ್ಲಾ ಮಾಡಿಯಂಡಿರ್‍ೕಂದ್ ದೇವಡ ಮಿಂಞತ್, ಯೇಸು ಕ್ರಿಸ್ತಂಡ ಪ್ರಸನ್ನತ್‌ಲ್ ಪಿಂಞ ಗೊತ್ತ್ ಮಾಡಿತುಳ್ಳ ದೂತಂಗಡ ಮಿಂಞತ್ ಆಜ್ಞೆ ಮಾಡ್‌ವಿ.

²²ದೇವಡ ಸೇವೇಕ್ ನೇಮಿಚಿಡ್‍ವಕ್ ಏದ್ ಮನುಷ್ಯಂಡ ಮಂಡೆರ ಮೇಲೆ ಅವಸರತ್‌ಲ್ ಕೈ ಬೆಕ್ಕತೆ. ಅನ್ನನೆ ಮಾಡ್‍ಚೇಂಗಿ, ಬೋರೆಯಿಂಗ ಮಾಡ್‌ವ ಪಾಪತ್‍ಲ್ ನೀನ್ ಸಹ ಪಾಲ್‍ದಾರನಾಯಿತ್‌ಪ್ಪಿಯ, ನೀನ್ ಪವಿತ್ರ ಉಳ್ಳಂವೊನಾಯಿತಿರ್.

²³ಬರಿ ನೀರ್ ಮಾತ್ರ ಕುಡಿಕತೆ, ನೀಡ ಕೆಲ ನೊಂಬಲಕಾಯಿತ್, ಅಕ್ಕಕ್ಕ ನೀಕ್ ಬಪ್ಪ ಕಾಯಿಲೆಕಾಯಿತ್ ಚೆನ್ನ ದ್ರಾಕ್ಷಿರಸತ್‍ನ ಕೂಟಿತ್ ಕುಡಿ.

²⁴ಚೆನ್ನ ಜನ ಮಾಡ್‍ನ ಪಾಪ ನ್ಯಾಯತೀರ್ಪ್‌ಕ್ ಮಿಂಞಲೇ ಗೊತ್ತಾಯಿ ಪೋಪ. ಆಚೇಂಗಿ ಇಂಞು ಚೆನ್ನ ಜನ ಮಾಡ್‍ನ ಪಾಪ ಬಯ್ಯ ಗೊತ್ತಾಪ.

²⁵ಅನ್ನನೆ ಚೆನ್ನ ಜನಡ ನಲ್ಲ ಕಾರ್ಯ ಎಲ್ಲಾರು ಕಾಂಬನೆಕೆ ಇಪ್ಪ. ಅನ್ನನೆ ಕಾಂಗತೆ ಇಪ್ಪದು, ಸಮಯ ಬಪ್ಪಕ ಎಲ್ಲಾರ್‌ಕು ಗೊತ್ತಾಪ.