Read Kodava ಫಿಲೆಮೋನ 1 Bible Online

ಫಿಲೆಮೋನ 1 - Kodava bible

ಫಿಲೆಮೋನ 1

¹ಕ್ರಿಸ್ತ ಯೇಸುರ ವಿಷಯತ್ ಕೈದಿಯಾಯಿತುಳ್ಳ ಪೌಲುನು, ನಂಗಡ ತಮ್ಮಣನಾನ ತಿಮೊಥೆಯನು, ನಂಗಕ್ ದುಂಬ ಪ್ರೀತಿಯುಳ್ಳ, ನಂಗಡ ಕೂಡೆ ಸೇವೆ ಮಾಡಿಯಂಡುಳ್ಳ ಫಿಲೆಮೋನಂಗ್,

²ನಂಗಡ ತಂಗೆ ಅಪ್ಫಿಯಾ, ನಂಗಡನೆಕೆ ದೇವಡ ಸೇವೆ ಮಾಡಿಯಂಡುಳ್ಳ ಅರ್ಖಿಪ್ಪ ಎಣ್ಣುವಯಿಂಗಕ್ ಪಿಂಞ ನೀಡ ಕೂಡೆ ಮನೆಲ್ ಕೂಡುವ ಸಬೇಕ್ ಒಳ್‍ದ್‍ವ ಕಾಗದ ಇದ್.

³ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

⁴ಕ್ರಿಸ್ತ ಯೇಸುರ ಮೇಲೆ ಉಳ್ಳ ನಂಬಿಕೆ ಪಿಂಞ ದೇವಡ ಮಕ್ಕಡ ಮೇಲೆ ಉಳ್ಳ ನೀಡ ಪ್ರೀತಿನ ನಾನ್ ಕ್‍ೕಟಿತ್, ನಾನ್ ಪ್ರಾರ್ಥನೆ ಮಾಡ್‌ವಕ, ಎಕ್ಕಲೂ ನೀಕಾಯಿತ್ ದೇವಕ್ ವಂದನೆ ಎಣ್ಣಿಯಂಡುಳ್ಳ.

⁶ನೀನ್ ನೀಡ ನಂಬಿಕೇನ ಬೋರೆಯಿಂಗಡ ಕೂಡೆ ಪಾಲ್‍ಮಾಡ್‌ವನೆಕೆ, ಅಯಿಂಗ, ನಂಗಕ್ ಕ್ರಿಸ್ತಂಡಲ್ಲಿ ಉಳ್ಳ ಎಲ್ಲಾ ನಲ್ಲದ್‍ನ ಪೂರ್ತಿಯಾಯಿತ್ ಗೊತ್ತ್ ಮಾಡಂಡೂಂದ್ ಪ್ರಾರ್ಥನೆ ಮಾಡ್‌ವಿ.

⁷ನಾಡ ಪ್ರೀತಿರ ಫಿಲೆಮೋನನೇ, ನೀಡಗುಂಡ್ ದೇವಡ ಮಕ್ಕಡ ಹೃದಯಕ್ ದುಂಬ ಒತ್ತಾಸೆ ಆನಗುಂಡ್, ನೀಡ ಪ್ರೀತಿಯಿಂಜ ನಂಗಕ್ ದುಂಬ ಕುಶಿಯು ಸಮಾದಾನವು ಆಚಿ.

⁸ಆನಗುಂಡ್, ನಾನ್ ಇಕ್ಕ ವಯಸ್ಸಾನಂವೊನಾಯಿತ್ ಪಿಂಞ ಕ್ರಿಸ್ತ ಯೇಸುಕಾಯಿತ್ ಕೈದಿಯಾಯಿತುಳ್ಳಗುಂಡು, ನೀನ್ ಎಂತ ಮಾಡಂಡೂಂದ್ ನೀಕ್ ದೈರ್ಯವಾಯಿತ್ ಹುಕ್‌ಮ್ ಕೊಡ್‍ಪಕ್ ದೈರ್ಯ ಉಂಡೇಂಗಿಯು, ನಾನ್ ಅನ್ನನೆ ಮಾಡತೆ ಪ್ರೀತಿಲ್ ಬೋಡುವಿ.

¹⁰ಅದ್ ಎಂತ ಎಣ್ಣ್‌ಚೇಂಗಿ, ನಾನ್ ಕೈದಿಯಾಯಿತ್‌ಪ್ಪಕ ಕ್ರಿಸ್ತಂಡ ನಲ್ಲ ಸುದ್ದಿನ ನಂಬಿತ್, ನಾಡ ಮೋಂವೊಂಡನೆಕೆ ಆಯಿತುಳ್ಳ ಒನೇಸಿಮಂಗಾಯಿತ್ ನಿನ್ನ ಬೋಡುವಿ.

¹¹ಮಿಂಞ ಅಂವೊ ನೀಕ್ ಒರ್ ಪ್ರಯೋಜನವಾಯಿತು ಇಂಜಿತ್‌ಲ್ಲೆ. ಆಚೇಂಗಿ ಇಕ್ಕ ಅಂವೊ ನಾಕ್ ಪಿಂಞ ನೀಕ್ ದುಂಬ ಪ್ರಯೋಜನ ಉಳ್ಳಂವೊನಾಯಿತ್ ಬದ್‍ಲಾಚಿ.

¹²ನಾಕ್ ದುಂಬ ಪ್ರೀತಿ ಉಳ್ಳಂವೊನಾಯಿತುಳ್ಳ ಅಂವೊನ, ನೀಡ ಪಕ್ಕ ನಾನ್ ಅಯಿಪಿ.

¹³ಕ್ರಿಸ್ತಂಡ ನಲ್ಲ ಸುದ್ದಿರಗುಂಡ್ ಕೈದಿಯಾಯಿತುಳ್ಳ ನಾಕ್ ಸೇವೆ ಮಾಡ್‌ವಕಾಯಿತ್ ನೀಕ್ ಬದ್‍ಲಾಯಿತ್ ಅಂವೊನ ನಾಡ ಪಕ್ಕ ಬೆಕ್ಕಂಡೂಂದ್ ನಾಡ ಆಸೆ.

¹⁴ಆಚೇಂಗಿಯು ನೀನ್ ಮಾಡ್‌ವ ನಲ್ಲ ಸೇವೇನ ಒತ್ತಾಯ ಮಾಡಿತ್ ಅಲ್ಲ, ಕುಶಿಯಿಂಜ ಮಾಡಂಡೂಂದ್ ಪಿಂಞ ನೀಡ ಒಪ್ಪಿಗೆ ಇಲ್ಲತೆ ಏದ್ ಮಾಡ್‌ವಕು ನಾಕ್ ಮನಸ್ಸಿಲ್ಲೆ.

¹⁵ಅಂವೊ ಎಕ್ಕಲೂ ನೀಡಂವೊನಾಯಿತ್ ಇಪ್ಪಕು, ಆಚೇಂಗಿ ಇಂಞು ಮಿಂಞಕ್ ಒರ್ ಅಡಿಯಾಳಾಯಿತ್ ಅಲ್ಲ ಅಡಿಯಾಳ್‍ಕಿಂಜ ಬಲ್ಯಂವೊನಾಯಿತ್, ನೀಡ ಪ್ರೀತಿಯುಳ್ಳ ತಮ್ಮಣನಾಯಿತ್ ಇಕ್ಕಂಡೂಂದ್ ಚೆನ್ನ ಕಾಲ ನಿನ್ನ ಬುಟ್ಟಿತ್ ಪೋಪಕ್ ದೇವ ಮಾಡ್‍ಚೀಂದ್ ನಾನ್ ಗೇನ ಮಾಡ್‌ವಿ.

¹⁶ಅಂವೊ, ನಾಕೇ ಇಚ್ಚಕ್ ಪ್ರೀತಿಯುಳ್ಳ ತಮ್ಮಣನಾಯಿತ್ ಇಂಜತೇಂಗಿ, ನೀಕ್ ತಡೀರ ಪ್ರಕಾರವು, ಒಡೆಯಂಡಲ್ಲಿಯು ಒರ್ ತಮ್ಮಣನಾಯಿತ್ ಎಚ್ಚಕ್ ಪ್ರೀತಿಲ್ ಇಪ್ಪ.

¹⁷ಆನಗುಂಡ್, ನೀನ್ ನನ್ನ ನೀಡಲ್ಲಿ ಐಕ್ಯ ಉಳ್ಳಂವೊನಾಯಿತ್ ಗೇನಮಾಡಿತುಂಡೇಂಗಿ, ನಾನ್ ನೀಡ ಪಕ್ಕ ಬಪ್ಪಕ ನನ್ನ ನೀನ್ ಎನ್ನನೆ ಸ್ವೀಕಾರ ಮಾಡ್‌ವಿಯೋ ಅನ್ನನೆ ಅಂವೊನ ಸಹ ಸ್ವೀಕಾರ ಮಾಡ್.

¹⁸ಅಂವೊ ನೀಕ್ ಎಂತೇಂಗಿಯು ಕೆಟ್ಟದ್ ಮಾಡಿತುಂಡೇಂಗಿ, ಅಥವ ನೀಡ ಪಕ್ಕ ಎಂತೇಂಗಿ ಸಾಲ ಎಡ್‍ತಿತ್ ಉಂಡೇಂಗಿ ಅದ್‍ನ ನಾಡ ಲೆಕ್ಕಕ್ ಇಡ್.

¹⁹ಪೌಲನಾನ ನಾನೇ ನಾಡ ಸ್ವಂತ ಕೈಯಿಂಜ ಇದ್‍ನ ಒಳ್‍ದಿಯೆ. ನಾನೇ ಅದ್‍ನ ವಾಪಸ್ ತಪ್ಪಿ. ನೀಡ ಆತ್ಮೀಯ ವಿಷಯತ್‍ಲ್ ನೀನೇ ನಾಕ್ ಸಾಲ ಕೊಡ್‍ಕಂಡೂಂದ್ ನಾನ್ ನೀಕ್ ಎಣ್ಣಂಡುವಾ?

²⁰ಅಕ್ಕು, ಪ್ರೀತಿರ ಫಿಲೆಮೋನನೇ, ಕ್ರಿಸ್ತಂಡಗುಂಡ್ ನೀಡಲ್ಲಿ ನಾಕ್ ಸಮಾದಾನ ಆಡ್. ಕ್ರಿಸ್ತಂಗಾಯಿತ್ ನಾಡ ಹೃದಯತ್‍ನ ನೀನ್ ಕುಶಿಪಡ್‍ತ್.

²¹ನಾಡ ತಕ್ಕ್‌ನ ಕ್‍ೕಟಿತ್, ಅದ್ಂಗಿಂಜ ದುಂಬ ಮಾಡ್‌ವಿಯಾಂದ್ ನಾಕ್ ಗೊತ್ತುಳ್ಳಗುಂಡು ಪಿಂಞ ನೀನ್ ಇದ್ಂಗ್ ಒತ್ತೊವಿಯಾಂದ್ ಉಳ್ಳ ನಂಬಿಕೆಯಿಂಜ ನಾನ್ ಈ ಕಾಗದತ್‍ನ ಒಳ್‍ದಿಯೆ.

²²ನೀಡ ಪ್ರಾರ್ಥನೆನ ದೇವ ಕ್‍ೕಟಿತ್ ನನ್ನ ನೀಡ ಪಕ್ಕ ಬಪ್ಪಕ್ ಅನುಗ್ರಹ ಮಾಡ್‌ವಾಂದ್ ನಾನ್ ನಂಬಿಯಂಡ್ ಉಳ್ಳ. ಆನಗುಂಡ್ ನಾಕ್ ಒರ್ ಕೋಂಬರೆನ ನೀನ್ ತಯಾರ್ ಮಾಡ್.

²³ಯೇಸು ಕ್ರಿಸ್ತಂಗಾಯಿತ್ ನಾಡ ಕೂಡೆ ಕೈದಿಯಾಯಿತುಳ್ಳ ಎಪಫ್ರ ಪಿಂಞ ನಾಡ ಕೂಡೆ ದೇವಡ ಸೇವಕಂಗಳಾಯಿತುಳ್ಳ ಮಾರ್ಕ, ಅರಿಸ್ತಾರ್ಕ, ದೇಮ ಪಿಂಞ ಲೂಕ ಎಣ್ಣ್‌ವಯಿಂಗ ಎಲ್ಲಾರು ವಂದನೆ ಎಣ್ಣಿಯಂಡುಂಡ್.

²⁵ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಡ ಆತ್ಮತ್‍ರ ಕೂಡೆ ಇಕ್ಕಡ್.