Read Kodava ಯಾಕೋಬ 2 Bible Online

ಯಾಕೋಬ 2 - Kodava bible

ಯಾಕೋಬ 2

¹ನಾಡ ಅಣ್ಣತಮ್ಮಣಂಗಳೇ, ಮಹಿಮೇರ ಒಡೆಯ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತುಳ್ಳ ನಿಂಗ, ಮನುಷ್ಯಂಗಡ ಪೊರಪಾಡ್‌ನ ನೋಟಿತ್ ಮರ್ಯಾದೆ ಮಾಡತಿ.

²ನಿಂಗಡ ಸಬೇಕ್ ಒರ್ ಮನುಷ್ಯ ಚಾಯಿ ಬಟ್ಟೆ ಇಟ್ಟಂಡ್, ಬೆಲೆಯುಳ್ಳ ಮಾಲ್ ಇಟ್ಟಂಡ್ ಬಪ್ಪಕಾಪ. ಅದೇ ಸಮಯತ್‍ಲ್ ಒರ್ ಬಡವ ಮಾಜಿ ಪೋನ ಬಟ್ಟೆ ಇಟ್ಟಂಡ್ ಸಹ ಬಪ್ಪಕಾಪ.

³ಅಕ್ಕ ನಿಂಗ ಚಾಯಿ ಬಟ್ಟೆ ಇಟ್ಟಿತುಳ್ಳ ಮನುಷ್ಯನ ಚಾಯಿತೆ ಸತ್ಕಾರ ಮಾಡಿತ್ ಅಂವೊ ಅಳ್‌ಪಕ್ ನಲ್ಲ ಜಾಗ ಕೊಡ್‍ಪಿರ. ಅದೇ ಸಮಯತ್‍ಲ್ ಬಡವಂಗ್: ನೀನ್ ಇಲ್ಲೆ ನಿಂದ, ಅಲ್ಲತ ಪೋನಕ ನಾಡ ಕಾಲ್‍ರ ಅಡಿಲ್ ಅಳೆ ಎಣ್ಣಿಯಂಡ್ ಎಣ್ಣುವಿರ.

⁴ನಿಂಗ ಇನ್ನನೆ ಮಾಡ್‍ಚೇಂಗಿ ನಿಂಗ ನಿಂಗಡೊಳ್‌ಲ್ ಪಕ್ಷಪಾತ ಮಾಡಿತ್, ಕೆಟ್ಟ ಬುದ್ದಿಲ್ ತೀರ್ಪ್ ಮಾಡ್‌ವಯಿಂಗಳಾಯಿತ್‌ಪ್ಪಿರಲ್ಲ?

⁵ನಾಡ ಪ್ರೀತಿರ ಅಣ್ಣತಮ್ಮಣಂಗಳೇ, ಕ್‍ೕಳಿ; ದೇವ ಈ ಲೋಕತ್‍ರ ಬಡವಂಗಳ, ನಂಬಿಕೇಲ್ ಐಶ್ವರ್ಯ ಉಳ್ಳಯಿಂಗಳಾಯಿತ್, ಅಂವೊನ ಪ್ರೀತಿ ಮಾಡ್‌ವಯಿಂಗಕ್ ಅಂವೊ ವಾಗ್ದಾನ ಮಾಡ್‍ನ ರಾಜ್ಯತ್‍ನ ಆಳುವಯಿಂಗಳಾಯಿತ್ ಗೊತ್ತ್ ಮಾಡಿತಲ್ಲ?

⁶ಆಚೇಂಗಿ ನಿಂಗ ಬಡವಯಿಂಗಳ ಅಲ್ಲಗೆಳದಿತುಳ್ಳಿರ. ಐಶ್ವರ್ಯವಂತಯಿಂಗತಾನೆ ನಿಂಗಳ ಮೋಸ ಮಾಡ್‌ವಯಿಂಗ? ಅಯಿಂಗತಾನೆ ನಿಂಗಳ ನ್ಯಾಯ ತೀರ್ಪ್‌ರ ಜಾಗಕ್ ಬಲ್‍ಚಂಡ್ ಪೋಪ?[2]

⁷ನಿಂಗಡ ದೇವಡ ನಲ್ಲ ಪೆದತ್‍ನ ಪಾಳ್ ಮಾಡ್‌ವಕಾಯಿತ್ ಅಯಿಂಗತಾನೆ ದೂಷಣೆ ಮಾಡ್‌ವ?

⁸ನಿಂಗ ನಿಂಗಳ ಎಚ್ಚಕ್ ಪ್ರೀತಿ ಮಾಡ್‍ವಿರೋ ಅನ್ನನೆ ನೆರಮನೆಕಾರಳ ಪ್ರೀತಿ ಮಾಡ್‌ವಿರಾಂದ್ ಉಳ್ಳ ದೇವಡ ವಾಕ್ಯವಾನ ದೇವಡ ರಾಜ್ಯತ್‍ರ ಪ್ರಮಾಣತ್‍ನ ಮಾಡ್‍ಚೇಂಗಿ, ಅಕ್ಕ ನಿಂಗ ನಲ್ಲದ್ ಮಾಡ್‍ನನೆಕೆ.

⁹ಆಚೇಂಗಿ ನಿಂಗ ಮನುಷ್ಯಂಗಡ ಪೊರಪಾಡ್‌ನ ನೋಟಿತ್ ಅದ್ಂಡ ಪ್ರಕಾರ ಮರ್ಯಾದೆ ಮಾಡ್‍ಚೇಂಗಿ, ನಿಂಗ ಪಾಪ ಮಾಡಿತ್, ನ್ಯಾಯಪ್ರಮಾಣಕ್ ವಿರೋದವಾಯಿತ್ ಮಾಡ್‌ನಯಿಂಗಾಂದ್ ತೀರ್ಪ್ ಆಪಿರ.

¹⁰ಒಬ್ಬ ದೇವಡ ನ್ಯಾಯಪ್ರಮಾಣ ಎಣ್ಣುವಾನೆಲ್ಲ ಮಾಡಿತ್, ಒರೇ ಒರ್ ನ್ಯಾಯಪ್ರಮಾಣತ್‍ನ ಮಾತ್ರ ಮಾಡತೆ ಪೋಚೇಂಗಿ ಅಂವೊ ಎಲ್ಲಾ ವಿಷಯತ್‍ಲು ಅಪರಾದಿಯಾಯಿತ್‌ಪ್ಪ.

¹¹ಎನ್ನನೆ ಎಣ್ಣ್‌ಚೇಂಗಿ ವ್ಯಬಿಚಾರ ಮಾಡತೇಂದ್ ಎಣ್ಣ್‌ನಂವೊ ಕೊಲೆ ಮಾಡತೇಂದ್ ಸಹ ಎಣ್ಣಿತುಂಡ್; ಆನಗುಂಡ್ ನಿಂಗ ವ್ಯಬಿಚಾರ ಮಾಡತೆ ಇಂಜತೇಂಗಿಯು ಕೊಲೆ ಮಾಡ್‍ಚೇಂಗಿ ನ್ಯಾಯಪ್ರಮಾಣಕ್ ವಿರೋದವಾಯಿತ್ ಮಾಡಿಯಂಡುಳ್ಳಿರ.[3]

¹²ನಿಂಗಳ ಸ್ವಾತಂತ್ರ ಮಾಡ್‌ವ ಪ್ರಮಾಣತ್‍ರ ಪ್ರಕಾರ ತೀರ್ಪ್ ಕ್‍ಟ್ಟ್‌ವನೆಕೆ ನಿಂಗ ತಕ್ಕ್ ಪರ್ಂದಿತ್ ಅನ್ನನೆ ನಡ್‌ಕಂಡು.

¹³ಈ ಲೋಕತ್‍ಲ್ ಜನಕ್ ಕರುಣೆ ಕಾಟತಯಿಂಗಕ್, ದೇವ ತೀರ್ಪ್ ತಪ್ಪ ದಿವಸತ್‍ಲ್, ಅಂವೊ ಕರುಣೆ ಕಾಟುಲೆ; ಆಚೇಂಗಿ, ನಿಂಗ ಕರುಣೆಯುಳ್ಳಯಿಂಗಳಾಯಿತ್ ಇಂಜತೇಂಗಿ, ದೇವ ನಿಂಗಳ ತೀರ್ಪ್ ಮಾಡ್‌ವ ದಿವಸತ್‍ಲ್ ನಿಂಗಕ್ ಕರುಣೆಯುಳ್ಳಂವೊನಾಯಿತಿಪ್ಪಾಂದ್ ನಿಂಗಕ್ ಗೊತ್ತಿರಂಡು.

¹⁴ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ದೇವಡ ಮೇಲೆ ನಂಬಿಕೆ ಉಂಡ್‍ೕಂದ್ ಎಣ್ಣ್‌ಚೇಂಗಿಯು, ಆ ನಂಬಿಕೇರ ಪ್ರಕಾರ ಕ್ರಿಯೆ ಇಲ್ಲತೆ ಪೋನಕ ನಿಂಗಕ್ ಎಂತ ಪ್ರಯೋಜನ? ಆ ನಂಬಿಕೆ ನಿನ್ನ ರಕ್ಷಣೆ ಮಾಡ್‌ವಕ್ ಕಯ್ಯುವ?

¹⁵ಉದಾರಣೆಕ್ ಒರ್ ಅಕ್ಕತಂಗೆ ಅಥವ ಅಣ್ಣತಮ್ಮಣಂಗ ಇಡ್‌ವಕ್ ಬಟ್ಟೆ ಇಲ್ಲತೆ, ಉಂಬಕ್ ಕೂಳ್ ಇಲ್ಲತೆ ಇಪ್ಪಕ,

¹⁶ನಿಂಗಡಲ್ಲಿ ಉಳ್ಳ ಒಬ್ಬ ಅಂವೊನ ನೋಟಿತ್: ನಿಂಗ ಶಾಂತಿಲ್ ಪೋಯಿರಿ, ತಿತ್ತ್ ಕಾಂಜಿತ್ ಕೆಲ ದುಂಬ್‌ಚಿಡೀಂದ್ ಎಣ್ಣಿತ್, ಅಂವೊಂಡ ತಡಿಕ್ ಬೋಂಡಿಯಾನದ್‍ನ ಒಂದು ಕೊಡ್‍ಕತೆ ಪೋನಕ ಪ್ರಯೋಜನ ಎಂತ?

¹⁷ಅನ್ನನೆ ನಂಬಿಕೇರ ಕೂಡೆ ಕ್ರಿಯೆ ಇಲ್ಲತಪೋನಕ ಅದ್ ಚತ್ತನೆಕೆ ಆಪ.

¹⁸ದಾರೇಂಗಿಯು ಒಬ್ಬ: ನೀಕ್ ನಂಬಿಕೆ ಉಂಡ್, ನಾಕ್ ಕ್ರಿಯೆ ಉಂಡ್; ನೀಕ್ ನಂಬಿಕೆ ಉಂಡ್‍ೕಂದ್ ಎಣ್ಣುವಿಯಲ್ಲ ಅದ್‍ನ ನಾಕ್ ಕ್ರಿಯೆ ಇಲ್ಲತೆ ಕಾಟಿತಾ, ನಾನ್ ನಾಡ ನಂಬಿಕೇನ ನಾನ್ ಮಾಡ್‌ವ ಕ್ರಿಯೇಲ್ ಕಾಟಿತಪ್ಪೀಂದ್ ಎಣ್ಣುವಲ್ಲ.

¹⁹ನಿಂಗ ಒರೇ ದೇವ ಉಂಡ್‍ೕಂದ್ ನಂಬುವಿರ. ಅದ್ ನಲ್ಲದ್. ಆಚೇಂಗಿ, ಕೂಳಿಯಳು ಸಹ ಅನ್ನನೆ ನಂಬುವ, ಅಯಿಂಗ ಬೊತ್ತಿತ್ ನಡ್‌ಗುವ.

²⁰ಮುಠಾಳ ಮನುಷ್ಯಂಗಳೇ, ಕ್ರಿಯೆ ಇಲ್ಲತ ನಂಬಿಕೆ ಪ್ರಯೋಜನ ಇಲ್ಲೇಂದ್ ಎಕ್ಕ ಪಡಿಪಿರ?

²¹ನಂಗಡ ಅಪ್ಪನಾನ ಅಬ್ರಹಾಮ ತಾಂಡ ಕುಂಞಿ ಇಸಾಕನ ದೇವ ಎಣ್ಣ್‌ನ ಪ್ರಕಾರ ತ್ಯಾಗ ಅರ್ಪಣೆ ಮಾಡ್‌ವಕಾಯಿತ್ ಬಲಿಪೀಠತ್‍ಲ್ ಕೊಲ್ಲ್‌ವಕಾಯಿತ್ ಅರ್ಪಿಚಿಡುವಂತ ಕ್ರಿಯೇಯಿಂಜತಾನೆ ನೀತಿವಂತವೊನಾಚಿ?

²²ನಂಬಿಕೆ ಪಿಂಞ ಕ್ರಿಯೆ ದಂಡು ಒಕ್ಕಚೆ ಕ್ರಿಯೆ ಮಾಡ್‌ನಗುಂಡ್‌ ಅಂವೊಂಡ ನಂಬಿಕೆ ಪೂರ್ತಿ ಆಚೀಂದ್ ನೋಟ್‌ವಿರಲ್ಲ?

²³ಅನ್ನನೆ ಅಬ್ರಹಾಮ ದೇವನ ನಂಬ್‍ಚಿ. ಅದ್ಂಗ್ ದೇವ ಅಂವೊನ ನೀತಿವಂತಂವೋಂದ್ ಲೆಕ್ಕ ಮಾಡ್‍ಚೀಂದ್ ಎಣ್ಣ್‌ವ ದೇವಡ ವಾಕ್ಯ ಪೂರ್ತಿಯಾಚಿ.[4] ಇದ್‍ನಗುಂಡ್ ದೇವ ಅಂವೊನ ದೇವಡ ಸ್ನೇಹಿತಾಂದ್ ಕಾಕ್‍ಚಿ.

²⁴ಅನ್ನನೆ ಮನುಷ್ಯ, ನಂಬಿಕೇರಗುಂಡ್ ಮಾತ್ರ ಅಲ್ಲ, ಅಂವೊ ಮಾಡ್‌ವ ಕ್ರಿಯೇನಗುಂಡು ನೀತಿವಂತಂವೊನಾಯಿತ್ ಆಪಾಂದ್ ಕಾಂಬಿರಲ್ಲ.

²⁵ಇದೇ ತರ ರಾಹಾಬ ಎಣ್ಣುವ ವೇಶಿಯು ಗುಪ್ತಚಾರಂಗಳ ಅವಡ ಮನೆಲ್ ಸ್ವೀಕಾರ ಮಾಡಿತ್ ಅಯಿಂಗಕ್ ಸಹಾಯ ಮಾಡ್‌ವಕಾಯಿತ್ ಬೋರೆ ಬದ್ರವಾನ ಬಟ್ಟೇಲ್ ಅಯಿಪಕ, ಅವ ಮಾಡ್‍ನ ಕ್ರಿಯೇರಗುಂಡಲ್ಲ ಅವಳ ನೀತಿವಂತವಾಂದ್ ಎಣ್ಣ್‌ಚಿ?

²⁶ಎನ್ನನೆ ಆತ್ಮ ಇಲ್ಲತ ತಡಿ ಚತ್ತನೆಕೆ ಉಂಡೋ, ಅನ್ನನೆ ಕ್ರಿಯೆ ಇಲ್ಲತ ನಂಬಿಕೆಯು ಚತ್ತನೆಕೆ ಉಂಡ್.