Read Kodava ಇಬ್ರಿಯ 7 Bible Online

ಇಬ್ರಿಯ 7 - Kodava bible

ಇಬ್ರಿಯ 7

¹ಈ ಮೆಲ್ಕಿಜೆದೇಕ ಸಾಲೇಮ್ ಎಣ್ಣುವ ಪಟ್ಟಣಕ್ ರಾಜನಾಯಿತು, ದೇವಾದಿ ದೇವಡ ಯಾಜಕನಾಯಿತು ಇಂಜತ್. ರಾಜಂಗಳ ಚೋಪ್‍ಚಿಟ್ಟಿತ್ ಬಂದ ಅಬ್ರಹಾಮಂಗ್ ಇಂವೊ ವಂದನೆ ಮಾಡ್‌ವಕ್ ಪೋಯಿತ್ ಅಬ್ರಹಾಮನ ಆಶೀರ್ವಾದ ಮಾಡ್‍ಚಿ.

²ಮೆಲ್ಕಿಜೆದೇಕಂಗ್ ಅಬ್ರಹಾಮ ಅಂವೊಂಡ ಎಲ್ಲಾ ವಸ್ತುಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಕೊಡ್‍ತತ್. ಮೆಲ್ಕಿಜೆದೇಕ ಎಣ್ಣುವ ಅಂವೊಂಡ ಆದ್ಯ ಪೆದಕ್ ನೀತಿರ ರಾಜಾಂದು, ಪಿಂಞ ಸಾಲೇಮ್‍ರ ರಾಜ ಎಣ್ಣುವ ಪೆದಕ್ ಸಮಾದಾನತ್‍ರ ರಾಜಾಂದು ಅರ್ಥ ಆಪ.[21]

³ಈ ಮೆಲ್ಕಿಜೆದೇಕಂಗ್ ಅಪ್ಪನು ಅವ್ವಳು, ವಂಶಾವಳಿಯು ಇಲ್ಲೆ, ಇಂವೊ ಜೀವತ್‍ರ ತೊಡಕ ಪಿಂಞ ಚಾವ್ ಇಲ್ಲತಂವೊನಾಯಿತ್ ಇಂಜತ್. ದೇವಡ ಮೋಂವೊಂಡನೆಕೆ ಎಕ್ಕಾಲು ಯಾಜಕನಾಯಿತ್ ನಿಂದಂಡುಂಡ್.

⁴ಇಂವೊ ಎಚ್ಚಕ್ ಬಲ್ಯಂವೋಂದ್ ನೋಟಿ; ನಂಗಡ ಗೋತ್ರತ್‍ರ ಮುತ್ತಜ್ಜನಾನ ಅಬ್ರಹಾಮ ಸಹ ಅಂವೊ ಯುದ್ದ ಮಾಡಿತ್ ಗೆಲ್ಲ್‌ವಕ ಎಡ್‌ತ ಬಂದ ಎಲ್ಲಾ ವಸ್ತುಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಮೆಲ್ಕಿಜೆದೇಕಂಗ್ ಕೊಡ್‍ತತ್.

⁵ಲೇವಿರ ಮಕ್ಕಡಲ್ಲಿ ಯಾಜಕನಾಪಯಿಂಗಳು, ಅಬ್ರಹಾಮಯಿಂಜ ಬಂದ ಸಂತಾನಕಾರಂಗಳಾನ ತಾಂಡ ಅಣ್ಣತಮ್ಮಣಂಗಡಲ್ಲಿಯು ನ್ಯಾಯಪ್ರಮಾಣತ್‍ರ ಪ್ರಕಾರ ಪತ್ತ್‌ಲ್ ಒರ್ ಬಾಗತ್‍ನ ಪಡೆಯುವಕ್ ಅಪ್ಪಣೆ ಕ್‍ಟ್ಟ್‌ಚಿ.

⁶ಆಚೇಂಗಿಯು, ಮೆಲ್ಕಿಜೆದೇಕ ಲೇವಿರ ವಂಶಾವಳಿಲ್ ಬರತೆ ಪೋಚೇಂಗಿಯು, ಅಬ್ರಹಾಮಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ತಿತ್ ವಾಗ್ದಾನ ಕ್‍ಟ್ಟ್‌ನಂವೊನ ಆಶೀರ್ವಾದ ಮಾಡ್‍ಚಿ.

⁷ಚೆರಿಯಯಿಂಗ ಬಲ್ಯಯಿಂಗಯಿಂಜ ಆಶೀರ್ವಾದತ್‍ನ ಪಡೆಯುವ, ಅದ್ಂಗ್ ಏದ್ ಅನುಮಾನವು ಇಲ್ಲೆ.

⁸ಈ ಲೋಕತ್‍ಲ್ ಚತ್ತ್ ಪೋಪ ಮನುಷ್ಯಂಗ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ತಂಡುಂಡ್, ಆಚೇಂಗಿ ಅಲ್ಲಿ ಚಾವ್ ಇಲ್ಲತಂವೋಂದ್ ಪೆದ ಕ್‍ಟ್ಟ್‌ನಂವೊ ಅನ್ನನೆ ಎಡ್‍ತತ್.

⁹ಪತ್ತ್‌ಲ್ ಒರ್ ಬಾಗತ್‍ನ ಎಡ್‌ಪ ಲೇವಿ ಸಹ ಅಂವೊಂಡ ಮುತ್ತಜ್ಜನಾನ ಅಬ್ರಹಾಮಂಡ ಮೂಲಕ ಪತ್ತ್‌ಲ್ ಒರ್ ಬಾಗತ್‍ನ ಕೊಡ್‌ತತ್‍ೕಂದ್ ಎಣ್ಣುವಕ್ ಆಪ.

¹⁰ಎನ್ನನೆ ಎಣ್ಣ್‌ಚೇಂಗಿ, ಮೆಲ್ಕಿಜೆದೇಕ ಅಬ್ರಹಾಮಂಗ್ ವಂದನೆ ಮಾಡಿತ್ ಅಂವೊಂಡ ಕೈಯಿಂಜ ಪತ್ತ್‌ಲ್ ಒರ್ ಬಾಗತ್‍ನ ಎಡ್‍ಪಕ, ಲೇವಿ, ಅಬ್ರಹಾಮಂಡ ಸಂತಾನವಾಯಿತ್ ಅಂವೊಂಡ ಒಳ್‍ಲ್ ಇಂಜತಲ್ಲಾ?

¹¹ಆನಗುಂಡ್, ಲೇವಿಯರ ಯಾಜಕತ್‍ರ ಸೇವೇರ ಪ್ರಕಾರ ನ್ಯಾಯಪ್ರಮಾಣತ್‍ನ ಜನ ಪಡ್ಂದತ್. ಆ ಲೇವಿಯರ ಯಾಜಕತ್‍ರ ಸೇವೇರಗುಂಡ್ ಜನ, ಪೂರ್ತಿ ಪವಿತ್ರ ಆಪಕಿಂಜತೇಂಗಿ, ದೇವ ಎನ್ನಂಗ್ ಆರೋನಂಡ ಪದ್ದತಿರ ಪ್ರಕಾರ ಅಲ್ಲತೆ, ಮೆಲ್ಕಿಜೆದೇಕಂಡ ನೇಮ ಪ್ರಕಾರ ಬೋರೆ ಒರ್ ಯಾಜಕಂಡ ಸೇವೇನ ಎಪ್ಪ್‌ಚಿಡಂಡು?

¹²ಯಾಜಕ ಸೇವೆ ಬದ್‍ಲಾಯಿ ಪೋಪದಾಚೇಂಗಿ, ನ್ಯಾಯಪ್ರಮಾಣವು ಬದ್‍ಲಾಯಿ ಪೋಕಂಡು.

¹³ಇದೆಲ್ಲಾ ದಾಡ ವಿಷಯತ್‍ನ ಎಣ್ಣಿಯಂಡುಂಡೋ, ಅಂವೊ ಬೋರೆ ಕುಲತ್ಂಜ ಬಂದಿತುಂಡಲ್ಲಾ? ಆ ಕುಲತ್‍ಲ್ ಒಬ್ಬ ಸಹ ದೇವಕ್ ಬಲಿಪೀಠತ್‍ಲ್ ಸೇವೆ ಮಾಡಿತ್‌ಲ್ಲೆ.

¹⁴ನಂಗಡ ಒಡೆಯ ಯೆಹೂದ್ಯ ಕುಲತ್‍ಲ್ ಪುಟ್ಟ್‌ನಂವೋಂದ್ ಎಲ್ಲಾರ್‌ಕು ಗೊತ್ತುಂಡ್; ಯೆಹೂದ್ಯ ಕುಲತ್‍ರ ಜನ ಯಾಜಕ ಸೇವೆ ಮಾಡ್‌ವ ವಿಷಯತ್ ಮೋಶೆ ಒಂದು ಎಣ್ಣಿತ್‌ಲ್ಲೆ.

¹⁵ಮೆಲ್ಕಿಜೆದೇಕರನೆಕೆ ಬೋರೆ ಒಬ್ಬ ಯಾಜಕ ಬಪ್ಪಾಂದ್ ಎಣ್ಣಿತುಳ್ಳಾಂಗ್, ಇಲ್ಲಿಕತ್ತನೆ ಎಣ್ಣ್‌ನದ್ ಎಚ್ಚಕ್ ನೇರಾಯಿತುಂಡ್.

¹⁶ಯೇಸು ತಡೀರ ಮೂಲಕ ನ್ಯಾಯಪ್ರಮಾಣತ್‍ರಗುಂಡ್ ಯಾಜಕನಾಯಿತ್ ಆಯಿತ್‌ಲ್ಲೆ, ಆಚೇಂಗಿ, ನಾಶ ಆಕತ ಜೀವತ್‍ರ ಶಕ್ತಿರ ಪ್ರಕಾರ ಯಾಜಕನಾಚಿ.

¹⁷ನೀನ್ ಕಾಲಕಾಲಕು ಮೆಲ್ಕಿಜೆದೇಕಂಡ ನೇಮ ಪ್ರಕಾರ, ಯಾಜಕನಾಯಿತ್ ಇಪ್ಪಿಯಾಂದ್ ಪ್ರವಾದನೆಯಾಯಿತ್ ಎಣ್ಣಿತುಂಡ್.[22]

¹⁸ಮಿಂಞತ್‍ರ ಆಜ್ಞೆ ಬಲಹೀನದಾಯಿತು ಪ್ರಯೋಜನ ಇಲ್ಲತದಾಯಿತು ಇಂಜಗುಂಡ್ ಅದ್‍ನ ಬದ್‍ಲ್ ಮಾಡ್‍ಚಿ.

¹⁹ನ್ಯಾಯಪ್ರಮಾಣ ಒರ್ ವಿಷಯತ್‍ನ ಕೂಡೆ ಪೂರ್ತಿ ಮಾಡ್‌ವಕಿಂಜಿಲೆ. ಆಚೇಂಗಿ, ಅದ್ಂಗಿಂಜ ಬಲ್ಯ ನಿರಿಕ್ಷೇರ ನಂಬಿಕೆ ಪೂರ್ತಿ ಮಾಡ್‌ವಕಾಯಿತ್ ಇಕ್ಕ ಕ್‍ಟ್ಟ್‌ಚಿ. ಅದ್ಂಡ ಮೂಲಕ ನಂಗ ದೇವಡ ಪಕ್ಕ ಪೋಯಂಡುಂಡ್.

²⁰ಇದ್‍ನ ಆಣೆ ಇಡತೆ ದೇವ ಮಾಡಿತ್‌ಲ್ಲೆ. ಮಿಂಞ ಬೋರೆಯಿಂಗ ಯಾಜಕಂಗಳಾಪಕ ದೇವ ಏದ್ ಆಣೆಯು ಇಟ್ಟಿತ್‌ಲ್ಲೆ.

²¹ಆಚೇಂಗಿ, ಯೇಸು ಆಣೆ ಇಟ್ಟಿತ್ ಯಾಜಕನಾಪಕ, ಒಡೆಯ ಸತ್ಯ ಮಾಡ್‍ಚಿ, ಅಂವೊಂಡ ಮನಸ್ಸ್ ಬದ್‍ಲಾಪದು ಇಲ್ಲೆ. ನೀನ್ ಎಕ್ಕಾಲು ಯಾಜಕನಾಯಿತ್ ಇಪ್ಪಿಯಾಂದ್ ದೇವ ಎಣ್ಣ್‌ಚಿ.[23]

²²ಇನ್ನನೆ ಆಣೆ ಇಟ್ಟಗುಂಡ್, ಯೇಸು ವಿಶೇಷವಾಯಿತ್ ಎಲ್ಲಾಕಿಂಜ ಬಲ್ಯ ಒಪ್ಪಂದಕ್ ಜವಾಬ್ದಾರನಾಚಿ.

²³ಅದಲ್ಲತೆ, ಪಳೆಯ ನೇಮತ್‍ರ ಪ್ರಕಾರ ದುಂಬ ಯಾಜಕಂಗ ಇಂಜತ್, ಎನ್ನಂಗೆಣ್ಣ್‌ಚೇಂಗಿ, ಒಬ್ಬ ಚಾವಕ, ಇಂಞೊಬ್ಬ ಬಾತ್. ಆನಗುಂಡ್, ಎಕ್ಕಾಲು ಬದ್‍ಕಿಯಂಡಿಪ್ಪಕ್ ಕಯಿಂಜಿತ್ತ್‌ಲ್ಲೆ.

²⁴ಆಚೇಂಗಿ ಯೇಸು, ಎಕ್ಕಾಲು ಬದ್‍ಕಿಯಂಡಿಪ್ಪಗುಂಡ್ ಕಾಲಕಾಲಕು ನಿಪ್ಪ ಯಾಜಕ ಸೇವೇರ ಯಾಜಕನಾಯಿತುಂಡ್.

²⁵ಆನಗುಂಡ್, ತಾಂಡ ಮೂಲಕ ದೇವಡ ಪಕ್ಕ ಬಪ್ಪಯಿಂಗಕಾಯಿತ್ ಎಕ್ಕಾಲು ದೇವಡ ಮಿಂಞತ್ ಬೋಡ್‌ವನೆಕೆ ಬದ್‍ಕಿಯಂಡಿಪ್ಪಗುಂಡ್, ಅಯಿಂಗಳ ಪೂರ್ತಿಯಾಯಿತ್ ರಕ್ಷಣೆ ಮಾಡ್‌ವಕ್ ಶಕ್ತಿ ಉಳ್ಳಂವೊನಾಯಿತುಂಡ್.

²⁶ಇನ್ನನೆ ಉಳ್ಳ ಮಹಾ ಯಾಜಕನೇ ನಂಗಕ್ ಬೋಂಡಿಯತ್. ಇಂವೊ, ಪವಿತ್ರವಾನಂವೊನು, ಕುತ್ತ ಇಲ್ಲತಂವೊನು, ಒರ್ ತಪ್ಪ್ ಇಲ್ಲತಂವೊನಾಯಿತು ಉಂಡ್. ಅಂವೊ ಪಾಪಿಯಂಗಡ ಕೂಡೆ ಕೂಡತೆ, ಪರಲೋಕತ್‍ಲ್ ಎಲ್ಲಾಕಿಂಜ ಬಲ್ಯ ಸ್ತಾನತ್‍ನ ಪಡ್ಂದಂವೊನಾಯಿತುಂಡ್.

²⁷ಯೇಸು, ಬೋರೆ ಮಹಾ ಯಾಜಕಂಗಡನೆಕೆ, ದಿನಾಲು ತಾಂಡ ಸ್ವಂತ ಪಾಪಕಾಯಿತ್ ಬಲಿ ಕೊಡ್‍ತ ಪಿಂಞ ಜನತ್‍ರ ಪಾಪಕಾಯಿತ್ ಬಲಿ ಕೊಡ್‍ಕಂಡೂಂದ್ ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ ಅಂವೊ ಜನಡ ಪಾಪಕಾಯಿತ್ ತಾನೆ ಬಲಿಯಾಪಕ, ಒರೇ ಕುರಿ ಅಂವೊನ ಅರ್ಪಿಚಿಟ್ಟತ್.

²⁸ನ್ಯಾಯಪ್ರಮಾಣ, ಬಲ ಇಲ್ಲತ ಮನುಷ್ಯಂಗಳ ಯಾಜಕಂಗಳಾಯಿತ್ ನೇಮಿಚಿಟ್ಟತ್, ನ್ಯಾಯಪ್ರಮಾಣತ್‍ರ ಕಾಲಕ್ ಬಯ್ಯ ಬಂದಿತುಳ್ಳ ಆಣೆರ ತಕ್ಕ್, ಕಾಲಕಾಲಕು ಪೂರ್ತಿಯಾಯಿತ್ ಮಾಡಿತುಳ್ಳ ದೇವಡ ಮೋಂವೊನ ಯಾಜಕನಾಯಿತ್ ನೇಮಿಚಿಟ್ಟತ್.