Read Kodava 2 ತಿಮೊಥೆಯ 3 Bible Online

2 ತಿಮೊಥೆಯ 3 - Kodava bible

2 ತಿಮೊಥೆಯ 3

¹ಈ ಲೋಕತ್‍ರ ಆಕೀರ್ ದಿವಸತ್‍ಲ್ ಕಠಿಣ ಕಾಲ ಬಪ್ಪಾಂದ್ ಗೇನ ಬೆಚ್ಚ.

²ಜನ ಅಯಿಂಗಯಿಂಗಳ ಕುಶಿಪಡ್‌ತ್‌ವ ಸ್ವಾರ್ತಂಗಳಾಯಿತ್, ದುಡ್ಡ್‌ರ ಮೇಲೆ ಅತಿ ಆಸೆ ಉಳ್ಳಯಿಂಗಳಾಯಿತ್, ಅಯಿಂಗಳ ಅಯಿಂಗಳೇ ಹೊಗಳ್‌ವಯಿಂಗಳಾಯಿತ್, ಆಂಗಾರ ಉಳ್ಳಯಿಂಗಳಾಯಿತ್, ಮರ್ಯಾದೆ ಕೊಡ್‍ಕತಯಿಂಗಳಾಯಿತ್, ಅಯಿಂಗಡ ಅಪ್ಪವ್ವಂಡ ತಕ್ಕ್‌ನ ಕ್‍ೕಕತಯಿಂಗಳಾಯಿತ್, ಸಹಾಯ ಮಾಡ್‍ನಯಿಂಗಳ ಗೇನ ಮಾಡತಯಿಂಗಳಾಯಿತ್, ಅಪವಿತ್ರಯಿಂಗಳಾಯಿತ್,

³ಪ್ರೀತಿ ಇಲ್ಲತಯಿಂಗಳಾಯಿತ್, ಮನ್ನಿಚಿಡತಯಿಂಗಳಾಯಿತ್, ಚಾಡಿ ಎಣ್ಣ್‌ವಯಿಂಗಳಾಯಿತ್, ತನ್ನಡಕ್ಕ ಇಲ್ಲತಯಿಂಗಳಾಯಿತ್, ಕ್ರೂರಿಯಂಗಳಾಯಿತ್, ನಲ್ಲದ್‍ನ ವಿರೋದಿಚಿಡುವಯಿಂಗಳಾಯಿತ್,

⁴ದುಷ್ಟ ಬುದ್ದಿ ಉಳ್ಳಯಿಂಗಳಾಯಿತ್, ಎಂತ ಆಪಾಂದ್ ಗೇನ ಮಾಡತೆ ತಪ್ಪ್ ಮಾಡ್‌ವಕ್ ದೈರ್ಯ ಉಳ್ಳಯಿಂಗಳಾಯಿತ್, ಒಂದು ಇಲ್ಲತ ಇಂಜತೇಂಗಿಯು ಎಲ್ಲಾ ಉಳ್ಳಯಿಂಗಡನೆಕೆ ಪೆರುಮೆ ಕಾಟ್‌ವಯಿಂಗಳಾಯಿತು, ದೇವನ ಕುಶಿಪಡ್‍ತತೆ ಅಯಿಂಗಯಿಂಗಳ ಕುಶಿಪಡ್‍ತ್‍ವಯಿಂಗಳಾಯಿತ್,

⁵ದೇವಡ ಮೇಲೆ ಬಕ್ತಿ ಉಳ್ಳಯಿಂಗಡನೆಕೆ ವೇಷ ಇಡ್‌ವ, ಆಚೇಂಗಿ, ದೇವಡ ಶಕ್ತಿನ ಅಯಿಂಗಡ ಒಳ್‍ಲ್ ಕ್ರಿಯೆ ಮಾಡ್‌ವಕ್ ಬುಡುಲೆ. ಈಂಗಳ ಬುಟ್ಟಿತ್ ನೀನ್ ದೂರ ಇರ್.

⁶ಈ ಜನ, ಪಾಪತ್‍ಲ್ ದುಂಬಿತ್ ಬೋರೆ ಬೋರೆ ಇಚ್ಛೆಲ್ ಚಿಕ್ಕಿತ್, ಎಕ್ಕಾಲು ಓದಿಯಂಡ್ ಉಂಡೇಂಗಿಯು ಸತ್ಯತ್‍ನ ಅರ್ಥ ಮಾಡ್‍ವಕಯ್ಯತ ಗಟ್ಟಿಯಿಲ್ಲತ ಮನಸ್ಸ್ ಉಳ್ಳ ಪೊಣ್ಣಾಳ್‍ರ ಮನೆಕ್ ನುಗ್ಗಿತ್, ಅಯಿಂಗಳ ಅಯಿಂಗಡ ಪುಡ್‍ತತ್‍ಲ್ ಬೆಚ್ಚಿತ್‌ಪ್ಪ.

⁸ಯನ್ನ, ಯಂಬ್ರ[2] ಎಣ್ಣ್‌ವಯಿಂಗ ಮೋಶೇಕ್ ಎದ್‍ರ್ ನಿಂದನೆಕೆ, ಈಂಗಳು ಸತ್ಯಕ್ ಎದ್‍ರ್ ನಿಂದಿತುಂಡ್. ಈ ಮನುಷ್ಯಂಗ ಕೆಟ್ಟ ಬುದ್ದಿಯುಳ್ಳಯಿಂಗಳು, ನಂಬಿಕೇರ ವಿಷಯತ್‍ಲ್ ಚೋತ್‍ಪೋನಯಿಂಗಳೂ ಆಯಿತುಂಡ್.

⁹ಆಚೇಂಗಿಯು, ಈಂಗ ಇನ್ನನೆ ದುಂಬ ದೂರ ಪೋಪಕಯ್ಯುಲೆ. ಯನ್ನ ಪಿಂಞ ಯಂಬ್ರಂಡ ಚಲ್ಲಕಳಿ ಎನ್ನನೆ ಗೊತ್ತಾಚೋ ಅನ್ನನೆ ಈ ಮನುಷ್ಯಂಗಡ ಚಲ್ಲಕಳಿಯು ಒರ್ ದಿನ ಗೊತ್ತಾಪ.

¹⁰ಆಚೇಂಗಿ ತಿಮೊಥೆಯ, ನಾಡ ಬೋದನೆ, ಬದ್‍ಕ್‍ರ ಬಟ್ಟೆ, ನಾಡ ಬದ್‍ಕ್‍ರ ನೋಕ, ನಾಡ ನಂಬಿಕೆ, ದೀರ್ಗ ಸಮಾದಾನ, ಪ್ರೀತಿ, ಪೊರುಮೆನ,

¹¹ಅಂತಿಯೋಕ್ಯ, ಇಕೋನ್ಯ ಪಿಂಞ ಲುಸ್ತ್ರ ಎಣ್ಣುವ ಪಟ್ಟಣತ್‍ಲ್ ನಾಕ್ ನಡ್ಂದ ದೇವಡ ವಿಷಯಕಾಯಿತ್ ಕ್‍ಟ್ಟ್‌ನ ಹಿಂಸೆ ಪಿಂಞ ಕಷ್ಟವೆಲ್ಲ ನೀಕ್ ಚಾಯಿತೆ ಗೊತ್ತುಂಡ್. ಅಂತು, ದೇವ ನನ್ನ ಈ ಎಲ್ಲಾ ಕಷ್ಟತ್ಂಜ ಬಚಾವ್ ಮಾಡ್‍ಚಿ.

¹²ಎನ್ನನಾಚೇಂಗಿಯು, ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಟ್ಟಿತ್ ದೇವಡ ಬಕ್ತಿಲ್ ಬದ್‍ಕಂಡೂಂದ್ ಆಸೆ ಪಡ್‌ವಯಿಂಗ ಹಿಂಸೆನ ಅನುಬವಿಚಿಡುವ.

¹³ಆಚೇಂಗಿ, ದುಷ್ಟಂಗ ಪಿಂಞ ವಂಚಕಂಗ, ಮೋಸ ಮಾಡಿಯಂಡ್, ಅಯಿಂಗಳು ಮೋಸ ಪೋಯಂಡ್, ಇಕ್ಕ ಉಳ್ಳ ಸ್ತತಿಯಿಂಜ ಇಂಞು ಪಾಳಾಯಿ ಪೋಪ.

¹⁴ಆಚೇಂಗಿ, ಇದೆಲ್ಲ ನೀಕ್ ಪಡಿಪ್‍ಚಿಟ್ಟದ್ ದಾರ್‍ೕಂದ್ ಗೊತ್ತಾನಗುಂಡ್, ನೀನ್ ಪಡಿಚಿತ್, ದೃಡವಾಯಿತ್ ನಂಬ್‍ನ ಬೋದನೆಲ್ ನೆಲೆಗೊಂಡಿರ್.

¹⁵ಯೇಸು ಕ್ರಿಸ್ತನ ನಂಬುವ ಮೂಲಕ ಕ್‍ಟ್ಟ್‌ವ ರಕ್ಷಣೆನ ನೀನ್ ಪಡೆಯುವಕ್, ನೀನ್ ಬಾಲ್ಯ ವಯಸಿಂಜ ಪಡಿಚ ಪವಿತ್ರವಾನ ದೇವಡ ವಾಕ್ಯ ನೀಕ್ ಜ್ಞಾನ ತಂದಿತುಂಡ್‍ೕಂದ್ ನೀಕ್ ಗೊತ್ತುಂಡ್.

¹⁶ದೇವಡ ವಾಕ್ಯವೆಲ್ಲಾ ದೇವಡ ಆತ್ಮತ್ಂಜ ಉರ್‍ಪ್‍ನದ್; ದೇವಡ ಮನುಷ್ಯ ಯೋಗ್ಯನಾಯಿತ್, ಎಲ್ಲಾ ನಲ್ಲ ಕೆಲಸ ಮಾಡ್‌ವಕ್ ಲಾಯಕಾಯಿತ್ ಇಪ್ಪಕ್,

¹⁷ಬೋದನೆ ಕೊಡ್‍ಪಕ್, ಕಂಡನೆ ಮಾಡ್‌ವಕ್, ತಪ್ಪ್‌ನ ಸರಿಪಡ್‍ತ್‍ವಕ್, ನೀತಿನ ಪಡಿಪ್‍ಚಿಡ್‍ವಕ್ ಪ್ರಯೋಜನವಾಯಿತುಂಡ್.