Read Kodava ಯಾಕೋಬ 1 Bible Online

ಯಾಕೋಬ 1 - Kodava bible

ಯಾಕೋಬ 1

¹ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಸೇವಕನಾನ ಯಾಕೋಬ, ಬೋರೆ ಬೋರೆ ನಾಡ್‍ಲ್ ಚದ್‌ರಿ ಪೋಯಿತುಳ್ಳ ಪನ್ನೆರಂಡ್ ಕುಲತ್‍ರ[1] ಜನಕ್ ವಂದನೆ ಮಾಡಿತ್ ಒಳ್‍ದ್‍ವ ಕಾಗದ ಇದ್.

²ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ಬಪ್ಪ ನಾನಾತರ ಪರೀಕ್ಷೆನ ಸಂತೋಷವಾಯಿತ್ ಎಡ್‌ತೊಳಿ.

³ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ನಂಬಿಕೇರ ಪರೀಕ್ಷೆ, ತಾಳ್ಮೆನ ಪಡಿಪ್‌ಚಿಡ್‌ವಾಂದ್ ನಿಂಗಕ್ ಗೊತ್ತುಂಡ್.

⁴ನಿಂಗ ಗುಣತ್‍ಲ್ ಬೊಳಿಯುವಕ, ನಿಂಗಡ ತಾಳ್ಮೆ ಪೂರ್ತಿ ಕೆಲಸ ಮಾಡಡ್, ಅಕ್ಕ ನಿಂಗ ಗುಣತ್‍ಲ್ ಶಕ್ತಿವಂತಯಿಂಗಳಾಯಿತ್, ನಿಂಗ ಒರ್ ವಿಷಯತ್‍ಲು ಕಮ್ಮಿ ಇಲ್ಲತಯಿಂಗಳಾಯಿತಿಪ್ಪಿರ.

⁵ದೇವ ಎಣ್ಣ್‌ನನೆಕೆ ನಿಂಗ ನಡ್‍ಕಂಡೂಂದ್ ಉಳ್ಳ ಜ್ಞಾನ ಬೋಂಡ್‌ಚೇಂಗಿ, ಅಂವೊಂಡ ಪಕ್ಕ ಕ್‍ೕಳಿ. ಅಕ್ಕ, ಅಂವೊ ನಿಂಗಳ ಜೋರ್ ಮಾಡುಲೆ, ಉದಾರ ಮನಸ್ಸ್‌ಲ್ ನಿಂಗಕ್ ಜ್ಞಾನತ್‍ನ ತಪ್ಪ.

⁶ಆಚೇಂಗಿಯು ನಿಂಗ ಅಪನಂಬಿಕೆಲ್ ಕ್‍ೕಕತೆ, ನಾನ್ ಕ್‍ೕಪದ್ ದೇವ ತಪ್ಪಾಂದ್ ನಂಬಿಕೇಲ್ ಕ್‍ೕಕಂಡು.

⁷ಅಪನಂಬಿಕೆಲ್ ನಿಂಗ ಕ್‍ೕಪದ್ ಎನ್ನನೆ ಎಣ್ಣ್‌ಚೇಂಗಿ: ಸಮುದ್ರತ್‍ರ ಅಲೆ ಬಪ್ಪಕ ಆ ಅಲೆ ಗಾಳಿಲ್ ಉರ್‌ಪಿತ್ ಪೋನನೆಕೆ.

⁸ಅನ್ನನೆ ಉಳ್ಳ ಮನುಷ್ಯ ನಾನ್ ಕ್‍ೕಪದ್, ದೇವಡ ಕೈಯಿಂಜ ಕ್‍ಟ್ಟ್‌ವಾಂದ್ ಗೇನ ಮಾಡ್‌ವಕ್ಕಾಗ. ದೇವಡ ವಿಷಯತ್‍ಲ್ ದಂಡ್ ಮನಸ್ಸ್ ಉಳ್ಳ ಮನುಷ್ಯ ತಾಂಡ ಬದ್‍ಕ್‍ಲ್ ಸ್ತಿರವಿಲ್ಲತಂವೊನಾಯಿತಿಪ್ಪ.

⁹ಒರ್ ಗರೀಬನ, ದೇವ ಬಲ್ಯ ಸ್ತಾನತ್‍ಲ್ ಬೆಚ್ಚಿತುಳ್ಳಗುಂಡ್ ಅಂವೊ ಕುಶಿ ಪಡಂಡು.

¹⁰ಐಶ್ವರ್ಯವುಳ್ಳಂವೊ ಅಂವೊಂಡ ಕಮ್ಮಿ ಸ್ತಾನತ್‍ಲ್ ಕುಶಿ ಪಡಡ್; ಎನ್ನಂಗೆಣ್ಣ್‌ಚೇಂಗಿ ಅಂವೊ ಕಾಡ್ ಪೂರನೆಕೆ ಬಾಡಿ ಪೋಪ.

¹¹ಸೂರ್ಯ ತಿತ್ತ್‌ರನೆಕೆ ಉದಿಚಿತ್, ಗಿಡ ಎಲ್ಲಾ ಬಾಡಿ ಪೋಯಿತ್, ಅದ್ಂಡ ಪೂ ಬುದ್ದಿತ್ ಅದ್ಂಡ ಚಾಯಿ ಪೋಯಿರುವ, ಅದ್ ಪಾಳಾಯಿ ಪೋಪ. ಅನ್ನನೆ ಐಶ್ವರ್ಯವುಳ್ಳಂವೊನು, ತಾಂಡ ಬದ್‍ಕ್‍ರ ಸ್ತಾನತ್‍ಲ್ ಬಾಡಿ ಪೋಪ.

¹²ಸೋದನೆನ ಸಹಿಸುವ ಮನುಷ್ಯ ಆಶೀರ್ವಾದ ಪಡ್ಂದಂವೊ; ಎನ್ನಂಗೆಣ್ಣ್‌ಚೇಂಗಿ ಅಂವೊ ಚೋತ್‍ಪೋಯಿತಿಲ್ಲೇಂದ್ ಗೊತ್ತಾನ ಪಿಂಞ, ದೇವನ ಪ್ರೀತಿಚಿಡ್‌ವಯಿಂಗಕಾಯಿತ್ ದೇವ ವಾಗ್ದಾನ ಮಾಡ್‍ನ ನಿತ್ಯ ಜೀವತ್‍ರ ಕಿರೀಟ ಅಂವೊಂಗ್ ಕ್‍ಟ್ಟ್‌ವ.

¹³ನಿಂಗಕ್ ಸೋದನೆ ಬಪ್ಪಕ, ದೇವ ನನ್ನ ಪಾಪ ಮಾಡ್‌ವಕ್ ಸೋದನೆ ಮಾಡಿಯಂಡುಂಡ್‍ೕಂದ್ ಎಣ್ಣುವಕ್ಕಾಗ. ದೇವ ದುರಾಸೇಲ್ ಸೋದನೆ ಪಡ್‌ವಂವೊನು ಅಲ್ಲ, ನಿಂಗಳ ಅನ್ನನೆ ಮಾಡ್‌ವಂವೊನು ಅಲ್ಲ.

¹⁴ಆಚೇಂಗಿ ಒಬ್ಬೊಬ್ಬನು ತಾಂಡ ಸ್ವಂತ ಇಚ್ಛೆರಗುಂಡ್ ಬಲ್‍ಚಿಪೋಯಿತ್, ಬುದ್ದಿತ್ ಸೋದನೆ ಪಟ್ಟಂಡುಂಡ್.

¹⁵ಪಿಂಞ ಇಚ್ಛೆ ಕುಳಿಮೆಯಾಯಿತ್ ಪಾಪ ಪುಟ್ಟ್‌ವ, ಪಾಪ ಪೂರ್ತಿಯಪಕ ಚಾವ್ ಬಪ್ಪ.

¹⁶ನಾಡ ಅಣ್ಣತಮ್ಮಣಂಗಳೇ, ನಿಂಗ ಮೋಸ ಪೋಕತಿ.

¹⁷ಎಲ್ಲಾ ನಲ್ಲದು ಪಿಂಞ ಪೂರ್ತಿಯಾಯಿತುಳ್ಳ ಏದ್ ಇನಾಮು ಬಾನತ್‌ರ ಬೊಳಿನ ಸೃಷ್ಟಿ ಮಾಡ್‌ನ, ಪರಲೋಕತ್‌ಲ್‌ ಉಳ್ಳ ಅಪ್ಪನಾನ ದೇವಡಯಿಂಜ ಇಳಿಂಜಿ ಬಂದಂಡುಂಡ್. ನಳ ಅಪ್ಪರ ಇಪ್ಪರ ಪೋಪನೆಕೆ ಅಂವೊ ಬದ್‍ಲಾಪುಲೆ.

¹⁸ಅಂವೊಂಡ ಚಿತ್ತತ್‍ರನೆಕೆ, ತಾಂಡ ಎಲ್ಲಾ ಸೃಷ್ಟಿಲ್, ನಂಗಳ ಆದ್ಯ ಸ್ತಾನತ್‍ಲ್ ಇಕ್ಕಂಡೂಂದ್ ನಂಗಳ ಸತ್ಯ ವಾಕ್ಯತ್‍ರ ಮೂಲಕ ಪುಟ್ಟ್‌ವಕ್ ಮಾಡ್‍ಚಿ.

¹⁹ನಾಡ ಅಣ್ಣತಮ್ಮಣಂಗಳೇ! ಎಲ್ಲಾರು ಕ್‍ೕಪಕ್ ಚುರ್‌ಕಾಯಿತು, ತಕ್ಕ್ ಪರಿಯುವಕ್ ನಿದಾನವಾಯಿತು, ಚೆಡಿ ಮಾಡ್‌ವಕ್ ತಾಳ್ಮೆಯಾಯಿತು ಇಕ್ಕಂಡು.

²⁰ನಿಂಗಕ್ ಚೆಡಿ ಬಾತೇಂಗಿ, ದೇವ ನಿಂಗಳಗುಂಡ್ ಮಾಡಂಡೂಂದ್ ಉಳ್ಳ ನೀತಿ ಕೆಲಸತ್‍ನ, ನಿಂಗಡ ಮೂಲಕ ಮಾಡ್‌ವಕ್ ಕಯ್ಯತ ಪೋಪ.

²¹ಆನಗುಂಡ್ ಎಲ್ಲಾ ಹೇಸಿಗೆಯಾನ ಗುಣ ಪಿಂಞ ಪಾಳ್ ಗುಣತ್‍ನ ಬುಟ್ಟ್‌ರಿ. ನಿಂಗಡ ಮನಸ್ಸ್‌ಲ್ ನಟ್ಟಿತುಳ್ಳ ಪಿಂಞ ನಿಂಗಡ ಆತ್ಮತ್‌ನ ಕಾಪಾಡ್‌ವಕ್ ಶಕ್ತಿಯುಳ್ಳ ದೇವಡ ವಾಕ್ಯತ್‍ನ, ಸಮಾದಾನತ್‍ಲ್ ಸ್ವೀಕಾರ ಮಾಡಿಯೊಳಿ.

²²ಅದಲ್ಲತೆ ನಿಂಗ ನಿಂಗಳ ಮೋಸ ಮಾಡತನೆಕೆ ದೇವಡ ವಾಕ್ಯತ್‍ನ ಕ್‍ೕಪಯಿಂಗಳಾಯಿತ್ ಮಾತ್ರ ಅಲ್ಲತೆ ಅದ್ಂಡ ಪ್ರಕಾರ ನಡ್‌ಪಯಿಂಗಳಾಯಿತು ಇಕ್ಕಂಡು.

²³ಎನ್ನಂಗೆಣ್ಣ್‌ಚೇಂಗಿ, ಒಬ್ಬ ದೇವಡ ವಾಕ್ಯತ್‍ನ ಕ್‍ೕಟಿತ್ ಅದ್ಂಡ ಪ್ರಕಾರ ನಡ್‍ಕತೆ ಪೋನಕ, ಅಂವೊ ಕನ್ನಡಿಲ್ ಅಂವೊಂಡ ಮೂಡ್‍ನ ನೋಟ್‌ವಂವೊಂಡನೆಕೆ ಇಪ್ಪ.

²⁴ಕನ್ನಡಿಲ್ ಅಂವೊನ ತಾನೆ ನೋಟಿತ್, ಆ ಜಾಗತ್‍ನ ಬುಟ್ಟಿತ್ ಪೋಪಕ, ಅಚ್ಚಕ್ ಬೆರಿಯ ಅಂವೊ ಎನ್ನನೆ ಇಂಜತ್‍ೕಂದ್ ಮರ್ಂದ್‌ರುವ.

²⁵ಆಚೇಂಗಿ ಒರ್ ಮನುಷ್ಯ ಅಂವೊನ ಬುಡುಗಡೆ ಮಾಡ್‌ವ ದೇವಡ ಪೂರ್ತಿ ಪ್ರಮಾಣತ್‍ನ ಜಾಗ್ರತೆಲ್ ನೋಟಿತ್, ಕ್‍ೕಟದ್‍ನ ಮರ್ಂದ್ ಪೋಕತೆ, ಅದ್ಂಡ ಪ್ರಕಾರ ನಡ್ಂದತೇಂಗಿ, ತಾಂಡ ಬದ್‍ಕ್‍ಲ್ ಆಶೀರ್ವಾದ ಉಳ್ಳಂವೊನಾಯಿತ್‌ಪ್ಪ.

²⁶ನಿಂಗಡಲ್ಲಿ ಒಬ್ಬ ತಾಂಡ ನಾವ್‌ಕ್ ಕಡಿವಾಣ ಇಡತೆ ನಾನ್ ದೇವಡ ಮೇಲೆ ಬಕ್ತಿ ಉಳ್ಳಂವೋಂದ್ ಗೇನ ಮಾಡ್‍ಚೇಂಗಿ ಅಂವೊ ತಾಂಗ್ ತಾನೆ ಮೋಸ ಮಾಡ್‌ವ, ಅಂವೊಂಡ ಬಕ್ತಿ ಪ್ರಯೋಜನ ಇಲ್ಲತ ಬಕ್ತಿಯಾಯಿತ್‌ಪ್ಪ.

²⁷ತಬ್ಬಲಿ ಮಕ್ಕ ಪಿಂಞ ವಿದವೆಯಿಂಗಡ ಕಷ್ಟತ್‍ಲ್ ಸಹಾಯ ಮಾಡ್‍ವದ್ ಪಿಂಞ ಈ ಲೋಕತ್‍ರ ಪಾಪ ಅಂವೊನ ದೋಷ ಮಾಡತನೆಕೆ ಕಾಪಾಡಿಯಂಡ್ ಬದ್‍ಕ್‍ವದ್ ಇನ್ನತಾನ ವಿಷಯವೇ, ಅಪ್ಪನಾನ ದೇವಡ ಮಿಂಞತ್ ಶುದ್ದವಾನ ಕಳಂಗ ಇಲ್ಲತ ಬಕ್ತಿಯಾಯಿತ್‌ಪ್ಪ.