Read Kodava 1 ಪೇತ್ರ 2 Bible Online

1 ಪೇತ್ರ 2 - Kodava bible

1 ಪೇತ್ರ 2

¹ಆನಗುಂಡ್, ಬೋರೆಯಿಂಗಳ ಕಷ್ಟಪಡ್‌ತ್‌ವದ್‍ಲ್ ಕುಶಿ ಪಡುವ ಎಲ್ಲಾ ಗುಣತ್‍ನ, ವಂಚನೆ ಮಾಡ್‌ವ ಗುಣತ್‍ನ, ಎಲ್ಲಾ ಕಪಟಿಯಾನ ಗುಣತ್‍ನ, ಹೊಟ್ಟೆಕಿಚ್ಚ್‌ನ, ಕುತ್ತಪರಿಯುವಾನೆಲ್ಲಾನ ನಿಂಗಡಲ್ಲಿಂಜ ಚಾಡಿ ಕಳೆಯುವಿರ.

²ಒರ್ ಪುಟ್ಟ್‌ನ ಕುಂಞಿರನೆಕೆ, ರಕ್ಷಣೆಲ್ ಬೊಳಿಯುವಕ್, ಆತ್ಮೀಯ ಪಾಲಾಯಿತ್ ಉಳ್ಳ ಶುದ್ದವಾನ ದೇವಡ ವಾಕ್ಯತ್‍ನ ಕುಡಿಪಕ್ ಕುಶಿಪಡಿ.

³ಇಕ್ಕ ನಿಂಗ ಒಡೆಯಂಡ ದಯೇನ ಅನುಬವಿಚಿಟ್ಟಿತುಳ್ಳಿರ.

⁴ಮನುಷ್ಯಂಗ ಬೋಂಡಾಂದ್ ತಿರಸ್ಕಾರ ಮಾಡಿತ್ಂಜತೇಂಗಿಯು, ದೇವ ಗೊತ್ತ್ ಮಾಡ್‌ನದು, ದುಂಬ ಬೆಲೆ ಉಳ್ಳದುವಾಯಿತುಳ್ಳ ಜೀವತ್‍ರ ಕಲ್ಲ್‌ರನೆಕೆ ಉಳ್ಳ ಒಡೆಯನಾನ ಯೇಸು ಕ್ರಿಸ್ತಂಡ ಪಕ್ಕ ಬಂದಿತುಳ್ಳಿರ.

⁵ಆನಗುಂಡ್, ನಿಂಗಳು, ಜೀವವಾಯಿತುಳ್ಳ ಕಲ್ಲ್‌ರನೆಕೆ ಉಳ್ಳಾಂಗ್, ನಿಂಗಡಗುಂಡ್, ಆತ್ಮೀಯ ಮನೆಯಾಯಿತ್ ಕೆಟ್ಟಿಯಂಡುಂಡ್. ಅಲ್ಲಿ, ನಿಂಗ ಯೇಸು ಕ್ರಿಸ್ತಂಡ ಮೂಲಕ, ದೇವಕ್ ಪ್ರೀತಿಯಾಯಿತುಳ್ಳ, ಆತ್ಮೀಯ ಬಲಿನ ಕೊಡ್‍ಪಕ್ ಪವಿತ್ರವಾನ ಯಾಜಕ ಮಕ್ಕಡ ಕೂಟವಾಯಿತು ಉಳ್ಳಿರ.

⁶ದೇವಡ ವಾಕ್ಯತ್‍ಲ್: ನೋಟಿ, ನಾನ್ ಗೊತ್ತ್ ಮಾಡ್‍ನ ಬೆಲೆಯುಳ್ಳ ಮೂಲೆಕಲ್ಲ್‌ನ ಚೀಯೋನ್‌[3] ಪಟ್ಟಣತ್‍ಲ್ ಬೆಚ್ಚಿಯೆ, ಅದ್ಂಡಮೇಲೆ ನಂಬಿಕೆ ಬೆಪ್ಪಂವೊ ಞಾಣ ಆಪುಲೇಂದ್ ಎಣ್ಣಿತುಂಡ್.[4]

⁷ಆನಗುಂಡ್, ಅದ್ಂಡಮೇಲೆ ನಂಬಿಕೆ ಬೆಪ್ಪ ನಿಂಗಕ್ ಅದ್ ಅಮುಲ್ಯವಾನದ್, ಆಚೇಂಗಿ, ಅದ್‍ನ ನಂಬತಯಿಂಗಕ್, ಅದ್: ಮನೆ ಕೆಟ್ಟ್‌ವಯಿಂಗ ಬೋಂಡಾಂದ್ ತಿರಸ್ಕಾರ ಮಾಡ್‍ನ ಆ ಕಲ್ಲೇ, ಮನೆರ ಮುಕ್ಯವಾನ ಕಲ್ಲಾಚಿ[5]

⁸ಆ ಕಲ್ಲ್ ಮನುಷ್ಯಂಗಳ ತಡ್‍ಪಕು ಬೂವಕು ಮಾಡ್‌ವ ಬಂಡೆಯಾಯಿತ್ ಆಚಿ. ಅಯಿಂಗ ದೇವಡ ಉಪದೇಶಕ್ ಬಗ್ಗ್‌ಚಿಡತಗುಂಡ್ ಅದ್ ತಡ್‍ತಂಡುಂಡ್, ಅದ್ಂಗೇ ಅಯಿಂಗಳ ನೇಮಿಚಿಟ್ಟಯಿಂಗಳಾಯಿತುಂಡ್.[6]

⁹ಆಚೇಂಗಿ ನಿಂಗ, ನಿಂಗಳ ಇರ್‌ಟ್‌ಂಜ ತಾಂಡ ಅದ್ಬುತವಾನ ಬೊಳಿಕ್ ಕಾಕ್‌ನಂವೊಂಡ ತುದಿನ ಅರಿಚಿಡ್‌ವಕ್, ದೇವ ಗೊತ್ತ್ ಮಾಡ್‍ನಯಿಂಗಳಾಯಿತ್, ರಾಜಕೀಯ ಯಾಜಕಂಗಳಾಯಿತ್, ಪವಿತ್ರವಾನ ರಾಜ್ಯತ್‍ರ ಮಕ್ಕಳಾಯಿತ್ ಪಿಂಞ ದೇವಡ ಸ್ವಂತ ಜನವಾಯಿತ್ ಉಳ್ಳಿರ.

¹⁰ಒರ್ ಕಾಲತ್‍ಲ್ ನಿಂಗ ದೇವಡ ಮಕ್ಕಳಾಯಿತ್ ಇಂಜಿತ್‌ಲ್ಲೆ, ಆಚೇಂಗಿ ಇಕ್ಕ ನಿಂಗ ದೇವಡ ಮಕ್ಕಳಾಯಿತ್ ಉಳ್ಳಿರ; ಒರ್ ಕಾಲತ್‍ಲ್ ನಿಂಗಕ್ ಕನಿಕರ ಕ್‍ಟ್ಟಿತ್‌ಲ್ಲೆ, ಆಚೇಂಗಿ ಇಕ್ಕ ನಿಂಗಕ್ ಕನಿಕರ ಕ್‍ಟ್ಟ್‌ಚಿ.

¹¹ನಾಡ ಪ್ರೀತಿರ ಜನಳೇ, ಈ ಲೋಕತ್‍ಲ್ ಚೆನ್ನ ಕಾಲ ಮಾತ್ರ ಬದ್‍ಕ್‍ವಯಿಂಗಳಾಯಿತ್, ಮನೆ ಇಲ್ಲತಯಿಂಗಡನೆಕೆ ಇಪ್ಪ ನಿಂಗಳ ನಾನ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ಆತ್ಮಕ್ ವಿರೋದವಾಯಿತ್ ಯುದ್ದ ಮಾಡ್‌ವ ಪಾಪತ್‍ರ ಗುಣತ್‍ನ ಕಳೆಯಂಡು.

¹²ದೇವಡ ಮೇಲೆ ನಂಬಿಕೆ ಇಲ್ಲತ ಜನ, ನಿಂಗ ತಪ್ಪ್ ಮಾಡ್‌ನಯಿಂಗಾಂದ್ ಕುತ್ತ ಪರ್ಂದತೇಂಗಿಯು, ಅಯಿಂಗ ನಿಂಗಡ ನಲ್ಲ ಕ್ರಿಯೇನ ಕಂಡಿತ್, ಅಂವೊ ನಂಗಳ ಕಾಂಬ ದಿವಸತ್‍ಲ್ ಅಯಿಂಗ ದೇವನ ತುದಿಪನೆಕೆ, ಅಯಿಂಗಡ ಮದ್ಯತ್‍ಲ್ ನಲ್ಲ ನಡತೆ ಉಳ್ಳಯಿಂಗಳಾಯಿತ್ ಬದ್‍ಕಂಡು.

¹³ಮನುಷ್ಯಂಗಡ ಮದ್ಯತ್‍ಲ್ ನೇಮಿಚಿಟ್ಟಿತುಳ್ಳ ಎಲ್ಲಾ ಅದಿಕಾರಕು, ಒಡೆಯಂಗಾಯಿತ್ ತಗ್ಗಿತ್ ನಡ್‌ಕಂಡು. ಅದ್ ರಾಜನಾಯಿತ್ಂಜತೇಂಗಿಯು,

¹⁴ಅಥವ ಅಂವೊ ಅಯಿಚ ಅದಿಕಾರಿಯಾಯಿತ್ಂಜತೇಂಗಿಯು, ತಪ್ಪ್ ಮಾಡ್‌ವಯಿಂಗಕ್ ದಂಡೆನೆ ತಪ್ಪಯಿಂಗಳಾಡ್ ಅಥವ ನಲ್ಲದ್ ಮಾಡ್‌ವಯಿಂಗಳ ಸತ್ಕಾರ ಮಾಡ್‌ವಯಿಂಗಳಾಡ್, ಅಂವೊ ಅಯಿಚಂವೊಂಗ್ ನಿಂಗ ತಗ್ಗಿತ್ ನಡ್‌ಕಂಡು.

¹⁵ಮುಠಾಳಂಗಡ ಗೊತ್ತಿಲ್ಲತ ತಕ್ಕ್‌ನ ನಿಂಗ ಅಡಕ್‍ವಕ್, ನಲ್ಲದ್ ಮಾಡಂಡೂಂದ್ ಉಳ್ಳದ್ ದೇವಡ ಚಿತ್ತವಾಯಿತ್ ಉಂಡ್.

¹⁶ಬುಡ್‍ಗಡೆ ಆನಯಿಂಗಳಾಯಿತ್ ಬದ್‍ಕಿ, ಆಚೇಂಗಿ, ನಿಂಗಕ್ ಕ್‍ಟ್ಟ್‌ನ ಈ ಸ್ವಾತಂತ್ರತ್‍ನ ನಿಂಗಡ ಇಚ್ಛೆರನೆಕೆ ಪಾಪ ಮಾಡಿತ್ ಮುಚ್ಚ್‌ವಕ್ ಉಪಯೋಗಿಚಿಡತಿ; ದೇವಡ ಸೇವಕಂಗಡನೆಕೆ ಬದ್‍ಕಂಡು.

¹⁷ಎಲ್ಲಾರ್‌ಕು ಚಾಯಿ ಮರ್ಯಾದೆ ಕೊಡಿ, ಯೇಸುನ ನಂಬ್‍ನಯಿಂಗಳ ಪ್ರೀತಿ ಮಾಡಿ, ದೇವಕ್ ಬೊತ್ತ್‌ಚಿಡಿ, ರಾಜನ ಗನಪಡ್‌ತಂಡು.

¹⁸ಅಳುವಳೇ, ಎಲ್ಲಾ ಮರ್ಯಾದೆಲ್ ನಿಂಗಡ ಎಜಮಾನಂಗಕ್ ತಗ್ಗಿತ್ ನಡ್‌ಪಿರ, ನಲ್ಲಯಿಂಗಕು, ಶಾಂತ ಗುಣ ಉಳ್ಳಯಿಂಗಕ್ ಮಾತ್ರ ಅಲ್ಲ, ಕಠಿಣ ಗುಣ ಉಳ್ಳಯಿಂಗಕು ಅನ್ನನೆ ಮಾಡಿ.

¹⁹ಎನ್ನಂಗೆಣ್ಣ್‌ಚೇಂಗಿ, ದೇವಡ ವಿಷಯತ್ ಉಳ್ಳ ಮನಸಾಕ್ಷಿಲ್, ಒಬ್ಬ ಅನ್ಯಾಯವಾಯಿತ್ ಕಷ್ಟಪ್ಪಟ್ಟತ್, ಹಿಂಸೆನ ಸಹಿಸಿಯಂಡ್ ಇಂಜತೇಂಗಿ, ಅದ್ ದೇವಡ ಮಿಂಞತ್ ದುಂಬ ಕೊಂಡಾಡುವಕ್ ಆಪ.

²⁰ಆಚೇಂಗಿ, ನಿಂಗ ತಪ್ಪ್ ಮಾಡಿತ್ ಅದ್ಂಗಾಯಿತ್, ಶಿಕ್ಷೆ ಕ್‍ಟ್ಟಿತ್ ಅದ್‍ನ ನಿಂಗ ಸಹಿಸಿಯಂಡ್ ಇಂಜತೇಂಗಿ, ನಿಂಗಕ್ ಎಂತ ಲಾಬ? ನಿಂಗ ನಲ್ಲದ್ ಮಾಡ್‌ವಕ ಕಷ್ಟಪಟ್ಟಿತ್, ಸಹಿಸಿಯಂಡ್ ಇಂಜತೇಂಗಿ ಅದ್ ದೇವಡ ಮಿಂಞತ್ ಕೊಂಡಾಡುವಕ್ ಆಪ.

²¹ಇದ್ಂಗಾಯಿತೇ ದೇವ ನಿಂಗಳ ಕಾಕಿಯತ್, ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತನು ನಿಂಗಕಾಯಿತ್ ಪಾಡ್‍ಪಟ್ಟಿತ್ ನಿಂಗ ಅಂವೊಂಡ ಬಟ್ಟೇಲ್ ಬಪ್ಪಕಾಯಿತ್ ಅಂವೊನ ಒರ್ ಉದಾರಣೆಯಾಯಿತ್ ಮಾಡ್‍ಚಿ.

²²ಅಂವೊ ಪಾಪ ಮಾಡಿತ್‌ಲ್ಲೆ, ಅಂವೊಂಡ ತಕ್ಕ್‌ಲ್ ಒರ್ ವಂಚನೇಯು ಕಂಡಿತ್‌ಲ್ಲೆ;[7]

²³ಅಂವೊನ ಅಯಿಂಗ ಅವಮಾನಮಾಡ್‌ವಕ, ಬದ್‍ಲ್ ಬಜ್ಜಿತ್‌ಲ್ಲೆ, ಹಿಂಸೆ ಮಾಡ್‌ವಕ, ಅಯಿಂಗಕ್ ಪೋಡಿ ಬಪ್ಪನೆಕೆ ಮಾಡಿತ್‌ಲ್ಲೆ. ಅದ್ಂಡ ಬದ್‍ಲ್, ನೀತಿಯಾಯಿತ್ ತೀರ್ಪ್ ಮಾಡ್‌ವಂವೊಂಡ ಪಕ್ಕ ಅಂವೊನ ಒಪ್ಪ್‌ಚಿಟ್ಟತ್.

²⁴ಅಂವೊ ನಂಗಡ ಪಾಪತ್‍ನ ತಾಂಡ ತಡೀಲ್ ಎಡ್‍ತಂಡ್, ಶಿಲುಬೇಲ್ ಪೊರ್‌ತಂಡ್‌ ಚತ್ತತ್. ಆನಗುಂಡ್, ನಂಗ ಪಾಪಕ್ ಚತ್ತ್ ಪೋಯಿತ್ ನೀತಿಕ್ ಬದ್‍ಕ್‍ವನೆಕೆ ಆಚಿ. ಅಂವೊಂಡ ಗಾಯತ್‍ನಗುಂಡ್ ನಂಗ ವಾಸಿಯಾಚಿ.

²⁵ಚದ್‌ರಿ ಪೋಯಿತ್ಂಜ ಕೊರಿರನೆಕೆ ಇಂಜಿರ; ಆಚೇಂಗಿ ಇಕ್ಕ ಕೊರಿ ಕಾಪಂವೊನೆಕೆ ನಿಂಗಡ ಆತ್ಮತ್‌ನ ನಡ್‍ತಿಯಂಡ್ ಪೋಪಂವೊಂಡ ಪಕ್ಕ, ಪಿಂಞ ನಿಂಗಳ ನೋಟುವ ಪೆರಿಯಂವೊಂಡ ಪಕ್ಕವು ಬಂದಿತುಳ್ಳಿರ.