Read Kodava 1 ಪೇತ್ರ 5 Bible Online

1 ಪೇತ್ರ 5 - Kodava bible

1 ಪೇತ್ರ 5

¹ನಿಂಗಡಲ್ಲಿ ಉಳ್ಳ ಪೆರಿಯಯಿಂಗಕ್ ಮೂಪನಾಯಿತು, ಕ್ರಿಸ್ತಂಡ ಕಷ್ಟಕ್ ಸಾಕ್ಷಿಯಾಯಿತು, ಇಂಞು ಮಿಂಞಕ್ ಬಪ್ಪಕುಳ್ಳ ಮಹಿಮೇಕ್ ಪಾಲ್‍ದಾರನಾಯಿತು ಇಪ್ಪ ನಾನ್ ನಿಂಗಕ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ:

²ನಿಂಗಡಲ್ಲಿ ಉಳ್ಳ ದೇವಡ ಮಕ್ಕಳ ನಿಂಗ ಚಾಯಿತೆ ಒರ್ ಕೊರಿ ಗುಂಪ್‍ನ ನೋಟ್‍ವನೆಕೆ ಪೆರಿಯಯಿಂಗಡ ಸೇವೇನ ಮಾಡಂಡು. ಒತ್ತಾಯತ್‌ಲ್ ಅಲ್ಲ, ದೇವ ಕುಶಿಪಡ್‌ವನೆಕೆ ಮನಪೂರ್ವವಾಯಿತ್ ಪಿಂಞ ಕೆಟ್ಟ ಆದಾಯಕಾಯಿತ್ ಅಲ್ಲ, ಪುರ್‌ಡುಳ್ಳ ಮನಸ್ಸ್‌ಲ್ ಮಾಡಂಡು.

³ನಿಂಗಡ ಕೈಕ್ ಒಪ್ಪ್‌ಚಿಟ್ಟಿತುಳ್ಳಯಿಂಗಳ ಬಾರವಾಯಿತ್ ಆಳುವನೆಕೆ ಅಲ್ಲ, ದೇವಡ ಮಕ್ಕಕ್ ಉದಾರಣೆಯಾಯಿತ್ ಇರಿ.

⁴ಅನ್ನನೆ ಮಾಡ್‍ಚೇಂಗಿ, ದೇವಡ ಮಕ್ಕಳ ಕೊರಿ ಕಾಪಂವೊಡನೆಕೆ ನೋಟಿಯಂಡುಳ್ಳ ಬಲ್ಯಂವೊ ಬಪ್ಪಕ, ನಿಂಗ ಅಂವೊಂಡಿಂಜ ಮಾಜ್ ಪೋಕತ ಮಹಿಮೇರ ಕಿರೀಟತ್‍ನ ಪಡೆಯುವಿರ.

⁵ಅನ್ನನೆ, ಬಾಲೆಕಾರಂಗಳೇ, ಪೆರಿಯಯಿಂಗಡ ತಕ್ಕ್‌ಕ್ ತಗ್ಗಿತ್ ನಡ್‌ಂದಂಡಿರಿ. ನಿಂಗ ಎಲ್ಲಾರು ಒಬ್ಬೊಬ್ಬಂಗ್ ಪೊರುಮೆನ ಬಟ್ಟೇರನೆಕೆ ಇಟ್ಟೊಳಿ. ಎನ್ನಂಗೆಣ್ಣ್‌ಚೇಂಗಿ, ಆಂಗಾರ ಉಳ್ಳಯಿಂಗಕ್ ದೇವ ಎದ್‍ರ್ ನಿಪ್ಪ, ಅಡಕ ಉಳ್ಳಯಿಂಗಕ್ ದೇವ ಕರುಣೆ ಕಾಟ್‍ವ.[12]

⁶ಆನಗುಂಡ್, ತಕ್ಕ ಸಮಯತ್‍ಲ್, ದೇವ ನಿಂಗಳ ಕೊಡಿಕ್ ಕೊಂಡ್ ಪೋಪನೆಕೆ, ದೇವಡ ಶಕ್ತಿರ ಕೈಕ್ ಅಡಿಲ್ ಅಡಕತ್‍ಲ್ ಇರಿ.

⁷ಅಂವೊ ನಿಂಗಳ ಚಾಯಿ ನೋಟ್‍ವಂವೊನಾಯಿತುಳ್ಳಗುಂಡ್, ನಿಂಗಡ ಬೇಜಾರತ್‍ನ ಅಂವೊಂಡ ಮೇಲೆ ಬುಡಿ.

⁸ತನ್ನಡಕ್ಕ ಉಳ್ಳಯಿಂಗಳಾಯಿತ್, ಎಚ್ಚರತ್ ಇಪ್ಪಯಿಂಗಳಾಯಿತ್ ಇರಿ. ನಿಂಗಡ ವಿರೋದಿಯಾನ ಸೈತಾನ, ಕೂತ್ ಕೊಡ್‍ಪ ಸಿಂಹತ್‍ರನೆಕೆ ದಾರ್‌ನ ಮುಗ್ಗಂಡೂಂದ್ ಸುತ್ತಿಯಂಡ್ ನೋಟಿಯಂಡುಂಡ್.

⁹ನಂಬಿಕೇಲ್ ದೈರ್ಯವಾಯಿತ್ ಇಂಜಂಡ್, ಅಂವೊಂಗ್ ಎದ್‍ರಾಯಿತ್ ನಿಲ್ಲಿ. ಈ ಲೋಕತ್‍ಲ್ ಉಳ್ಳ ನಿಂಗಡ ಎಲ್ಲಾ ಅಣ್ಣತಮ್ಮಣಂಗ ಇದೇ ತರ ಕಷ್ಟತ್‍ಲ್ ಬದ್‍ಕಿಯಂಡ್ ಉಳ್ಳದ್ ನಿಂಗಕ್ ಗೊತ್ತುಂಡಲ್ಲ!

¹⁰ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಂಗಳ ತಾಂಡ ನಿತ್ಯ ಮಹಿಮೇಕ್ ಕಾಕ್‍ನ ಕೃಪೆ ದುಂಬ್‍ನ ದೇವ, ಚೆನ್ನ ಕಾಲ ಕಷ್ಟ ಅನುಬವಿಚಿಡುವ ನಿಂಗಳ ಚಾಯಿ ಮಾಡಿತ್, ಬಲಪಡ್‍ತಿತ್, ಸ್ತಿರಪಡ್‌ತಿತ್, ನಿಪ್ಪ್‌ಚಿಡಡ್.

¹¹ಅಂವೊಂಗ್ ಎಕ್ಕಾಲು ಶಕ್ತಿ ಆಡ್. ಆಮೆನ್.

¹²ನಿಂಗಕ್ ಪುರ್‌ಡ್ ಕೊಡ್‍ಪಕ್ ಪಿಂಞ ಈ ಕೃಪೆ ದೇವಡ ಸತ್ಯವಾನದ್‍ೕಂದ್ ಸಾಕ್ಷಿಕೊಡುಪಕಾಯಿತ್, ನಾನ್ ಈ ಚೆರಿಯ ಕಾಗದತ್‍ನ ಸತ್ಯವಂತಂವೋಂದ್ ನಾನ್ ಗೇನ ಮಾಡ್‌ವ ತಮ್ಮಣನಾನ ಸಿಲ್ವಾನಂಡ ಸಹಾಯತ್‍ಲ್ ಒಳ್‍ದಿಯೆ. ಇದ್‍ಲ್ ನಿಂಗ ಸ್ತಿರವಾಯಿತ್ತಿರಿ.

¹³ನಿಂಗಡ ಕೂಡೆ ಗೊತ್ತ್ ಮಾಡ್‍ನ, ಬಾಬೆಲ್‍ಲ್ ಉಳ್ಳಯಿಂಗ ಪಿಂಞ ನಾಡ ಮೋಂವೊಂಡನೆಕೆ ಉಳ್ಳ ಮಾರ್ಕ ನಿಂಗಕ್ ವಂದನೆ ಎಣ್ಣಿಯಂಡುಂಡ್.

¹⁴ಒಬ್ಬೊಬ್ಬಂಗಳ ಯೇಸುನ ನಂಬ್‍ನಯಿಂಗಡ ಪ್ರೀತಿಲ್ ಸತ್ಕಾರ ಮಾಡಿ. ಕ್ರಿಸ್ತಂಡ ಕೂಡೆ ಐಕ್ಯತ್‍ಲ್ ಉಳ್ಳ ನಿಂಗ ಎಲ್ಲಾರ್‌ಕು ಸಮಾದಾನ ಕ್‍ಟ್ಟಡ್.