Read Kodava ಇಬ್ರಿಯ 10 Bible Online

ಇಬ್ರಿಯ 10 - Kodava bible

ಇಬ್ರಿಯ 10

¹ನ್ಯಾಯಪ್ರಮಾಣಾಂದ್ ಎಣ್ಣುವದ್, ಇಂಞು ಮಿಂಞಕ್ ಬಪ್ಪಕುಳ್ಳ ನಲ್ಲ ವಿಷಯಕ್ ಒರ್ ನೆಳವಾಯಿತ್ ಮಾತ್ರ ಇಂಜತ್, ಅದಾಯಿತೇ ನೇರಾನದ್ ಅಲ್ಲ. ಈ ಕಾರಣಕಾಯಿತ್, ಕಾಲಕಾಲಕ್ ಎಡೆಬುಡತೆ ಮಾಡ್‌ವ ಒರೇ ತರ ಬಲೀರಗುಂಡ್, ಆರಾದನೆ ಮಾಡ್‌ವಕ್ ಬಪ್ಪಯಿಂಗಳ ಏದ್ ಕಾಲಕು ದೇವಡ ಮಿಂಞತ್ ತ್‍ೕರ ಪೂರ್ತಿ ಮಾಡ್‌ವಕ್ ಕಯ್ಯುಲೆ.

²ಅನ್ನನೆ ತ್‍ೕರ ಪೂರ್ತಿಮಾಡ್‌ವದಾಚೇಂಗಿ, ಆರಾದನೆ ಮಾಡ್‌ವಯಿಂಗ ಒರ್ ಕುರಿ ತ್‍ೕರ ಕತ್ತಿತಾನ ಪಿಂಞ, ಇಂಞು ಅಯಿಂಗಡಲ್ಲಿ ಪಾಪ ಉಂಡ್‍ೕಂದ್ ಅಯಿಂಗಕ್ ಎಣ್ಣುವ ಅಯಿಂಗಡ ಮನಸಾಕ್ಷಿ ಇಲ್ಲತಾಯಿ ಪೋಪ. ಅಕ್ಕ, ಇನ್ನನೆ ಬಲಿ ಕೊಡ್‍ಪದ್‍ನ ನಿಪ್ಪ್‌ಚಿಡುವಲ್ಲ?

³ಅನ್ನನೆ ಬಲಿನ ನಿಪ್ಪ್‌ಚಿಡತಗುಂಡ್, ಪಾಪ ಇಂಞು ಉಂಡ್‍ೕಂದ್ ಓರೋರ್ ಕಾಲಕು ಅದ್ಂಡ ಮೂಲಕ ಗೇನ ಬಂದಂಡುಂಡ್.

⁴ಎನ್ನಂಗೆಣ್ಣ್‌ಚೇಂಗಿ, ಎತ್ತ್ ಪಿಂಞ ಕೋಬಾಡ್‍ರ ಚೋರೆ, ಒಬ್ಬನ ಪಾಪತ್ಂಜ ವಿಮೋಚನ ಮಾಡ್‌ವಕ್ ಕಯ್ಯುಲೆ.

⁵ಆನಗುಂಡ್, ಕ್ರಿಸ್ತ ಈ ಲೋಕತ್‍ಲ್ ಬಪ್ಪಕ ಅಂವೊ ದೇವಡ ಪಕ್ಕ: ಬಲಿ ಪಿಂಞ ಕಾಣಿಕೆ ನೀಕ್ ಕುಶಿಯಿಲ್ಲೆ, ಒರ್ ತಡೀನ ನಾಕಾಯಿತ್ ನೀನ್ ತಯಾರ್ ಮಾಡಿಯ;

⁶ದಹನ ಬಲಿಯು, ಪಾಪ ಪರಿಹಾರತ್‍ರ ಬಲಿಯು ನೀಕ್ ಕುಶಿಯಿಲ್ಲೇಂದ್ ಎಣ್ಣಿಯ.

⁷ಅಕ್ಕ ಕ್ರಿಸ್ತ: ದೇವಾ, ನೀಡ ಪುಸ್ತಕತ್‍ಲ್ ನಾಡ ವಿಷಯತ್ ಎಣ್ಣಿತುಂಡ್; ನೋಟಿ, ನೀಡ ಚಿತ್ತತ್‍ರನೆಕೆ ಮಾಡ್‌ವಕ್ ನಾನ್ ಬಂದಂಡುಳ್ಳ್‌ಂದ್ ಎಣ್ಣ್‌ಚಿ.[28]

⁸ನ್ಯಾಯಪ್ರಮಾಣತ್‍ರನೆಕೆ, ಅಯಿಂಗ ಮಾಡಿಯಂಡುಳ್ಳ ಬಲಿರ ವಿಷಯತ್, ಮಿಂಞ ಎಣ್ಣ್‌ನನೆಕೆ: ಬಲಿನ, ಕಾಣಿಕೆನೆ, ದಹನ ಬಲಿನ ಪಿಂಞ ಪಾಪ ಪರಿಹಾರತ್‍ರ ಬಲಿನ ನೀನ್ ಕ್‍ೕಟಿತ್‌ಲ್ಲೆ, ನೀಕ್ ಅದ್‍ಲ್ ಕುಶಿ ಇಲ್ಲೇಂದ್, ಪಿಂಞ

⁹ದೇವ, ನೀಡ ಚಿತ್ತತ್‍ರನೆಕೆ ಮಾಡ್‌ವಕ್, ಇಕ್ಕ ನಾನ್ ಬಂದಂಡುಳ್ಳ್‌ಂದ್ ಅಕ್ಕ ಎಣ್ಣ್‌ಚಿ. ದಂಡನೆ ಒಪ್ಪಂದತ್‍ನ ಸ್ತಿರಪಡ್‌ತ್‍ವಕಾಯಿತ್ ಆದ್ಯ ಒಪ್ಪಂದತ್‍ನ ಅಂವೊ ತಳ್ಳಿರ್‌ತ್.

¹⁰ಯೇಸು ಕ್ರಿಸ್ತಂಡ ತಡಿ ಒರೇ ಕುರಿ ಬಲಿಯಾನಗುಂಡ್, ದೇವಡ ಚಿತ್ತತ್‍ರನೆಕೆ ಅದ್ಂಡ ಮೂಲಕ ನಂಗಳ ಪವಿತ್ರವಾನಯಿಂಗಳಾಯಿತ್ ಮಾಡ್‍ಚಿ.

¹¹ಏದ್ ಯಾಜಕನು, ದಿನಾಲು ಸೇವೆ ಮಾಡ್‍ವಂವೊನಾಯಿತು, ಪಾಪಕ್ ಏದ್ ಕಾಲತ್‍ಲು ವಿಮೋಚನ ತಪ್ಪಕ್ ಕಯ್ಯತ ಒರೇ ತರ ಬಲಿನ ಪುನಃ ಪುನಃ ಅರ್ಪಿಚಿಡುವಂವೊನಾಯಿತು ಇಂಜತ್.

¹²ಆಚೇಂಗಿ ಕ್ರಿಸ್ತನಾನ ಈ ಮಾಹಾ ಯಾಜಕ, ಪಾಪತ್‍ರ ವಿಮೋಚನಕಾಯಿತ್ ಒರೇ ಬಲಿನ ಕೊಡ್‌ತಿತ್ ದೇವಡ ಬಲ್‌ತೆ ಬರಿಲ್ ಅಳ್‌ತತ್.

¹³ತಾಂಡ ವಿರೋದಿಯಳ ತಾಂಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ ಅಲ್ಲಿ ಇಂಜಿತ್ ಪಾರಕಾತಂಡುಂಡ್.

¹⁴ಎನ್ನಂಗೆಣ್ಣ್‌ಚೇಂಗಿ, ಪವಿತ್ರವಾನಯಿಂಗಳಾಯಿತ್ ಮಾಡ್‍ನಯಿಂಗಳ ಒರೇ ಬಲಿರ ಮೂಲಕ ಇಂವೊ ಎಕ್ಕಾಲು ಪೂರ್ತಿ ಮಾಡಿತುಂಡ್.

¹⁵ಈ ವಿಷಯತ್ ಪವಿತ್ರಾತ್ಮ ಸಹ ನಂಗಕ್ ಸಾಕ್ಷಿಯಾಯಿತ್ ಎಣ್ಣಿಯಂಡುಂಡ್.

¹⁶ಈ ಕಾಲ ಆನ ಪಿಂಞ ನಾನ್ ಅಯಿಂಗಡ ಕೂಡೆ ಮಾಡ್‌ವ ಒಪ್ಪಂದ ಎಂತ ಎಣ್ಣ್‌ಚೇಂಗಿ: ನಾನ್ ನಾಡ ನ್ಯಾಯಪ್ರಮಾಣತ್‍ನ ಅಯಿಂಗಡ ಹೃದಯತ್‍ಲ್ ಬೆಚ್ಚಿತ್, ಅಯಿಂಗಡ ಮನಸ್ಸ್‌ಲ್ ಅದ್‍ನ ಒಳ್‍ದ್‌ವೀಂದ್ ಒಡೆಯ ಎಣ್ಣಿಯಂಡುಂಡ್‍ೕಂದ್ ಉಳ್ಳದೇ ಆ ಒಪ್ಪಂದ.[29]

¹⁷ಅಯಿಂಗಡ ಪಾಪತ್‍ನ ಪಿಂಞ ಅಯಿಂಗಡ ಅಕ್ರಮತ್‌ನ ಅದಲ್ಲತೆ ಅಯಿಂಗಡ ಪಾಪತ್‍ನ ಪಿಂಞ ದಷ್ಟತನತ್‌ನ ಇಂಞು ಮಿಂಞಕ್ ನಾಡ ನೆನಪ್‍ಲ್ ಬೆಪ್ಪ್‌ಲೇಂದ್ ಉಳ್ಳದ್‍ನ ಎಣ್ಣಿಯಂಡುಂಡ್.[30]

¹⁸ಅನ್ನನೆ ಪಾಪಕ್ ಮನ್ನಿಪ್ ಕ್‍ಟ್ಟಿತುಂಡೇಂಗಿ, ಇಂಞು ಮಿಂಞಕ್ ಬಲಿ ಕೊಡ್‍ಪಕ್ ಅವಸ್ಯ ಇಲ್ಲೆ.

¹⁹ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ಯೇಸುರ ಚೋರೆರ ಮೂಲಕ ಅತಿಪವಿತ್ರವಾನ ಜಾಗಕ್ ಪೋಪಕುಳ್ಳ ದೈರ್ಯ ನಂಗಕ್ ಇಕ್ಕ ಕ್‍ಟ್ಟ್‌ಚಿ.

²⁰ಅದ್ ಎನ್ನನೆ ಎಣ್ಣ್‌ಚೇಂಗಿ, ಪಡಿರ ಬಟ್ಟೇರನೆಕೆ ಉಳ್ಳ ತಾಂಡ ತಡೀರ ಮೂಲಕ ನಂಗಕಾಯಿತ್ ಪುದಿಯ ಪಿಂಞ ಜೀವವಾಯಿತುಳ್ಳ ಬಟ್ಟೇನ ತೊರ್ಂದತ್.

²¹ಪಿಂಞ ದೇವಡ ಮನೆರ ಮೇಲೆ ಅದಿಕಾರಿಯಾಯಿತುಳ್ಳ ಮಹಾ ಯಾಜಕನಾನ ಒಬ್ಬ ನಂಗಕಾಯಿತ್ ಉಂಡ್.

²²ಆನಗುಂಡ್, ದೇವಡ ಪಕ್ಕ, ನೇರಾನ ಹೃದಯ ಉಳ್ಳಯಿಂಗಳಾಯಿತ್, ನಂಬಿಕೇರ ಪೂರ್ತಿ ನಿಶ್ಚಯ ಉಳ್ಳಯಿಂಗಳಾಯಿತ್ ಪೋಕ. ನಂಗಡ ಪಾಳಾಯಿ ಪೋನ ಮನಸಾಕ್ಷಿನ ಕಳೆಂದಿತ್ ಶುದ್ದ ಆಪಕಾಯಿತ್ ಕ್ರಿಸ್ತಂಡ ಚೋರೆನ ತಳಿಚತ್, ಶುದ್ದವಾನ ನೀರ್‌ಲ್ ನಂಗಡ ತಡೀನ ಕತ್ತ್‌ನಯಿಂಗಳಾಯಿತ್ ಪೋಕ.

²³ನಂಗಡ ನಂಬಿಕೇನ ಅರಿಕೆ ಮಾಡ್‌ವದ್‍ಲ್ ದೈರ್ಯತ್‍ಲ್ ಸ್ತಿರವಾಯಿತ್ ನಿಕ್ಕಂಡು, ಎನ್ನಂಗೆಣ್ಣ್‌ಚೇಂಗಿ ವಾಗ್ದಾನ ಮಾಡ್‍ನಂವೊ ಸತ್ಯವಂತಂವೊನಾಯತುಂಡ್.

²⁴ನಂಗ ಒಬ್ಬೊಬ್ಬಂಗ್ ಪ್ರೀತಿಲ್ ಪಿಂಞ ನಲ್ಲ ಕೆಲಸ ಮಾಡ್‌ವದ್‍ಲ್ ಎನ್ನನೆ ಸಹಾಯ ಮಾಡ್‌ವಕ್ ಕಯ್ಯೂಂದ್ ಗೇನ ಮಾಡಿಯಂಡ್ ಇರಂಡು.

²⁵ಚೆನ್ನ ಜನ ಸಬೇಕ್ ಬಪ್ಪದ್‍ನ ಬುಡುವನೆಕೆ ನಂಗಳು ಬುಡತೆ, ಒಬ್ಬೊಂಗೊಬ್ಬ ಬುದ್ದಿ ಎಣ್ಣಿಯಂಡ್ ಇಕ್ಕಂಡು. ಅಂವೊ ಪುನಃ ಬಪ್ಪ ದಿವಸ ಪಕ್ಕ ಬಂದಂಡ್ ಉಳ್ಳದ್‍ನ ನಿಂಗ ಎಚ್ಚಕ್ ನೋಟಿಯಂಡುಳ್ಳಿರೋ, ಅಚ್ಚಕ್ ಎಚ್ಚರ ಎಡ್‌ಕಂಡು.

²⁶ಸತ್ಯ ಎಂತ್‍ೕಂದ್ ಗೊತ್ತಾನ ಪಿಂಞ, ನಂಗ ಮನಪೂರ್ವವಾಯಿತ್ ಪಾಪ ಮಾಡ್‍ಚೇಂಗಿ, ಪಾಪತ್‍ರ ವಿಮೋಚನಕಾಯಿತ್ ಕೊಡ್‍ಪಕ್, ಬೋರೆ ಏದ್ ಬಲಿಯು ಇಲ್ಲೆ.

²⁷ಆನಗುಂಡ್, ದೇವಡ ನ್ಯಾಯತೀರ್ಪ್ ಬಪ್ಪಾಂದ್ ಪೋಡಿಲ್ ನೋಟಿಯಂಡ್ ಮಾತ್ರ ಬದ್‍ಕಂಡು. ಅಯಿಂಗಕ್, ವಿರೋದಿಯಳ ಕತ್ತ್‌ಚಿಡುವ ದೇವಡ ಚೆಡಿರ ತಿತ್ತ್ ಉಂಡ್‍ೕಂದ್ ಗೊತ್ತಿರಡ್.

²⁸ಮೋಶೇರ ನ್ಯಾಯಪ್ರಮಾಣತ್‍ನ ತ್‍ಕ್ಕಾರ ಮಾಡ್‍ನಂವೊಂಗ್ ದಂಡ್ ಅಥವ ಮೂಂದ್ ಸಾಕ್ಷಿರ ಮೂಲಕ ಮರಣ ಶಿಕ್ಷೆ ಕೊಡ್‍ಪಕ್ ಬಟ್ಟೆ ಉಂಡಲ್ಲಾ?

²⁹ದೇವಡ ಮೋಂವೊನ ತಾಂಡ ಕಾಲ್‍ರ ಅಡಿಕ್ ಇಟ್ಟಿತ್ ಬೋಂಡಾಂದ್ ಎಣ್ಣಿತ್, ತನ್ನ ಪವಿತ್ರ ಮಾಡ್‍ನ ಒಪ್ಪಂದತ್‍ರ ಚೋರೆನ ಅಶುದ್ದಾಂದ್ ಗೇನ ಮಾಡಿತ್, ಕೃಪೇರ ಆತ್ಮತ್‌ನ ತ್‍ಕ್ಕಾರ ಮಾಡ್‌ವಂವೊ ಎಚ್ಚಕ್ ಬಲ್ಯ ದಂಡನೆಕ್ ಯೋಗ್ಯನಾಯಿತ್‌ಪ್ಪಾಂದ್ ಗೇನ ಮಾಡಿಯೊಳಿ.

³⁰ಪಗೆ ತ್‍ೕಪದ್ ನಾಡ ಕೆಲಸ, ನಾನೇ ಪಗೆ ತ್‍ೕಪೀಂದ್ ಒಡೆಯ ಎಣ್ಣ್‌ಚೀಂದು, ಒಡೆಯ ತಾಂಡ ಜನಕ್ ನ್ಯಾಯತೀರ್ಪ್ ತಪ್ಪಾಂದ್ ಎಣ್ಣ್‌ನಂವೊ ದಾರ್‍ೕಂದು ನಂಗಕ್ ಗೊತ್ತುಂಡ್.[31]

³¹ಜೀವವಾಯಿತುಳ್ಳ ದೇವಡ ಕೈಯಿಲ್ ಚಿಕ್ಕಿ ಪೋಪದ್ ಎಚ್ಚಕ್ ಬಯಂಕರವಾಯಿತ್‌ಪ್ಪ.

³²ಕ್ರಿಸ್ತಂಡ ವಿಷಯತ್‍ನ ಗೊತ್ತ್ ಮಾಡ್‍ನ ಆ ದಿವಸತ್‍ನ ಗೇನ ಮಾಡಿಯೊಳಿ. ಆ ಕಾಲತ್‍ಲ್ ಎಚ್ಚಕ್ ಬಲ್ಯ ಹಿಂಸೆನ ನಿಂಗ ಸಹಿಸಿಯಂಡ್ ಇಂಜಿರ.

³³ಆ ಕಾಲತ್‍ಲ್ ಚೆನ್ನ ಸಮಯತ್‍ಲ್ ನಿಂಗಳ ಎಲ್ಲಾಡ ಮಿಂಞತ್ ಅವಮಾನ ಮಾಡಿತ್, ಹಿಂಸೆಯು ಮಾಡ್‍ಚಿ. ಚೆನ್ನ ಸಮಯತ್‍ಲ್, ನಿಂಗಡ ಕೂಟ್‌ಲ್ ಇಂಜಯಿಂಗಕ್ ಅನ್ನನೆ ಮಾಡ್‍ಚಿ, ಅದ್‍ನಗುಂಡ್ ನಿಂಗಕ್ ಕಷ್ಟ ಆಚಿ.

³⁴ಕ್ರಿಸ್ತಂಗಾಯಿತ್ ಜೈಲ್‍ಲ್ ಕೈದಿಯಾಯಿತ್ ಇಂಜಯಿಂಗಕ್ ಕನಿಕರ ಕಾಟಿತುಳ್ಳಿರ, ನಿಂಗಡ ಆಸ್ತಿ ನಿಂಗಳ ಬುಟ್ಟಿತ್ ಪೋಪಕ, ನಿಂಗಕ್ ಪರಲೋಕತ್‍ಲ್ ಇದ್‌ಂಗಿಂಜ ಚಾಯಾನದು, ಪಾಳಾಯಿ ಪೋಕತದುವಾಯಿತುಳ್ಳ ಆಸ್ತಿ ಉಂಡ್‍ೕಂದ್ ಗೊತ್ತಾನಗುಂಡ್, ಸುಲ್‌ಗೆ ಮಾಡ್‌ವಕ್ ಕುಶೀಲ್ ಬುಟ್ಟಿರ.

³⁵ಆನಗುಂಡ್, ನಿಂಗಡ ದೈರ್ಯತ್‍ನ ಕಳೆಯುವಕ್ಕಾಗ, ಅದ್ ನಿಂಗಕ್ ಬಲ್ಯ ಪ್ರತಿಫಲ ತಪ್ಪ.

³⁶ನಿಂಗ ದೇವಡ ಚಿತ್ತತ್‍ರನೆಕೆ ಮಾಡಿತ್ ವಾಗ್ದಾನ ಮಾಡ್‍ನದ್‍ನ ಪಡೆಯುವಕ್ ನಿಂಗಕ್ ದುಂಬ ತಾಳ್ಮೆ ಬೋಂಡಿತುಂಡ್.

³⁷ಇಂಞು ಚೆನ್ನ ಸಮಯತ್‍ಲ್ ಬಪ್ಪಾಂದ್ ಎಣ್ಣ್‌ನಂವೊ ಬಪ್ಪ, ತಡೆ ಮಾಡುಲೆ.

³⁸ನಂಬಿಕೇರ ಮೂಲಕ ನೀತಿವಂತಯಿಂಗ ಬದ್‍ಕ್‍ವ, ಅದ್‍ನ ಅಂವೊ ಬುಟ್ಟಿತ್ ಪೋಚೇಂಗಿ, ನಾನ್ ಅಂವೊಂಡ ಮೇಲೆ ಕುಶಿಪಡುಲೇಂದ್ ದೇವ ಎಣ್ಣ್‌ಚಿ.[32]

³⁹ಆಚೇಂಗಿ ನಂಗ ದೇವನ ಬುಟ್ಟಿತ್ ಪಾಳಾಯಿ ಪೋಪಯಿಂಗ ಅಲ್ಲ, ಆತ್ಮಕ್ ರಕ್ಷಣೆ ಕ್‍ಟ್ಟುವಕಾಯಿತ್ ನಂಬಿಕೆ ಉಳ್ಳಯಿಂಗಳಾಯಿತುಂಡ್.