Read Kodava ಇಬ್ರಿಯ 4 Bible Online

ಇಬ್ರಿಯ 4 - Kodava bible

ಇಬ್ರಿಯ 4

¹ದೇವ ತಪ್ಪ ಆರಾಮ್‍ರ ಜಾಗಕ್ ಪೋಪಕುಳ್ಳ ವಾಗ್ದಾನ ನಂಗಕ್ ಇಂಞು ಉಳ್ಳಗುಂಡ್, ನಿಂಗಡಲ್ಲಿ ಒಬ್ಬ ಸಹ ಅಲ್ಲಿಕ್ ಎತ್ತ್‌ವಕ್ ಆಪುಲೇಂದ್ ಗೊತ್ತಾಕತನೆಕೆ ಪೋಡಿಲ್ ಬದ್‍ಕಂಡು.

²ಎನ್ನಂಗೆಣ್ಣ್‌ಚೇಂಗಿ, ದೇವಡ ನಲ್ಲ ಸುದ್ದಿ ಅಯಿಂಗಕ್ ಅರಿಚಿಟ್ಟನೆಕೆ, ನಂಗಕು ಅರಿಚಿಟ್ಟಿತುಂಡ್; ಅದ್‍ನ ಕ್‍ೕಟಯಿಂಗ ನಂಬಿಕೆ ಇಲ್ಲತೆ ಕ್‍ೕಟಾಂಗ್, ಅಯಿಂಗ ಕ್‍ೕಟ ವಾಕ್ಯ ಅಯಿಂಗಕ್ ಪ್ರಯೋಜನಪಟ್ಟಿತ್‌ಲ್ಲೆ.

³ನಂಬ್‍ನ ನಂಗ ಆ ಆರಾಮ್‍ರ ಜಾಗಕ್ ಬಂದಂಡುಂಡ್; ದೇವಡ ಕ್ರಿಯೆ ಈ ಲೋಕಕ್ ಅಡಿಪಾಯ ಇಟ್ಟ ಕಾಲತ್ಂಜ ಪೂರ್ತಿಯಾಯಿತ್ಂಜತ್. ಆಚೇಂಗಿಯು, ಈ ಜನ ಆರಾಮ್‍ಲ್ ಇಪ್ಪಕ್ ನಾನ್ ತಪ್ಪ ಜಾಗಕ್ ಕಂಡಿತವಾಯಿತ್ ಎತ್ತುಲೇಂದ್ ನಾಡ ಚೆಡಿಲ್ ಆಣೆ ಇಟ್ಟಿಯೇಂದ್ ದೇವ ಎಣ್ಣ್‌ಚಿ.[15]

⁴ಅದಲ್ಲತೆ, ದೇವ ತಾಂಡ ಎಲ್ಲಾ ಕ್ರಿಯೇನ ಪುರ್ತಿಮಾಡಿತ್, ಏಳನೆ ದಿವಸತ್‍ಲ್ ಆರಾಮ್‍ಲ್ ಇಂಜತ್‍ೕಂದ್ ಒರ್ ಜಾಗತ್‍ಲ್ ಅಂವೊ ಎಣ್ಣಿತುಂಡ್.[16]

⁵ಇನ್ನನೆ ಎಣ್ಣ್‌ನ ಜಾಗತ್‍ಲ್, ಅಯಿಂಗ ನಾನ್ ತಪ್ಪ ಆರಾಮ್‍ರ ಜಾಗಕ್ ಎತ್ತುಲೇಂದ್ ಎಣ್ಣಿತುಂಡ್.

⁶ಆನಗುಂಡ್ ಇಂಞು ಚೆನ್ನ ಜನ ಆರಾಮ್‍ರ ಜಾಗಕ್ ಪ್ರವೇಶ ಮಾಡ್‍ವದ್ ಇಂಞು ಮಿಂಞಕ್ ಬಪ್ಪಕುಳ್ಳ ವಿಷಯವಾಯಿತುಂಡ್. ದೇವಡ ನಲ್ಲ ಸುದ್ದಿನ ಮಿಂಞಲೇ ಕ್‍ೕಟಯಿಂಗ ಅದ್‍ನ ನಂಬಿತ್‌ಲ್ಲೆ, ಅದ್ಂಗಾಯಿತ್ ಪ್ರವೇಶ ಮಾಡಿತ್‌ಲ್ಲೆ.

⁷ಆಚೇಂಗಿಯು, ದುಂಬ ಕಾಲ ಆನ ಪಿಂಞ ರಾಜನಾನ ದಾವೀದನಗುಂಡ್: ಇಂದ್ ಅಂವೊಂಡ ಸದ್ದ್‌ನ ಕ್‍ೕಟತೇಂಗಿ, ನಿಂಗ ನಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡತೀಂದ್ ದೇವಡ ಪಾಟ್‍ಲ್ ಎಣ್ಣಿತುಳ್ಳನೆಕೆ, ಇಂದ್‍ೕಂದ್ ಎಣ್ಣ್‌ವಗುಂಡ್, ಇಂಞು ಮಿಂಞಕ್ ಒರ್ ನಾಳ್‍ನ ಅಂವೊ ಗೊತ್ತ್ ಮಾಡಿ ಬೆಚ್ಚಿತುಂಡ್.[17]

⁸ಯೆಹೋಶುವ ಎಣ್ಣ್‌ವಂವೊ ಇಸ್ರಾಯೇಲ್ ಜನತ್‍ನ ಆರಾಮ್‍ರ ಜಾಗಕ್ ಪ್ರವೇಶ ಮಾಡ್‍ಚಿಟ್ಟಿತ್ಂಜತೇಂಗಿ, ದೇವ ಬೋರೆ ಒರ್ ನಾಳ್‌ರ ವಿಷಯತ್‍ನ ಪುನಃ ಎಣ್ಣಿತಿಪ್ಪುಲೆ.

⁹ಆನಗುಂಡ್, ದೇವಡ ಮಕ್ಕಕ್ ಆರಾಮ್‍ರ ಕಾಲ ಇಂಞು ಮಿಂಞಕ್ ಬಪ್ಪಕ್ ಉಂಡ್.

¹⁰ಎನ್ನಂಗೆಣ್ಣ್‌ಚೇಂಗಿ, ದೇವ ತಾಂಡ ಕೆಲಸತ್‍ನ ಪೂರ್ತಿ ಮಾಡಿತ್ ಆರಾಮ್‍ಲ್ ಇಪ್ಪನೆಕೆ, ದೇವಡ ಆರಾಮ್‍ರ ಜಾಗಕ್ ಎತ್ತ್‌ನಂವೊ ಸಹ ತಾಂಡ ಕೆಲಸತ್‍ನ ಪೂರ್ತಿ ಮಾಡಿತ್ ಆರಾಮಾಯಿತ್ ಇಪ್ಪ.

¹¹ಆನಗುಂಡ್, ನಂಗಡಲ್ಲಿ ಒಬ್ಬನು ಅಯಿಂಗಡನೆಕೆ ತಗ್ಗಿತ್ ನಡ್‌ಕತೆಗುಂಡ್ ಬುದ್ದ್‌ ಪೋಕತನೆಕೆ, ದೇವಡ ಆರಾಮ್‍ರ ಜಾಗಕ್ ಎತ್ತ್‌ವಕ್ ಪ್ರಯತ್ನ ಪಡಂಡು. ಆನಗುಂಡ್, ಅಯಿಂಗ ತಗ್ಗಿತ್ ನಡ್‌ಕತೆಗುಂಡ್ ಬುದ್ದ್‌ ಪೋನನೆಕೆ, ನಂಗಡಲ್ಲಿ ಒಬ್ಬನು ಬುದ್ದ್‌ ಪೋಕತನೆಕೆ ದೇವಡ ಆರಾಮ್‍ರ ಜಾಗಕ್ ಎತ್ತ್‌ವಕ್ ಪ್ರಯತ್ನ ಪಡಂಡು.

¹²ದೇವಡ ವಾಕ್ಯ ಜೀವವು, ಶಕ್ತಿ ಉಳ್ಳದಾಯಿತು, ದಂಡ್ ಪಕ್ಕವು ಚೂಪಾಯಿತ್ ಉಳ್ಳ ಏದ್ ಬಾಳ್‌ಕತ್ತಿಕಿಂಜಲು ಚೂಪಾಯಿತ್ ಉಂಡ್. ಇದ್ ಆತ್ಮತ್‌ನ ಪಿಂಞ ಜೀವತ್‍ನ, ಮುಟ್ಟ್‌ನ ಪಿಂಞ ಅದ್ಂಡ ಒಳ್‍ಲ್ ಉಳ್ಳ ಮಜ್ಜೆನ ಬೋರೆ ಬೋರೆ ಮಾಡಿತ್ ನಂಗಡ ಒಳ್‍ಕ್ ಕುತ್ತುವನೆಕೆ ಉಂಡ್. ಇದ್ ಹೃದಯತ್‍ರ ಗೇನತ್‍ನ ಪಿಂಞ ಆಲೋಚನೆರ ರೀತಿನ ನಂಗಕ್ ಕಾಟಿತಪ್ಪದಾಯಿತುಂಡ್.

¹³ಅಂವೊಂಡ ಕಣ್ಣ್‌ಕ್ ಮರ್‌ಂಜಿತ್‌ಪ್ಪ ಸೃಷ್ಟಿ ಏದು ಇಲ್ಲೆ; ಅಂವೊಂಡ ಕಣ್ಣ್‌ಕ್ ಎಲ್ಲಾ ತೊರ್‌ಂದದಾಯಿತು, ಕಾಂಬನೆಕೆಯು ಉಂಡ್, ಅಂವೊಂಗೇ ನಂಗ ಲೆಕ್ಕ ಕೊಡ್‍ಕಂಡು.

¹⁴ಬಾನತ್‍ರ ಮೂಲಕ ಪರಲೋಕಕ್ ಪೋಯಿತುಳ್ಳ ದೇವಡ ಮೋಂವೊನಾನ ಯೇಸು ಎಣ್ಣುವ ಮಹಾ ಯಾಜಕ ನಂಗಕ್ ಉಳ್ಳಗುಂಡ್, ನಂಗ ಮಾಡ್‍ನ ನಂಬಿಕೇರ ಅರಿಕೇನ ಗಟ್ಟಿಯಾಯಿತ್ ಪುಡ್‍ಚಂಡ್ ಬದ್‍ಕಂಡು.

¹⁵ನಂಗಡ ಬಲಹೀನತ್‍ರ ವಿಷಯತ್ ನಂಗಕಾಯಿತ್ ಬೇಜಾರ್ ಪಡುವಕ್ ಕಯ್ಯತ ಯಾಜಕ ನಂಗಕ್ ಇಲ್ಲತೆ, ಎಲ್ಲಾ ರೀತಿಲ್ ನಂಗಡನೆಕೆ ಸೋದನೆ ಪಟ್ಟಿತು, ಪಾಪ ಇಲ್ಲತಂವೊನಾಯಿತುಳ್ಳ ಮಹಾ ಯಾಜಕನೇ ನಂಗಕ್ ಉಂಡ್.

¹⁶ಆನಗುಂಡ್, ನಂಗಕ್ ಕರುಣೆ ಕ್‍ಟ್ಟುವಕಾಯಿತು, ತಕ್ಕ ಸಮಯತ್‍ಲ್ ಸಹಾಯ ಮಾಡ್‌ವ ಕೃಪೆ ಕ್‍ಟ್ಟ್‌ವಕಾಯಿತು ದೈರ್ಯವಾಯಿತ್ ಕೃಪೇರ ಸಿಂಹಾಸನತ್‍ರ ಪಕ್ಕ ನಂಗ ಪೋಕ.