Read Kodava 2 ಪೇತ್ರ 2 Bible Online

2 ಪೇತ್ರ 2 - Kodava bible

2 ಪೇತ್ರ 2

¹ಇಸ್ರಾಯೇಲ್ ಜನಡ ಮದ್ಯತ್‍ಲ್ ಸಹ ಕಳ್ಳ ಪ್ರವಾದಿಯಂಗ ಇಂಜತ್. ಅನ್ನನೆ ನಿಂಗಡ ಮದ್ಯತ್‍ಲು ಕಳ್ಳ ಬೋದನೆಕಾರಂಗ ಇಪ್ಪ. ಅಯಿಂಗ ದಾರ್‌ಕು ಗೊತ್ತಿಲ್ಲತನೆಕೆ, ತಂತ್ರವಾಯಿತ್ ದೇವಡ ಮಕ್ಕಳ ಪಾಳ್ ಮಾಡ್‌ವ ಪಾಳ್ ಬೋದನೆನ ಬೋದನೆ ಮಾಡಿತ್, ಅಯಿಂಗಕ್ ರಕ್ಷಣೆ ತಪ್ಪಕಾಯಿತ್ ಬೆಲೆ ಕೊಡ್‍ತ ಒಡೆಯನ ಸಹ ಒತ್ತತೆ, ಅಯಿಂಗಕ್ ಅಯಿಂಗಳೇ ಬೆರಿಯ ನಾಶ ಬಪ್ಪನೆಕೆ ಮಾಡ್‌ವ.

²ಈ ಕಳ್ಳ ಬೋದನೆಕಾರಡ ಕೆಟ್ಟ ನಡತೇಲ್ ದುಂಬ ಜನ ನಡ್‍ಪ, ಅನ್ನನೆ ಅಯಿಂಗಡಗುಂಡ್ ಸತ್ಯತ್‍ರ ಬಟ್ಟೇರ ಪೆದಕ್ ದೂಷಣೆ ಆಪ.

³ದುರಾಸೇಲ್, ಅಯಿಂಗಳೇ ಮಾಡ್‍ನ ಕಥೇರ ಬೋದನೆರ ಮೂಲಕ ನಿಂಗಡಿಂಜ ಅಯಿಂಗಕ್ ಆದಾಯ ಆಪನೆಕೆ ವಂಚನೆ ಮಾಡ್‌ವ. ದೇವ ಅಯಿಂಗಳ ಪಂಡೇ ನ್ಯಾಯತೀರ್ಪ್ ಮಾಡಿರ್‌ತ್, ಅಯಿಂಗಡ ಮೇಲೆ ಬಪ್ಪ ಶಿಕ್ಷೆ ಬೆರಿಯ ಬಪ್ಪ.

⁴ಪಾಪ ಮಾಡ್‍ನ ಪರಲೋಕತ್‍ಲ್ ಇಂಜ ದೂತಂಗಳ ಸಹ ದೇವ ಬುಟ್ಟಿತ್‌ಲ್ಲೆ, ಅಯಿಂಗಳ ನರಕಕ್ ಅಯಿಚಿತ್, ಇರ್‌ಟಾನ ಕುಂಡ್‍ಲ್ ತಳ್ಳಿತ್ ನ್ಯಾಯತೀರ್ಪ್ ಕೊಡ್‍ಪಕಾಯಿತ್ ಬೆಚ್ಚಿತುಂಡ್.

⁵ಪಂಡ್ ಕಾಲತ್‍ಲ್, ದೇವಡ ನೀತಿನ ಬೋದನೆ ಮಾಡ್‍ನ ನೋಹ ಎಣ್ಣ್‌ವಂವೊ ಪಿಂಞ ಅಂವೊಂಡ ಕೂಡೆ ಇಂಜ ಏಳ್ ಜನಳ ಮಾತ್ರ ಕಾಪಾಡಿತ್, ದೇವ ಬಕ್ತಿ ಇಲ್ಲತಯಿಂಗಡ ಮೇಲೆ ಜಲಪ್ರಳಯ ಬಪ್ಪಕ್ ಮಾಡಿತ್, ಈ ಲೋಕತ್‍ನ ಸಹ ಶಿಕ್ಷೆಯಿಂಜ ದೇವ ಕಾಪಾ‍ಡಿತ್‌ಲ್ಲೆ.[1]

⁶ಅದೇ ತರ, ಸೊದೋಮ್ ಪಿಂಞ ಗೊಮೋರ ಪಟ್ಟಣತ್‍ನ ತಿತ್ತ್‌ಕ್ ಇಟ್ಟಿತ್ ಬೂದಿಯಾಪನೆಕೆ ತೀರ್ಪ್ ಮಾಡಿತ್, ಬಪ್ಪಕುಳ್ಳ ಕಾಲತ್‍ಲ್ ದೇವಡ ಮೇಲೆ ಬಕ್ತಿ ಇಲ್ಲತೆ ಬದ್‍ಕ್‍ವಯಿಂಗಕ್ ಉದಾರಣೆಯಾಯಿತ್ ಮಾಡ್‍ಚಿ.[2]

⁷ಆಚೇಂಗಿ, ಅದೇ ಸಮಯತ್‍ಲ್, ನೀತಿವಂತಂವೊನಾನ ಲೋಟ ಎಣ್ಣ್‌ವಂವೊ, ಲೈಂಗಿಕ ಪಾಪತ್‍ಲ್ ದುಷ್ಟಂಗಳಾಯಿತ್ ಬದ್‍ಕಿಯಂಡ್ ಇಂಜ ಜನಡ ಮದ್ಯತ್‍ಲ್ ವಾಸ ಮಾಡಿಯಂಡ್ ಇಂಜತೇಂಗಿಯು,

⁸ದಿನಾಲು ಅದ್‍ನೇ ಕಂಡಿತ್ ಕ್‍ೕಟಿತ್, ತಾಂಡ ನೀತಿಯಾನ ಹೃದಯತ್‍ಲ್ ನೊಂಬಲ ಪಟ್ಟಂಡ್ ಇಂಜತ್. ಅಕ್ಕ ಅಂವೊನ ದೇವ ಕಾಪಾಡ್‍ಚಿ.

⁹ಅನ್ನನೆ ಆಚೇಂಗಿ, ಬಕ್ತಿಯುಳ್ಳಯಿಂಗಳ ಅಯಿಂಗಕ್ ಬಪ್ಪ ಸೋದನೆಯಿಂಜ ಕಾಪಾಡ್‌ವಕು, ಅನೀತಿಯಾನಯಿಂಗಳ ನ್ಯಾಯತೀರ್ಪ್ ನಾಳ್‍ಕತ್ತನೆ ಶಿಕ್ಷೇಲ್ ಬೆಚ್ಚಿತ್‌ಪ್ಪಕು ಒಡೆಯಂಗ್ ಗೊತ್ತುಂಡ್.

¹⁰ಎಲ್ಲಾಕಿಂಜ, ಅಯಿಂಗಡ ಸ್ವಂತ ಮೋಸವಾನ ಲೈಂಗಿಕ ಪಾಪತ್‍ರ ಗುಣತ್‍ರ ಆಸೆರನೆಕೆ ಬದ್‍ಕ್‍ವಕ್ ಬಗ್ಗ್‌ಚಿಟ್ಟಿತ್ ನಡ್ಂದಂಡ್, ಒಡೆಯಂಡ ಅದಿಕಾರತ್‍ನ ಅಲ್ಲಗೆಳೆಯುವಯಿಂಗಕ್ ಕಂಡಿತವಾಯಿತ್ ಇನ್ನನೆ ಮಾಡ್‌ವ. ಈಂಗ, ದಾರ್ ಎಣ್ಣ್‌ಚೇಂಗಿಯು ತಗ್ಗಿತ್‌ ನಡ್‌ಕತಯಿಂಗಳು, ಆಂಗಾರಿಯಳು, ದೇವಡ ಸನ್ನಿದಾನತ್‍ಲ್ ಪರಲೋಕತ್‍ಲ್ ಮಹಿಮೆ ಪಡ್ಂದಯಿಂಗಳ ದೂಷಣೆ ಮಾಡ್‌ವಕ್ ಪೋಡಿಯಿಲ್ಲತಯಿಂಗಳು ಆಯಿತುಂಡ್.

¹¹ದೇವದೂತಂಗ ಶಕ್ತಿ ಉಳ್ಳಯಿಂಗಳಾಯಿತ್ ಇಂಜತೇಂಗಿಯು, ಅದಿಕಾರ ಉಳ್ಳಯಿಂಗಳಾಯಿತ್ ಇಂಜತೇಂಗಿಯು, ದೇವಡ ಸನ್ನಿದಾನತ್‍ಲ್ ಅಯಿಂಗಳ ದೂಷಣೆ ಮಾಡ್‌ಲೆಲ್ಲ!

¹²ಆಚೇಂಗಿ, ಈ ಕಳ್ಳ ಬೋದನೆ ಮಾಡ್‌ವಯಿಂಗ ಅಯಿಂಗಕ್ ಗೊತ್ತಿಲ್ಲತ ವಿಷಯತ್‍ಲ್ ದೇವ ದೂಷಣೆ ಎಣ್ಣಿಯಂಡುಂಡ್. ಈಂಗ ಮುಠಾಳರನೆಕೆ ಉಳ್ಳ ಪ್ರಾಣಿಯರನೆಕೆ, ಬುದ್ದಿಯಿಲ್ಲತ ಸೂನ್ಯ ಮೃಗತ್‍ರನೆಕೆ, ಪುಡ್‌ಚಿತ್ ಪಾಳಾಪಕಾಯಿತೇ ಪುಟ್ಟ್‌ನಯಿಂಗ. ಮೃಗತ್‍ರನೆಕೆ ಈಂಗಳು ಪಾಳಾಯಿ ಪೋಪ.

¹³ಅಯಿಂಗ ಮಾಡ್‍ನ ಕೇಡ್‍ಕ್ ಅಯಿಂಗಕ್ ಬಪ್ಪ ಕೇಡೇ ಫಲವಾಯಿತ್‌ಪ್ಪ. ಪೋಲ್‍ರ ಬೊಳಿಲ್ ಕೂಟ್‍ಕಳೀಲ್ ಮುಳ್‍ಗಿತ್ ಇಪ್ಪದ್ ಕುಶೀಂದ್ ಗೇನ ಮಾಡ್‌ವ. ಅಯಿಂಗ ನಿಂಗಡಲ್ಲಿ ಲೆಜ್ಜೆಯಾಯಿತ್, ಞಾಣವಾಯಿತ್ ಇಪ್ಪ. ಅಯಿಂಗ, ನಿಂಗಡ ಕೂಡೆ ಐಕ್ಯತ್‍ರ ಗಾದ್ದಾಳತ್‍ಲ್ ಉಂಬಕ ಸಹ ಅಯಿಂಗ ಮಾಡ್‌ವ ವಂಚನೆಲ್ ಕುಶಿಪಟ್ಟಂಡ್ ಇಪ್ಪ.

¹⁴ಅಯಿಂಗ ವ್ಯಬಿಚಾರತ್‍ರ ಗೇನತ್‍ಲ್ ದುಂಬಿತ್, ಪಾಪ ಮಾಡ್‌ವದ್‍ನ ನಿಪ್ಪ್‌ಚಿಡತಯಿಂಗಳಾಯಿತ್ ಬದ್‍ಕ್‍ವ; ಸ್ತಿರವಿಲ್ಲತ ದೇವಡ ಮಕ್ಕಳ ಪಾಪ ಮಾಡ್‌ವನೆಕೆ ಅಯಿಂಗಡ ಕೈಕ್ ಇಡ್‌ವ, ದುಡ್ಡ್‌ರ ಆಸೆಕಾಯಿತ್ ಅಯಿಂಗಡ ಹೃದಯತ್‍ನ ಚಾಯಿತೆ ಪಡಿಚಿಟ್ಟ ಶಾಪತ್‍ರ ಮಕ್ಕಳಾಯಿತ್ ಈಂಗ ಉಂಡಲ್ಲ!

¹⁵ಈಂಗ ಸರಿಯಾನ ಬಟ್ಟೇನ ಬುಟ್ಟಿತ್, ತಪ್ಪ್‌ಚಿಟ್ಟಿತ್, ಬೆಯೋರ ಎಣ್ಣ್‌ವಂವೊಂಡ ಮೋಂವೊನಾನ ಬಿಳಾಮ ಎಣ್ಣ್‌ವಂವೊಂಡ ಬಟ್ಟೇಲ್ ನಡ್‌ಂದಯಿಂಗ; ಈ ಬಿಳಾಮ ಅನೀತಿರ ಸಂಪಾದೆನೆಲ್ ಕುಶಿಪಟ್ಟತ್.[3]

¹⁶ಆಚೇಂಗಿ, ಅಂವೊ ಮಾಡ್‍ನ ಅಕ್ರಮಕಾಯಿತ್ ಅಂವೊಂಗ್ ಜೋರ್ ಮಾಡ್‌ಚಿ. ತಕ್ಕ್ ಪರಿಯತ ಕತ್ತೆ, ಮನುಷ್ಯಂಡನೆಕೆ ತಕ್ಕ್ ಪರ್ಂದಿತ್, ಒರ್ ಪ್ರವಾದಿಯಾನ ಅಂವೊಂಡ ಮುಠಾಳತನತ್‍ನ ತಡ್‍ತತ್.

¹⁷ಈಂಗ ನೀರ್ ಇಲ್ಲತ ಕಣತೆರನೆಕೆ, ಪಿಂಞ ಬಿರ್‌ಗಾಳಿಲ್ ಅಲ್ಲಿ ಇಲ್ಲಿ ಓಡುವ ಮೋಡತ್‍ರನೆಕೆ ಉಂಡ್; ಬಲ್ಯ ಇರ್‌ಟ್‌ನ ಮಾತ್ರ ಈಂಗಕ್ ನ್ಯಾಯತೀರ್ಪಾಯಿತ್ ಬೆಚ್ಚಿತುಂಡ್.

¹⁸ಅಯಿಂಗಡ ಬಾಯಿಲ್ ಮುಠಾಳತನತ್‍ರ ಪಿಂಞ ಒಂದು ಇಲ್ಲತ ಬಡಾಯಿ ತಕ್ಕ್ ಮಾತ್ರ ಉಂಡ್. ಅಯಿಂಗಡ ಕಳ್ಳ ಬೋದನೆರ ಮೂಲಕ, ತಡೀರ ಇಚ್ಛೆರ ಆಸೆ, ಪಾಪ ಅಲ್ಲಾಂದ್ ಎಣ್ಣಿತ್, ಪಾಪ ಮಾಡ್‌ವ ಜನತ್‍ಂಜ, ಇಕ್ಕ ಬುಡ್‌ಗಡೆಯಾಯಿತ್ ಬಂದ ಯೇಸುನ ನಂಬ್‍ನಯಿಂಗಕ್ ಆಸೆ ಕಾಟಿತ್ ಅಯಿಂಗಳ ತಿರಿತ್ ಪೋಪಕ್ ಮಾಡಿಯಂಡುಂಡ್.

¹⁹ಅಯಿಂಗ ಕೇಡಾನ ಪಾಪಕ್ ಅಡಿಯಾಳಾಯಿತ್ಂಜತೇಂಗಿಯು, ಬೋರೆಯಿಂಗಕ್ ಬುಡ್‍ಗಡೇನ ವಾಗ್ದಾನಮಾಡಿಯಂಡುಂಡ್; ಏದ್ ವಿಷಯ ಒಬ್ಬನ ಗೆದ್ದ್‌ಚೋ ಅದ್ಂಗೇ ಅಂವೊ ಅಡಿಯಾಳಾಯಿತುಂಡ್.

²⁰ಒಡೆಯನಾನ ಯೇಸು ಕ್ರಿಸ್ತನ ಗೊತ್ತಾಯಿತ್, ಈ ಲೋಕತ್‍ರ ಪಾಳ್ ಪಾಪತ್ಂಜ ಬಚಾವಾನಯಿಂಗ ಪುನಃ ಅದ್‍ಲ್ ಚಿಕ್ಕಿತ್ ಪೋನಕ ಅಯಿಂಗಕ್ ಬಪ್ಪಕುಳ್ಳ ಸ್ತಿತಿ ಮಿಂಞತ್‍ರ ಸ್ತಿತಿಕಿಂಜ ಮೋಸವಾಯಿತ್‌ಪ್ಪ.

²¹ಅನ್ನನೆ ಉಳ್ಳಯಿಂಗ, ನೀತಿರ ಬಟ್ಟೇನ ಗೊತ್ತಾನ ಪಿಂಞ ಅಯಿಂಗಕ್ ಒಪ್ಪ್‌ಚಿಟ್ಟ ಪವಿತ್ರವಾನ ಆಜ್ಞೆನ ಬುಟ್ಟಿತ್ ಪೋಪಕಿಂಜ, ಅದ್‍ನ ಅಯಿಂಗಕ್ ಗೊತ್ತಿಲ್ಲತೆ ಇಂಜಿತೇಂಗಿ ಚಾಯಾಯಿತ್‌ಪ್ಪ.

²²ನಾಯಿ ಅದ್ ಕಕ್ಕ್‌ನದ್‍ನ ಪುನಃ ತಿಂಬನೆಕೆ, ಕತ್ತ್‌ನ ಪಂದಿ ಪುನಃ ಬಂಡ್‍ಲ್ ಪೋಪಾಂದ್ ಎಣ್ಣ್‌ವ ಪಳೆಯ ತಕ್ಕ್‌ರನೆಕೆ ಅಯಿಂಗಕ್ ಆಚಿ.[4]