Read Kodava 2 ತಿಮೊಥೆಯ 2 Bible Online

2 ತಿಮೊಥೆಯ 2 - Kodava bible

2 ತಿಮೊಥೆಯ 2

¹ಆನಗುಂಡ್ ನಾಡ ಮೋನೇ, ನೀನ್ ಯೇಸು ಕ್ರಿಸ್ತಂಡ ಕೃಪೇಲ್ ಬಲಪಡ್.

²ಎಚ್ಚಕೋ ಸಾಕ್ಷಿರ ಮಿಂಞತ್, ನಾನ್ ಮಾಡ್‍ನ ಬೋದನೇನೆಲ್ಲ ಕ್‍ೕಟ ನೀನ್, ಅದ್‍ನ, ಬೋರೆಯಿಂಗಕ್ ಪಡಿಪ್‍ಚಿಡ್‍ವಕ್ ಯೋಗ್ಯವಾನ ನಂಬಿಕಸ್ತಂಡ ಪಕ್ಕ ಒಪ್ಪ್‌ಚಿಡ್.

³ಯೇಸು ಕ್ರಿಸ್ತಂಡ ಒರ್ ನಲ್ಲ ಸೈನಿಕನಾಯಿತ್ ನೀನ್ ಸಹ ನಂಗಡ ಕೂಡೆ ಕಷ್ಟ ಅನುಬವಿಚಿಡ್.

⁴ಸೈನಿಕನಾಯಿತ್ ಸೇವೆ ಮಾಡಿಯಂಡುಳ್ಳ ಒಬ್ಬ ತಾಂಡ ಸ್ವಂತ ಬದ್‍ಕ್‍ರ ಕೆಲಸತ್‍ಲ್ ಚಿಕ್ಕಿ ಪೋಕತೆ, ಅಂವೊಂಗ್ ಹುಕುಮ್ ತಪ್ಪ ಅದಿಕಾರಿನ ಮಾತ್ರ ಕುಶಿ ಪಡ್‍ತ್‍ವಕ್ ನೋಟ್‍ವ.

⁵ಅನ್ನನೆ ಏದ್ ಒರ್ ಕಳಿಕಾರನೂ ಕಳಿರ ಆಜ್ಞೆನ ಸರಿಯಾಯಿತ್ ಮಾಡತೆ ಪೋಚೇಂಗಿ ಅಂವೊಂಗ್ ಕಿರೀಟ ಕ್‍ಟ್ಟುಲೆ.

⁶ಕಷ್ಟಪಟ್ಟಿತ್ ವ್ಯವಸಾಯ ಮಾಡ್‌ವಂವೊ ಬೊಳ್‍ತ್‍ನ ಬೊಳೆರ ಆದ್ಯ ಫಲ ಅಂವೊಂಗ್ ಕ್‍ಟ್ಟಂಡು.

⁷ನಾನ್ ಎಣ್ಣ್‌ವಾನೆಲ್ಲ ಗೇನ ಮಾಡ್. ನೀಕ್ ಇದ್‍ನೆಲ್ಲಾ ದೇವ ಅರ್ಥ ಮಾಡಿತಪ್ಪ.

⁸ದಾವೀದಂಡ ಸಂತಾನಕಾರನಾನ ಯೇಸು ಕ್ರಿಸ್ತ, ನಾನ್ ಬೋದನೆ ಮಾಡ್‍ನ ನಲ್ಲ ಸುದ್ದಿರನೆಕೆ, ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಾತ್‍ೕಂದ್ ಎಣ್ಣುವ ವಿಷಯತ್‍ನ ಗೇನ ಬೆಚ್ಚ.

⁹ಈ ನಲ್ಲ ಸುದ್ದಿರಗುಂಡ್, ನನ್ನ ಕೊಲೆಗಾರನೆಕೆ ಸರ್ಪಣಿಲ್ ಕೆಟ್ಟಿತ್, ನಾನ್ ಕಷ್ಟಪಟ್ಟಂಡ್ ಉಳ್ಳ. ಆಚೇಂಗಿ ದೇವಡ ವಾಕ್ಯ ಬಂದನೆ ಆಯಿತ್‌ಲ್ಲೆ.

¹⁰ಆಂಗಾಯಿತ್ ಗೊತ್ತ್ ಮಾಡಿತುಳ್ಳಯಿಂಗಕ್ ಯೇಸು ಕ್ರಿಸ್ತಂಡಿಂಜ ಕ್‍ಟ್ಟ್‌ವ ರಕ್ಷಣೆ ನಿತ್ಯ ಮಹಿಮೆಲ್ ಅಯಿಂಗಕ್ ಸಹ ಕ್‍ಟ್ಟ್‌ವನೆಕೆ ನಾನ್ ಎಲ್ಲಾನ ಅಯಿಂಗಕಾಯಿತ್ ಸಹಿಸಿಯಂಡುಂಡ್.

¹¹ಇದ್ ಒರ್ ಸತ್ಯವಾನ ತಕ್ಕ್. ಯೇಸುರ ಕೂಡೆ ನಂಗ ಚತ್ತಿತುಂಡೇಂಗಿ ನಂಗ ಸಹ ಅಂವೊಂಡ ಕೂಡೆ ಬದ್‍ಕ್‍ವ.

¹²ನಂಗ ಅಂವೊಂಡ ಕೂಡೆ ಕಷ್ಟಪಟ್ಟತೇಂಗಿ ನಂಗ ಸಹ ಅಂವೊಂಡ ಕೂಡೆ ಆಳು‍ವೆ ಮಾಡ್‌ವ, ನಂಗ ಯೇಸುನ ಗೊತ್ತ್‌ಲ್ಲೇಂದ್ ಎಣ್ಣ್‌ಚೇಂಗಿ ಅಂವೊ ಸಹ ನಂಗಳ ಗೊತ್ತ್‌ಲ್ಲೇಂದ್ ಎಣ್ಣುವ.

¹³ಅಂವೊಂಗ್ ನಂಗ ನಂಬಿಕಸ್ತನಾಯಿತ್‌ಲ್ಲೇಂಗಿಯೂ ಅಂವೊ ನಂಬಿಕಸ್ತನಾಯಿತಿಪ್ಪ. ಎನ್ನಂಗೆಣ್ಣ್‌ಚೇಂಗಿ ಅಂವೊ ತಾಂಡ ಗುಣಕ್ ವಿರೋದವಾಯಿತ್ ಮಾಡ್‌ವಕ್ ಕಯ್ಯುಲೆ.

¹⁴ಈ ವಿಷಯತ್‍ನ ಎಕ್ಕಾಲು ಅಯಿಂಗಕ್ ನೀನ್ ಞಾಪಕ ಮಾಡಿಯಂಡಿರ್. ಒಂದಾಂಗು ಪ್ರಯೋಜನವಿಲ್ಲತ ಪಿಂಞ ಕ್‍ೕಪಯಿಂಗಳ ಪಾಳ್ ಮಾಡ್‌ವಂತ ಅರ್ಥ ಇಲ್ಲತ ತಕ್ಕ್‌ಲ್ ಮಾಡ್‌ವ ತರ್ಕತ್‍ನ ಮಾಡತನೆಕೆ, ದೇವಡ ಮಿಂಞತ್ ಅಯಿಂಗಕ್ ಎಚ್ಚರ ಮಾಡ್.

¹⁵ನೀ ಞಾಣಪಡುವಕ್ ಅವಸ್ಯ ಇಲ್ಲತ ಸೇವಕನಾಯಿತ್, ದೇವಡ ಸತ್ಯ ವಾಕ್ಯತ್‍ನ ಏದ್ ತಪ್ಪಿಲ್ಲತೆ, ನೇರಾಯಿತ್ ಬೋದನೆ ಮಾಡ್‌ವಂವೊನಾಯಿತ್, ದೇವಡ ಮಿಂಞತ್ ನೀನ್ ಯೋಗ್ಯನಾಯಿತ್ ನಿಪ್ಪಕ್ ಜಾಗ್ರತೆಲ್ ಇರ್.

¹⁶ಈ ಲೋಕತ್‍ರ ಒರ್ ಪ್ರಯೋಜನವಿಲ್ಲತ ಹರಟೆ ತಕ್ಕ್‌ಕ್ ದೂರ ಇರ್. ಎನ್ನಂಗೆಣ್ಣ್‌ಚೇಂಗಿ ಅನ್ನನೆ ಹರಟೆ ತಕ್ಕ್‌ಲ್ ಪಾಲ್‍ದಾರಂಗಳಾಪಯಿಂಗ ದೇವಡಯಿಂಜ ದುಂಬ ದೂರ ಪೋಪ.

¹⁷ಆ ತರ ತಕ್ಕ್, ವಾಸಿ ಆಕತ ತಡೀಲ್ ಪಬ್ಬ್‌ವ ಗಾಯತ್‍ರನೆಕೆ ಉಂಡ್. ಹುಮೆನಾಯ, ಪಿಲೇತ ಸಹ ಇನ್ನನೆ ತಕ್ಕ್ ಪರಿವಕಿಂಜತ್.

¹⁸ಅಯಿಂಗ, ಅಕ್ಕಲೆ ಚತ್ತಯಿಂಗ ಪುನಃ ಜೀವತ್‍ಲ್ ಬಾತ್‍ೕಂದ್ ಬೋದನೆ ಮಾಡಿಯಂಡ್ ಸತ್ಯತ್ಂಜ ದೂರ ಆಯಿರ್‌ತ್. ಅಯಿಂಗ ಇನ್ನನೆ ಬೋದನೆ ಮಾಡ್‍ನಗುಂಡ್ ಚೆನ್ನ ಜನಡ ನಂಬಿಕೇನ ಪಾಳ್ ಮಾಡಿರ್‌ತ್.

¹⁹ಆಚೇಂಗಿಯು ದೇವಡ ವಾಕ್ಯತ್‍ರ ಅಡಿಪಾಯ ಗಟ್ಟಿಯಾಯಿತ್ ನಿಂದಿತುಂಡ್. ಅದ್‍ಲ್: ಒಡೆಯಂಗ್ ಅಂವೊಂಡ ಜನ ದಾರ್‍ೕಂದ್ ಗೊತ್ತುಂಡ್‍ೕಂದ್ ಪಿಂಞ ದೇವಡ ಪೆದತ್‍ನ ಎಣ್ಣುವ ಎಲ್ಲಾ ಜನಳು ಕೆಟ್ಟ ಕೆಲಸತ್‍ನ ಬುಟ್ಟಿತ್ ದೂರ ಆಂಡೂಂದ್ ದೇವಡ ವಾಕ್ಯತ್‍ಲ್ ಎಣ್ಣಿತುಂಡ್.[1]

²⁰ಒರ್ ಬಲ್ಯ ಮನೆಲ್, ಪೊನ್ನ್, ಬೊಳ್ಳಿರ ಪಾತ್ರ ಮಾತ್ರ ಅಲ್ಲತೆ, ಮಣ್ಣ್‌ರ, ಮರತ್‍ರ ಪಾತ್ರ ಸಹ ಇಪ್ಪ. ಚೆನ್ನ ಪಾತ್ರ ಗೌರವ ಕಾರ್ಯಕು, ಚೆನ್ನ ಪಾತ್ರ ದಿನಾಲ್ ಉಪಯೋಗಿಚಿಡುವ ಕಾರ್ಯಕು ಆಪ.

²¹ಆನಗುಂಡ್, ಒರ್ ಮನುಷ್ಯ ಪಾಪತ್‍ರ ಕೆಲಸತ್‍ನ ಬುಟ್ಟಿತ್ ಅಂವೊನ ಪವಿತ್ರವಾಯಿತ್ ಮಾಡ್‍ಚೇಂಗಿ, ಅಂವೊಂಡ ಎಜಮಾನಂಡ ಗೌರವ ಕಾರ್ಯಕ್ ಉಪಯೋಗಿಚಿಡುವ ಪಾತ್ರವಾಯಿತ್ ಇಪ್ಪ. ಅಂವೊ ಪವಿತ್ರವಾಯಿತ್ ಪಿಂಞ ಏದ್ ನಲ್ಲ ಕೆಲಸಕೂ ಉಪಯೋಗಿಚಿಡುವಕ್ ತಯಾರಾಯಿತ್‌ಪ್ಪ.

²²ಬಾಲ್ಯ ವಯಸ್ಸ್‌ಲ್ ಬಪ್ಪ ಇಚ್ಛೆಯಿಂಜ ನೀ ಓಡಿ ಪೋ. ನೀತಿ, ನಂಬಿಕೆ, ಪ್ರೀತಿ, ಸಮಾದಾನತ್‍ನ ಪಡೆಯುವಕ್ ಶುದ್ದ ಹೃದಯತ್ಂಜ ಒಡೆಯನ ಆರಾದನೆ ಮಾಡ್‌ವಯಿಂಗಡ ಕೂಡೆ ಅದ್‍ನ ಪಡೆಯುವಕ್ ಪೇಚಾಡ್.

²³ಮೂಡ ತಕ್ಕ್ ಪಿಂಞ ಪ್ರಯೋಜನ ಇಲ್ಲತ ಚರ್ಚೆ, ಬರಿ ಜಗಳಕ್ ಬಟ್ಟೆ ಕೊಡ್‍ಪಾಂದ್ ಗೊತ್ತಾನಗುಂಡ್, ಅದ್‍ಂಜ ನೀನ್ ದೂರ ಇರ್.

²⁴ದೇವಡ ಸೇವಕ ಜಗಳ ಮಾಡ್‌ವಕ್ಕಾಗ; ಆಂಡ ಬದ್‍ಲ್ ಅಂವೊ ಎಲ್ಲಾರ್‌ಕು ಕನಿಕರ ಉಳ್ಳಂವೊನಾಯಿತು, ಬೋದನೆ ಕೊಡ್‍ಪದ್‍ಲ್ ಗಟ್ಟಿ ಉಳ್ಳಂವೊನಾಯಿತು ಪಿಂಞ ತಾಳ್ಮೆ ಉಳ್ಳಂವೊನಾಯಿತು ಇರಂಡು.

²⁵ನೀಡ ಬೋದನೆಕ್ ಎದ್‍ರ್ ನಿಪ್ಪಯಿಂಗಕ್ ಸಮಾದಾನತ್‍ಲ್ ಅಯಿಂಗಡ ತಪ್ಪ್‌ನ ಎಣ್ಣಿ ಕೊಡ್‍ಪಂವೊನಾಯಿತಿರಂಡು. ಎನ್ನಂಗೆಣ್ಣ್‌ಚೇಂಗಿ ಒರ್ ಸಮಯ ಅಯಿಂಗ ಪಶ್ಚಾತಾಪ ಪಟ್ಟಿತ್, ಸತ್ಯತ್‍ನ ಅರಿಂಜಂಡ್ ಪುನಃ ದೇವಡ ಪಕ್ಕ ಬಪ್ಪಕ್ ದೇವ ಒರ್ ಸನ್ನಿವೇಶ ಕೊಡ್‍ಪ.

²⁶ಅಕ್ಕ ಅಯಿಂಗಕ್ ಬುದ್ದಿ ಬಂದಿತ್, ಸೈತಾನಂಡ ಕೆಣಿಯಿಂಜ ಬಚಾವ್ ಆಪ. ಎನ್ನಂಗೆಣ್ಣ್‌ಚೇಂಗಿ, ಸೈತಾನ ಅಯಿಂಗಳ ಪುಡ್‌ಚಿತ್, ಅಂವೊಂಡ ಇಚ್ಛೆಕ್ ಬಗ್ಗ್‌ಚಿಡ್‍ವನೆಕೆ ಮಾಡಿತುಂಡ್.