Read Kodava ಇಬ್ರಿಯ 11 Bible Online

ಇಬ್ರಿಯ 11 - Kodava bible

ಇಬ್ರಿಯ 11

¹ಇಕ್ಕ, ನಂಬಿಕೆ ಎಂತ ಎಣ್ಣ್‌ಚೇಂಗಿ, ಕಂಡಿತವಾಯಿತ್ ಆಪಾಕುಳ್ಳ ನಿರಿಕ್ಷೇರ ದೈರ್ಯವು, ಕಣ್ಣ್‌ಕ್ ಕಾಂಗತ ವಿಷಯತ್‍ರಮೇಲೆ ಉಳ್ಳ ನಿಶ್ಚಯವು ಆಯಿತುಂಡ್.

²ಇದ್ಂಡ ಮೂಲಕ ನಂಗಡ ಮುತ್ತಜ್ಜಂಗಕ್ ನಲ್ಲರಿಕೆ ಕ್‍ಟ್ಟ್‌ಚಿ.

³ನಂಬಿಕೇರ ಮೂಲಕ, ದೇವ ಈ ಲೋಕತ್‍ನ ಅಂವೊಂಡ ತಕ್ಕ್‌ರ ಮೂಲಕ ಸೃಷ್ಟಿ ಮಾಡ್‌ಚೀಂದು, ಅನ್ನನೆ ನಂಗಡ ಕಣ್ಣ್‌ಕ್ ಕಾಂಬ ವಿಷಯವೆಲ್ಲ, ಕಣ್ಣ್‌ಕ್ ಕಾಂಬಕಯ್ಯುವ ವಿಷಯತ್‍ರಗುಂಡ್ ಮಾಡಿತ್‌ಲ್ಲೇಂದು ನಂಗಕ್ ಗೊತ್ತುಂಡ್.

⁴ನಂಬಿಕೇರ ಮೂಲಕ, ಹೇಬೆಲ ತಾಂಡ ಅಣ್ಣ ಕಾಯಿನ ಮಾಡ್‍ನ ಬಲಿಕಿಂಜ ವಿಶೇಷವಾನ ಬಿಲೀನ ದೇವಕ್ ಅರ್ಪಣೆ ಮಾಡ್‍ಚಿ; ಅದ್ಂಗಾಯಿತ್ ಅಂವೊಂಗ್ ನೀತಿವಂತಂವೋಂದ್ ಸಾಕ್ಷಿ ಕ್‍ಟ್ಟ್‌ಚಿ; ಹೇಬೆಲಂಡ ಕಾಣಿಕೆರ ವಿಷಯತ್ ದೇವ ಸಹ ಸಾಕ್ಷಿ ಕೊಡ್‍ತತ್, ಅಂವೊ ಚತ್ತ್ ಪೋಚೇಂಗಿಯು ಇಂದ್ ಸಹ ತಕ್ಕ್ ಪರ್ಂದಂಡುಂಡ್.

⁵ನಂಬಿಕೇರ ಮೂಲಕ, ಹನೋಕ ಚಾವ್‍ನ ಅನುಬವಿಚಿಡತೆ ಈ ಲೋಕತ್ಂಜ ದೇವ ಅಂವೊನ ಎಡ್‍ತಂಡತ್; ದೇವ ಅಂವೊನ ಎಡ್‍ತಗುಂಡ್, ಅಂವೊ ಕಾಂಗತ ಆಯಿಪೋಚಿ; ಅಂವೊನ ದೇವ ದುಂಬ ಪ್ರೀತಿ ಮಾಡ್‍ಚೀಂದ್ ಅಂವೊನ ದೇವ ಎಡ್‍ಪಕ್ ಮಿಂಞಲೇ ಅಂವೊಂಗ್ ಸಾಕ್ಷಿ ಕೊಡ್‍ತತ್.[33]

⁶ನಂಬಿಕೆ ಇಲ್ಲತಪೋನಕ ದೇವನ ಕುಶಿ ಪಡ್‍ತ್‍ವಕ್ ಸಾದ್ಯ ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ದೇವಡ ಪಕ್ಕ ಕೂಡ್‍ವಂವೊ ದೇವ ಉಂಡ್‍ೕಂದು, ಅಂವೊನ ತ್‍ೕಡ್‌ವ ಜನಕ್ ಅಂವೊ ಪ್ರತಿಫಲ ತಪ್ಪಾಂದು ನಂಬಂಡು.

⁷ನಂಬಿಕೇರ ಮೂಲಕ ನೋಹ, ಅಂವೊ ಬದ್‍ಕಿಯಂಡ್ ಇಂಜ ಕಾಲತ್‍ಲ್, ಮಿಂಞಕ್ ಬಪ್ಪಕುಳ್ಳ ವಿಷಯತ್‍ಲ್ ದೇವಡಿಂಜ ಎಚ್ಚರ ಕ್‍ಟ್ಟಿತ್, ದೇವಡ ಬಕ್ತಿ ಉಳ್ಳಂವೊನಾಯಿತ್, ತಾಂಡ ಮನೆಲ್ ಉಳ್ಳಯಿಂಗಳ ಕಾಪಾಡ್‌ವಕ್ ಒರ್ ಕಪ್ಪಲ್‌ನ ಮಾಡ್‍ಚಿ; ಅದ್‍ನಗುಂಡ್, ಈ ಲೋಕಕ್ ದಂಡೆನೇರ ತೀರ್ಪ್ ಕ್‍ಟ್ಟ್‌ಚೀಂದ್ ತೀರ್ಪ್ ಮಾಡಿತ್, ನಂಬಿಕೇರ ಮೂಲಕ ಕ್‍ಟ್ಟುವ ನೀತಿಕ್ ಬಾದ್ಯತೆ ಕ್‌ಟ್ಟ್‌ನಂವೊನಾಚಿ.

⁸ನಂಬಿಕೇರ ಮೂಲಕ, ಅಬ್ರಹಾಮ ತಾಂಗ್ ಬಾದ್ಯತೆಯಾಯಿತ್ ಕ್‍ಟ್ಟ್‌ವಕುಳ್ಳ ಜಾಗಕ್ ಪೋಪಕ್ ದೇವ ಕಾಕ್‍ವಕ, ತಗ್ಗಿತ್, ತಾನ್ ಎಲ್ಲಿ ಪೋಯಂಡುಳ್ಳ್‌ಂದ್ ಗೊತ್ತಿಲ್ಲತೆ ಪೊರಟಿತ್ ಪೋಚಿ.

⁹ನಂಬಿಕೇರ ಮೂಲಕ, ಅಂವೊ ವಾಗ್ದಾನತ್‍ರ ದೇಶತ್‍ಲ್ ಬೋರೆ ದೇಶತ್‍ರಂವೊನೆಕೆ ಇಂಜಂಡ್, ಆ ವಾಗ್ದಾನತ್‍ರ ಬಾದ್ಯತೆಕಾರಳಾನ ಇಸಾಕ ಪಿಂಞ ಯಾಕೋಬಂಡ ಕೂಡೆ ಗುಡಾರತ್‍ಲ್ ವಾಸ ಮಾಡಿಯಂಡ್ ಇಂಜತ್.

¹⁰ಎನ್ನಂಗೆಣ್ಣ್‌ಚೇಂಗಿ, ದೇವ ತಯಾರ್ ಮಾಡಿತ್ ರೂಪ್‍ಚಿಡುವ, ಅಡಿಪಾಯ ಉಳ್ಳ ಪಟ್ಟಣಕಾಯಿತ್ ಪಾರಕಾತಂಡಿಂಜತ್.

¹¹ನಂಬಿಕೇರ ಮೂಲಕ, ಸಾರಳ ಸಹ[34], ವಾಗ್ದಾನ ಮಾಡ್‍ನಂವೊ ಸತ್ಯವಂತಂವೋಂದ್ ನಂಬಿತ್, ಕುಂಞಿ ಪೆರುವಕುಳ್ಳ ವಯಸ್ ಆಯಿಪೋಯಿತ್ಂಜತೇಂಗಿಯು, ಕೆಲಕರ್ತಿ ಆಪಕುಳ್ಳ ಶಕ್ತಿನ ಪಡ್ಂದಿತ್ ಕುಂಞಿನ ಪೆತ್ತತ್.

¹²ಆನಗುಂಡ್, ತಡೀಲ್ ಇಂಞು ಮಿಂಞಕ್ ಒಂದು ಮಾಡ್‌ವಕ್ ಕಯ್ಯತ, ತಡಿ ಚತ್ತ್ ಪೋಚೀಂದ್ ಎಣ್ಣುವಕಾಪ ಒಬ್ಬನಗುಂಡ್, ಎಣ್ಣ್‌ವಕಯ್ಯತ ಬಾನತ್ ಮೀನ್‍ರನೆಕೆಯು, ಕಡಕರೆಲ್ ಲೆಕ್ಕ ಮಾಡ್‌ವಕ್ ಕಯ್ಯತ ಮಣತ್‍ರನೆಕೆಯು ದುಂಬ ಜನ ಪುಟ್ಟ್‌ಚಿ.

¹³ಈಂಗೆಲ್ಲಾ ದೇವ ವಾಗ್ದಾನ ಮಾಡ್‍ನದ್‍ನ ಪಡಯತೆ, ದೂರತ್‍ಲ್ ಅದ್‍ನ ನೋಟಿತ್, ನಂಬಿಕೇಲ್ ಮನಸ್ಸ್‌ಲ್ ಎಡ್‍ತಂಡ್, ಈ ಲೋಕತ್‍ಲ್ ಅಯಿಂಗಳ ಅನ್ಯ ಜನ ಪಿಂಞ ಜಾಗ ಇಲ್ಲತಯಿಂಗಾಂದ್ ಅರಿಕೆ ಮಾಡಿಯಂಡ್ ನಂಬಿಕೇಲ್ ಚತ್ತ್ ಪೋಚಿ.

¹⁴ಇನ್ನನೆ ಅರಿಕೆ ಮಾಡ್‌ವಯಿಂಗ ಅಯಿಂಗಡ ಸ್ವಂತ ದೇಶಕ್ ಪೋಯಂಡ್ ಉಂಡ್‍ೕಂದ್ ಎಣ್ಣಿಯಂಡುಂಡ್.

¹⁵ಅಯಿಂಗ ಬುಟ್ಟಿತ್ ಬಂದ ದೇಶತ್‍ನ ಗೇನ ಮಾಡಿಯಂಡ್ ಇಂಜತೇಂಗಿ, ಅಯಿಂಗ ಪುನಃ ವಾಪಸ್ ಪೋಪಕ್ ಅಯಿಂಗಕ್ ಸಮಯ ಕ್‍ಟ್ಟ್‌ವಕಿಂಜತಲ್ಲಾ?

¹⁶ಆಚೇಂಗಿ, ಅಯಿಂಗ ಬುಟ್ಟಿತ್ ಬಂದ ದೇಶಕಿಂಜ ವಿಶೇಷವಾಯಿತುಳ್ಳ ಪರಲೋಕತ್‍ರ ದೇಶತ್‍ನ ಕುಶಿಪಟ್ಟತ್; ಆನಗುಂಡ್ ದೇವ, ಅಯಿಂಗಡ ದೇವಾಂದ್ ಕಾಕುವಕ್ ಞಾಣ ಪಡುಲೆ; ಅಯಿಂಗಕಾಯಿತ್ ಒರ್ ಪಟ್ಟಣತ್‍ನ ತಯಾರ್ ಮಾಡ್‍ಚಿ.

¹⁷ನಂಬಿಕೇರ ಮೂಲಕ, ಅಬ್ರಹಾಮ ದೇವ ಅಂವೊನ ಪರೀಕ್ಷೆ ಮಾಡ್‌ವಕ, ಇಸಾಕನ ಬಲಿಯಾಯಿತ್ ಅರ್ಪಿಚಿಟ್ಟತ್. ದಾಡ ವಿಷಯತ್ ವಾಗ್ದಾನ ಕ್‍ಟ್ಟ್‌ಚೋ, ಅಂವೊ ತಾಂಡ ಒರೇ ಮೋಂವೊನಾಯಿತ್ಂಜತೇಂಗಿಯು ಅರ್ಪಣೆ ಮಾಡ್‍ಚಿ.

¹⁸ಈ ಇಸಾಕಂಡ ಮೂಲಕವೇ ನೀಡ ಸಂತಾನ ಕಾಕ್‍ವಕ್ ಆಪಾಂದ್ ಅಬ್ರಹಾಮಂಗ್ ಎಣ್ಣಿತ್ಂಜತ್.[35]

¹⁹ಇಸಾಕ ಚತ್ತ್ ಪೋಚೇಂಗಿಯು, ಅಂವೊನ ದೇವ ಜೀವವಾಯಿತ್ ಎಪ್ಪ್‌ಚಿಡ್‌ವಕ್ ಶಕ್ತಿ ಉಳ್ಳಂವೋಂದ್ ನಂಬ್‍ಚಿ, ಅನ್ನನೆ ಅಂವೊಂಗ್ ಇಸಾಕ ಪುನಃ ಚಾವ್‍ಯಿಂಜ ಕ್‍ಟ್ಟ್‌ನನೆಕೆ ಆಚಿ.

²⁰ನಂಬಿಕೇರ ಮೂಲಕ ಇಸಾಕ, ಮಿಂಞಕ್ ಬಪ್ಪ ವಿಷಯತ್‍ಲ್ ಯಾಕೋಬನ ಪಿಂಞ ಏಸಾನ ಆಶೀರ್ವಾದ ಮಾಡ್‍ಚಿ.

²¹ನಂಬಿಕೇರ ಮೂಲಕ, ಯಾಕೋಬ, ತಾನ್ ಚಾವಕ್ ಸಮಯ ಬಪ್ಪಕ, ಯೋಸೇಫಂಡ ದಂಡ್ ಮೋನಿಯಂಗಳ ಆಶೀರ್ವಾದ ಮಾಡಿತ್, ತಾಂಡ ಕೈಯಿಲ್ ಇಂಜ ಕೋಲ್‍ಲ್ ತಾಂಗಿಯಂಡ್ ಆರಾದನೆ ಮಾಡ್‍ಚಿ.[36]

²²ನಂಬಿಕೇರ ಮೂಲಕ ಯೋಸೇಫ, ಇಸ್ರಾಯೇಲ್ ಜನ ಐಗುಪ್ತ ದೇಶತ್ಂಜ ಪೊರಟಿತ್ ಪೋಪಾಂದ್ ಅಂವೊಂಡ ವಯಸಾನ ಕಾಲತ್‍ಲ್ ಗೊತ್ತಾಯಿತ್, ಅಯಿಂಗ ಪೋಪಕ, ತಾಂಡ ಮೂಳೆಯಳ ಎಡ್‍ತಂಡ್ ಪೋಪಕ್ ಹುಕುಮ್ ಕೊಡ್‍ತತ್.

²³ನಂಬಿಕೇರ ಮೂಲಕ, ಮೋಶೇರ ಅಪ್ಪವ್ವ, ಮೋಶೆ ಚಾಯಿ ಉಂಡ್‍ೕಂದ್ ನೋಟಿತ್, ಐಗುಪ್ತ ರಾಜಂಡ ಆಜ್ಞೆಕ್ ಬೊತ್ತತೆ, ಮೂಂದ್ ತಿಂಗ ಒಳ್‌ಪ್‌ಚಿಟ್ಟಿತ್ ಬೆಚ್ಚತ್.

²⁴ನಂಬಿಕೇರ ಮೂಲಕ, ಮೋಶೆ ಬಲ್ಯಂವೊನಾಪಕ, ಐಗುಪ್ತ ದೇಶತ್‍ರ ರಾಜನಾನ ಫರೋಹನಂಡ ಮೋವಡ ಕ್‍ಣ್ಣಂದ್ ಜನ ಕಾಕ್‌ವದ್‍ನ ತಿರಸ್ಕಾರ ಮಾಡ್‍ಚಿ.

²⁵ಚೆನ್ನ ಕಾಲ ಮಾತ್ರ ಕುಶಿ ತಪ್ಪ ಪಾಪಕಿಂಜ, ದೇವಡ ಮಕ್ಕಡ ಕೂಡೆ ಕಷ್ಟತ್‍ನ ಅನುಬವಿಚಿಡುವದ್‍ನ ಗೊತ್ತ್ ಮಾಡ್‍ಚಿ.

²⁶ಐಗುಪ್ತ ದೇಶತ್‍ರ ಆಸ್ತಿಕಿಂಜ ಕ್ರಿಸ್ತಂಗಾಯಿತ್ ಕ್‍ಟ್ಟುವ ಅವಮಾನತ್‍ನ ಬಲ್ಯ ಆಸ್ತಿಯಾಯಿತ್ ಲೆಕ್ಕ ಮಾಡಿತ್, ಇಂಞು ಮಿಂಞಕ್ ಬಪ್ಪಕುಳ್ಳ ಪ್ರತಿಫಲಕಾಯಿತ್ ನೋಟಿಯಂಡಿಂಜತ್.

²⁷ನಂಬಿಕೇರ ಮೂಲಕ ಅಂವೊ, ಐಗುಪ್ತ ದೇಶತ್‍ನ ಬುಟ್ಟಿತ್ ಅಲ್ಲಿಯತ್‍ರ ರಾಜಂಡ ಚೆಡಿಕ್ ಬೊತ್ತತೆ ಪೊರಟಿತ್ ಪೋಚಿ. ಎನ್ನಂಗೆಣ್ಣ್‌ಚೇಂಗಿ, ದಾರೂ ಕಾಂಬಕಯ್ಯತ ದೇವನ ಅಂವೊ ನೋಟ್‌ನನೆಕೆ ತಾಳ್ಮೆಲ್ ಮಿಂಞಕ್ ಪೋಚಿ.

²⁸ನಂಬಿಕೇರ ಮೂಲಕ, ಐಗುಪ್ತ ದೇಶತ್ ಜನತ್‍ರ ಆದ್ಯ ಕ್‍ಣ್ಣ ಮಕ್ಕಳ ದೇವ ಒರ್ ದೂತನ ಅಯಿಚಿತ್ ಕೊಲ್ಲ್‌ವಕ, ಆ ದೂತ ಇಸ್ರಾಯೇಲ್ ಜನತ್‍ಲ್ ದಾರ್‌ನು ಮುಟ್ಟತನೆಕೆ, ಪಸ್ಕ ನಮ್ಮೆರ, ಚೋರೆನ ಮನೆರ ಪಡಿಲ್ ತಳಿಪ ನೇಮತ್‍ನ ಮಾಡ್‍ಚಿ.

²⁹ನಂಬಿಕೇರ ಮೂಲಕ, ಇಸ್ರಾಯೇಲ್ ಜನ ಚೋಂದ ಸಮುದ್ರತ್‍ನ ಒರ್ ಒಣಂಗ್‍ನ ನೆಲತ್‌ಲ್ ನಡ್ಂದ್ ಪೋಪನೆಕೆ ದಾಟಿತ್ ಪೋಚಿ; ಐಗುಪ್ತ ದೇಶತ್‍ರ ಜನ ಅನ್ನನೆ ಮಾಡ್‌ವಕ ಅಯಿಂಗ ಮುಳ್‍ಗಿ ಪೋಚಿ.

³⁰ನಂಬಿಕೇರ ಮೂಲಕ ಯೆರಿಕೋ ಪಟ್ಟಣತ್‍ರ ಗೋಡೆನ ಏಳ್ ದಿನ ಅಯಿಂಗ ಸುತ್ತ್‌ನ ಪಿಂಞ ಆ ಗೋಡೆ ಬುದ್ದತ್.

³¹ನಂಬಿಕೇರ ಮೂಲಕ, ಯೆರಿಕೋ ಪಟ್ಟಣತ್‍ರ ರಾಹಾಬ ಎಣ್ಣುವ ವೇಶಿ, ಗುಪ್ತಚಾರಂಗಳ ಸಮಾದಾನತ್‍ಲ್ ವಾಪಸ್ ಅಯಿಚಿತ್, ತಗ್ಗಿತ್ ನಡ್‌ಕತಯಿಂಗಡ ಕೂಡೆ ಪಾಳಾಯಿ ಪೋಕತೆ ಬಚಾವಾಚಿ.

³²ಇಂಞು ಮಿಂಞಕ್ ನಾನ್ ಎಂತ ಎಣ್ಣ್‌ವಿ? ಗಿಡಿಯೋನ, ಬಾರಾಕ, ಸಂಸೋನ, ಎಫ್‌ಥ, ದಾವೀದ, ಸಮುವೇಲ, ಪಿಂಞ ಪ್ರವಾದಿಯಂಗಡ ವಿಷಯತ್‍ನ ವಿವರಿಚಿಡಂಡೂಂದ್ ಎಣ್ಣ್‌ಚೇಂಗಿ, ಇಕ್ಕ ಸಮಯ ಇಲ್ಲೆ.

³³ನಂಬಿಕೇರ ಮೂಲಕ ಅಯಿಂಗ ರಾಜ್ಯಂಗಳ ಗೆದ್ದತ್, ನೀತಿಲ್ ಆಳ್ವಿಕೆ ಮಾಡ್‍ಚಿ, ವಾಗ್ದಾನ ಪಡ್ಂದತ್, ಸಿಂಹತ್‍ರ ಬಾಯಿನ ಮುಚ್ಚತ್.

³⁴ತಿತ್ತ್‌ಕ್ ಇಟ್ಟತೇಂಗಿಯು ಬೆಂಜಿತ್‌ಲ್ಲೆ, ಬಾಳ್‌ಕತ್ತಿಕ್ ಬಚಾವಾಚಿ, ಶಕ್ತಿ ಇಲ್ಲತೆ ಇಪ್ಪಕ ಶಕ್ತಿ ಪಡ್ಂದತ್, ಯುದ್ದ ಮಾಡ್‌ವದ್‍ಲ್ ಬಲ್ಯಂಗಳಾಚಿ, ಅನ್ಯ ಸೇನೇನ ದೌತ್‌ಚಿ.

³⁵ಚತ್ತ್ ಪೋನಯಿಂಗಳ, ಪೊಣ್ಣಾಳುವ ಪುನಃ ಜೀವತ್‍ಲ್ ಪಡ್ಂದತ್; ಬೋರೆ ಚೆನ್ನ ಜನ ಬಲ್ಯ ವಿಶೇಷವಾಯಿತುಳ್ಳ ಜೀವತ್‍ನ ಪಡೆಯುವಕಾಯಿತ್ ಬುಡುಗಡೆ ಆಪಕ್ ಒತ್ತತೆ, ಹಿಂಸೆನೆ ಸಹಿಸಿಯಂಡತ್.

³⁶ಬೋರೆ ಚೆನ್ನ ಜನ, ಅವಮಾನ ಪಟ್ಟಂಡ್, ಜನಡ ಕೈಯಿಂಜ ಪೊಯಿತ್ ಕ್‌ಟ್ಟಿಯಂಡ್, ಸರ್ಪಣಿಲ್ ಕೈದಿಯಾಯಿತ್ ಇಂಜಂಡ್ ಜೈಲ್‌ಕ್ ಪೋಚಿ.

³⁷ಚೆನ್ನ ಜನಕ್ ಕಲ್ಲ್ ಕನ್‍ಚತ್, ಈರ್ಚ್ ಬಾಳ್‍ರಗುಂಡ್ ದಂಡಾಯಿತ್ ಮುರಿಚತ್, ಬಾಳ್‌ಕತ್ತಿರಗುಂಡ್ ಕೊಂದತ್, ಆಡ್‍ರ ತೋಲ್ ಪಿಂಞ ಕೊರಿರ ತೋಲ್‍ನ ಇಟ್ಟಂಡ್ ತಿರ್‌ಗಿಯಂಡ್, ಬೋಂಡಿಯಾನದ್ ಇಲ್ಲತೆ, ಕಷ್ಟಪಟ್ಟಿತ್, ಹಿಂಸೆನೆ ಸಹಿಸಿಯಂಡ್ ಇಂಜತ್.

³⁸ಈ ಲೋಕ ಅಯಿಂಗಕ್ ಯೋಗ್ಯವಾಯಿತ್ಂಜಿತ್‌ಲ್ಲೆ; ಅಯಿಂಗ ಮಣಬೂಮಿಲ್, ಕುಂದ್‍ಲ್, ಗುವೆಲ್, ನೆಲತ್‍ರ ತೂತತ್‍ಲ್ ತಿರ್‌ಗಿಯಂಡ್ ಇಂಜತ್.

³⁹ಈಂಗ ಎಲ್ಲಾರ್‌ಕು ನಂಬಿಕೇರ ಮೂಲಕ ಚಾಯಿ ಸಾಕ್ಷಿ ಕ್‍ಟ್ಟಿಪೋಚೇಂಗಿಯು, ವಾಗ್ದಾನ ಮಾಡ್‍ನದ್‍ನ ಪಡೆಯುವಕ್ ಕಯಿಂಜಿತ್‌ಲ್ಲೆ.

⁴⁰ಅಯಿಂಗ ನಂಗಳ ಬುಟ್ಟಿತ್ ಪೂರ್ತಿಯಾನಯಿಂಗಳಾಯಿತ್ ಆಕತನೆಕೆ, ವಿಷೇವಾಯಿತುಳ್ಳ ಒರ್ ಬಲ್ಯ ವಿಷಯತ್‍ನ ದೇವ ನಂಗಕಾಯಿತ್ ಮಿಂಞಲೇ ನೇಮಿಚಿಟ್ಟಿತುಂಡ್.