Read Kodava 2 ಪೇತ್ರ 3 Bible Online

2 ಪೇತ್ರ 3 - Kodava bible

2 ಪೇತ್ರ 3

¹ಪ್ರೀತಿರ ಜನಳೇ, ನಾನ್ ನಿಂಗಕ್ ಇಕ್ಕ ಒಳ್‍ದ್‍ವದ್ ದಂಡನೆ ಕಾಗದ. ನಾನ್ ಒಳ್‍ದ್‍ನ ಈ ದಂಡ್ ಕಾಗದ‍ತ್‍ಲು, ನಿಂಗಡ ಮನಸ್ಸ್‌ರ ಞಾಪಕತ್‍ನ ಎಪ್ಪ್‌ಚಿಡ್‌ವಕ್ ಪಿಂಞ ಚೆನ್ನ ವಿಷಯತ್‍ನ ಗೇನ ಮಾಡ್‍ಚಿಡ್‌ವಕ್ ನಾನ್ ಪೇಚಾಡಿಯಂಡುಂಡ್.

²ಪೂರ್ವ ಕಾಲತ್‍ಲ್ ಪವಿತ್ರ ಪ್ರವಾದಿಯಂಗಡ ಮೂಲಕ ಎಣ್ಣ್‌ನ ತಕ್ಕ್‌ನ ಪಿಂಞ ರಕ್ಷಕನಾಯಿತುಳ್ಳ, ಒಡೆಯಂಡ ಅಪೊಸ್ತಲಂಗಳಾಯಿತುಳ್ಳ ನಂಗಡ ಮೂಲಕ ನಿಂಗಕ್ ಕ್‍ಟ್ಟ್‌ನ ಆಜ್ಞೆನ ಗೇನಮಾಡಂಡೂಂದ್ ನಾಕ್ ನೇರಾಯಿತು ಆಸೆ.

³ನಿಂಗಕ್ ಗೊತ್ತಾಂಡೂಂದ್ ಉಳ್ಳ ಆದ್ಯ ವಿಷಯ ಎಂತ ಎಣ್ಣ್‌ಚೇಂಗಿ: ಕಡೆ ಕಾಲತ್‍ಲ್ ಏಜುವಯಿಂಗ ಬಂದಿತ್ ಏಜಿತ್, ಅಯಿಂಗಡ ಇಚ್ಛೆಲ್ ನಡ್‍ಪ.

⁴ಒಡೆಯ ಪುನಃ ಬಪ್ಪಾಂದ್ ಎಣ್ಣಿಯಂಡುಳ್ಳ ವಾಗ್ದಾನ ಎಲ್ಲಿ? ನಂಗಡ ಅಜ್ಜಂಗ ಚತ್ತ್ ಪೋಚಿ, ಎಲ್ಲಾ ಸೃಷ್ಟಿ ಆನ ಕಾಲತ್ಂಜ ಅನ್ನನೆ ಉಂಡ್‍ೕಂದ್ ಎಣ್ಣುವ.

⁵ಆಚೇಂಗಿ, ಪಂಡ್ ಕಾಲತ್‍ಲ್ ದೇವ ಅಂವೊಂಡ ತಕ್ಕ್‌ರ ಮೂಲಕ ಬಾನತ್‍ನ ಮಾಡ್‍ಚೀಂದ್ ಪಿಂಞ ನೀರಿಂಜ ಈ ಬೂಮಿನ ಕೊಂಡ್ ಬಾತ್‍ೕಂದ್, ನೀರ್‌ಂಜಲೇ ಅದ್‍ನ ಬೋರೆ ಮಾಡ್‍ಚೀಂದ್ ಅಯಿಂಗ ಮರ್ಂದ್ ಪೋಚಿ.

⁶ಪಿಂಞ ಜಲಪ್ರಳಯ ಬಂದಿತ್ ಅಕ್ಕತ್‍ರ ಲೋಕತ್‍ನ ಪಾಳ್ ಮಾಡ್‍ಚೀಂದ್ ಅಯಿಂಗಕ್ ಗೊತ್ತ್ಂಜತೇಂಗಿಯು ಬೋಂಡೂಂದೇ ಮರ್ಂದ್ ಪೋಯಿರ್‌ತ್.

⁷ಇಕ್ಕ ಉಳ್ಳ ಬಾನವು, ಬೂಮಿಯು, ಆ ತಕ್ಕ್‌ರಗುಂಡ್, ತಿತ್ತ್‌ಕಾಯಿತ್ ಬೆಚ್ಚಿತುಂಡ್, ದೇವಡ ಮೇಲೆ ಬಕ್ತಿ ಇಲ್ಲತಯಿಂಗಕ್ ನ್ಯಾಯತೀರ್ಪ್ ಕ್‍ಟ್ಟಿತ್ ನಾಶ ಆಪಕತ್ತನೆ ಬದ್ರವಾಯಿತ್ ಅದ್‍ನ ಕಾಪಾಡಿಯಂಡುಂಡ್.

⁸ಆಚೇಂಗಿ ನಾಡ ಪ್ರೀತಿರ ಜನಳೇ, ಒಡೆಯಂಗ್ ಒರ್ ದಿವಸ ಆಯಿರ ಕಾಲತ್‍ರನೆಕೆಯು, ಆಯಿರ ಕಾಲ ಒರ್ ದಿವಸತ್‍ರನೆಕೆಯು ಉಂಡ್‍ೕಂದ್ ಉಳ್ಳ ವಿಷಯತ್‍ನ ನಿಂಗ ಮರ್ಂದ್ ಪೋಪಕ್ಕಾಗ.

⁹ಚೆನ್ನ ಜನ ಎಣ್ಣ್‌ವನೆಕೆ, ಒಡೆಯ ತಾಂಡ ವಾಗ್ದಾನತ್‍ನ ನೆರೆವೇರಿಚಿಡುವ ವಿಷಯತ್‍ಲ್ ತಡೆ ಮಾಡಿಯಂಡಿಲ್ಲೆ. ಒಬ್ಬ ಸಹ ನಾಶ ಆಕತೆ ಎಲ್ಲಾರು ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ಬರಂಡೂಂದ್ ಕುಶಿಪಟ್ಟಿತ್ ನಿಂಗಳ ಗೇನಮಾಡಿಯಂಡೇ, ದುಂಬ ತಾಳ್ಮೇಳ್ ಉಳ್ಳಂವೊನಾಯಿತುಂಡ್.

¹⁰ಒಡೆಯಂಡ ದಿವಸ ಒರ್ ಕಳ್ಳ ಬಪ್ಪನೆಕೆ ಬಪ್ಪ; ಬಲ್ಯ ಸದ್ದ್ ಕ್‍ೕಪ, ಅಕ್ಕ, ಪಂಚಬೂತಂಗ ಎಲ್ಲಾ ತಿತ್ತ್‌ರಗುಂಡ್ ಕತ್ತಿ ಪೋಪ, ಬಾನ ಕಾಂಗತೆ ಆಯಿಪೋಪ, ಬೂಮಿಯು ಅದ್‍ಲ್ ಉಳ್ಳ ಎಲ್ಲವೂ ಇಲ್ಲತ ಆಯಿಪೋಪ.

¹¹ಎಲ್ಲಾ ಇನ್ನನೆ ನಾಶ ಆಯಿ ಪೋಪಗುಂಡ್, ನಿಂಗ ಎನ್ನನೆ ಉಳ್ಳಯಿಂಗಳಾಯಿತ್ ಇಕ್ಕಂಡು? ನಿಂಗ ಪವಿತ್ರವಾಯಿತ್, ಬಕ್ತಿ ಉಳ್ಳಯಿಂಗಳಾಯಿತ್ ಬದ್‍ಕಂಡು.

¹²ಅನ್ನನೆ ನಿಂಗ ಬದ್‍ಕಿಯಂಡ್, ಅಂವೊಂಗಾಯಿತ್ ಎಲ್ಲಾನ ಮಾಡಿಯಂಡ್ ಪಾರಕಾತಂಡ್ ಇರಿ. ಅಕ್ಕ, ದೇವಡ ದಿವಸ ಬೆರಿಯ ಬಂದ್‍ರ್‍ವ; ಆ ದಿವಸತ್‍ಲ್ ಬಾನ ತಿತ್ತ್‌ಲ್ ಬೆಂಜಿತ್ ಪೋಪ ಅದ್ಂಡ ಉರಿಲ್ ಪಂಚಬೂತಂಗ ಎಲ್ಲಾ ಉರುಗಿ ಪೋಪ.

¹³ಅಂವೊಂಡ ವಾಗ್ದಾನತ್‍ರನೆಕೆ, ನೀತಿ ವಾಸ ಮಾಡಿಯಂಡುಳ್ಳ ಪುದಿಯ ಬಾನ ಪಿಂಞ ಪುದಿಯ ಬೂಮಿ ಬಪ್ಪಾಂದ್ ನಂಗ ಪಾರಕಾತಂಡ್ ಉಂಡ್.

¹⁴ಆನಗುಂಡ್ ನಾಡ ಪ್ರೀತಿರ ಜನಳೇ, ಇನ್ನತದೆಲ್ಲ ಬಪ್ಪಾಂದ್ ಪಾರಕಾತಂಡ್ ಉಳ್ಳಾಂಗ್, ನಿಂಗ ಏದ್ ತಪ್ಪಿಲ್ಲತಯಿಂಗಳಾಯಿತು, ಕುತ್ತ ಇಲ್ಲತಯಿಂಗಳಾಯಿತು, ಅಂವೊಂಡ ಕೂಡೆ ಸಮಾದಾನತ್‍ಲ್ ಇಪ್ಪಯಿಂಗಳಾಯಿತ್ ಎಚ್ಚರತ್‍ಲ್ ಇರಂಡು.

¹⁵ನಂಗಡ ಒಡೆಯಂಡ ಬಲ್ಯ ತಾಳ್ಮೆನ, ಜನ ರಕ್ಷಣೆ ಆಪಕಾಯಿತ್‍ೕಂದ್ ಗೇನ ಮಾಡಂಡು; ನಂಗಡ ಪ್ರೀತಿರ ಅಣ್ಣ ಪೌಲನು, ದೇವ ಅಂವೊಂಗ್ ಕೊಡ್‍ತ ಜ್ಞಾನತ್‍ರನೆಕೆ, ಇನ್ನನೆ ನಿಂಗಕ್ ಒಳ್‍ದಿತುಂಡ್.

¹⁶ಅಂವೊ ತಾಂಡ ಎಲ್ಲಾ ಕಾಗದ‍ತ್‍ಲು ಈ ವಿಷಯತ್‍ನ ಒಳ್‍ದಿತುಂಡ್; ಅಂವೊ ಎಣ್ಣ್‌ನ ಚೆನ್ನ ವಿಷಯತ್‍ನ ಅರ್ಥ ಮಾಡ್‌ವಕ್ ಕಯಿಂಜಂಡಿಲ್ಲೆ. ಗೊತ್ತಿಲ್ಲತಯಿಂಗಳು, ಸ್ತಿರ ಇಲ್ಲತಯಿಂಗಳು ಅಯಿಂಗಕ್ ನಾಶ ಬಪ್ಪನೆಕೆ, ಬೋರೆ ವಾಕ್ಯತ್‍ನ ಮಾಡ್‌ವನೆಕೆ ಇದ್‍ನ ಸಹ ತಿರಿಕಿಯಂಡುಂಡ್.

¹⁷ಆನಗುಂಡ್, ನಾಡ ಪ್ರೀತಿರ ಜನಳೇ, ಇನ್ನತಾನದೆಲ್ಲ, ನಿಂಗಕ್ ಮಿಂಞಲೇ ಗೊತ್ತಾನಗುಂಡ್, ದುಷ್ಟಂಗಡ ವಂಚನೆಲ್ ನಿಂಗ ಜಾರಿತ್, ನಿಂಗಡ ಸ್ತಿರವಾನ ಸ್ತಾನತ್ಂಜ ಬುದ್ದಿತ್ ಪೋಕತನೆಕೆ ಎಚ್ಚರತ್‍ಲ್ ಇರಿ.

¹⁸ನಂಗಡ ರಕ್ಷಕನು, ಒಡೆಯನು ಆನ ಯೇಸು ಕ್ರಿಸ್ತಂಡ ಕೃಪೇಲ್, ಅಂವೊನ ಗೊತ್ತ್ ಮಾಡ್‌ವ ವಿಷಯತ್‍ಲ್ ಬೊಳಿವಿರ. ಅಂವೊಂಗ್ ಇಕ್ಕಲು ಎಕ್ಕಲು ಮಹಿಮೆ ಬರಡ್. ಆಮೆನ್.