Read Kodava 1 ಪೇತ್ರ 3 Bible Online

1 ಪೇತ್ರ 3 - Kodava bible

1 ಪೇತ್ರ 3

¹ಅನ್ನನೆ, ಪೊಣ್ಣಾಳುವಳೇ, ನಿಂಗ ನಿಂಗಡ ಸ್ವಂತ ವಡಿಯಂಗಡ ಪಕ್ಕ ಅಡಕತ್‍ಲ್ ಇರಂಡು. ಅಕ್ಕ, ಅಯಿಂಗಡಲ್ಲಿ, ದಾರೇಂಗಿಯು ದೇವಡ ವಾಕ್ಯತ್‍ನ ನಂಬತಯಿಂಗಳಾಯಿತ್ ಇಂಜತೇಂಗಿ, ನಿಂಗಡ ತಕ್ಕ್‌ರಗುಂಡ್ ಅಲ್ಲ, ನಿಂಗಡ ಗುಣತ್‍ರಗುಂಡ್,

²ಪಿಂಞ ಅಯಿಂಗ ನಿಂಗಡ ಪವಿತ್ರವಾನ ಬಕ್ತಿಯುಳ್ಳ ನಡತೇನ ಕಾಂಬಕ ಅಯಿಂಗಳ ದೇವಡ ಪಕ್ಕ ಬಲಿಪಕ್ ಆಪ.

³ನಿಂಗಡ ಬೋಜ, ನಿಂಗ ಪೊರಮೆ ಇಡ್‌ವ ಆಬರಣತ್ಂಜ ಬಪ್ಪಕ್ಕಾಗ. ಅದ್ ಎಂತ ಎಣ್ಣ್‌ಚೇಂಗಿ: ನಿಂಗಡ ತೆಲ್‌ಮಿಲ್ ಮಾಡ್‌ವ ಅಲಂಗಾರ, ಪೊನ್ನ್‌ರ ಆಬರಣ ಪಿಂಞ ಅಲಂಗಾರವಾನ ಬಟ್ಟೆ.

⁴ಅದ್ಂಡ ಬದ್‍ಲ್, ನಿಂಗಡ ಬೋಜ ನಿಂಗಡ ಒಳ್‍ಲಿಂಜ ಬಪ್ಪದಾಯಿತ್ ಇರಂಡು. ಅದ್ ಎಂತ ಎಣ್ಣ್‌ಚೇಂಗಿ: ಪಾಳಾಯಿ ಪೋಕತ ಅಲಂಗಾರವಾನ ಶಾಂತ ಮನಸ್ಸ್‌ಲ್ ನಿಂಗಡ ಹೃದಯತ್‍ಲ್ ಮುಚ್ಚಿತಿಪ್ಪ ಗುಣವೇ. ಅದ್ ದೇವಡ ನೋಟತ್‌ಲ್ ದುಂಬ ಬೆಲೆಯುಳ್ಳದಾಯಿತುಂಡ್.

⁵ಇನ್ನನೆ ಪೂರ್ವ ಕಾಲತ್‍ಲ್, ದೇವಡ ಮೇಲೆ ನಿರೀಕ್ಷೆ ಇಟ್ಟಿತ್ಂಜ ಪವಿತ್ರವಾನ ಪೊಣ್ಣಾಳುವ, ಅಯಿಂಗಡ ವಡಿಯಂಗಡ ಪಕ್ಕ ಅಡಕತ್‍ಲ್ ಇಂಜಿತ್, ಅಯಿಂಗಳ ಈ ಗುಣತ್‍ರಗುಂಡ್ ಅಲಂಗಾರ ಮಾಡ್‍ಚಿ.

⁶ಅನ್ನನೆ, ಸಾರಳ ತಾಂಡ ವಡಿಯನಾನ ಅಬ್ರಹಾಮನ, ಒಡೆಯಾಂದ್ ಕಾಕಿತ್, ಅಂವೊಂಗ್ ಬಗ್ಗಿತ್ ಇಂಜತ್. ನಿಂಗ ನಲ್ಲದ್ ಮಾಡಿತ್ ದಾರ್‌ಕು ಬೊತ್ತ್‌ವಕ್ ಜಾಗ ಕೊಡ್‍ಕತೆ ಇಂಜತೇಂಗಿ ನಿಂಗಳು ಅವಡ ಮೋಳಿಯಂಗಳಾಯಿತ್‌ಪ್ಪಿರ.

⁷ಅನ್ನನೆ, ವಡಿಯಂಗಳೇ! ನಿಂಗಡ ಪೊಣ್ಣಾಳುವ ತಡೀಲ್ ಬೆಲ ಇಲ್ಲತಯಿಂಗಳಾಯಿತ್ ಉಳ್ಳಾಂಗ್, ನಿಂಗಡ ಪ್ರಾರ್ಥನೆಕ್ ತಡೆ ಬರತನೆಕೆ, ಜ್ಞಾನತ್‍ಲ್ ಅಯಿಂಗಡ ಕೂಡೆ ಬದ್‌ಕಿತ್, ನಿಂಗಡ ಕೂಡೆ ಅಯಿಂಗಳು ಕೃಪೇರ ನಿತ್ಯ ಜೀವಕ್ ಪಾಲ್‍ದಾರಂಗಳಾನಗುಂಡ್, ಅಯಿಂಗಕ್ ಬೋಂಡಿಯಾನ ಮರ್ಯಾದೆನ ಕೊಡ್‍ಕಂಡು.

⁸ಕಡೇಕ್ ನಾನ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ: ನಿಂಗ ಎಲ್ಲಾರು ಒಬ್ಬ ಒಬ್ಬಂಡ ಕೂಡೆ ಐಕ್ಯತ್‍ಲ್ ಬದ್‍ಕಂಡು; ದಯೆ ಉಳ್ಳಯಿಂಗಳಾಯಿತ್, ಯೇಸುನ ನಂಬ್‍ನಯಿಂಗಡ ಪ್ರೀತಿ ಉಳ್ಳಯಿಂಗಳಾಯಿತ್, ಕನಿಕರ ಉಳ್ಳಯಿಂಗಳಾಯಿತ್, ಪೊರುಮೆ ಉಳ್ಳಯಿಂಗಳಾಯಿತ್ ಇಕ್ಕಂಡು.

⁹ಕ್‍ೕಡ್ ಮಾಡ್‌ವಯಿಂಗಕ್ ಕ್‍ೕಡ್ ಮಾಡತಿ, ಅವಮಾನ ಮಾಡ್‌ವಯಿಂಗಳ ಅವಮಾನ ಮಾಡತಿ, ಆಚೇಂಗಿ, ನಿಂಗ ಆಶೀರ್ವಾದ ಪಡೆಯುವಕ್ ದೇವ ನಿಂಗಳ ಕಾಕಿತುಂಡ್‍ೕಂದ್ ಗೇನ ಮಾಡಿತ್ ಅಯಿಂಗಳ ಆಶೀರ್ವಾದ ಮಾಡಿ.

¹⁰ದಾರ್ ಅಯಿಂಗಡ ಬದ್‍ಕ್‍ನ ಪ್ರೀತಿಚಿಡುವ, ಪಿಂಞ ನಲ್ಲ ಬವಿಷ್ಯ ಬರಂಡೂಂದ್ ಗೇನ ಮಾಡ್‌ವ, ಅಯಿಂಗ ಕೆಟ್ಟದ್ ಪರಿಯುವಕ್ ತಾಂಡ ನಾವ್‌ನ ಪಿಂಞ ಪೊಟ್ಟ್ ಪರಿಯುವಕ್ ತಾಂಡ ಕಿರಿನ ಅಡಕುವ.

¹¹ಕೆಟ್ಟದ್‍ನ ಬುಟ್ಟಿತ್, ನಲ್ಲದ್ ಮಾಡಂಡು; ಸಮಾದಾನತ್‍ನ ತ್‍ೕಡಿತ್ ಅದ್ಂಡ ಬಯ್ಯಕ್ ಪೋಂಡು.

¹²ದೇವಡ ಕಣ್ಣ್ ನೀತಿವಂತಯಿಂಗಡ ಮೇಲೆ ಪಿಂಞ ಅಂವೊಂಡ ಕೆಮಿ ಅಯಿಂಗಡ ಪ್ರಾರ್ಥನೆನ ಕ್‍ೕಪಕ್ ದುಂಬ ಪಕ್ಕತ್‍ಲ್ ಉಂಡ್, ಆಚೇಂಗಿ ಕೆಟ್ಟದ್ ಮಾಡ್‌ವಯಿಂಗಡ ಮೇಲೆ ಅಂವೊಂಡ ಮೂಡ್ ವಿರೋದವಾಯಿತುಂಡ್.[8]

¹³ನಿಂಗ ನಲ್ಲದ್ ಮಾಡಂಡೂಂದ್ ಅರ್ಪಿಚಿಟ್ಟಯಿಂಗಳಾಯಿತ್ ಇಂಜತೇಂಗಿ, ನಿಂಗಕ್ ಕ್‍ೕಡ್ ಮಾಡ್‍ವದ್ ದಾರ್?

¹⁴ಆಚೇಂಗಿ, ನೀತಿವಂತ ಕಾರ್ಯ ಮಾಡಿತ್ ಅದ್ಂಗಾಯಿತ್ ತೊಂದರೆ ಬಾತೇಂಗಿ, ನಿಂಗ ಆಶೀರ್ವಾದ ಪಡ್ಂದಯಿಂಗ. ಅಯಿಂಗ ಜೋರ್ ಮಾಡ್‌ವದ್‍ನ ನೋಟಿತ್ ನಿಂಗ ಬೊತ್ತತೆ, ಪೋಡಿ ಇಲ್ಲತೆ ಇಕ್ಕಂಡು.[9]

¹⁵ಆಚೇಂಗಿ, ಕ್ರಿಸ್ತಂಗ್ ನಿಂಗಡ ಹೃದಯತ್‍ಲ್ ಮರ್ಯಾದೆ ಕೊಡ್‍ಕಂಡು, ಅಂವೊನ ಒಡೆಯನಾಯಿತ್ ಗನಪಡ್‌ತಂಡು. ನಿಂಗಡ ನಿರಿಕ್ಷೇರ ವಿಷಯತ್ ದಾರಾಚೇಂಗಿ ಪ್ರಶ್ನೆ ಇಟ್ಟತೇಂಗಿ, ಅಯಿಂಗ ಎಲ್ಲಾರ್‌ಕು ಉತ್ತರ ಕೊಡ್‍ಪನೆಕೆ, ತಾಯಾರಾಯಿತ್ ಇರಿ. ಆಚೇಂಗಿ ಅದ್‍ನ ಮರ್ಯಾದೆಲ್ ಶಾಂತತ್‍ಲ್ ಮಾಡಂಡು.

¹⁶ನಲ್ಲ ಮನಸಾಕ್ಷಿಲ್ ಇರಿ, ಅಕ್ಕ, ನಿಂಗಕ್ ಕ್ರಿಸ್ತಂಡ ಐಕ್ಯತ್‍ಲ್ ಉಳ್ಳ ನಲ್ಲ ನಡತೇನ ದೂಷಣೆ[10] ಮಾಡಿತ್, ನಿಂಗಳ ಕೆಟ್ಟಯಿಂಗಾಂದ್ ಎಣ್ಣುವಯಿಂಗಕ್ ಞಾಣ ಆಪ.

¹⁷ಕೆಟ್ಟದ್ ಮಾಡಿತ್ ಕಷ್ಟಪಡ್‌ವಕಿಂಜ, ದೇವಕ್ ಚಿತ್ತ ಉಂಡೇಂಗಿ, ನಲ್ಲದ್ ಮಾಡಿತ್ ಕಷ್ಟಪಡ್‌ವದ್ ನಲ್ಲದ್.

¹⁸ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಸಹ ನಂಗಳ ದೇವಡ ಪಕ್ಕ ಕೊಂಡ್ ಬಪ್ಪಕಾಯಿತ್, ಅನೀತಿ ಉಳ್ಳಯಿಂಗಕ್ ಬದ್‍ಲಾಯಿತ್ ನೀತಿಯುಳ್ಳಂವೊನಾಯಿತ್ ಒರೇ ಕುರಿ ಪಾಪತ್‍ರಗುಂಡ್ ಕಷ್ಟಪಟ್ಟತ್; ಅಂವೊ ತಡೀಲ್ ಚತ್ತತ್, ಆತ್ಮತ್‍ಲ್ ಜೀವವಾಯಿತ್ ಬಾತ್.

¹⁹ಆ ಆತ್ಮತ್‍ಲ್ ಅಂವೊ ಪೋಯಿತ್, ಕೆಟ್ಟಿ ಇಟ್ಟಿತುಳ್ಳ ಆತ್ಮಂಗಕ್ ದೇವಡ ನಲ್ಲ ಸುದ್ದಿನ ಎಣ್ಣ್‌ಚಿ.

²⁰ಆ ಆತ್ಮಂಗ, ಪಂಡ್ ಕಾಲತ್‍ಲ್ ನೋಹ ಕಪ್ಪಲ್ ಮಾಡಿಯಂಡಿಪ್ಪಕ, ದೇವ ತಾಳ್ಮೆಲ್ ಪಾರಕಾತಂಡಿಂಜ ಸಮಯತ್‍ಲ್, ದೇವಡ ಸದ್ದ್‌ಕ್ ಕೆಮಿ ಕೊಡ್‍ಕತೆ ಪೋನಯಿಂಗ. ಅಕ್ಕ, ಆ ಕಪ್ಪಲ್‍ಲ್ ಚೆನ್ನ ಜನವಾಯಿತ್ಂಜ ಎಟ್ಟ್ ಜನ ಮಾತ್ರ ಜಲ ಪ್ರಳಯತ್ಂಜ ತಪ್ಪ್‌ಚಿಟ್ಟತ್.

²¹ಅದ್ಂಗ್ ಸಮವಾನ ನಂಗಡ ರಕ್ಷಣೆಕಾಯಿತುಳ್ಳ ದೀಕ್ಷಾಸ್ನಾನ ಎಂತ ಎಣ್ಣ್‌ಚೇಂಗಿ, ಅದ್ ನಂಗಡ ತಡೀರ ಅಶುದ್ದತ್‍ನ ಕತ್ತುವ ವಿಷಯ ಅಲ್ಲ. ಆಚೇಂಗಿ, ದೇವಡ ವಿಷಯತ್ ನಂಗಡ ಮನಸಾಕ್ಷಿರ ಒಪ್ಪಂದವಾಯಿತ್, ಇಕ್ಕ ನಂಗಳ ಯೇಸು ಕ್ರಿಸ್ತ ಚಾವ್‍ಯಿಂಜ ಜೀವತ್‍ಲ್ ಬಂದ ಮೂಲಕ ರಕ್ಷಣೆ ಮಾಡಿಯೆ.

²²ಅಂವೊ ಪರಲೋಕಕ್ ಪೋಯಿತ್, ದೇವಡ ಬಲ್‌ತೆ ಬರಿಲ್ ಅಳ್‌ತಿತ್ ಉಂಡ್; ದೇವದೂತಂಗ, ಅದಿಕಾರ, ಶಕ್ತಿ ಅಂವೊಂಡ ಅಡಿಲ್ ಅಡಕತ್‍ಲ್ ಉಂಡ್.