Read Kodava ಇಬ್ರಿಯ 1 Bible Online

ಇಬ್ರಿಯ 1 - Kodava bible

ಇಬ್ರಿಯ 1

¹ಪಂಡ್ ಕಾಲತ್‍ಲ್ ದೇವ ನಂಗಡ ಮುತ್ತಜ್ಜಂಗಡ ಕೂಡೆ ಪ್ರವಾದಿಯಂಗಡ ಮೂಲಕ ಬೋರೆ ಬೋರೆ ಸಮಯತ್‍ಲ್ ಬೋರೆ ಬೋರೆ ರೀತಿಲ್ ತಕ್ಕ್ ಪರ್ಂದಂಡಿಂಜತ್.

²ಆಚೇಂಗಿ, ಕಡೆ ಕಾಲವಾನ ಇಕ್ಕ, ಅಂವೊಂಡ ಮೋಂವೊಂಡ ಮೂಲಕ ನಂಗಡ ಕೂಡೆ ತಕ್ಕ್ ಪರ್‌ಂದಿತುಂಡ್. ಇಂವೊನ ಎಲ್ಲಾಂಗು ಹಕ್ಕ್‌ದಾರನಾಯಿತ್ ನೇಮಿಚಿಟ್ಟಿತ್, ಇಂವೊನಗುಂಡ್ ಇಡೀ ಲೋಕತ್‍ನ ಸೃಷ್ಟಿ ಮಾಡ್‍ಚಿ.

³ಇಂವೊ ದೇವಡ ಮಹಿಮೇರ ಬೊಳಿಯು, ಅಂವೊಂಡ ರೂಪತ್‍ರ ಪ್ರತಿಮೆಯುವಾಯಿತುಂಡ್. ಅದಲ್ಲತೆ, ಎಲ್ಲಾನ ಅಂವೊಂಡ ಶಕ್ತಿ ದುಂಬ್‍ನ ವಾಕ್ಯತ್‍ರಗುಂಡ್ ಪೊರ್‍ತಂಡ್ ಅಂವೊನಗುಂಡ್ ನಂಗಡ ಪಾಪತ್‍ನ ಕಳೆಯುವಕಾಯಿತ್ ಶುದ್ದ ಮಾಡ್‌ವ ಕ್ರಿಯೇನ ಮಾಡ್‍ಚಿ. ಪಿಂಞ ಪರಲೋಕತ್‍ಲ್ ಉಳ್ಳ ಮಹಿಮೆ ದುಂಬ್‍ನಂವೊಂಡ ಬಲ್‌ತೆ ಬರಿಲ್ ಅಳ್‌ತತ್.

⁴ಇಂವೊ, ದೇವದೂತಂಗಕು ಬಲ್ಯಂವೊನಾಯಿತ್ ಎಚ್ಚಕ್ ಪೆದ ಎಡ್‌ತಂಡತೋ, ಅಚ್ಚಕ್ ಬಲ್ಯದಾಯಿತ್ ಅಯಿಂಗಕಿಂಜ ಗನ ಪಟ್ಟಂವೊನಾಚಿ.

⁵ಎನ್ನನೆ ಎಣ್ಣ್‌ಚೇಂಗಿ: ನೀನ್ ನಾಡ ಮೋಂವೊ, ಇಂದ್ ನಾನ್ ನೀಡ ಅಪ್ಪನಾಯೇಂದ್ ಪಿಂಞ, ನಾನ್ ನೀಡ ಅಪ್ಪನಾಯಿತಿಪ್ಪಿ, ನೀನ್ ನಾಡ ಮೋಂವೊನಾಯಿತ್ ಇಪ್ಪಿಯಾಂದ್[2] ಅಂವೊ ಅಂವೊಂಡ ದೂತಂಗಡಲ್ಲಿ ದಾರ್‌ಕಾಚೇಂಗಿಯು ಎಕ್ಕಾಚೇಂಗಿಯು ಎಣ್ಣಿತುಂಡಾ?

⁶ಇಂಞು, ದೇವ ತಾಂಡ ಆದ್ಯ ಮೋಂವೊನ ಈ ಲೋಕತ್‍ಲ್ ಅಯಿಪಕ, ದೇವದೂತಂಗ ಎಲ್ಲಾರು ಅಂವೊನ ಆರಾದನೆ ಮಾಡಂಡೂಂದ್[3] ಎಣ್ಣ್‌ಚಿ.

⁷ದೇವದೂತಂಗಡ ವಿಷಯತ್: ದೇವ ತಾಂಡ ದೂತಂಗಳ ಗಾಳಿಯಾಯಿತು, ತಾಂಡ ಸೇವಕಂಗಳ ತಿತ್ತ್‌ರ ಜ್ವಾಲವಾಯಿತು ಮಾಡ್‍ಚೀಂದ್[4] ಎಣ್ಣಿತುಂಡ್.

⁸ಆಚೇಂಗಿ ತಾಂಡ ಮೋಂವೊಂಡ ವಿಷಯತ್: ಓ ದೇವಾ, ನೀಡ ಸಿಂಹಾಸನ ಕಾಲಕಾಲಕು ಇಪ್ಪ, ನೀಡ ರಾಜ್ಯತ್‍ನ ನೀತಿರಗುಂಡ್ ಆಳುವಿಯ,

⁹ನೀನ್ ನೀತಿನ ಪ್ರೀತಿ ಮಾಡಿತ್, ದುಷ್ಟತನತ್‍ನ ದ್ವೇಶ ಮಾಡಿತುಳ್ಳಿಯ; ಆನಗುಂಡ್, ಓ ದೇವ, ನೀಡ ಕೂಟ್‌ಕಾರಂಗಕಿಂಜ ದುಂಬ ಜಾಸ್ತಿಯಾಯಿತ್ ನೀಡ ದೇವ ನಿನ್ನ ಕುಶೀರ ತೈಲತ್‍ರಗುಂಡ್ ಅಬಿಷೇಕ ಮಾಡ್‍ಚಿ.[5]

¹⁰ಒಡೆಯನೇ, ನೀನ್ ಆದ್ಯವಾಯಿತ್ ಈ ಲೋಕಕ್ ಅಡಿಪಾಯ ಇಟ್ಟಿಯ, ಬಾನತ್‍ನ ನೀಡ ಕೈಯಿಂಜ ಮಾಡಿಯಾಂದ್ ಸಹ ದೇವಡ ವಾಕ್ಯತ್‍ಲ್ ಎಣ್ಣಿತುಂಡ್;

¹¹ಅದೆಲ್ಲಾ ನಾಶ ಆಯಿಪೋಪ; ಆಚೇಂಗಿ ನೀನ್ ನೆಲಗೊಂಡಿಪ್ಪಿಯ. ಅದೆಲ್ಲಾ ಒರ್ ಬಟ್ಟೇರನೆಕೆ ಪಳೆಯದಾಪ;

¹²ಒರ್ ಮೇಲಂಗಿರನೆಕೆ ನೀನ್ ಅದ್‍ನ ಸುತ್ತುವಿಯ; ಅದ್ ಇಲ್ಲತಾಯಿ ಪೋಪ; ಆಚೇಂಗಿ ನೀನ್ ಬದ್‍ಲಾಪುಲೆ; ನೀಡ ಬದ್‍ಕ್‍ರ ಕಾಲ ಅಂತ್ಯ ಆಪುಲೇಂದ್[6] ಸಹ ಎಣ್ಣಿತುಂಡ್.

¹³ಅದಲ್ಲತೆ, ನಾನ್ ನೀಡ ವಿರೋದಿಯಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ, ನೀನ್ ನಾಡ ಬಲ್‌ತೆ ಬರಿಲ್ ಅಳ್‌ತಾಂದ್[7] ದೇವ ಅಂವೊಂಡ ದೂತಂಗಡಲ್ಲಿ ದಾರ್‍ಕಾಚೇಂಗಿಯು ಎಕ್ಕಾಚೇಂಗಿಯು ಎಣ್ಣಿತುಂಡಾ?

¹⁴ಆನಗುಂಡ್, ರಕ್ಷಣೆ ಕ್‍ಟ್ಟ್‌ವಯಿಂಗಕ್ ಸೇವೆ ಮಾಡ್‌ವಕಾಯಿತ್ ದೇವದೂತಂಗ ಎಲ್ಲಾರು, ದೇವ ಅಯಿಚ ಸೇವೇರ ಆತ್ಮವಾಯಿತುಂಡಲ್ಲಾ?