Read Kodava ತೀತ 1 Bible Online

ತೀತ 1 - Kodava bible

ತೀತ 1

¹ದೇವಡ ಸೇವಕನಾಯಿತು, ಯೇಸು ಕ್ರಿಸ್ತಂಡ ಅಪೊಸ್ತಲನಾಯಿತು ಉಳ್ಳ ಪೌಲನಾನ ನಾನ್, ನಂಗಕುಳ್ಳ ಒರೇ ತರ ನಂಬಿಕೇರೆ ಮೂಲಕ ಕ್ರಿಸ್ತನಗುಂಡ್ ನಾಕ್ ನೇರಾನ ಮೋಂವೊನಾಯಿತ್ ಉಳ್ಳ ತೀತಂಗ್ ಒಳ್‍ದ್‍ವ ಕಾಗದ ಇದ್.

²ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ಕರುಣೆ ಪಿಂಞ ಸಮಾದಾನ ಕ್‍ಟ್ಟಡ್.

³ದೇವ ಗೊತ್ತ್ ಮಾಡ್‍ನಯಿಂಗಡ ನಂಬಿಕೇನ ಸ್ತಿರಪಡ್‌ತ್‍ವಕ್ ಪಿಂಞ ಸತ್ಯತ್‍ರ ಮೂಲಕ ಅಯಿಂಗಕ್ ದೇವಡ ಮೇಲೆ ಬಕ್ತಿನ ಬೊಳ್‍ತ್‍ವಕ್ ದೇವ ನನ್ನ ಗೊತ್ತ್ ಮಾಡ್‍ಚಿ. ಪೊಟ್ಟ್ ಪರಿಯತ ದೇವ, ಪಂಡಿಂಜೇ ನಿತ್ಯ ಜೀವತ್‍ನ ವಾಗ್ದಾನ ಮಾಡಿತ್, ಅದ್ಂಡ ಮೂಲಕ ನಿರೀಕ್ಷೆ ಬಪ್ಪನೆಕೆ ಮಾಡ್‍ಚಿ.

⁴ತಕ್ಕ ಸಮಯತ್‍ಲ್ ನಂಗಡ ರಕ್ಷಕನಾನ ದೇವಡ ಆಜ್ಞೆರ ಪ್ರಕಾರ ನಾಕ್ ಒಪ್ಪ್‌ಚಿಟ್ಟ ಬೋದನೆರಗುಂಡ್ ಅಂವೊಂಡ ತಕ್ಕ್‌ನ ಕಾಂಬ್‍ಚಿಟ್ಟತ್.

⁵ನಂಗ ಕ್ರೇತ ದ್ವೀಪತ್‍ಲ್ ಮಾಡಿಯಂಡಿಂಜ ದೇವಡ ಸೇವೇನ ಪೂರ್ತಿಮಾಡ್‌ವಕಾಯಿತು, ನಾನ್ ನೀಕ್ ಎಣ್ಣ್‌ನನೆಕೆ ಪಟ್ಟಣತ್ಂಜ ಪಟ್ಟಣಕ್ ಸಬೆರ ಪೆರಿಯಯಿಂಗಳ ನೇಮಿಚಿಡ್‌ವಕಾಯಿತು ನಾನ್ ನಿನ್ನ ಅಲ್ಲಿ ಬುಟ್ಟಿತ್ ಬಂದಿಯೆ.

⁶ನೀನ್ ನೇಮಿಚಿಡುವ ಸಬೆರ ಪೆರಿಯಯಿಂಗ ಎನ್ನನೆ ಇರಂಡೂಂದ್ ಎಣ್ಣ್‌ಚೇಂಗಿ: ಅಂವೊ ದಾರೂ ಕುತ್ತ ಪರಿಯತನೆಕೆ ಇಕ್ಕಂಡು, ಅಂವೊ ಒರೇ ಒರ್ ಪೊಣ್ಣ್‌ರ ವಡಿಯನಾಯಿತ್ ಇರಂಡು, ಅಂವೊಂಡ ಮಕ್ಕ ದೇವಡ ಮೇಲೆ ನಂಬಿಕೆ ಉಳ್ಳಯಿಂಗಳಾಯಿತ್ ಇರಂಡು. ಅಯಿಂಗ ತನ್ನಡಕ್ಕ ಇಲ್ಲತಯಿಂಗ ಪಿಂಞ ಅಪ್ಪವ್ವಂಗಡ ತಕ್ಕ್ ಕೇಕತಯಿಂಗಾಂದ್ ದಾರೂ ಎಣ್ಣತ ಮಕ್ಕ ಉಳ್ಳ ಒಬ್ಬನಾಯಿತ್ ಇರಂಡು.

⁷ಸಬೆರ ಪೆರಿಯಯಿಂಗ ದೇವಡ ಮಕ್ಕಳ ಚಾಯಿತೆ ನಡ್‍ತಿಯಂಡ್ ಪೋಪ ಜವಾಬ್ದಾರಿ ಉಳ್ಳಂವೊನಾಯಿತ್ ಇಪ್ಪ. ಆನಗುಂಡ್, ದಾರೂ ಕುತ್ತ ಪರಿಯುವಕ್ ಕಯ್ಯತನೆಕೆ ಅಂವೊಂಡ ಬದ್‍ಕ್ ಇರಂಡು. ಅಂವೊಂಡ ಕುಶೀರನೆಕೆ ಮಾಡ್‍ವಂವೊನಾಯಿತು, ಬೆರಿಯ ಚೆಡಿ ಬಪ್ಪಂವೊನಾಯಿತು, ಕುಡಿಪಂವೊನಾಯಿತು, ಜಗಳ ಮಾಡ್‌ವಕ್ ಕುಶಿಯುಳ್ಳಂವೊನಾಯಿತು, ದುಡ್ಡ್‌ರ ಮೇಲೆ ಆಸೆ ಉಳ್ಳಂವೊನಾಯಿತು ಇಪ್ಪಕ್ಕಾಗ.

⁸ಆಂಡ ಬದ್‍ಲ್ ಅಂವೊ ಜನಳ ಸತ್ಕಾರ ಮಾಡ್‍ವಂವೊನಾಯಿತು, ನಲ್ಲದ್‍ನ ಪ್ರೀತಿಚಿಡ್‌ವಂವೊನಾಯಿತು, ತನ್ನಡಕ್ಕ ಉಳ್ಳಂವೊನಾಯಿತು, ನೀತಿವಂತಂವೊನಾಯಿತು ಪವಿತ್ರ ಉಳ್ಳಂವೊನಾಯಿತು, ಶಿಸ್ತ್ ಉಳ್ಳಂವೊನಾಯಿತು ಇರಂಡು.

⁹ಅಂವೊ, ನೇರಾನ ಸತ್ಯ ಉಪದೇಶತ್‍ನ ಚಾಯಿತೆ ಬೋದನೆ ಮಾಡಿತ್, ಜನಕ್ ಪುರ್‌ಡ್ ಕೊಡ್‌ತಿತ್, ದೇವಡ ವಾಕ್ಯಕ್ ವಿರೋದವಾಯಿತ್ ಬೋದನೆ ಮಾಡ್‌ವಯಿಂಗಕ್ ತಕ್ಕ ಉತ್ತರ ಕೊಡ್‍ಪಕ್ ಅಂವೊ ಪಡಿಚಿತುಳ್ಳ ಸತ್ಯವಂತ ಬೋದನೆಲ್ ಸ್ತಿರವುಳ್ಳಂವೊನಾಯಿತು ಇರಂಡು.

¹⁰ದುಂಬ ಜನ, ಮುಕ್ಯವಾಯಿತ್, ರಕ್ಷಣೆ ಕ್‍ಟ್ಟುವಕ್ ಸುನ್ನತಿ ಮಾಡಂಡೂಂದ್ ಎಣ್ಣಿಯಂಡುಳ್ಳ ಯೆಹೂದ್ಯಂಗ, ಏದ್ ಅದಿಕಾರಕು ಬಗ್ಗಿತ್ ನಡ್‍ಕತಯಿಂಗಳಾಯಿತ್, ಬೋಂಡತ ತಕ್ಕ್ ಪರ್ಂದಂಡ್, ಜನಳ ಮೋಸಮಾಡ್‍ವಯಿಂಗಳಾಯಿತ್ ಉಂಡ್.

¹¹ಅಯಿಂಗ ಬೋದನೆ ಮಾಡತನೆಕೆ ಅಯಿಂಗಳ ನಿಪ್ಪ್‌ಚಿಡಂಡು. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದುಡ್ಡ್ ಮಾಡ್‌ವಕಾಯಿತ್, ಸತ್ಯ ಅಲ್ಲತ ಬೋದನೆನ ಸರಿಯಾನ ಬೋದನೇಂದ್ ಎಣ್ಣಿತ್, ದುಂಬ ಕುಟಂಬತ್‍ನ ಪಾಳ್‍ಮಾಡಿಯಂಡುಂಡ್.

¹²ಕ್ರೇತ ದ್ವೀಪತ್‍ರ ಜನ, ಎಕ್ಕಾಲು ಪೊಟ್ಟ್ ಪರಿಯುವಯಿಂಗ. ದುಷ್ಟ ಮೃಗತ್‍ರನೆಕೆ ಮೋಸ ಮಾಡ್‌ವಯಿಂಗ ಪಿಂಞ ಹೊಟ್ಟೆಬಾಕೆ ಸೋಮಾರಿಯಂಗಾಂದ್, ಕ್ರೇತ ದ್ವೀಪಕ್ ಕೂಡ್‍ನ ಅಯಿಂಗಡ ಒರ್ ಪ್ರವಾದಿ ಅಯಿಂಗಡ ವಿಷಯತ್‍ನ ಇನ್ನನೆ ಎಣ್ಣಿತುಂಡ್.

¹³ಇನ್ನನೆ ಅಂವೊ ಎಣ್ಣ್‌ನದ್ ಸತ್ಯವಾಯಿತುಂಡ್. ಆನಗುಂಡ್ ಅಯಿಂಗಳ ಜೋರ್ ಮಾಡಿತ್, ಅಯಿಂಗಡ ನಂಬಿಕೇನ ಸ್ತಿರಪಡ್‍ತ್.

¹⁴ಅಯಿಂಗ ಯೆಹೂದ್ಯಂಗಡ ಕಟ್ಟ್‌ಕಥೆಕು, ಸತ್ಯತ್‍ರ ಬೋದನೆನ ತಿರಸ್ಕಾರ ಮಾಡ್‌ವ ಜನತ್‍ರ ಬೋದನೆಕ್ ಕೆಮಿ ಕೊಡ್‍ಕಂಡಾಂದು ಎಚ್ಚರ ಮಾಡ್.

¹⁵ದೇವಡ ಮಕ್ಕಳಾಯಿತ್ ಹೃದಯತ್‍ಲ್ ಶುದ್ದವಾಯಿತುಳ್ಳಯಿಂಗಕ್ ಎಲ್ಲಾ ಶುದ್ದವಾಯಿತ್‌ಪ್ಪ. ಆಚೇಂಗಿ, ಹೃದಯತ್‍ಲ್ ಅಶುದ್ದವಾಯಿತ್ ದೇವಡ ಮೇಲೆ ನಂಬಿಕೆ ಬೆಕ್ಕತಯಂಗಕ್ ಏದು ಶುದ್ದವಾಯಿತ್ ಇಪ್ಪುಲೆ. ಅಯಿಂಗಡ ಬುದ್ದಿ ಪಿಂಞ ಮನಸಾಕ್ಷಿ ಅಶುದ್ದವಾಯಿತೇ ಇಪ್ಪ.

¹⁶ಅಯಿಂಗ ದೇವನ ಗೊತ್ತುಂಡ್‍ೕಂದ್ ಎಣ್ಣುವ, ಆಚೇಂಗಿ ಅಯಿಂಗ ಮಾಡ್‌ವ ಕ್ರಿಯೆ ಅಯಿಂಗಕ್ ದೇವ ಗೊತ್ತ್‌ಲ್ಲೇಂದ್ ಕಾಟಿತಪ್ಪ. ಅಯಿಂಗ, ಜನ ದ್ವೇಶ ಮಾಡ್‌ವಯಿಂಗಳಾಯಿತು, ಏದ್ ಅದಿಕಾರಕು ಬಗ್ಗಿತ್ ನಡ್‍ಕತಯಿಂಗಳಾಯಿತು ಉಂಡ್. ಆನಗುಂಡ್ ಅಯಿಂಗ ಏದ್ ನಲ್ಲ ಕ್ರಿಯೆ ಮಾಡ್‌ವಕು ಯೋಗ್ಯತೆ ಇಲ್ಲತಯಿಂಗಳಾಯಿತುಂಡ್.