Read Kodava 2 ತಿಮೊಥೆಯ 1 Bible Online

2 ತಿಮೊಥೆಯ 1 - Kodava bible

2 ತಿಮೊಥೆಯ 1

¹ಯೇಸು ಕ್ರಿಸ್ತಂಡ ಮೇಲೆ ಉಳ್ಳ ನಂಬಿಕೇರಗುಂಡ್, ವಾಗ್ದಾನ ಮಾಡಿತುಳ್ಳ ಯೇಸು ಕ್ರಿಸ್ತಂಡಲ್ಲಿ ಉಳ್ಳ ಜೀವತ್‍ರ ವಿಷಯತ್‍ನ ಬೋರೆಯಿಂಗಕ್ ಎಣ್ಣ್‌ವಕ್, ಯೇಸು ಕ್ರಿಸ್ತಂಡ ಚಿತ್ತತ್‍ರನೆಕೆ ಅಪೊಸ್ತಲನಾಯಿತುಳ್ಳ ಪೌಲನಾನ ನಾನ್,

²ನಾಡ ಮೋಂವೊನಾನ ತಿಮೊಥೆಯಂಗ್ ಒಳ್‍ದ್‍ವ ಕಾಗದ ಇದ್. ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ಕರುಣೆ ಪಿಂಞ ಸಮಾದಾನ ನೀಕ್ ಕ್‍ಟ್ಟಡ್.

³ನಾನ್ ಬೈಟ್ ಪೋಲ್ ಪ್ರಾರ್ಥನೆ ಮಾಡ್‌ವಕ ನಿನ್ನ ಎಕ್ಕಾಲು ಗೇನ ಮಾಡ್‌ವಿ. ಅದಲ್ಲತೆ ನಾಡ ಮುತ್ತಜ್ಜಂಗ ದೇವಡ ಸೇವೇನೆ ಮಾಡ್‍ನನೆಕೆ, ನಲ್ಲ ಮನಸಾಕ್ಷಿಲ್, ನಾನು ಸೇವೆ ಮಾಡಿಯಂಡ್ ನೀಕಾಯಿತ್ ದೇವಕ್ ವಂದನೆ ಮಾಡ್‌ವಿ.

⁴ನೀನ್ ಕಣ್ಣೀರ್ ಇಟ್ಟದ್ ನಾಕ್ ಇಂಞು ಗೇನ ಉಳ್ಳಗುಂಡ್, ನಿನ್ನ ಕಾಂಗಂಡೂಂದ್ ನಾನ್ ದುಂಬ ಆಸೇಲ್ ಉಳ್ಳ. ಅನ್ನನೆ, ನಿನ್ನ ಕಂಡತೇಂಗಿ ನಾಕ್ ದುಂಬ ಕುಶಿ ಆಪ.

⁵ನೀನ್ ದೇವಡ ಮೇಲೆ ಬೆಚ್ಚಿತುಳ್ಳ ಕಪಟ ಇಲ್ಲತ ನೇರಾನ ನಂಬಿಕೇನ ನಾನ್ ಇಕ್ಕ ಗೇನ ಮಾಡ್‌ವಿ. ಆ ನಂಬಿಕೆ ಆದ್ಯವಾಯಿತ್ ನೀಡ ಅವ್ವಯ್ಯ ಲೋವಿರ ಕೂಡೆ ಪಿಂಞ ನೀಡ ಅವ್ವ ಯೂನೀಕೆರ ಕೂಡೆಯು ಇಂಜತ್. ಅದ್ ನೀಕ್ ಸಹ ಉಂಡ್‍ೕಂದ್ ನಾನ್ ದೃಡವಾಯಿತ್ ನಂಬುವಿ.

⁶ಇದ್ಂಗಾಯಿತ್, ನಾನ್ ನೀಡ ಮೇಲೆ ನಾಡ ಕೈಯಿನ ಬೆಪ್ಪಕ ನೀಕ್ ಕ್‍ಟ್ಟ್‌ನ ಆತ್ಮೀಯ ವರತ್‍ನ ಇಂಞು ಪ್ರಕಾಶವಾಯಿತ್ ಮಾಡ್‌ವಕ್ ನಾನ್ ನೀಕ್ ಞಾಪಕ ಮಾಡ್‌ವಿ.

⁷ದೇವ ನಂಗಕ್ ಪೋಡಿರ ಆತ್ಮತ್‌ನ ತಂದಿತ್‍ಲ್ಲೆ, ಆಚೇಂಗಿ ಬಲ, ಪ್ರೀತಿ ಪಿಂಞ ತೆಳ್ಂಗ್‍ನ ಬುದ್ದಿಯುಳ್ಳ ಆತ್ಮತ್‍ನೇ ತಂದಿತುಂಡ್.

⁸ಆನಗುಂಡ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ವಿಷಯತ್ ಸಾಕ್ಷಿ ಪರಿಯುವಕ್ ಪಿಂಞ ಅಂವೊನಗುಂಡ್ ಕೈದಿಯಾಯಿತುಳ್ಳ ನಾಡ ವಿಷಯತ್ ಞಾಣ ಪಡತೆ. ಅದ್ಂಗ್ ಬದ್‍ಲ್ ದೇವ ಕೊಡ್‍ಪ ಶಕ್ತಿಯಿಂಜ ದೇವಡ ನಲ್ಲ ಸುದ್ದಿಕಾಯಿತ್ ನಾಡ ಕೂಡೆ ಕಷ್ಟಪಡ್‌ವಕ್ ತಯಾರಾಯಿತಿರ್.

⁹ಎನ್ನಂಗೆಣ್ಣ್‌ಚೇಂಗಿ ದೇವ ನಂಗಳ ರಕ್ಷಣೆ ಮಾಡಿತ್, ಪವಿತ್ರವಾನ ಬದ್‍ಕ್ ಬಾಳ್‌ವಕ್ ನಂಗಳ ಕಾಕಿತುಂಡ್. ನಂಗಕ್ ಇದ್ ಕ್‍ಟ್ಟ್‌ವಕ್ ಒರ್ ಯೊಗ್ಯತೆಯು ಇಲ್ಲೆ. ಆಚೇಂಗಿ, ಕಾಲ ಸುರ್ ಆಪಕ್ ಮಿಂಞಲೇ, ಈ ಕೃಪೆ ಯೇಸು ಕ್ರಿಸ್ತನಗುಂಡ್ ನಂಗಕ್ ಕ್‍ಟ್ಟಂಡೂಂದ್ ದೇವಡ ಚಿತ್ತವಾಯಿತ್ಂಜತ್.

¹⁰ಇಕ್ಕ ನಂಗಡ ರಕ್ಷಕನಾನ ಯೇಸು ಕ್ರಿಸ್ತ ಪ್ರತ್ಯಕ್ಷ ಆನಗುಂಡ್ ಆ ಕೃಪೇನ ಕಾಂಬಕಾಚಿ. ಅಂವೊ ಚಾವ್‍ನ ಗೆದ್ದಿತ್, ಜೀವತ್‍ನ ಪಿಂಞ ನಾಶ ಆಕತ ಬದ್‍ಕ್‍ನ ನಲ್ಲ ಸುದ್ದಿಯಿಂಜ ಬೊಳಿಕ್ ಕೊಂಡ್ ಬಾತ್.

¹¹ಈ ನಲ್ಲ ಸುದ್ದಿಕಾಯಿತ್ ದೇವ ನನ್ನ ಒರ್ ಪ್ರಸಂಗಿಯಾಯಿತ್, ಒರ್ ಅಪೊಸ್ತಲನಾಯಿತ್ ಪಿಂಞ ಬೋದಕನಾಯಿತ್ ನೇಮಿಚಿಟ್ಟಿತುಂಡ್.

¹²ಇದ್ಂಗಾಯಿತ್ ನಾನ್ ಇಕ್ಕ ಕಷ್ಟಪಟ್ಟಂಡ್ ಉಳ್ಳ. ಆಚೇಂಗಿ ನಾಕ್ ಞಾಣ ಆಪುಲೆ, ಎನ್ನಂಗೆಣ್ಣ್‌ಚೇಂಗಿ, ನಾನ್ ದಾಡ ಮೇಲೆ ನಂಬಿಕೆ ಬೆಚ್ಚಿತ್ ಉಂಡ್‍ೕಂದ್ ನಾಕ್ ಗೊತ್ತುಂಡ್. ನಾನ್ ಅಂವೊಂಡ ಪಕ್ಕ ಒಪ್ಪ್‌ಚಿಟ್ಟದ್‍ನ, ಅಂವೊ ಆ ದಿನಕತ್ತನೆ ಕಾಪಾಡ್‌ವಕ್ ಶಕ್ತಿ ಉಳ್ಳಂವೊನಾಯಿತುಂಡ್‍ೕಂದ್ ನಾನ್ ದೃಡವಾಯಿತ್ ನಂಬಿತುಳ್ಳ.

¹³ನೀನ್ ಯೇಸು ಕ್ರಿಸ್ತಂಡ ಮೇಲೆ ಉಳ್ಳ ನಂಬಿಕೆಯಿಂಜ, ಪ್ರೀತಿಯಿಂಜ, ನಾಡ ಪಕ್ಕ ಕ್‍ೕಟಿತ್ತುಳ್ಳ ಆರೋಗ್ಯವಾನ ಬೋದನೆನ ಒರ್ ಉದಾರಣೆಯಾಯಿತ್ ಬೆಚ್ಚಂಡ್, ಅನ್ನನೆ ಮಾಡ್.

¹⁴ನೀಡ ಪಕ್ಕ ಒಪ್ಪ್‌ಚಿಟ್ಟಿತುಳ್ಳ, ಆ ನಲ್ಲ ಸತ್ಯತ್‍ನ, ನಂಗಡ ಒಳ್‍ಲ್ ವಾಸ ಮಾಡ್‌ವ ಪವಿತ್ರಾತ್ಮನಗುಂಡ್ ಅದ್‍ನ ಕಾಪಾಡ್.

¹⁵ನೀಕ್ ಗೊತ್ತುಳ್ಳನೆಕೆ ಆಸ್ಯ ಸೀಮೆಲ್ ಉಳ್ಳ ಎಲ್ಲಾರು ನನ್ನ ದೂರ ಮಾಡಿರ್‌ತ್. ಅಯಿಂಗಡಡೆಲ್ ಫುಗೇಲ ಪಿಂಞ ಹೆರ್ಮೊಗೆನ ಎಣ್ಣ್‌ವಯಿಂಗ ಕೂಡೆ ನನ್ನ ದೂರ ಮಾಡಿರ್‌ತ್.

¹⁶ದೇವ ಒನೇಸಿಫೊರಂಡ ಮನೆಕ್ ಕರುಣೆ ಕಾಟಡ್. ಎನ್ನಂಗೆಣ್ಣ್‌ಚೇಂಗಿ ಅಂವೊ ದುಂಬ ಕುರಿ ಬಂತ್ ನಾಕ್ ಪುರ್‌ಡ್ ಕೊಡ್‍ತತ್; ಪಿಂಞ ನಾನ್ ಕೈದಿಯಾಯಿತ್ ಇಂಜತೇಂಗಿಯು ಅಂವೊ ಞಾಣ ಪಟ್ಟಿತ್ತ್‌ಲ್ಲೆ.

¹⁷ಆಂಡ ಬದ್‍ಲ್ ಅಂವೊ ರೋಮ್ ಪಟ್ಟಣಕ್ ಬಪ್ಪಕ, ದುಂಬ ಕಷ್ಟಪಟ್ಟಿತ್ ನನ್ನ ತ್‍ೕಡಿ ಕಂಡ್‌ಪುಡ್‌ಚತ್.

¹⁸ಯೇಸು ಕ್ರಿಸ್ತ ಪುನಃ ಬಪ್ಪ ದಿವಸತ್‍ಲ್, ಅಂವೊಂಡ ಮೇಲೆ ದೇವಡ ವಿಶೇಷ ಕರುಣೆ ಇರಡ್! ಅಂವೊ, ಎಫೆಸತ್‍ಲ್ ನಾಕ್ ಎಚ್ಚಕೋ ಸಹಾಯ ಮಾಡಿತುಂಡ್‍ೕಂದ್ ನೀಕ್ ಚಾಯಿತೆ ಗೊತ್ತುಂಡ್.